Auaunaga i Tagata Uma
E mafai faapefea e le valaau a Elder Uchtdorf ina ia auauna atu i ni auala tupufua ma masani ai ona suia ai le faasoaina atu o le talalelei mo oe?
Atapue mai le Getty Images
I le avea ai ma se vaega o a tatou taumafaiga e auauna atu i se auala e paia atu ma maualuga atu, ua amata ai e taitai o le Ekalesia ona talanoa e uiga i le galuega faafaifeautalai a tagata o le au paia o le auaunaga i tagata uma, “e tusa lava pe le o i ai o latou igoa i lau lisi o uso po o tuafafine o auaunaga.”1 O lenei auala sili atu ona lelei o se suiga o le mafaufau—o se auala ua faaleleia atili lea e mafai ona suia ai mea uma e uiga i le auala ma le mafuaaga tatou te auauna atu ai i isi.
Na matauina e Elder Dieter F. Uchtdorf o le Korama a Aposetolo e Toasefululua e faapea: “Po o a lava auala e foliga mai e tupufua ma masani ai ia te oe, ia faasoa atu i tagata pe aisea e taua ai Iesu Keriso ma Lana Ekalesia ia te oe. Valaaulia i latou ia ‘o mai inā matamata.’ Ona uunaia lea o i latou e o mai ma fesoasoani. E anoanoai avanoa mo tagata e fesoasoani ai i totonu o le tatou Ekalesia.
“Aua le tatalo mo na o faifeautalai ia mauaina ē filifilia. Tatalo i aso uma ma lou loto atoa ina ia e maua i latou o e o le a o mai inā matamata, o mai ma fesoasoani, ma o mai ma nonofo.”2
O le auauna atu e faatatau i le avea ma soo e sili ona tuuto ma liua o Iesu Keriso o e tutusa o latou loto ma agaalofa e pei o le Faaola. Ua valaaulia i tatou e le Alii ina ia alualu i luma e auauna atu i isi i ni auala tupufua ma masani ai ona o le alofa. E le faatatau i le faia o se auaunaga. E faatatau i le avea o se auauna e pei o Iesu Keriso.
Aoao e Auauna atu i le Tagata (Ua Tofiaina)
O loo tatou aoao pea e avea ma uso ma tuafafine o auaunaga. O se suiga faapenei e mafai ona umi se taimi e alu ai, ma atonu o le a tatou faia ni mea sese. I lo’u mafaufau, o se tasi o na mea sese o le faateaese lea o tofiga o auaunaga e faapea ua na o se faauooga “faafoliga” pe na “fai faamalosi”—i se ala e le masani ai pe tupufua. Ae ua tuuina mai e le Alii ia i tatou ni tofiga fitoitonu i le avea ai o ni uso ma ni tuafafine o auaunaga. O lenei faiga, ua Ia faamautinoaina ai ia leai se tasi e le faitulia.
Pe a oo mai mala faalenatura i le Iunaite Setete, e faapotopoto faatasi e le Koluse Mumu ma le National Guard a latou volenitia ma tofitofi i latou i ni eria fitoitonu ina ia tele se fesoasoaniga e faia ai. O le mauaina o se tofiga e le tuuitiitia ai le ofofua atu o le meaalofa o le taimi ma le alofa o volenitia. E leai se tasi o e na aafia lona ola i se faalavelave e foliga mai ua fesiligia nei tofiga. E lagonaina e i latou na mauaina fesoasoani le lotofaafetai ua sau se isi e fesoasoani!
E pei o volenitia a le National Guard po o le Koluse Mumu, pe a avea i tatou ma soo o Iesu Keriso e ala i le osia o feagaiga paia, tatou te volenitia e faapotopoto faatasi i le faatinoina o tofiga patino e fesoasoani ai i isi.
O nei tofiga tatou te maua ai avanoa e aoao ai ma tuputupu ae ai i o tatou tomai e auauna atu ai, e tele lava ina ala mai i o tatou toilalo. Ae e le pine, ona avea lea o auaunaga ma “natura lona lua” ia i tatou—e pei lava ona tatou aoao e savali, tautala, tietie i se uila, tatā se mea faifa ili, pe aoao se taaloga.
Atapue mai le Getty Images
O Le A le Auaunaga i Tagata Uma i “Auala Fuatiaifo ma Masani”?
O o tatou tofiga o auaunaga taitoatasi e saunia ai i tatou e “auauna atu i tagata uma” i auala tupufua ma masani. O le auauna atu i tagata uma e manaomia ai se loto naunautai ma ni mata e vaai ai ia i latou o siomia i tatou—o tagata ua tuu e le Alii i o tatou ala. O le “auaunaga” i lena tulaga e mafai ona faigofie lava e pei o le valaauliaina o i latou—i faiga tupufua ma masani ai—e “o mai e matamata” po o le “o mai e fesoasoani.”
