SOOTAGA o Afafine o le Atua i Lona Mana o le Perisitua
O tamaitai o ni tagata auai taua i le galuega o loo faataunuuina e le Atua e ala i Lona mana o le perisitua.
Ata pue o se tamaitai o loo vaavaai atu i le Malumalu o Oakland Kalefonia.
Ua ou oo ina iloaina mo le taimi muamua lava le taua o le malamalama i le perisitua ma ona faamanuiaga fesootai mo tamaitai. O loo tatou ola i se vaitau ua talanoaina soo ai le aia tutusa, mana, faiga tutusa, ma le onosaia—e sili atu nai lo isi uiga mama. Ma le sili atu nai lo lena, o le faasinomaga, pule, faaleagaga, ma e oo lava i le Atua o ni autu o le tele o le fenumiai mo le toatele.
O le toatele o tamaitai, i le le iloaina po o a faamanuiaga latou te mauaina, e le o faaaogaina atoatoa le taumafataga faaleagaga e mafai ona latou maua. O le tele foi o alii o le o malamalama i lea mataupu.
E mafai faapefea ona tatou malamalama atili i le sootaga o loo i ai a tamaitai ma le mana o le perisitua ma fesoasoani ia te i latou e “laa i luma,” e “ave lo[latou] nofoaga moni ma manaomia i o [latou] aiga, i o [latou] nuu, ma i le malo o le Atua—e sili atu nai lo [latou] faia muamua”?1 Muamua, e mafai ona tatou saili i le lotomaualalo e malamalama i upu moni e o faatasi ma le perisitua, ae maise aoaoga lata mai a taitai o le Ekalesia. Lona lua, e mafai ona tatou saili e malamalama pe aisea e le o iloa atoatoa ai e nisi tamaitai lo latou agavaa i le mana o le perisitua a le Atua. Lona tolu, e mafai ona tatou nofouta i auala e mafai ai ona tatou fesoasoani i tamaitai e auai atoatoa i le galuega e faataunuuina e le Atua e ala i Lona mana o le perisitua.
1. O a ni Upu Moni ua Faamanino Mai e Uiga i Tamaitai ma le Perisitua?
O aposetolo ma taitai aoao o ausilali a tamaitai ua faamamafaina mai talu ai nei le sootaga o tamaitai ma le perisitua. O nisi nei o upu moni e taua le malamalama i ai ma aoao atu i le ala sao.
O le perisitua o le mana ma le pule a le Atua.
O le perisitua o le mana o loo auala mai ai le faataunuuina e le Atua o Lana galuega maoae o le faaolataga, le aumaia “o le tino ola pea ma le ola faavavau o le tagata” (Mose 1:39). O alii ma tamaitai uma e i ai se matafaioi taua i le galuega a le Atua, ma o alii ma tamaitai foi e mauaina Lona mana e faataunuuina ai Lana galuega.
O tamaitai e i ai sa latou matafaioi aloaia ma taua i le galuega o le faaolataga.
Na faapea mai Bonnie L. Oscarson, o se tasi sa avea ma Peresitene Aoao o Tamaitai Talavou: “E manaomia e tamaitai uma ona tagai ia i latou lava o ni tagata auai taua i le galuega o le perisitua. O tamaitai i lenei Ekalesia o ni peresitene, fesoasoani, faiaoga, sui o aufono, uso, ma tina, ma o le malo o le Atua e le mafai ona gaoioi sei vagana ua tatou tutula’i ma faataunuu o tatou tiute i le faatuatua.”2
Na aoao mai Peresitene Gordon B. Hinckley (1910–2008), “Ua tuuina mai e le Atua i tamaitai o lenei ekalesia se galuega e fai i le fausiaina o lona malo. O lea e aofia ai itu uma o o tatou matafaioi taua e tolu—o le, muamua, ia aoao atu le talalelei i le lalolagi; lua, ia faamalosia le faatuatua ma fausia le fiafia o tagata o le Ekalesia; ma le, tolu, ia tauave i luma le galuega tele o le faaolataga mo e ua maliliu.
