Autalavou Matutua
O Le Mea Moni o loo i tua atu o Na Ata-Atoatoa o Talaaga Otooto
O Bárbara Rodríguez e 25 ona tausaga ma sa fanau i Anzoátegui, Venesuela, lea sa ia feiloai ai i lana tane. O loo nonofo i le taimi nei i Lima, Peru. Ua tuuto atu Bárbara i le fatuina o anomea faagaeetia i luga o a laua upega fesootai.
A tatou faatusatusaina i tatou lava i luga o ala o faasalalauga faaagafesootai, ua tatou misia le ata telē atu.
Ata pue na tuuina mai e le tusitala
I se taimi e lei mamao atu, sa faaali mai ai se manatu o se tasi o loo mulimulita’ia a’u i luga o le Instagram ma fai mai, “E faapefea ona matuai susulu mai ou foliga ma ni tamaiti se toalua, ae e tau le mafai ona ou taulimaina se [tamaitiiti] e toatasi?” Sa vave ona ou ’ata ma manao e tali atu ia te ia ma se ata o o’u foliga i lena taimi.
Sa ou tali atu, “Sa ou manatu lava o loo fai si o’u faatamala i o’u foliga vaaia pe a faatusatusa i isi tinā. O le aafiaga lena o ala o faasalalauga faaagafesootai—e tele ina tatou faatusatusaina i tatou lava i se isi tagata, ae o loo faatusatusa e lena tagata o ia lava i se isi. Ae o le mea moni ou te le o matuai susulu i le taimi nei, ma ou te le ula foi tuu i luga se ata o o’u foliga vaaia. E masani lava na o aso Faraile ma Aso Sa ou te ofu lelei ma foliga ‘tauagafau’ ai.”
Ua o ni nai tausaga nei talu ona ou faasoa atu e uiga i o matou olaga i luga o ala o faasalalauga faaagafesootai. O le tele lava, ou te taumafai e faailoa atu pe faape’ī le “olaga moni” mo tagata o le Ekalesia a Iesu Keriso. Ma o le faia o lea mea, sa i ai ni aafiaga ua uunaia ai au e mafaufau i uiga lelei ma tulaga lamatia o ala o faasalalauga faaagafesootai.
E le Faaalia Mai e Ala o Faasalalauga Faaagafesootai Mea Uma
E le o le taimi muamua lea ua fesili mai ai se tagata ia te au i se fesili faapea. O le mea a ia, e faaali mai e ala o faasalalauga faaagafesootai na o se vaega itiiti lava o olaga o tagata. I lo’u tulaga, e tusa lava pe ou te taumafai e faamaoni, e le mafai lava ona ou faailoa atu mea uma. Ma e le tatau ona tatou faatusatusaina i tatou lava pe faavaeina lo tatou tāua i se atapue matagofie se tasi. O le faia o faatusatusaga, aemaise lava i luga o ala o faasalalauga faaagafesootai, e mafai ona faafaigata ai mo i tatou ona iloa o tatou malosiaga na tuuina mai e le Atua.
I le avea ai ma Au Paia o Aso e Gata Ai, tatou te faia le mea sili tatou te mafaia ina ia avea ai faapei o Iesu Keriso. Ae o le mea moni e leai se tasi o i tatou e atoatoa. Ma i luga o ala o faasalalauga faaagafesootai, e tatau ona tatou taumafai ia aua nei faia ni faamasinoga sese e le gata ia i tatou lava ae faapena foi i isi. E tatau ona tatou manatua, e tusa lava pe tatou te mafaufau ua atoatoa le olaga o se tasi, tatou te le o vaaia luitau patino atonu o loo latou feagai. Tatou te le iloa lelei mea o loo tutupu i olaga o tagata i tua atu o mea latou te filifili e faasoa atu i luga o polokalama initoneti ua faamāmāina ma le faaeteete.