Na tuuina mai e le Faaola le faataitaiga. Ina ua faaali atu Iesu i tagata i le malumalu i Nuumau, sa Ia ta’u atu ia i latou, “Ae o le a ou alu atu nei i le Tamā, ma e faaali atu foi au lava i ituaiga ua leiloloa o Isaraelu” (3 Nifae 17:4).
E pei o i tatou, sa i ai se mea na tatau ona afio i ai le Faaola. Na faaauau pea le tala:
“Ma sa oo ina ua uma ona fetalai atu faapea o Iesu, sa toe silasila solo faataamilo ona fofoga i luga o le motu o tagata, ma silasila atu ua maligi o latou loimata, ma ua latou pulatoa mai ia te ia e peiseai ua latou mananao e ole mai ia te ia ia afio pea o ia faatasi ma i latou mo sina taimi umi teisi atu.
“Ma sa ia fetalai mai ia te i latou: Faauta, ua tumu lou loto i le agaalofa ia te outou” (3 Nifae 17:5–6; faaopoopo le faamamafa).3
E ui lava ina sa i ai se mea na fuafua o Ia e afio i ai, ae sa i ai i le Faaola ni mata e vaai ai ma se loto e lagona ai, o lea na Ia nofo ai e auauna atu i tagata:
“E i ai ea ni isi o ia te outou ua mama’i? Ia aumai i latou iinei. E i ai ea ni isi o outou ua pipili, pe ua tauaso, pe ua setu, pe ua manua, pe ua lepela, pe ua supa, pe ua tutuli, pe ua puapuagatia i soo se ala? Ia aumai i latou iinei ma o le a ou faamaloloina i latou, ona ua ou agaalofa tele ia te outou; ua tumu lou loto i le alofa mutimutivale” (3 Nifae 17:7).
O le iloaina o le Faaola e pei ona tatou iloa ai, mo Lona faaavanoa o le taimi e faamalolo ai e mamai a o lei oo i le isi Ana fuafuaga faatulagaina, sa o se mea tupufua lea. Mo i tatou, o le auaunaga i tagata uma i auala masani ma tupufua e mafai ona aofia ai le na o le valaaulia o se tasi e faia se mea ua uma ona e fuafua e fai, po o le o faatasi i se gaoioiga ua uma ona e fuafuaina e auai atu i ai.
Afai o loo e aveina se kosi o le ola-tutoatasi, valaaulia lou tuaoi e sau i le vasega. Afai e te alu i se gaoioiga a le uarota, valaaulia lau paaga faigaluega e te lua o faatasi. Afai o fai sau suesuega faaleaiga o tusitusiga paia po o se afiafi faaleaiga, ia valaaulia lau uo e auai faatasi ma oe. O le uiga lena o le “o mai e matamata.” Ma i nisi taimi e le mafai ona asiasi atu ai i le tagata, o le auaaunaga e mafai ona faia e ala atu i se tesi i le telefoni, imeli, poo se vili i le telefoni.
Faatuatuaina e Auauna Atu
Ina ua vaetofia au e Peresitene M. Russell Ballard e avea ma peresitene fou o le Siteki Muamua o Talavou Nofofua Matutua a Provo Iuta, sa ia tuuina mai se tofiga faigofie ma patino: “Alu e asiasi i ou taitai ma tagata auai i o latou fale ma fale mautotogi!” Na pau lena; na te lei tuuina mai lava se isi aoaoga po o ni tofiga.
O le faamaopoopoina ai o a matou taumafaiga ma a matou epikopo, na matou amataina ai i le aso Lua, i le lua o aso talu ona mae’a la matou konafesi faalesiteki. A o matou auauna atu i le matou siteki, sa matou faia ni mea sese, misia ni avanoa, ma sa masani ona mafaufau, “Atonu sa sili atu se isi auala ou te fai atu ai” po o le “Maimau pe ana matou fesili i ni fesili e sili atu.”
Na matauina e le Peresitene o le Iunivesite a Polika Iaga o Kevin J Worthlin e faapea “o le toilalo o se vaega taua o lo tatou alualu i luma e faavavau—o la tatou sailiga mo le atoatoa. Ma ona o le Togiola ua mafai ai e i tatou—pe afai tatou te tali atu i toilalo i le ala sao—ona faamanuiaina i se ituaiga fou o le aoaoina lea e faatagaina ai o tatou toilalo e avea ma se vaega o le faagasologa o le faaatoatoaina.“4
O le matou aafiaga lenei ao matou aoao e auauna atu i taitai ma tagata o le siteki ma isi na matou feiloai i ai. A o faaauau a matou auaunaga, na amata ona tuu e le Alii ni tagata se toatele i o matou ala.