“O tamaitai i le ekalesia o ni soa faatasi ma o latou alii i le tauaveina i luma o lenei galuega maoae a le Alii. … O loo tauaveina e tamaitai ni matafaioi tetele ma ua pa’u ia i latou le faataunuuina o na matafaioi. O loo faauluulu latou ia latou lava faalapotopotoga, ma o na faalapotopotoga e malolosi ma taua ma o ni aafiaga taua mo le lelei i le lalolagi. Ua latou tutu i ni matafaioi lagolago i [e umia] le perisitua, ma tauivi faatasi e fausia le malo o le Atua i le lalolagi. Matou te faamamaluina ma faaaloalogia outou mo lo outou malosiaga. Matou te faamoemoe i le taitaiga, ma le malosi, ma taunuuga aoga mai la outou puleaina o faalapotopotoga o loo outou vaaia. Matou te puipuia ma lagolagoina outou o ni afafine o le Atua, o galulue i se faigapaaga maoae e fesoasoani ia te ia i le aumaia o le tino ola pea ma le ola e faavavau o atalii ma afafine uma a le Atua.”3
O tamaitai faapea alii ua faasoaina i ai le mana ma le pule e i latou o loo umia ki o le perisitua.
O ki o le perisitua “o le pule lea a le Atua ua tuuina mai i [e o umiaina] le perisitua e faatonu ai, faafoe ai, ma pulea ai le faaaogaina o Lana perisitua i luga o le fogaeleele.”4 Ua faamatala mai e Peresitene Dallin H. Oaks, o le Fesoasoani Muamua o le Au Peresitene Sili, “O galuega po o sauniga uma e faatinoina i totonu o le Ekalesia e faia i lalo o le pule tuusao po o le pule faamatuu a le tagata o loo umiaina ki mo lena matafaioi.”5
Ua i ai i tamaitai le pule e faatino ai o latou valaauga, i lalo o le taitaiga a se tasi e umia ki o le perisitua, e pei lava ona faia e alii. Na faamatalaina e Peresitene M. Russell Ballard, “O i latou o loo i ai ki o le perisitua … ua latou faafaigofieina moni mo tagata uma o loo auauna atu ma le faamaoni i lalo o la latou taitaiga e faaaoga le pule o le perisitua ma maua ai le mana o le perisitua.”6
Na saunoa mai Peresitene Oaks: “E le masani ona tatou talanoa i tamaitai i le i ai o le pule o le perisitua i o latou valaauga faale-Ekalesia, ae o le a se isi pule o i ai? Pe a vaetofiaina se tamaitai—talavou pe matua—e talai le talalelei o se faifeautalai faamisiona, ua tuu atu ia te ia le pule o le perisitua e faatino ai se matafaioi faaleperisitua. E moni foi lena mea pe a vaetofiaina se tamaitai e galue o se taitai po o se faiaoga i se faalapotopotoga o le Ekalesia i lalo o le taitaiga a se tasi o loo umiaina ki o le perisitua.”7
Pe a aoaoina atu lenei mataupu i au tamaiti aoga, e masani ona ou fesili atu, “Afai e faia e se siteki se fonotaga a le au peresitene o Alii ma Tamaitai Talavou, o ai e pulefaamalumalu?” Ona sa valaauina ma vaetofia uma le peresitele o Tamaitai Talavou o le siteki ma le peresitene o Alii Talavou o le siteki e se tasi o loo umia ki o le perisitua (le peresitene o le siteki), i o latou valaauga, o i laua uma e i ai le pule o le perisitua lava lea e tasi ma o le mea lea e leai se tasi e pulefaamalumalu i le tasi. E fetaui lava mo i laua le auauai i le taitaiga o fonotaga.
E faamanuiaina tutusa e le Alii tamaitai ma alii e ala atu i Lana perisitua.
