’Ua arata’i te hō’ē ’ōrama iā’u i te parau mau
’Ua feruri noa ānei au i te ti’i ?
Tau matahiti i ma’iri a’e nei, tē fārerei ra vau i te mau misiōnare, ’e e fifi tō’u i te pae o te ea. E ’oto rahi tō’u, ’e te mea tā’u i hina’aro roa ’o te fāri’ira’a ïa i te hō’ē arata’ira’a nō tō’u orara’a.
’Aita vau i ’ite i te ti’aturira’a ’e te ’oa’oa nō te mau mea ato’a, nō teie iho ā ra ’Ēkālesia ’o tā te mau misiōnare e parau tāmau nei. Noa atu te reira, ’ua fa’aoti au ma te ’ana’anatae ’ore e haere i te purera’a ’ōro’a nō te taime mātāmua.
’Ua haere mai tō’u metua vahine nā muri iā’u, ’e i te taime ’a tae ai mātou i te fare purera’a, ’ua tūpa’i tō’u māfatu i te hō’ē tūpa’ira’a i te taime ’a ’ite ai au i te hō’ē ti’i ’ana’ana e purapura ra i ni’a i te tāpo’i fare. ’O te hi’ora’a nehenehe roa te reira ’o tā’u i ’ore nā i hi’o ! E hi’ora’a nō te hau tō teie fare ’e te fāri’i maita’i tei taui roa tō’u huru, ’e ’ua tomo atu vau ma te ana’anatae.
I te taime o te ’ōro’a mo’a, ’ua tāpiri au i tō’u nā mata ’e ’ua fā mai te hō’ē hōho’a o Iesu i roto i tō’u ferurira’a. I te pa’arira’a, ’ua ’ite na vau nō ni’a ia Iesu, terā rā, ’ua ’ana’anatae noa vau nō ni’a iāna ’aita i maoro a’enei. ’Aita vau i tai’o na i te Bibilia. E parau mau teie, ’aita roa vau i ’ite i te tumu Iesu Mesia i pohe ai i ni’a i te sātauro ’aore rā nō te aha e ’ahuru mā piti ’āpōsetoro tāna, ’aore rā nō te aha e rave rahi mau peropheta tei ha’api’i nō ni’a iāna.
I te reira rā taime, e au ra ’ua tū’atihia vau iāna. Mai te huru ra iā’u ’ei mea mau ’oia. ’Ua fāri’i au i te hō’ē mana’o nō te here pāto’i ’ore ’e te hia’ai e ha’api’i rahi mai ā. ’Ua ti’aturi au ē, ’o ’oia te puna nō te parau mau ’e te here ’o tā’u e ’imi ra.
Tau mahana i muri mai, ’ua ani au i tō’u metua vahine nō ni’a i te ti’i ’o tā’u i ’ite. E au ra ’ua hepohepo ri’i ’oia ’e ’ua parau mai ē ’aita ’oia i ’ite a’e i te hō’ē ti’i, ’ua hina’aro rā ’oia e ho’i fa’ahou nā pīha’i iho i te fare nō te hi’o i te reira, i muri a’e i tō’u fa’ata’ara’a iāna i te nehenehe o te reira.
I tō māua taera’a atu i te fare purera’a, te ti’i ’o tā’u i ’ite i te tahi tau mahana nā mua atu ’ua mo’e te reita. ’Ua maere roa vau ! ’Ua tātara te hō’ē ta’ata i te reira ?