I se tasi taimi, a o ma savavali ma se tasi o o’u fesoasoani, o J. B. Haws, i le va o fale mautotogi, sa ma feiloai ai i se alii talavou i le paka o taavale. Sa ma tutū e faatalofa i ai ma iloa ai ua masiiese o ia mai le matou siteki. Sa matou talanoa mo sina taimi ma iloa ai o ia o se faifeautalai ua maea se misiona na feagai ma ni fesili e uiga i lona faatuatua. O lo’u fesoasoani o se matai faiaoga e faigofie ona fesootai ma tagata. O le taliina o fesili faapenei sa tupufua ma masani ai J. B. Sa mafai ona ou iloa atu i foliga o lenei alii talavou se malamalama atonu na misi mo se taimi ae ua toe aliali mai ao la talanoa.
Sa manino lava le fiafia o J. B. ia te ia ma i ana fesili ma atugaluga. Sa talanoa tatala mai le alii talavou ona sa faaali atu le agaalofa o J. B. Na “tumu le loto” o lo’u fesoasoani i le alofa, ma sa i ai sona manao ia malamalama i lenei alii talavou e aunoa ma le faamasinoina o ia. Na fesili atu J. B. pe mafai ona ma toe asiasi ia te ia pe a mautū ai i lona fale mautotogi fou. Sa lue mai le ulu o le alii talavou, sa faafesuiai ia numera o telefoni feaveai, ma sa faia ai se tautinoga e tulitatao atu ia te ia.
Ae ma te lei o ese, sa ma fesili atu pe i ai se isi mea e mafai ona ma faia e fesoasoani atu ai. Sa ia fai mai, “O le lua tutū mai e faatalofa o se tasi lea o mea aupito sili ona taua e mafai ona lua faia mo au i le asō.” Mulimuli ane i lena afiafi, sa ou mafaufau ifo ia te au lava, “Ana faapea ma te lei o atu ma J.B. e auauna atu, semanu e le mafai ona ma feiloai i lenei alii talavou.”
E foliga mai na silafia e le Alii o le a ma auauna atu i lena afiafi, o lea na Ia tuuina ai lenei alii talavou i lo ma’ua ala—ma le faatuatuaga o le a ma vaai ia te ia ma auauna atu ia te ia.
A tatou mananao e auauna atu i tagata uma a o tatou i ai i o tatou olaga i aso taitasi, o le a tuu e le Alii ni tagata i o tatou ala auā Na te faatuatuaina i tatou, o le a tatou tetepa a’e mai a tatou telefoni feaveai, faaalu sina taimi e ata’ata atu ai i se tagata e le masani ai, pe fai atu se fesili mai se tasi na tatou feiloai i ai i le maketi po o fea lava tatou te i ai i le aoga, galuega, po o le lotu.
Atapue mai le Getty Images
O Taunuuga Ofoofogia o Auaunaga
O le toe tepa i tua i le faataitaiga a le Faaola i le 3 Nifae, na ou mauaina ai se mataupu faavae taua e uiga i le auaunaga. E pei ona outou manatua:
“Sa oo ina ua uma ona fetalai mai o ia faapea, sa o atu faatasi uma le motu o tagata, ma o latou tagata mamai ma o latou tagata puapuagatia, ma o latou pipili, ma o latou tauaso, ma o latou gugu, ma i latou uma o e na puapuagatia i soo se ala; ma sa ia faamaloloina i latou uma taitoatasi ina ua aumaia i latou ia te ia.
“Ma o i latou uma, i latou uma o e na faamaloloina ma i latou o e na malolosi, sa latou punonou i lalo i ona vae, ma tapuai atu ia te ia; ma o le toatele o i latou o le motu o tagata o e na mafai ona o atu sa sogi i ona vae, sa oo ina latou faataeleina ona vae i o latou loimata” (3 Nifae 17:9–10; faaopoopo le faamamafa).
Ia matau o na uso ma tuafafine o auaunaga o e na fesoasoani e aumaia i latou na latou iloa ma alolofa i ai ia faalatalata atili atu ia Iesu Keriso, sa latou i ai foi i vae o le Faaola, ifo, tapuai, ma sogi ma faataeleina Ona vae i o latou loimata.
A o tatou auauna atu i tagata uma, o le a tatou vaaia Keriso o faamaloloina manu’a faalelagona, faaleagaga, ma faaletino. Ma a o tatou valaaulia isi e “o mai e matamata” ma “o mai e fesoasoani” i auala tupufua ma masani, o le a tatou iloa ai ua faamaloloina ai foi o tatou lava manua.