E saunia e le Alii le tele o faamanuiaga e ala atu i Lana perisitua lena e oo atu i tagata uma o e osia ma tausia feagaiga paia. Na aoao mai Peresitene Ballard, “O i latou uma o e osia feagaiga paia ma le Alii ma e faamamaluina na feagaiga o le a agavaa e maua faaaliga faaletagata lava ia, ia faamanuiaina e ala i auaunaga a agelu, e fagatua ma le Atua, e maua le atoaga o le talalelei, ma, mulimuli ane, ia avea ma suli faatasi ma Iesu Keriso i mea uma o i ai i lo tatou Tama.”8
Na faatonu mai Peresitene Iosefa Filitia Samita (1876–1972): “O faamanuiaga o le perisitua e le faapea e gata ai i na o alii lava. O nei faamanuiaga ua liligiina mai foi i … tamaitai faamaoni uma o le Ekalesia. … Ua ofo mai e le Alii i ona afafine meaalofa uma faaleagaga ma faamanuiaga e mafai ona maua e ona atalii.”9
Ma ao galulue tamaitai i le galuega a lo latou Tama, o le a faamanuiaina foi i latou e avea ma “suli lava o le Atua, o suli faatasi ma Keriso” (Roma 8:17; tagai foi fuaiupu 16).
O tamaitai faapea ma alii (nofofua pe faaipoipo) e mafai ona faaeeina i le mana o le perisitua i le malumalu.
I le 1833 na folafola atu ai e le Alii ia Iosefa Samita faapea o le Au Paia, o alii faapea ma tamaitai, o le a faaeeina i le “mana mai luga” (Mataupu Faavae ma Feagaiga 95:8). Na faamanino mai e Peresitene Ballard: “O le faaeega paia o se meaalofa moni lava o le mana. O i latou uma lava e ulufia le maota o le Alii, e galulue i sauniga o le perisitua. E tutusa lava i alii ma tamaitai.”10 O tagata agavaa uma na maua o latou faaeega paia ma tausia feagaiga na latou osia i le malumalu ua i ai le mana o le perisitua. O lea la, o tamaitai, faaipoipo pe nofofua, e mafai ona maua le mana o le perisitua i o latou aiga e tusa lava pe leai se asiasiga mai se o umia le perisitua.
Na fesili Sheri Dew, lea sa fesoasoani i le Au Peresitene Aoao o le Aualofa: “O le a le uiga o le mauaina o le mana o le perisitua? O lona uiga e mafai ona tatou maua faaaliga, faamanuiaina ma maua le fesoasoani e ala i le galuega a agelu, aoao e tatala le veli lena e vavaeina i tatou mai lo tatou Tama Faalelagi, ia faamalosia e tetee i faaosoosoga, ia puipuia, ma ia faamalamalamaina, ma faia ia sili atu le poto nai lo o le mea o loo tatou i ai—e faia uma lava e aunoa ma se fesoasoani faalelalolagi.”11 O le a le taunuuga sili o lenei mana ma e faapefea ona maua? Na faaali mai e le Alii faapea “o le mana o le faaleatua,” e aofia ai le mana e avea ai faapei o Ia, e faaalia e ala mai i sauniga o le perisitua (tagai Mataupu Faavae ma Feagaiga 84:20).
O nisi taimi e faaaoga eseese ai le pule o le perisitua i le Ekalesia nai lo totonu o le aiga.
O le faalapotopotoga o le Ekalesia e tuufaasolo i le pule; o le aiga e faaletama. Na faasoa mai e Peresitene Oaks “e tele mea e tutusa ai ma ni nai eseesega i le auala e galueaiina ai le pule o le perisitua i totonu o le aiga ma le Ekalesia.”12 E ala i le mamanu faalelagi, o le tane ma le ava e mafai ona i ai ni tiutetauave eseese, ae la te galulue faatasi o se “paaga tutusa.”13 Na aoao mai e Elder L. Tom Perry (1922–2015) o le Korama a Aposetolo e Toasefululua: “Manatua, uso e, i lau matafaioi o se taitai i totonu o le aiga, o lau ava, o lau soa lea. … Talu mai le amataga, sa aoao mai ai e le Atua le tagata, o le faaipoipoga e tatau ona tuu faatasia ai le tane ma le ava ia tasi. O lea, e leai se peresitene po o se sui peresitene i se aiga. E galulue faatasi le ulugalii e faavavau mo le manuia o le aiga. E tuu faatasia i le upu, i galuega, ma faatinoga, a o la’ua taitai, ma faatonu lo la’ua iunite faaleaiga. O i la’ua o se paaga tutusa. La te fuafuaina faatasi ma faatulaga mataupu a le aiga ma le lotogatasi a o agai atu i luma.”14
O le a le mea e tupu pe a maliu le toalua o se tasi? Na aoao mai Peresitene Oaks: “Ina ua maliu lo’u tama, sa pulefaamalumalu lo’u tina i lo matou aiga. Sa leai sona tofi o le perisitua, ae i le avea ai o se matua o loo ola o la la’ua ulugalii, o lea sa avea ai o ia ma tofi e pulea lona aiga. O le taimi foi lena, sa ia matua faaaloalo ai i le pule o le perisitua a lo matou epikopo ma isi taitai o le Ekalesia. Sa pulefaamalumalu o ia i lona aiga, ae sa latou pulefaamalumalu i le Ekalesia.”15
2. Pa Pupuni
O a nisi o pa pupuni na e mafai ona taofia tamaitai mai le iloaina atoatoa o lo latou mauaina o le mana o le perisitua?