I te hepetoma i muri iho i te fare purera’a, ’ua ani atu vau i te hō’ē ta’ata nō ni’a i te ti’i. ’Ua hepohepo ri’i ’oia ’e ’ua parau mai ’oia iā’u ē, ’aita roa te hō’ē ti’i i vai na i ni’a i te fare purera’a. I tō’u fa’ata’ara’a iāna mai te hea te huru o te ti’i, ’ua parau mai ’oia, « ’A ’ē ! Tē parau nei ’oe nō te ti’ī o Moroni ? ’Aita te reira e vai nei i ni’a i te mau fare purera’a, tei ni’a rā te ti’i i te rahira’a o te mau hiero » ’Ua parau mai ’oia iā’u ē, ’ua riro na Moroni ’ei peropheta i roto i te Buka a Moromona ’e ’ua riro ato’a ’oia ’ei hō’ē tuha’a i roto i te fa’aho’i-fa’ahou-ra’a mai.
’Ua fa’aoti a’era vau ē, e ferurira’a noa te reira i te ti’i. ’Ua ’imi rā vau i roto i te Buka a Moromona i te mau fa’ahitira’a o Moroni. ’Ua ha’api’i mai au ē, ’ua ’ere ’oia i tōna ’utuāfare ’e tōna mau hoa, ’ua ha’amāuiuihia ’oia e te mau hara a tō te ao nei, e noa atu rā te reira, ’ua pe’e tāmau noa ’oia i te fa’auera’a a te Atua nō te pāruru i te parau mau. ’Ua ha’api’i ato’a mai au ē, ’ua fā mai ’oia ia Iosepha Semita e rave rahi taime nō te hōro’a iāna i te mau poro’i nō ’ō mai i te Metua i te ao ra. Tē ha’api’ira’a mai nō ni’a ia Moroni ’e tāna mau ha’api’ira’a ’e e mea nāhea ’oia i te tītau-rahi-ra’a i te pe’e i te Mesia ’e i te pārurura’a i te parau mau, ’ua tauturu mau ïa iā’u ’ia fa’afāriu i tō’u ’ā’au ato’a i te ’evanelia.
I te taime ’a fāri’i ai au i te rāve’a nō te haere e māta’ita’i i te hiero nō Sapporo i Tāpōnē, ’ua ’ite au i te ti’i mau o Moroni nō te taime mātāmua roa. ’O te hō’ē ā ti’i ’o tā’u i ’ite i ni’a i tā’u fare purera’a. Te ti’i rā tā’u i ’ite i te reira mahana, ’ua ’ana’ana ïa i te ’ānapanapa i ni’a a’e i teie nei ao. Tē ti’aturi nei au ē, teie « ti’i ’ānapanapa », ’o te hō’ē ïa ’ōrama nō ’ō mai i te Metua i te ao ra, i te ani-manihini-ra’a iā’u ’ia ’ite mai i tōna here ’e te parau mau o te ’evanelia a Iesu Mesia tei fa’aho’i-fa’ahou-hia mai. Nō te ha’api’i mai nō ni’a i te mau peropheta tahito mai ia Moroni tei fa’a’ite pāpū nō te Mesia ’e te mau peropheta ora e nā reira ato’a nei. Nō te ’ite mai i te arata’ira’a ’o tā’u i ’imi ma te hina’aro mau.
’Ua ’ite au ē, ’ua fa’aho’i fa’ahou mai te Fatu i te ’evanelia a Iesu Mesia nā roto mai i te peropheta Iosepha Semita ’e e mau peropheta ora tā tātou i teie mahana ’o tē arata’ihia nei e āna nō te hōpoi mai i te parau mau ia tātou ’e nō te tauturu ia tātou ’ia ho’i fa’ahou i te Metua i te ao ra. ’Ua ’ite au ē, ’o Iesu Mesia te puna o te hau ’e te ’oa’oa i roto i teie orara’a mai tō a muri mai.
Te māramarama o tāna ’evanelia tei fa’aho’i-fa’ahou-hia mai ’e te mau ha’amaita’ira’a ato’a tāna i hōro’a mai, ’ua fa’ataui roa te reira i tō’u orara’a, ’e mai te mahana mātāmua i te fare purera’a, ’ua ’ite au e arata’i te Metua i te ao ra i tō’u orara’a ’a tāmau noa ai au i te pe’e iāna ’e i tāna mau ve’a.