Te vai-hau-ra’a ’ei misiōnare i te taime o te COVID-19
E fa’atupu tā ’outou fa’atumura’a i te ta’a-’ē-ra’a tā’āto’a.
’Ahani ’ua ui mai te hō’ē ta’ata iā’u e tau ’āva’e i teienei e nāhea vau i te feruri i tā’u misiōni, e’ita roa vau e fa’ata’a atu i te tere ’o tē tīa’i mai ra iā’u. Hō’ē noa iho rā mea : E misiōnare au nā Te ’Ēkālesia a Iesu Mesia i te Feiā Mo‘a i te mau Mahana Hope’a Nei—i teienei rā, e misiōnare ato’a vau i roto i te taime o te hō’ē ma’i pe’e.
E aha te aura’a o te reira ?
Te aura’a ’o te ravera’a ïa i te hina’aro o te Fatu ma te hō’ē rāve’a hōhonu roa a’e. Te aura’a ’o te tāmatara’a ïa e tāvini i te Fatu ’e tāna mau tamari’i ma te fa’aruru i te tauira’a tāmau. Te aura’a ’o te ha’api’ira’a mai ïa i te ha’amātau ’oi’oi i te mau huru tupura’a ’āpī. Te aura’a ’o te ha’api’ira’a mai ïa ’ia riro ’ei ta’ata marū a’e, te maita’i, te fa’a’oroma’i ’e te here i te mau mahana ato’a.
Te aura’a ato’a ’o te fa’arurura’a ïa e rave rahi mau pāpū-’ore-ra’a ’e te uira’a e rave rahi mau uira’a mai te :
« E fa’aho’ihia ānei tō’u hoa i te fare ananahi ? »
« E fa’anu’uhia ānei mātou i te hō’ē vāhi ta’a ’ē nō te tirotiro ? »
« E aha tē tupu i te mau ta’ata tā mātou e ha’api’i nei mai te mea e ti’a iā’u ’ia reva ? »
’Ua tāmau noa mātou i tā mātou mau ha’api’ira’a ’evanelia i ni’a i te mau rāve’a tōtiare, e ’ere rā i te mea ’ōhie noa—’e e ’ere mau i te ’itera’a misiōnare ’o tā te hō’ē o mātou i mana’o na. ’Āre’a rā, tei ’ō nei mātou, ma te pāpū i roto i tā mātou fa’aotira’a e tāvini nā te mau vāhi ato’a, e tāvini i te Fatu noa atu te huru tupura’a ’aore rā te huru ravera’a o te reira, nō te tae’a atu i te ’ā’au o tāna mau tamari’i.
Nō te aha vau i mā’iti noa ai e tāvini ?
’Oia mau, te mau fifi o te orara’a misiōnare tei te pae tino, te pae ferurira’a ’e te pae vārua ïa—’ua fa’aruru tātou pā’āto’a hō’ē a’e o te reira. ’Oia mau, ’ua fa’aruru tātou i te ’arora’a e rave rahi ’e e tāmau ā tātou i te fa’aruru i te mau tāmatara’a hau atu, nā roto rā i te aroha o Iesu Mesia, tei hōro’a i tōna ora nō tātou, ’ua ’ite tātou ē e ’ohipa maita’i te reira.
’Ua ’ite au ē tē ’ite maita’i mai ra te Metua i te ao ra ia tātou pā’āto’a. ’Ua ’ite ’oia, tē vai ra te mau misiōnare e ’ore e nehenehe e haere nā roto i te hiero ’aore rā, e tu’u i te ’āvae i roto i te hō’ē pū ha’api’ipi’ira’a misiōnare hou e haere atu ai i te misiōni. ’Ua ’ite ’oia, tē vai ra te feiā ’āpī e ’ore roa e fāna’o e tāvini i roto i te mau fenua i reira rātou e pi’ihia ai. ’E teienei rā, ’ua ’ite teie mau misiōnare ē, ’ua here te Fatu ia tātou ’e tē pāruru nei ia tātou mai tāna i nā reira noa na. ’E ’ua nava’i tā tātou mau tauto’ora’a i tōna hi’ora’a mai. ’Ua ha’api’i maita’i mai tātou pā’āto’a ē, e nehenehe tātou e tāvini i te Fatu ’e e fa’a’ite i tāna ’evanelia nā te mau vāhi ato’a ’e i roto i te huru orara’a ato’a. ’E e ho’ona te reira.