Le mautonu o alii ma tamaitai foi e faatatau i le perisitua.
Na aoao mai Peresitene Oaks: “O le Perisitua Mekisateko e le o se tulaga po o se faailoga faapipii. O se mana faalelagi ua taofia i le faatuatuaga e faaaoga mo le manuia o le galuega a le Atua mo Lana fanau. E tatau ona tatou manatua i taimi uma o alii o loo umiaina le perisitua e le o “le perisitua.” E le talafeagai le faasino atu i “le perisitua ma tamaitai.” E tatau ona tatou faasino atu i ai, ‘o e umiaina le perisitua ma tamaitai.’”16
E ala i le fai atu, “O le a usuina nei e le perisitua se pese,” po o “tatou te manaomia ni perisitua ofo fua mai e o i le tolauapiga a Tamaitai Talavou,” ua tatou faia i tatou lava ma isi, e tusa lava po o le a le faamoemoega lelei, se faaleagaina e ala i le uunaia ma faatupuina le fenumiai ma faaitiitia ai le taua o le mana o le Atua.
Ma manatu ai faapea o le perisitua e leai se sootaga ma tamaitai.
Ina ua valaaulia e suesue le perisitua, o nisi o tamaitai na tali mai, “Ou te le manaomia ona oo i lena autu. E le faatatau ia te au.” Ae ona e faamanuiaina uma fanau a le Atua e le perisitua, tatou te manuia uma lava i le mauaina o se malamalama sili atu i ai. O le a faamanuiaina uma i tatou mai se malamalama sili atu o le perisitua. Mafaufau pe faapefea ona faamanuiaina le Ekalesia ma o tatou aiga pe afai o tamaitai ma alii o le Ekalesia e tutusa uma le malamalama ma le aoaoina lelei i upumoni e faatatau i le perisitua.
Na faamamafa mai e Linda K. Burton, o le sa avea ma Peresietne Aoao o le Aualofa, faapea o tamaitai e faapea foi alii e manaomia ona suesue i le autu o le perisitua. “Uso e, e le mafai ona tatou tutu i luga ma aoao atu na mea tatou te le malamalama i ai ma iloa mo i tatou lava.”17
Tuuina o tuaoi i tamaitai na e le o i ai moni lava iina.
E manino lava faapea o nisi o valaauga i le Ekaleisa e manaomia ai le faauuina i le tofi o le perisitua, ae e tatau ona tatou faaeteete ia aua nei taofia o tatou tamaitai i le faigofie lava ona faalagolago i aganuu, talafaasolopito, aoaoga sese, po o tu masani. Mo se faataitaiga, e mafai e tamaitai ona avea ma ni taitai ma faiaoga lelei, leo taua i aufono o le Ekalesia, ma ni faataitaiga mamana o le avea ma soo i tagata o soo se tausaga.
3. O Le A Se Mea e Mafai Ona Tatou Faia?
O nisi nei o ala e mafai e i tatou uma lava ona fesoasoani i o tatou tuafafine i le talalelei ia sili atu ona atoatoa le auai i le galuega e faataunuuina e le Atua e ala i Lona mana o le perisitua.
