Lesona e 3 o le Olaga mai ia Moronae
Mai le amataga i le faaiuga, o le Tusi a Mamona o se malaga le malōlō o upumoni mamana e faavavau, folafolaga maoae ma lesona, ma faataitaiga musuia o le faatuatua ia Iesu Keriso. Ae o le vaega e sili ona lelei ai, e moni uma lava!
Ae a tatou latalata atu i le faaiuga ma taunuu atu i mataupu a Moronae, e mautinoa lava le i ai o nisi o upumoni e sili ona mamana ma lesona sui olaga mo i tatou! Sa faamaeaina e Moronae le Tusi a Mamona i lana molimau ofoofogia ma lana valaaulia patino ia o mai ia Keriso ma saili ia iloa le moni mo i tatou lava. Ae i totonu o na faamatalaga mamana, o ni lesona faaopoopo nei e tolu e suia ai olaga e mafai ona tatou aoao ai mai i ana mataupu faaiu i lenei tusi matagofie.
1. Vaai i Tua Atu o le Laina Tini
E i ai se lagona faamalieina lea e oo mai i le faaiuga o se galuega faatino faigata ae tauia: o le faamauina o le vaega mulimuli o se paso i lona tulaga po o le auina atu i totonu o se poloketi sili ona lelei i le aoga.
Na manatu Moronae ua mae’a lona sao i le Tusi a Mamona ina ua uma ona ia tusia le toilalo o le malo o sa Iareto e pei ona maua i le tusi a Eteru. Na ia amata i le: “O lenei o au o Moronae, ina ua uma ona ou faia o le faaiuga o le otootoga o le tala o le nuu o Iareto, sa ou manatu o le a ou le toe tusia ni isi mea faaopoopo, peitai ou te lei oti lava” (Moronae 1:1).
O le mea moni e faapea na ola lava o ia, atonu na sili ona oo mai o se mea e faʻateʻia ai nai lo le mea atonu na e masalosalo i ai. Ae maise lava, sa ia feosofai solo toatasi, ma fili na fetaomi mai i itu uma.
Sa i ai ni ona taimi faaopoopo. Ma i le na o le 10 mataupu, sa faaaogaina ai e Moronae ma le tatau. O ni nai upumoni sa ia faaaofiaina ai o le auala lea e faauuina ai aoao ma ositaulaga; faatonuga mo le faamanatuga (e aofia ai tatalo); aoaoga i le auala e faatautaia ai sauniga a le Ekalesia; o se lauga mamana a lona tama i le faatuatua, faamoemoe, ma le alofa mama; ma le folafolaga paia o loo maua i le Moronae 10:3–5 lea o loo aoao mai ai ia i tatou taitoatasi le auala e maua ai faaaliga patino e uiga i le moni o le Tusi a Mamona. Oka!
I na mataupu e 10 na te lei fuafuaina e tusia, na faaopoopo ai e Moronae upumoni taua mo le aufaitau i le lumanai o le Tusi a Mamona.
E mafai ona tatou aoao uma mai i lana faataitaiga. O le isi taimi e te mauaina ai se taimi faaopoopo itiiti i ou lima nai lo le taimi na fuafuaina, po o le, a e lagona e pei sa e galue malosi ma mautinoa lava ua tatau ona uma, pe taua ea le tatalo ma le mafaufau loloto ia iloa pe i ai se isi mea teisi e mafai ona e saofaga ai pea?
Ae maise lava, na faamanuiaina le lalolagi atoa ona sa faia e Moronae.
2. Manatua le Pusa Maa
Afai na e filifili e totō lau laau taumafa mata e sili ona e fiafia i ai i tuafale, o le a tatau ona e faaaogaina se onosai faateleina nai lo o le [onosai] itiiti. E tusa lava pe o le taimi sao o le tausaga ma na i ai ni tulaga lelei e ola ai, masalo o le a tele lava ni nai tausaga ona faatoa oo lea i le taimi e tauina ai le fua muamua mai au taumafaiga.
Ae o lena mea e iu lava ina mafai ona fai, a ea? Ae maise lava, e oo mai mea lelei ia i latou o e faatalitali. Ma e tusa lava pe e te totoina se isi ituaiga laau lea o le a le oo i lona matua atoatoa mo le tele o tausaga (e pei o se laau olive), e mafai lava ona e maua le faamalieina i le iloa ai o le a manuia ai lau fanau ma a latou fanau.
Peitai, e le mafaatusalia a tatou taumafaiga i mea na faia e Moronae. O galuega i le olaga o lona tamā, lea na avea ma galuega a Moronae ina ua maliu lona tamā, o le a le fua mai i se taimi lata mai. E le fua mai i le 10 tausaga. E le i se afe tausaga foi. Na tusia e Mamona, “Ua tusia nei mea i le toe vaega o le aiga o Iakopo … ae ia natia mau i latou mo le Alii ina ia oo mai i latou i lana lava taimi e tatau ai” (Mamona 5:12; ua faaopoopo le faamamafa).
Sa lei iloa tonu e Moronae le taimi o le a oo mai ai lenei galuega, ae atonu na ia iloa lelei o le a umi lava. Sa ia vaai i se faaaliga vaaia o o tatou aso ma vavalo e uiga i ni tulaga faapitoa o le a i ai (tagai Mamona 8:35).