E aha te mea e fa’ahaere nei iā’u i mua ?
I te mau mahana fifi, ’ua ’ite mai au ē e piti rāve’a nō te hi’o i te reira taime :
-
Ma te hō’ē huru hi’ora’a faufa’a ’ore, te tīa’ira’a ma te fa’a’oroma’i ’ore i te mau mea ’ia ho’i mai i tōna huru mau.
-
’Aore rā ma te hō’ē hi’ora’a ātea ’āpī, te ha’amaura’a i te mau fā, te fa’anahora’a ma te mana’o pāpū mau ’e nō te ta’ata iho, te fa’a’ohipara’a i teie huru tupura’a mai te hō’ē rāve’a nō te rave i te mau tauira’a ’o tā tātou i hina’aro noa nā, ’ua fa’ataimehia rā.
Tē tāmata nei au i te mā’iti i te piti o te rāve’a. ’A feruri ai au i te mau orara’a i teienei o te ao nei, tē uiui nei au ē e hō’ē ānei rāve’a te COVID-19 nō te tauturu ia tātou ’ia fa’ahiahia hau atu i tō tātou mau aura’a ’aore rā nō te fa’aitoito ia tātou ’ia ha’amahora atu ā i tō tātou ’ā’au i tō tātou Hāmani Maita’i ’e ’ia ineine nō te fa’aro’ora’a iāna. ’E ’ia riro te ’evanelia ’ei ’ohipa mātāmua roa a’e.
E ’ere noa te reira ’ei hō’ē taime fifi nō te mau misiōnare—e mea fifi nō te mau ta’ata ato’a. Tera rā, mai tā te tāpena Moroni i pi’i ia vetahi ’ē ’ia ’āmui mai nō te tumu o te ti’amāra’a (hi’o Alama 46), ’ua pi’i-ato’a-hia tātou ’ia ti’a i ni’a ’e ’eiaha e mata’u. ’E ’ia ’ite ē, tei ia tātou mau ra tō tātou Metua i te ao ra, ’o te fa’ati’a ia tātou ’ia tāvini ma tō tātou ’ā’au ato’a, tō tātou pūai ato’a, tō tātou vārua ’e te itoito noa atu te ’ohipa e tupu mai (hi’o Te Parau Ha’api’ira’a ’e te mau Parau Fafau 4:2).
’Ei mau misiōnare nā te Fatu, e ti’a ia tātou ’ia tūtonu tāmau noa i tō tātou mata i ni’a i tō tātou Fa’aora ’e tā tātou fā mure ’ore. ’Ia ha’amana’o tātou ē, ’ua here te Metua i te ao ra i tāna mau tamari’i ato’a ’e ’ua hina’aro ’ia ho’i pau roa tātou iāna ra.
E parau mau, noa atu e mea fifi i te riro ’ei misiōnare i roto i te taime o te COVID-19, e nehenehe tātou e fa’ariro i teie taime ’ei hō’ē o te mea maita’i a’e i roto i tō tātou orara’a. Ma te parauti’a mau, ’ua riro te reira nō’u ! ’E te reira tā’āto’a nō tō’u fa’atumura’a, nō te mea ’ua tāmata noa vau i te ha’amana’o i tō’u here nō te Metua i te ao ra ’e tō’u hina’aro i te tauturu iāna ’ia ha’aputuputu mai ia ’Īsera’ela tei ha’apurarahia. ’E ’ua ’ite au ē, e hōro’a mai ’oia i te aroha rahi i tāna mau misiōnare ’a rave ai tātou mā tō tātou maita’i a’e nō te fa’aoti i teie pi’ira’a ’o tāna i hōro’a ia tātou.