COVID-19 : E rāve’a nō te tūtonu i ni’a i te ’ā’au o te ’evanelia
I roto i te roara’a o te ’ā’amu, tē vai ra iho ā te tau fifi. I teie mahana, tē fa’aruru ’āmui nei tātou i te mau ’ati rahi e fa’atupuhia nei e te COVID-19. ’Ua fa’aro’o tātou i te reira fa’ahou ’e fa’ahou ā : i te mau taime ’aita i ’iteahia a’enei E rave rahi o tātou ’o tē ha’ape’ape’a nei nō tō tātou ea ’e nō te maita’i o te mau ta’ata tei herehia e tātou. ’Ua ’ite tātou pā’āto’a i te mau tupura’a i te pae o te ’imira’a faufa’a ’e i te pae ’āehuehu tei ravehia e teie tirotiro. Mai te huru ra ē, ’aita te mau mea e tupu maita’i ra. ’Ua fa’ataimehia te tāvinira’a misiōnare ’e te ’ohipa hiero. E rave rahi mau ta’ata tei fāri’i i te teimaha nō te tauira’a i te terera’a ’ohipa i te fare.
Tē fa’arurura’a i te hō’ē ananahi pāpū ’ore e nehenehe e fa’atupu mai i te mana’o hepohepo ’aore rā te ri’ari’a—’ua fāri’i pāpū mau ’outou i te reira. I roto rā i te reira mau hepohepora’a, tē vai ra te ti’aturira’a ! Noa atu rā te pāpū-’ore-ra’a ’e te tauira’a, ’aita roa te mau mea faufa’a ’e te niu o te ’evanelia i taui :
-
’Ua fa’ataimehia paha ’aore rā ’ua tā’ōti’ahia te mau purera’a ’e te mau putuputura’a a te ’Ēkālesia, ’aita rā te orara’a i te ’evanelia ! E nehenehe tātou e tāmau noa i te ha’amori, i te aupuru, i te fa’a’ohipa i te ’evanelia i roto i tō tātou fare.
-
Tei roto noa te Atua i tōna mau ra’i.
-
Tāna tamaiti, ’o Iesu Mesia, tē ti’a noa nei ’oia ’ei upo’o nō teie ’ohipa. ’Ua māramarama ’oia i te mau ’arora’a a tō te ao nei ’e tā tātou iho mau ’arora’a. ’Ua fafau mai ’oia ē, « e’ita vau e vaiiho ia ’oe ’ia ’ōtare noa » (Ioane 14:18). E tono mai ’oia i te Vārua Mo’a ’ia pārahi mai i piha’i iho ia tātou.1
-
’Ua pi’i te Atua i te mau peropheta, te mau hi’o ’e te mau heheu parau. ’E nā roto ia rātou, ’ua fa’anaho maita’i ’oia i te mea tā tātou e hina’aro nō te fa’aruru i teie vero.2 ’A feruri na i te fa’anahora’a ha’api’ira’a ’āpī tei fa’atumuhia i ni’a i te ’utuāfare, ’oia ato’a i te tahi mau fa’atanora’a, ’o tei tauturu ia tātou ’ia fa’aineine nō teie tau ’e ’ia ora ’e ’ia aupuru ma te rāve’a teitei a’e ’e te mo’a a’e.3 E ’ere teie mau tauira’a ’āpī i te ’ohipa mahoi (coïncidence)—’ua fa’anahohia rā te reira e te hō’ē Atua tei ’ite i te mau mea ato’a ’e te here.
Noa atu te hepohepora’a, ’e ma teie mau ’ohipa i roto i te ferurira’a, e nehenehe tātou e fa’atūtonu i ni’a i te ’ā’au o te ’evanelia, tei roto ho’i te fa’aro’o i te Fatu ra ia Iesu Mesia.
E nāhea rā tātou e nehenehe ai e fa’a’ohipa i taua fa’aro’o ra ? Mai te ha’amatara’a mai ā, ’ua fa’ati’a te Fatu i tāna mau pipi ’ia fa’a’oroma’i i te mau tāmatara’a ma te ’ore e fāri’i i te mau pāhonora’a ato’a. E hōhonu a’e tō tātou mau a’a o te fa’aro’o, mai te mea e fa’a’ohipa tātou i te ti’amāra’a ’e ’ia haere i mua i roto i te pāpū-’ore-ra’a. ’Ua tāpiti ’o Elder Neil L. Andersen nō te pupu nō te Tino ’Ahuru ma Piti ’āposeōolo i te reira ma te parau ē « ’aita ’oe i ’ite i te mau mea ato’a, ’ua nava’i rā tā ’oe i ’ite ! » 4
Tē tāmata nei te ’ā’amu o Nephi ’e tōna mau taea’e nō te roa’a mai i te mau ’api veo ’ei hi’ora’a rahi nō te reira. ’Ua ’ite rātou e aha te ti’a ia rātou ’ia rave : ’ia roa’a mai i te mau ’api ! ’Ua fāri’i rātou i te hō’ē mana’o maita’i e nō te aha. Aita rā rātou i ’ite nāhea i te rave i te reira. I muri a’e e piti manuia-’ore-ra’a (hi’o 1 Nephi 3:10–27), ’aita ’o Nephi e nehenehe fa’ahou e tūru’i i ni’a i tōna iho mau ’aravihi. Maoti ra i te fa’aru’era’a, ’ua tāmata ’oia i te hō’ē fa’ahou ā taime. ’A hi’o na i te fa’a’ohipara’a ti’a o te mau parau a Nephi i tō tātou nei huru tupura’a i teie mahana :
« ’Ua arata‘ihia vau e te Vārua, ’e ’aore au i ’ite na i te mau mea tā‘u e rave ra.
« Haere atu ra rā vau » (1 Nephi 4:6–7).
Noa atu te mau uira’a e rave rahi i roto i tō tātou orara’a, mai te mea e, « e haere tātou » mai ia Nephi, i te ti’aturira’a i te Atua ’e te pe’era’a i tāna mau peropheta ’e te tūtonura’a i ni’a i te fa’aro’o, e arata’i ’e e hāmani maita’i ’oia ia tātou. I te tahi taime i roto i teie fa’anahora’a, e riro mai tā tātou mau uira’a fifi ’ei mau tumu maere niuhia.
E ha’amara’a ana’e i tō tātou fa’aro’o ia Iesu Mesia, tō tātou ti’aturi i tāna mau tāvini ’e tō tātou here nō te tahi ’e te tahi ’a fa’aruru ai tātou i te ananahi. E nehenehe teie tau nō te hepohepo ’e te fifi nā te ao nei e riro ’ei vāhi mo’a nō tātou nō te ha’afātata atu iāna. ’A nā reira ai tātou, e fa’a’ī tōna hau marū i tō tātou vārua, tae noa atu i ropū i te ’ārepurepura’a ’e e ’ite mai tātou i te pūai ’e te pāhonora’a ’o tā tātou e hina’aro.