O le tele lenei ua tatou mautinoaina lelei: Sa le i faia e Moronae lenei mea mo le lelei o soo se tasi o lona aiga po o uo po o ni paaga foi. I nisi o upu silli ona faamomoi-loto ua tusiaina, na faapea mai ai Moronae: “Ua nao au lava. Ua fasiotia lou tamā i le taua, ma tagata uma o lo’u aiga, ma ua leai ni au uo po o se mea ou te alu i ai; ma o le a le umi e tuu ai au e le Alii ou te ola ai ou te le iloa” (Mamona 8:5).
Ua maliliu uma lona aiga. Ana uo uma. Lona nuu atoa! Ma ina ua uma lana faamaumauga, sa ia fauina se pusa maa e teu malu ai faamaumauga paia lea o le a le mafai ona suluia i le malamalama o le ao mo le faitau fiaselau o tausaga.
O le ola amiotonu e fatuina ai ni suiga lelei i le lalolagi. O nisi taimi o na galugalu e tele ni augatupulaga e manaomia ai ina ia taunuu ai i ona taunuuga atoatoa. Ae ua aoaoina i tatou e Moronae e mafai ona tatou faatuatua pea i le taimi a le Atua. Pau le mea e manaomia o le faia o la tatou vaega.
3. Tausia se Vaaiga e Faavavau
O le mea moni lava: e oo mai tofotofoga, e le fea le olaga, ma o nisi taimi, e tiga ai mea uma lava. E faapitoa le faigata o le olaga pe a tatou mafaufau ua iu lava ina tatou manumalo i se tofotofoga, ae toe to mai se isi uaga o luitau ma taia ai i tatou ma toe pauu ai i lalo.
Pe o tatou feagai ma le popolevale po o le faanoanoa, maliu o sē e pele, po o se isi luitau, o nisi taimi o le taofimau ai i le faatuatua ma le faamoemoe e foliga mai e matua lofituina lava. I nei taimi faigata e faigofie ona mafaufau, “E mafai faapefea ona i ai ni isi mea e sili atu ona leaga?”
Ia, mo Moronae, sa o se faamatalaga moni lava lena. Atonu na i ai ni isi mea e sili atu ona leaga mo ia i le agai ai i le iuga o lona olaga. I taimi faigata, pe a lagonaina le pei e leai se mafuaaga e agai ai pea i luma pe taofimau ai pea i le faamoemoe, e mafai ona tatou vaai i lana faataitaiga o le faatuatua e le maluelue i le feagai ai ma le tetele o le faatafunaga.
O nisi o le a latou tau’a le olaga o Moronae e matuai leaga faia lava. E ui lava sa faamaoni o ia, ae na aveesea tagata uma na ia alofaina. O ia o le tagata mulimuli na ola o lona nuu atoa. Sa tatau ona ia faamae’aina le faamaumauga a lona tamā ona na fasiotia Mamona ae na te lei maua se avanoa e faamae’a ai. Ma sa sailia Moronae e sa Lamana ma sa solasola solo mo lona ola i le taimi na ia tusia ai lana tusi atoa o tusitusiga paia.
Mata e mafai ona e vaai faalemafaufau i le matua taufaafefe ma le leai o se faamoemoe o lena tulaga? Afai na oo se isi tagata i tofotofoga na oo ia Moronae, e masalo na faaosoosoina i latou e lafoai lo latou faatuatua, ia faafitia Keriso, ma ia tuuaia le Tama Faalelagi ona o o latou tulaga matautia. Ae e sa lei faapena Moronae.
Nai lo lena, na pipiimau pea Moronae seia oo lava i le iuga (tagai Moronae 1:3). Sa ia tausia se vaaiga e faavavau e fesoasoani ai ia te ia e feagai ma ona luitau. Sa ia iloa le mea moni ma iloa e tusa lava po o le a le mea e tupu ia te ia, pau lava le mea ia i ai lona faatuatua i le Faaola ma talitonu i le Tama Faalelagi, o faamanuiaga uma sa folafola mai ia te ia o le a faataunuuina i se aso, ma o le a faaolaina o ia e ala i le mana o Iesu Keriso ma faamanuiaga o Lana Togiola (tagai i le Moronae 10).
Ia, o se molimau matuai mamana lena .
Pe a foliga mai e leai ni isi mea e sili atu ona leaga, e mafai ona tatou maua le mafanafana i le tausisia o se vaaiga e faavavau ma atiina ae se faatuatua e pei o Moronae. Afai tatou te faia lena mea, ua folafola mai ia i tatou “e mafai ona outou faia o mea uma e tatau ai ia [Keriso]” (Moronae 10:23). E mafai ona tatou iloa o loo faatasi le Tama Faalelagi ma i tatou. E mafai ona tatou talitonu o lana fuafuaga o le fiafia o le a saunia ai se auala mo i tatou e faatoilalo ai faalavelave uma taitasi o le a tatou feagai i le olaga faitino. Ma e mafai ona tatou siomia i tatou lava i le malamalama, olioli, ma faamanuiaga o le talalelei toefuataiina a Iesu Keriso.
Faatasi ai ma se vaaiga e faavavau, o loo i ai pea ia i tatou se mafuaaga e faamoemoe ai. Ma e mafai ona tatou faatuatua o le a i ai se aso o le a mafai ai ona tatou faapea uma ai, “E mafai faapefea ona i ai ni isi mea e sili atu ona lelei?”