E tatau ona tatou masani i upu a le Usoga ma o tatou taitai tamaitai.
I le aluga o nai tausaga ua mavae, na saunoa ai sui sinia o le Korama a Aposetolo e Toasefululua e faapitoa lava i le matafaioi a tamaitai i le Ekalesia. Pe o tatou faalogo ea ma le faaeteete i nei lauga?
Mo se faataitaiga, i le 2015, na faailoa mai ai e Peresitene Russell M. Nelson, “E le mafai ona atoa le malo o le Atua ma e le mafai lava ona atoa e aunoa ma tamaitai o e osia feagaiga paia ona tausia lea, o tamaitai o e e mafai ona tautatala atu ma le mana ma le pule a le Atua!”18
Fesoasoani i tagata uma ia malamalama i le tulagaese o le matafaioi a tamaitai i le galuega o le perisitua.
Na faamanatu mai e Peresitene Ballard i tamaitai o le Aualofa faapea o lo latou “lio o faatosinaga o se lio tulaga ese—o se lio e le mafai ona kopiina e alii. E leai se tasi e mafai ona puipuia lo tatou Faaola i ni isi faatauanau po o le mana nai lo outou—o afafine o le Atua o loo i ai se malosiaga ma le talitonuga i totonu. O le mana o le leo o se tamaitai ua liua e le mafuatiaina, ma ua sili atu ona manaomia e le Ekalesia o outou leo i le taimi nei nai lo se isi lava taimi.”19 Na folafola mai e Bonnie L. Oscarson: “E manaomia ona vaai [tamaitai] o le Ekalesia ia i latou lava o ni tagata auai taua i le galuega o le faaolataga o loo taitaia i le perisitua ma ia le tau na ona matamata i ai ma lagolago.”20
Tuu atu le faamalo i taitai tamaitai.
E faamaoni lava, tatou te tuuina atu le gauai maoae i mea e tau mai e i latou tatou te lagolagoina o ni perofeta, tagatavaai, ma talifaaaliga. Latou te umia ki o le malo, ae taitaia e le Alii Lana galuega e ala mai ia i latou. E faaopoopo atu i a latou aoaoga, o taitai tamaitai o le Ekalesia ua vaetofia ma tuuina atu i ai le pule o le perisitua e saunoa ai i alii ma tamaitai foi o le Ekalesia. Matou te fia faalogologo ia latou aoaoga ma faalogo foi i fautuaga ua tuuina mai e le Atua ia i tatou e ala mai ia i latou.
Faaaofia tamaitai i aufono, e le gata i na o se tofi ae faatasi ma le faatinoga.
Na saunoa mai Peresitene Ballard: “Ma o soo se taitai perisitua o e e le fa’aofiaina ona tuafafine a taitai i le faaaloalo atoa ma fa’aaogaina ua ia le faamamaluina ma faalauteleina ki ua tuuina atu i ai. O lona mana ma uunaiga o le a faaitiitia seia oo ina ia aoaoina le ala o le Alii.”21
Aua le tuuina atu tali “ma le pule” i fesili e lei taliina mai e le Alii lava Ia.
Na lapatai mai Peresitene Oaks i tagata o le Ekalesia ia aloese mai le taliina o fesili e lei taliina mai e le Alii: “Aua ne‘i o tatou faia le mea sese sa faia i le taimi ua tuanai, … o le taumafai e faapipii ni mafuaaga i faaaliga. O mafuaaga e iu ane lava o mea e fai e tagata i se tulaga maoae. O faaaliga o mea ia tatou te lagolagoina o le finagalo o le Alii ma o le mea lena e taoto ai le saogalemu.”22
Ua tuuina mai e Peresitene Ballard se faataitaiga sili o lenei mea: “Aisea o alii—ae le o tamaitai—e faauuina i tofi o le perisitua? … E lei faaalia mai lava e le Alii pe aisea ua Ia faatulagaina ai Lana Ekalesia e pei ona Ia faia ai.”23 Na lapatai mai foi Peresitene Ballard ia i tatou “ia aua nei faasoa atu ni tala po o ni mea moni e faamoemoe e faatupu ai le faatuatua ae le faamaonia e moni po o ni malamalamaaga ma ni faamatalaga ua le toe faaaogaina o a tatou aoaoga faavae ma faiga ua tuanai. O se tulaga atamai tele le avea ma se faataitaiga masani o le suesue i upu a perofeta ma aposetolo soifua; ia ogatasi pea ma mataupu, aiaiga faavae, ma faamatalaga o i ai nei a le Ekalesia e ala atu i le mormonnewsroom.org ma le LDS.org; ma saili atu i galuega a tagata popoto aloaia, magafagafa lelei, ma faamaoni a le Au Paia o Aso e Gata Ai ina ia mautinoa ai e te le o aoaoina atu ni mea e le sao, tuai, pe le talafeagai.”24 Manatua o nisi taimi, “Ou te le iloa” o se tali moni sili lena. E tatau ona tatou suesue ma le maelega i le malamalama o le faatuatua ia aoao le upumoni faalelagi.