O Le Tulaga Moni o se Ata o le Aiga
E masani lava ona tele ni mea e tutupu i tua atu o vaaiga o ata pue uma o aiga ia e te vaai ai i luga o ala o faasalalauga faaagafesootai. Atonu e tilotilo nisi o tagata i na ata ma fesili ifo ia i latou lava, “Aisea e le matuai manaia ai ata o lo’u aiga?” Ae tatou te le iloa po o a ni mea e fai ia maua ai na ata “atoatoa.”
Mo se faataitaiga, sa matou taumafai i se tasi aso e pue se ata o le aiga i le tuua ai o le lotu. E mafai ona faigata lenei mea i le i ai o ni fanau laiti se toalua, ae ou te fiafia lava e pueina na taimi ona ou te toe tilotilo ai i tua i le matutua ua i ai la’u fanau.
A o ma taumafai ina ia faanonofo lelei tamaiti mo le ata, sa ou faaaluina se taimi ou te talanoa atu ai i lou atalii e lua tausaga, o Alavini, o lē sa tagi ona sa manao ou te tago e sii ia. Na ou punou i lalo, ma solo ese ona loimata, ona aioi atu lea ia te ia e tu i luga ina ia mafai ona ou faaali atu o matou ofu (lea sa ou faia ia pea uma i lena taeao). O lau tama teine e tolu tausaga o Avril, sa fai atu foi i lo’u toalua e sii o ia ona sa le manao foi e tu. Sa lei mananao moni i laua e pue ni ata.
Sa le manuia le faagasologa o le puegā ata—o lea sa tuu ai loa. Ae ina ua ou taunuu i le fale, sa ou maua se mea na sili atu. O lo’u tuagane (o lē sa pueina ata) sa pueina le taimi na tupu uma ai le vevesi. I le ata, sa ma faato’ato’aina ai ma lo’u toalua le ma fanau. Sa lei faaalia lelei ai o matou ofu, ae sa o se taimi—o le agalelei—ma moni. Sa matuai o’u fiafia i ai.
Ina ua ou faasoaina atu le ata i luga o ala o faasalalauga faaagafesootai, sa ou faaupuina “O le tulaga moni o se ata o le aiga.” Ou te lei mafaufauina e toatele ni tagata o le a fesootai i ai, ae na ou iloa ai e le tau manaomia ona atoatoa le foliga mai o ni mea. E leai se afaina o le alu i le mea ua i ai ma ia moni. Ae na aoao mai ai foi ia te au se lesona telē atu—e faapea, a tatou talitonu ua atoatoa se tasi, tatou te lei vaai i auiliiliga uma.
Aua Nei Tuua Ala o Faasalalauga Faaagafesootai ma Ufiufia Lou Faasinomaga Moni
O upega fesootai o ala o faasalalauga o se meafaigaluega mamana lea e mafai ona tatou faaaogaina mo le tele o mea lelei. Ae e tatau ona tatou faaeteete ia aua nei o tatou lotovaivai pe faatusatusa i tatou lava i mea tatou te vaaia i luga o ala o faasalalauga faaagafesootai. E pei ona saunoa mai ai Elder Gary E. Stevenson o le Korama a Aposetolo e Toasefululua, “Talosia, e mafai ona tatou aoao ia sili atu le moni, saili nisi uiga malie, ma faaitiitia le lotovaivai pe a fetaiai ma ni ata o loo faaali mai ni tulaga faafoliga ma e masani ona taitai atu ai i faatusatusaga faavaivailoto.”1
Ou te iloa a tatou manatua lo tatou natura paia o ni fanau a le Atua, o le a tatou le tuua se avanoa mo ni faatusatusaga tiga po o ni faamasinoga patino. Ma afai tatou te tuu le faalogologo i na faatusatusaga ia e taumafai e faaleaga o tatou gafatia, o le a mafai ona tatou ola i ni olaga faamanuiaina e aunoa ma le popole e uiga i na tusiga uma o loo i ai ia e foliga mai o ni ata-atoatoa.