Mga Young Adult

Paghukom sa Matarung nga Paghukom (Bisan sa Social Media)

Pinaagi sa mga sakop sa kinatibuk-ang hunta [general board] sa Young Women ug mga kawani sa Liahona

Uban sa tabang sa Manluluwas, makakat-on kita sa paghukom sa paagi nga Iyang gusto kanato.

“Ayaw paghukom.”

Madungog nato kini sa makadaghan kaayo sa kalibutan karon, uban sa mga mensahe nga nagsulti kanato nga dili ato ang katungod sa paghukom sa uban. Sa pulong lang nga paghukom adunay daghang pagkanegatibo nga nalambigit niini. Apan isip mga miyembro sa Simbahan sa Manluluwas, nasayud kita nga ang paghukom usa ka butang nga Iyang gitambag kanato sa pagbuhat—basta buhaton lang nato kini sa Iyang paagi.

Sa dihang si Jesus miayo sa usa ka tawo sa Igpapahulay, mahait kaayo Siya nga gihukman tungod kay sa balaod ni Moises natakda ang mga pagdili kabahin sa unsay inyong buhaton sa Igpapahulay—ug ang katawhan wala magtuo nga Siya nagsubay niadtong mga lagda. Apan ang Manluluwas mibadlong kanila tungod sa kadali nga mangita og sayop sa uban. Dayon Siya mitambag kanila nga “ayaw na kamo pagpanghukom pinasikad sa panagway, hinonoa pagpanghukom kamo sa matarung nga paghukom” (Juan 7:24; tan-awa usab sa Hubad ni Joseph Smith, Mateo 7:1–2).

Unsa man kita ka sagad, sama niadtong mihukom sa Manluluwas, nga mohukom sa uban sa dili matarung nga paagi? Tingali labaw pa kay sa atong mahunahunaan! Tungod kay ang paghukom sa uban sayon ra kaayo, ilabi na diha sa social media, kinahanglan kita nga makat-on unsaon sa paggamit sa tambag sa Manluluwas sa paghukom sa matarung nga paghukom sa kalibutan karon.

Pag-ila sa Matarung batok sa Dili Matarung nga mga Paghukom

Kabahin ang paghukom sa atong kabubut-on. Adunay daghang butang nga kinahanglan atong gamiton ang paghukom diha sa kinabuhi: mga butang sama sa pagpili og trabaho, pagdesisyon uban kang kinsa makig gahin og panahon ug kon unsaon sa paggamit ang atong panahon, pagpili sa media nga gamiton, ug uban pa. Apan sa unsang paagi nga makagamit kita niining mga paghukom—ug sa katapusan sa tanang paghukom—sa matarung nga paagi?

Si Presidente Dallin H. Oaks, Unang Magtatambag sa Unang Kapangulohan, mihatag og unom ka mga lagda kon unsaon sa paghukom sa husto nga paagi. Masayud kita nga ang atong mga paghukom matarung kon:

Kini “malikayan ang pagpamahayag nga ang usa ka tawo [na]siguro sa kahimayaan o … padulong na gayud siya sa kalayo sa impyerno.”
Kini “magiyahan pinaagi sa Espiritu … , dili sa kasuko, panimalos, kasina, o interes.”
Kini “nasulod sa atong pagkatinugyanan.”
Kini naglakip sa “igo nga kahibalo sa mga kamatuoran.”
Dili kini mahitungod sa mga tawo apan mahitungod sa mga sitwasyon.
Kini “moggamit sa matarung nga mga sumbanan.”¹

Si propeta Moroni mihatag usab og usa ka sumbanan alang sa paghukom sa matarung nga paagi: “Ang tanan nga mga butang nga maayo nagagikan sa Dios; ug kana nga mga dautan nagagikan sa yawa; kay ang yawa … nagdapit ug nagdani sa pagpakasala, ug sa pagbuhat niana nga dautan sa kanunay ”(Moroni 7:12).

Kon ang pagtan-aw sa social media, paghunahuna sa panaghigalaay, o mga pagdesisyon kon unsaon sa paggamit sa atong panahon, sa dili pa mohimo og paghukom, mangutana kita sa atong kaugalingon, Kini bang post/tawo/kalihokan:

makapahimo kanako nga mobati og kalinaw ug kamaayo?
makadapit ba nako sa pagbuhat og maayo?
makatabang ba nako sa paghigugma sa Dios ug moserbisyo Kaniya?