Fesoasoani i tamaitai ma alii ia sili atu le malamalama i le perisitua.
O le fesoasoani i alii ma tamaitai foi ia mautinoa lo latou mafaia ona suesue ma aoao e uiga i le perisitua e taua tele. O nisi nei o mau e mafai ona fesoasoani i lenei faagasologa e aofia ai, ae e le faatapulaaina i le, Alema 13 ma le Mataupu Faavae ma Feagaiga vaega 2, 13, 20, 76, 84, 95, 107, 110, 121, ma le 124. O le auai i le malumalu mo le faamoemoe o le sailia ma le faamaoni e le gata mo tali ae faapitoa lava mo fesili musuia e faatatau i le autu e taua tele lava.
Na faatonu mai Elder Bruce R. McConkie (1915–85) o le Korama a Aposetolo e Toasefululua: “O lenei aoaoga faavae o le perisitua—e le iloa e le lalolagi ma e itiiti lava ua iloaina e oo lava i le Ekalesia—e le mafai ona aoaoina mai na o tusitusiga paia. …
“O le aoaoga faavae o le perisitua ua na ona iloaina e ala mai i faaaliga patino. E oo mai, lea fasifuaitau ma lea fasi fuaitau, i le mana o le Agaga Paia ia i latou o e alolofa ma auauna i le Atua ma o latou loto atoa, manatu, mafaufau ma le malosi atoa. (Tagai i le MF&F 98:12.)”25
Fesoasoani i tamaitai ia malamalama e tatau ona latou tutu faatasi ma le Alii ma Ana perofeta.
Ua sili atu le feeseeseai ma le fenumiai o le lalolagi. O tamaitai, i le tele o ala, ua fetauai o le tasi ma le isi. Ua malolosi manatu ma o lagona i tamaitai ua matautia. Vaai faalemafaufau i le faatosinaga mo le lelei i lenei lalolagi pe afai o tagata uma o le Ekalesia o le a mafai ona vaai atu faapea o i latou, e pei o Eseta, ua faasaoina “mo se taimi faapenei” (Eseta 4:14) ma o i latou, taitoatasi ma i le avea ai o se vaega lototasi atoa, ua manaomia e taitai, ae le mulimuli, i le lalolagi.
4. Faaiuga
Na saunoa Ema Samita: “O le a tatou faia se mea tulaga ese. … Tatou te faamoemoeina ni mea tutupu tulaga ese ma ni valaau faanatinati.”26 O nei valaau faanatinati, e oo lava i talosaga, ua oo mai taitai o le Ekalesia i tamaitai i le aluga o nai tausaga ua mavae e lei faia lava muamua. Ao tatou malamalama atili i upumoni e fesootai i le perisitua, ia iloa mafuaaga tatau pe aisea ua tele ai tamaitai o loo nonofo i lalo ae o o latou faamanuiaga, ma faatino le malamalama tatou te maua mai e faatatau i tamaitai ma o latou avanoa e auai i le galuega o le perisitua, e mafai ona tatou “maua le olioli ma le filemu lena e oo mai i le iloaina e ala i lau aoaoga faapea na e uunaia se olaga, na e siitia se tasi o fanau a le Tama Faalelagi i lana malaga i se aso o le a toe olioli ai i Lona afioaga.27