Digital Lamang: Batan-ong mga Hamtong
Unsaon nga Manaa sa Social Media apan Dili sa bati nga Impluwensya
Ania ang pipila lang ka mga paagi nga akong nakat-unan aron sa paggamit sa social media isip usa ka himan alang sa kaayohan.
Siguro kitang tanan usahay mahimong masubrahan na diha sa social media, mahimong kini pangandoy sa usa ka hingpit nga pinuy-anan sa umaabut, pagdiskubre kon unsaon sa pagpangarte nga walay sayop, o mangandoy nga kita anaa sa pagbakasyon nga gihimo sa atong katrabaho sa una. Samtang ang social media mahimong magamit alang sa daghang maayong mga tumong, makapasakit usab kini kanato pinaagi sa pagguba sa pagsalig sa atong kaugalingon, makapahimo sa atong mga gilauman nga medyo taas ra kaayo, ug nagtubo ang gidaghanon sa atong kasina nga atong bation ngadto sa uban.
Isip usa ka blogger, akong nakaplagan akong kaugalingon nga madutlan sa pipila niining makadaot nga mga sangputanan sa social media. Gikinahanglan nako nga makat-on og mga paagi nga ako maanaa diha sa social media apan dili kini ang himoong pagtutok sa akong inadlaw adlaw nga kinabuhi. Ania ang pipila ka mga butang nga akong buhaton nga makatabang kanako nga mogamit sa social media isip usa ka himan alang sa kaayohan:
-
Pagtakda og kinutuban sa gidaghanon sa oras nga imong igahin sa social media sa matag adlaw. Kon dili, ang mga gutlo mopaingon sa mga oras.
-
Pagbaton og usa ka katuyoan alang sa paggamit sa social media. Kon kamo anaa sa social media nga walay katuyoan nga naa sa hunahuna (sama pananglit, kon moabli lang para dunay mabuhat tungod kay gilaay kamo), mao kana ang kalagmitan nga kamo mag-usik sa kadaghanan sa inyong panahon.
-
Hinumdumi ang mas dako nga panglantaw. Daghang mga tawo diha sa social media nagpakita lang sa mga maayong bahin sa ilang mga kinabuhi, ug makapahimo kini nga daw ang tanan nilang nasinati mao ang kanunay nga kaharuhay ug kamaya. Apan wala nimo makita ang tanang butang. Luyo sa mga talan-awon, ang ilang mga kinabuhi tingali ingon ra sab ka apiki sa imoha. Ayaw itandi ang imong kaugalingon sa uban. Kamo adunay igo ra, ug kamo igo na. Si Elder Gary E. Stevenson sa Korum sa Napulog Duha ka mga Apostoles mipahinumdom kanato, “Ang pagkumpara sa atong kaugalingon daw kasarangan nga kinabuhi ngadto sa uban nga maayong pagkaretoki, hingpit nga pagkamugna nga mga kinabuhi ingon sa makita diha sa social media mahimong makahatag kanato og mga pagbati sa pagkawala sa kadasig, kasina, ug gani kapakyasan.”1
-
Ayaw pabantang sa pagkanegatibo. Kon adunay usa ka butang nga kanunayng modala ninyo paubos, i-unlike, i-unfollow, o i-unfriend. Ang social media dili angay nga mobilin kaninyo og magul-anon nga pagbati. I-follow, i-friend, ug i-like ang mga tawo ug mga butang nga makapahimo kaninyo nga mas maayo ug sa inyong inadlaw adlaw nga kinabuhi.
-
Magtinguha nga mohigugma, moawhag, ug modasig sa uban. Kay sa gamiton ang social media aron nindot ka nga tan-awon, sulayi ang pagpost aron makatabang sa uban nga mobati nga gihigugma ug importante. Ipakigbahin ang kamaayo. Pagmatngon sa mga tawo kinsa ingon og nagkinahanglan og usa ka higala ug motabang kanila sa pagpaambit og makapabayaw nga mensahe!
Si Elder Stevenson miingon usab: “Samtang mipahinumdom si Sister Bonnie L. Oscarson nato … , ang kalampusan sa kinabuhi dili moabut kon pila ka likes ang atong makuha o pila ka mga higala o mga sumusunod kita aduna sa social media. Hinoon, kini adunay usa ka butang nga mahimo sa pagkonektar sa makahuluganong paagi ngadto sa uban ug sa pagdugang og kahayag ngadto sa ilang mga kinabuhi.”2
Kana gayud unta ang atong kinatas-an nga tumong kon mogamit og social media.
Hinumdumi nga samtang kita motan-aw sa social media pinaagi panglantaw sa ebanghelyo ug magtinguha sa paggamit niini sa positibo nga mga paagi, dili kita matanggong sa hunahuna sa pagtandi o sa pagkawala sa kadasig. Hinoon kita makabiya gikan sa social media nga mobati nga gibayaw ug madasig sa pagbuhat og maayo.