Kon kita makaamgo nga ang tanan nga maayong mga butang naggikan sa Dios, makagamit kita sa atong kabubut-on sa paghimo og maalamon ug matarung nga mga paghukom kabahin sa uban, kabahin sa atong kaugalingon, ug kabahin sa unsay atong pun-on sa atong kinabuhi.

Paglingkawas sa Pagbalik-balik sa Dili Matarung nga Pagpanghukom

Karon nga ato nang natino kon unsay matarung nga paghukom, unsay atong mahimo kon atong makita ang atong kaugalingon nga naungot sa negatibong paghukom? Ania ang pipila ka mga ideya:

Paggahin og panahon nga magpuasa sa social media. Makahatag kini kaninyo og oportunidad sa paghinay-hinay, pagbawi, ug pakigsuod sa uban sa tinuoray nga mga paagi. Kon kamo makakita og mas daghang mga tawo nga wala sa social media, makaamgo kamo nga sila mga tinuod nga mga tawo nga dunay tinuod nga mga panlimbasug, ug kamo mas minus nga dunay kalagmitan nga mohukom kanila.
Imbis nga magpost og mahitungod sa inyong kaugalingon, pagpost mahitungod sa usa ka tawo nga inyong gimahal kinsa nakapadasig kaninyo. Sultihi ang uban nganong nakadayeg ka niining tawhana. Makahatag kini kaninyo og usa ka higayon sa pagtan-aw gawas sa inyong kaugalingon ug sa pagpanalangin kay sa magpadayeg.
Pilia ang paghatag og lunsay, kinasingkasing nga pagtubag sa matag adlaw diha sa social media, kini mahimong sa paghatag og pagbati sa adlawng natawhan, usa ka pagpahalipay, o gani bisan usa ka mabinationg mensahe.
Sa kanunay adunay mga tawo diha sa social media nga sobra ra kaayo ang gipaambit diha sa social media, mopaambit lang sa maanindot kaayo nga mga pagbakasyon, ingon og dunay hingpit nga mga pamilya, o kasagaran mabingkilon. Sa dili pa kita mohukom, makapangutana kita sa atong kaugalingon, “Unsa ba ang nahibaloan sa Ginoo mahitungod niining tawhana, ug unsay akong makat-unan kabahin nila?” Pag-ampo alang sa tabang aron makita sila sama sa Iyang pagtan-aw. Ug kon ang ilang mga post kanunay naghatag kanimo og negatibo nga mga pagbati, mahimo gayud nimo silang i-unfollow.

Ang pagtan-aw sa tanan kon unsa gayud sila—mga anak sa langitnong mga ginikanan—makapausab sa atong mabaw nga mga impresyon kanila ngadto sa mahangturong panglantaw. Adunay gahum diha sa pag-amgo sa tinuod nga pagkatawo ug katuyoan sa tanan. Sama sa gipahinumdom ni Sister Michelle Craig, Unang Magtatambag sa Kinatibuk-ang Kapangulohan sa Young Women:

“Kamo adunay balaang kinaiyahan ug katuyoan nga talagsaong angay kaninyo. …

“Sayon ra kining pagkumpara sa atong kaugalingon ngadto sa uban. Sa kanunay adunay usa ka tawo nga daw aduna sa tanang mga butang kon ipunon o mas importante kay kanato. Apan sa kasagaran kita makalimot nga ang ilang katuyoan lahi gikan sa atong katuyoan. Kon kita maningkamot sa tinuoray nga pagpakabuhi kon si kinsa gayud kita—kon kita nakasabut ug mapasalamaton sa mga gasa ug mga talento gikan sa Dios nga talagsaon ngari kanato isip mga indibidwal—nan makasinati gayud kita og kalipay. “²

Sa katapusan, ang paglingkawas gikan sa pagbalik-balik sa paghukom diha sa social media nagkinahanglan og paglihok sa atong bahin. Nagkinahanglan kini og pagtan-aw sa gawas sa atong kaugalingon sa pagtandog sa kinabuhi sa laing tawo. Nagkinahanglan kini sa pagbayaw sa uban ug sa pagpaambit sa Kahayag ni Kristo. Sa pagbuhat sa ingon, dili lamang kita makaserbisyo sa uban, apan kita mobati usab og mas maayo mahitungod sa atong kaugalingon.

