Pagpangalagad ngadto sa Tanan
Sa unsang paagi ang panawagan ni Elder Uchtdorf sa pagpangalagad sa natural ug normal nga mga paagi makausab sa pagpaambit sa ebanghelyo alang kaninyo?
Mga Imahe gikan sa Getty Images
Isip kabahin sa atong mga paningkamot sa pagpangalagad sa mas balaan ug mas halangdon nga paagi, ang mga lider sa Simbahan nagsugod sa paghisgut kabahin sa miyembro nga misyonaryo nga buhat isip ang pagpangalagad ngadto sa tanan, “maanaa man o wala ang ilang mga ngalan sa listahanan sa imong pangalagaran nga mga kaigsoonan.”1 Kini nga mas maayo nga paagi usa ka lahi nga panglantaw—usa ka gipanindot nga paagi nga makausab sa tanan mahitungod kon unsang paagi ug nganong mangalagad kita sa uban.
Si Elder Dieter F. Uchtdorf sa Korum sa Napulog Duha ka mga Apostoles nakaobserbar: “Sa bisan unsang paagi nga natural o normal para nimo, ipaambit sa mga tawo ngano nga si Jesukristo ug ang Iyang Simbahan importante para nimo. Dapita sila nga ‘moduol ug motan-aw.’ Dayon dasiga sila nga moduol ug motabang. Adunay daghang mga kahigayonan alang sa mga tawo nga motabang sa atong Simbahan.
“Pag-ampo dili lang aron makit-an sa mga misyonaryo ang mga pinili. Pag-ampo kada adlaw sa tibuok ninyong kasingkasing aron inyong mapalgan kadtong kinsa moduol ug motan-aw, moduol ug motabang, ug moduol ug magpabilin.”2
Ang pagpangalagad mao ang mahitungod sa pagkahimong mas mapahinunguron ug mas nakabig nga mga disipulo ni Jesukristo kinsa adunay susama nga mga pagbati sa gugma ug kalooy ingon sa Manluluwas. Ang Ginoo midapit kanato sa pag-uswag sa pagpangalagad sa uban sa natural ug normal nga mga paagi tungod sa gugma nga anaa kita alang kanila. Dili kini mahitungod sa paghimo sa pagpangalagad. Kini mao ang pagkahimong usa ka tigpangalagad nga sama ni Jesukristo.
Pagkat-on sa Pagpangalagad ngadto sa (Gi-assign nga) Tawo
Nagkat-on pa gihapon kita aron mahimong tigpangalagad nga mga kaigsoonan. Ang usa ka kausaban sama niini magkinahanglan og panahon, ug tingali makahimo kita og mga sayop. Sa akong hunahuna, usa niadto nga mga sayop mao ang pagkonsiderar sa mga buluhaton sa pagpangalagad isip “dili tinuod” o “pinugos” lamang nga panaghigalaay—sa paagi nga dili normal o natural. Apan ang Ginoo naghatag kanato og piho nga mga buluhaton isip tigpangalagad nga mga kaigsoonan. Niini nga paagi, Iyang gisiguro nga walay usa nga wala maapil.
Kon ang natural nga mga katalagman moigo sa Estados Unidos, ang mga organisasyon sa Red Cross ug National Guard mopalihok sa ilang mga boluntaryo ug mo-assign kanila sa piho nga mga dapit aron makahatag sa labing dako nga tabang. Ang pagdawat og usa ka buluhaton nakapahimo sa oras ug gugma sa mga boluntaryo nga dili na boluntaryo. Walay tawo nga nakasinati og kalisdanan sa iyang kinabuhi ang mo-kwestyon niini nga mga buluhaton. Ang mga nakabenepisyo mapasalamaton nga adunay tawo nga miabut aron sa pagtabang!
Sama sa mga boluntaryo sa National Guard o Red Cross, kon kita mahimong mga disipulo ni Jesukristo pinaagi sa paghimo og sagradong mga pakigsaad, kita moboluntaryo nga tawagon sa paghimo og piho nga mga buluhaton sa pagtabang sa uban.
Kini nga mga buluhaton maghatag kanato og mga oportunidad sa pagkat-on ug pagpalambo sa atong mga abilidad sa pagpangalagad, kasagaran pinaagi sa atong mga kapakyasan. Apan sa dili madugay, ang pagpangalagad mahimong “ikaduha nga kinaiya” kanato—sama nga nakakat-on kita sa paglakaw, pag-istorya, pagbisikleta, pagpatukar og instrumento sa musika, o pagkat-on og sport.
Mga Imahe gikan sa Getty Images
Unsa Ang Pagpangalagad ngadto sa Tanan sa “Natural ug Normal nga mga Paagi”?
Ang atong indibidwal nga mga buluhaton sa pagpangalagad makaandam kanato sa “pagpangalagad ngadto sa tanan” sa normal ug natural nga mga paagi. Ang pagpangalagad ngadto sa tanan nagkinahanglan og andam nga kasingkasing ug mga mata aron makakita niadtong naglibot kanato—ang mga tawo nga gibutang sa Ginoo sa atong mga dalan. Ang “pagpangalagad” nianang higayona mahimong sama ka yano sa pagdapit kanila—sa natural ug normal nga paagi—nga “moduol ug motan-aw” o “moduol ug motabang.”
Ang Manluluwas mihatag og ehemplo. Sa dihang si Jesus mipakita ngadto sa mga katawhan didto sa templo sa Bountiful, Siya miingon ngadto kanila, “Apan karon mobalik Ako ngadto sa Amahan, ug usab aron magpakita sa akong kaugalingon ngadto sa nawala nga mga tribo sa Israel” (3 Nephi 17:4).
Sama kanato, ang Manluluwas adunay dapit nga adtoan. Ang istorya mipadayon:
“Ug nahinabo nga human si Jesus nakapamulong, siya milibut sa iyang mga mata pag-usab ngadto sa pundok sa mga katawhan, ug nakakita nga sila naghilak, ug nagtan-aw kaniya ingon og nagpasabut nga sila mohangyo kaniya sa pagpabilin og diyutay pa nga panahon uban kanila.
“Ug siya miingon ngadto kanila: Tan-awa, ang akong kasingkasing napuno sa kapuangod diha kaninyo” (3 Nephi 17:5–6).3
Bisan tuod Siya nagplano nga moadto sa usa ka dapit, ang Manluluwas adunay mga mata aron makakita ug usa ka kasingkasing nga makabati, busa Siya mihunong aron sa pagpangalagad sa mga katawhan:
“Aduna ba kamo dihay mga masakiton? Dad-a sila ngari. Aduna ba kamo dihay mga bakol, o mga buta, o mga pungkol, o mga angol, o mga sanglahon, o mga dili makalihok, o kadto nga mga bungol, o kadto nga gitakbuyan sa tanan nga mga matang sa sakit? Dad-a sila ngari ug Ako moayo kanila, kay Ako adunay kalooy diha kaninyo; ang akong kasingkasing napuno sa kalooy” (3 Nephi 17:7).
Ang pagkaila sa Manluluwas sa samang paagi nga ato Siyang nailhan, nga Siya migahin og panahon sa pag-ayo sa masakiton sa wala pa ang Iyang sunod nga lakaw mao ang usa ka natural nga butang. Alang kanato, ang pagpangalagad ngadto sa tanan sa normal ug natural nga mga paagi mahimong maglakip sa yanong pagdapit sa usa ka tawo sa pagbuhat og butang nga giplano na ninyong buhaton o pag-uban kaninyo ngadto sa usa ka kalihokan nga giplano na ninyong tambongan.
Kon nagtambong kamo og kurso sa pagbarug sa kinaugalingong paningkamot, dapita ang inyong silingan nga motambong uban kaninyo. Kon moadto kamo sa usa ka kalihokan sa ward, dapita ang inyong kauban sa trabaho nga mokuyog kaninyo. Kon nagpahigayon na kamo og pamilya nga pagtuon sa kasulatan o home evening, dapita ang inyong higala nga moapil kaninyo. Mao kana ang buot ipasabut sa “moduol ug motan-aw”. Kini wala nagkinahanglan kanato sa pagdugang og usa ka kalihokan sa atong busy nga mga iskedyul. Sa panahon nga dili posible ang pagbisita sa personal, ang pagpangalagad mahimo pinaagi sa mensahe sa text, email o tawag sa telepono.
Gisaligan sa Pagpangalagad
Sa dihang si Presidente M. Russell Ballard mi-set apart kanako isip ang bag-ong presidente sa Provo Utah Young Single Adult First Stake, mihatag siya og yano ug piho nga buluhaton: “Bisitaha ang imong mga lider ug mga miyembro sa ilang mga panimalay ug mga apartment!” Mao kadto; wala siya mihatag og lain nga pagbansay o mga buluhaton.
Sa pagpakigsabut sa among mga paningkamot uban sa among mga bishop, nagsugod kami sa Martes, duha ka adlaw human sa among komperensya sa stake. Samtang nangalagad kami sa among stake, nakahimo kami og mga sayop, wala makakita og mga oportunidad ug sa kasagaran naghunahuna, “Unta nasulti ko kadto og mas maayo pa” o “Unta nangutana ko og mas maayong pangutana.”
Ang Presidente sa Brigham Young University nga si Kevin J Worthen nakaobserbar nga ang “pagkapakyas mao ang usa ka mahinungdanon nga bahin sa atong mahangturong kauswagan—ang atong pagpangita sa kahingpitan. Ug tungod sa Pag-ula kita mahimo nga—kon kita motubag sa mga kapakyasan sa husto nga paagi—mapanalanginan uban sa usa ka bag-ong matang sa pagkat-on nga magtugot sa atong mga kapakyasan nga mahimong kabahin sa proseso sa pagkahingpit.”4
Kini mao ang among kasinatian samtang nagkat-on kami sa pagpangalagad sa mga lider ug miyembro sa stake ug sa uban nga among nahimamat. Samtang nagpadayon kami sa pagpangalagad, ang Ginoo misugod sa pagbutang og mas daghang mga tawo sa among agianan.