Pagbuntog sa Kaugalingon nga Paghukom ug Makadaot nga mga Pagtandi

Usa sa gamhanang himan ni Satanas mao ang pagpaningkamot sa pagpugong kanato sa pagbaton og usa ka tinuod nga pagsabut sa tinuod nato nga pagkatawo. Kon kita mahisalaag sa atong tinuod nga pagkatawo, ang mahukmanong mga hunahuna ug pagpanaway sa kaugalingon mapulihan og mga pagbati nga kapuangod sa kaugalingon ug gugma. Kita mopahilayo sa uban, sa atong kaugalingon, ug gani sa Espiritu Santo.

Ang kamatuoran, ang pagkumpara dili kanunayng kabahin niadtong gikumpara sa atong kaugalingon; sa kasagaran kabahin kini sa atong kaugalingon ug sa kakulang og pagsalig sa atong kaugalingon. Ang pagkompara sa pagkatinuod mahimong usa ka dili matarung nga paghukom sa atong kaugalingon.

Ug samtang ang pagkumpara lagmit mao ang makapawagtang sa kalipay,³ nahibalo sa atong bili, sa atong mga kalig-on ug mga talento, ug katuyoan sa Langitnong Amahan alang kanato ug kinsa kita sa umaabot mao ang yawe ngadto sa kalipay.

Ang Manluluwas migahin sa Iyang kinabuhi sa pagbuhat og maayo (tan-awa sa Mga Buhat 10:38). Nagpakabuhi Siya alang sa uban, nga walay usa ka sayop. Ug gani Siya sa gihapon gibadlong ug gihukman. Apan tungod kay nasayud Siya kon si kinsa gayud Siya sa tinud-anay ug unsa ang Iyang katuyoan, nakahimo Siya sa pagdala sa paghukom inubanan sa grasya, wala kini tuguti nga nakababag sa unsay Iyang tuyo nga buhaton.

Samtang mosunod kita sa Iyang ehemplo, makahimo usab kita sa samang buhat! Ang kalibutan nakapahimo ra niining sayon alang kanato sa pagkompara sa atong kaugalingon ug paghukom ug kalimtan kon si kinsa kita, apan mahimo kitang makakat-on gikan ni Sister Joy D. Jones, Kinatibuk-ang Presidente sa Primary, kinsa mitudlo: “Kon ang gugma nga atong gibati alang sa Manluluwas ug sa unsay Iyang gibuhat alang nato mas dako pa kay sa enerhiya nga atong gihatag sa mga kahuyang, pagduha-duha, o dili maayong kinaiya, nan motabang Siya nato nga mabuntog ang mga butang nga nakaingon sa pag-antus sa atong kinabuhi. Luwason kita Niya gikan sa atong mga kahuyang.”⁴

Sa atong nahibaloan “ang bili sa mga kalag mahinungdanon sa panan-aw sa Dios” (Doktrina ug mga Pakigsaad 18:10). Karon pulihi ang pulong nga mga kalag sa inyong kaugalingong ngalan. Hinuktoki sa makadiyot. Ang Langitnong Amahan nakaila sa inyong ngalan, Siya nasayud sa inyong bili ug ang Iyang Bugtong Anak namatay alang kaninyo kay kamo ingon niana kabililhon ngadto Kaniya.

Busa kon ang kalibutan bug-at nang pamation ug ang pagkompara mosugod na, paduol ngadto Kanila ug inyong mabati nga ang pagduha-duha sa kaugalingon ug ang kaugalingong paghukom matunaw ug mabati ang tinuod nga pagsalig sa kaugalingon nga maggikan sa pagkahibalo sa inyong labing bililhon nga bili.

Tan-aw ngadto sa Manluluwas

Kita sa kanunay makatan-aw ngadto sa Manluluwas alang sa giya sa tanan natong buhaton. Kabahin sa unsay Iyang gitanyag kanato pinaagi sa Iyang Pag-ula mao ang gahum sa pag-usab ug maghunahuna unsaon sa pagbuhat sa tanan nga Iyang gisugo nga atong buhaton. Ug kon mopili kita sa pagsunod ug mopaduol ngadto Kaniya, Siya motabang kanato nga makat-on nga buhian ang dili matarung nga paghukom ug motan-aw sa uban—ug sa atong kaugalingon—pinaagi sa Iyang mga mata.