Sa usa ka higayon, usa sa akong mga magtatambag, si J. B. Haws, ug ako naglakaw taliwala sa mga apartment complex dihang nakahimamat kami og batan-ong lalaki diha sa parkinganan. Mihunong kami aron mangumusta ug nasayran nga siya mohawa na sa among stake. Nag-istorya kami kadiyot ug nakadiskobre nga siya usa ka returned-missionary nga nag-atubang og mga pangutana mahitungod sa iyang pagtuo. Ang akong magtatambag usa ka hanas nga magtutudlo kinsa dali ra nga makasuod og mga tawo. Ang pagtubag og mga pangutana sama niini natural ug normal lang alang kang J. B. Akong makita sa mata niining batan-ong lalaki ang usa ka kahayag nga migawas pag-usab nga tingali nawala sulod sa taudtaod nga panahon samtang nag-istoryahanay sila.
Kini klaro nga interesado si J. B. kaniya ug sa iyang mga pangutana ug mga kabalaka. Ang batan-ong lalaki matinuorong mipaambit sa iyang mga pagbati tungod kay si J. B. mipakita og kalooy. “Napuno ang kasingkasing” sa akong magtatambag sa gugma, ug siya adunay tinguha sa pagsabut niining batan-ong lalaki nga wala naghukom kaniya. Nangutana si J. B. kon makabisita ba kami kaniya kon makabalhin na siya sa iyang bag-ong apartment. Mitando ang batan-ong lalaki, nagbayloay og mga numero sa cellphone, ug mihimo og usa ka saad sa pag-follow up kaniya.
Sa wala pa kami mobiya, nangutana kami kon aduna bay bisan unsang butang nga among mahimo aron sa pagtabang. Miingon siya, “Ang paghunong aron mangumusta mao ang usa sa labing importanteng butang nga inyong nahimo alang kanako karong adlawa.” Nianang pagkagabii, naghunahuna ko sa akong kaugalingon, “Kon si J. B. ug ako wala pa migawas aron mangalagad, wala unta namo mahimamat kini nga batan-ong lalaki.”
Ingon og ang Ginoo nasayud nga kami mangalagad nianang gabhiona, mao nga Iyang gibutang kini nga batan-ong lalaki sa among dalan—nagsalig nga kami makakita kaniya ug mangalagad ngadto kaniya.
Kon magtinguha kita sa pagpangalagad ngadto sa tanan samtang kita magpadayon sa atong inadlaw-adlaw nga kinabuhi, ang Ginoo mobutang og mga tawo sa atong dalan tungod kay Siya nagsalig kanato nga mohangad gikan sa atong mga cellphone, mogahin og panahon sa pagpahiyom ngadto sa usa ka estranghero, o mangutana sa usa ka tawo nga atong nahimamat sa merkado o sa bisan asa nato makaplagan ang atong kaugalingon diha sa eskwelahan, trabahoan, o sa simbahan.
Mga Imahe gikan sa Getty Images
Ang Talagsaong mga Resulta sa Pagpangalagad
Sa paghinumdom sa ehemplo sa Manluluwas sa 3 Nephi, nadiskobrehan nako ang usa ka importanting baruganan mahitungod sa pagpangalagad. Sama sa inyong mahinumduman:
“Ug nahinabo nga sa diha nga siya nahuman sa pagpamulong, ang tanan nga pundok sa mga katawhan, nagkahiusa, ug miduol uban sa ilang mga masakiton ug may mga balatian, ug ilang mga bakol, ug uban sa ilang mga buta, ug uban sa ilang mga amang, ug sa tanan kanila nga gitakbuyan sa tanan nga matang sa sakit; ug siya miayo kanila matag usa kanila nga gidala ngadto kaniya.
“Ug silang tanan, kadto kinsa nangaayo ug kadto kinsa mga maayo, miluhod sa iyang tiilan, ug misimba kaniya; ug kutob sa miduol kaniya ang kadaghanan mihalok sa iyang mga tiil, hangtud nga ang iyang mga tiil naligo sa ilang mga luha” (3 Nephi 17:9–10).
Bantayi nga kadto nga mga tigpangalagad nga mga kaigsoonan kinsa mitabang sa pagdala niadtong ilang nailhan ug gihigugma nga mas mapaduol kang Jesukristo nakakaplag usab sa ilang kaugalingon diha sa tiilan sa Manluluwas, nga nagyukbo, nagsimba, ug naghalok ug nagligo sa Iyang mga tiil uban sa ilang mga luha.
Samtang mangalagad kita ngadto sa tanan, atong makita si Kristo nga nag-ayo sa emosyonal, espiritwal ug pisikal nga mga samad. Ug samtang magdapit kita sa uban nga “moduol ug motan-aw” ug “moduol ug motabang” sa natural ug normal nga mga paagi, kita makakaplag sa atong kaugalingon nga mga samad nga namaayo usab.