Ua Na’o Tusiga Faatekinolosi

O I ai Ni Au Fesili e uiga i le Talalelei? O Auala Nei e Lima e Maua ai Tali

Saunia e Chakell Wardleigh

Mekasini a le Ekalesia

E i ai foi au fesili. Ma e leai se mea e fefe ai.

“E iai se tasi e i ai ni ana fesili?”

Na e faalogo i le mea lenei i le faaiuga o se lesona ma mafaufau, “Ioe, e miliona a’u fesili” po o le “Ioe, ua matua ou leiloa a,” ae e te nofonofo filemu pea?

Sa ou maua ai. Ma o nisi taimi ou te fefe pea i le faia o ni fesili.

Ou te fefe i le le lava o le iloa po o mea e mafaufau i ai isi, ma le mauaina o faamatalaga ia e ono tuu ai au ma le tele o nisi fesili.

E tusa lava foi, e le tatau ona i ai se fefe po o se maasiasi i le i ai o se fesili ma le manao ia malamalama atili, aemaise lava pe a oo i le talalelei. E finagalo le Tama Faalelagi ia tatou sailia le poto sili atu! E oo lava foi ia Elder Dieter F. Uchtdorf na faapea mai, “O le faia o fesili e le o se faailoga lea o le vaivai; ae o se taimua o le tuputupu ae.”¹

E tele lava mea e aoaoina e tagata uma. Ma o fesili e tatalaina ai le faitotoa i le malamalama ma le faatuatua sili atu—pe afai o loo e sailia ni tali i auala sao! O auala nei e lima e faʻamalamalama ai au fesili.

1. Siaki Au Punaoa

E tele punaoa lelei e faatuatuaina e mafai ona e maua ai se malamalamaaga atili e pei o tusitusiga paia ma anomea a le Ekalesia. Ae o loo i ai foi le tele o faamatalaga sese ma punaoa taufaasese o loo i ai foi i le lalolagi. E laki ona e mafai ona e iloatino le upumoni mai le taufaasese!

Ua tuuina mai e Anthony Sweat, o se polofesa lagolago o le talafaasolopito ma aoaoga faavae o le Ekalesia i le Iunivesite a Polika Iaga, ni fesili se lima e fesili ai i le iloiloina pe mafai ona faatuatuaina se punavai:

Pe o se punavai autu ea? (Tusia pe gaosia e se tasi na auai pe na vaai i le mea na tupu.)
O se tala faaonaponei? (Tusia i le taimi pe lata foi i le taimi o le mea na tupu.)
Pe o i ai se vaaiga faamoemoeina? (I le mea e gata ai le mafai, e saili e le tusitala ia sa’o, paleni, le faaituau, ma e le faapito.)
O le a lona sootaga i isi punaoa? (Aso, faʻamatalaga, talosaga, ma isi mea o loʻo o gatasi ma isi punaoa e faʻatatau i le mea lava e tasi.)
Pe o lagolagoina ona talosaga i se faamaoniga? (O faamatalaga e faavae i luga o faamaoniga mautu ma faamatalaga e lagolago ai.)²

Na aoao mai Elder Jeffrey R. Holland o le Korama a Aposetolo e Toasefululua, “I le tulaga o le faatuatua ma le talitonuga, e fesoasoani le taulai atu o au fesili ia i latou o e i ai moni lava na uiga!”³ O ana upu ma fesili o i luga e mafai ona e maua ai le mautinoa i le sailia o faamatalaga faatuatuaina.

2. Faalagolago i Upu a Perofeta

O perofeta ma aposetolo e aumaia aoaoga faavae ma le upumoni (ma o lea latou te tali mai ai mo outou!) e ala i faaaliga. Ua faafia ona faamafanafanaina au mai le faitau po o le faalogo i se lauga o le konafesi aoao pe a ou le mautonu pe faanoanoa.

E tusa lava pe e te le malamalama i mea uma e uiga i savali a taitai o le Ekalesia, ia manatua o a latou upu e aumai mai le Tama Faalelagi—e oo mai i se puna o le alofa ma le upumoni. Afai e te manatua ma faalagolago i upu a Elder Ulisses Soares: “O le i ai o perofeta o se faailoga o le alofa o le Atua mo Ana fanau,”⁴ o le a e aumaia le faamoemoe i lou olaga, e tusa lava po o le a le malamalama o loo e sailia.

3. Suesue i Tusitusiga Paia … Suesuega Moni

O le a se foliga o lau suesuega i tusitusiga paia? E mafai ona sili atu lo’u lelei! Ae a ou mafaufau loloto moni i mea o loo ou faitauina, ou te matauina se eseesega ia te au lava. Ou te lagona le filemu ma le faamoemoe. Ina ia tatala lou mafaufau i musumusuga i tusitusiga paia, faataitai motugaafa nei:

Ia amata ma faaiu au suesuega i se tatalo. A o e valaaulia le Agaga e fesoasoani ia te oe ia malamalama, o le a e iloa nisi malamalamaaga ma uunaiga sili atu.
Tusi i lalo musumusuga e te maua. O le faitauina o nei uunaiga mulimuli ane, e fesoasoani e te faia ai ni fesootaiga i lou olaga ma iloa ai tali i le aluga o taimi.
Faaalu sina taimi e nofo filemu ai. Nofo filemu ma gauai atu i mafaufauga ma lagona e faamaninoina pe a uma ona e faitau ma suesue. Manatua, e tautala mai le Agaga i se leo itiiti ma le filemu.

4. Aoao i Auala e Maua ai Faaaliga

I le taimi lenei o le olaga, sa sili atu ona ou manaomia le Tama Faalelagi nai lo se isi lava taimi e taiala a’u ma fesoasoani ia te a’u e faamalosia lo’u faatuatua. Ma sa ou le fiafia i nisi taimi pe a ou faia mea uma e valaaulia ai le Agaga ae ou te le maua lava ni tali mai le lagi. O le mea e faafetai ai, sa ou aoao mai ia Sister Sheri Dew, o le sa avea muamua ma Fesoasoani Lua i le Au Peresitene Aoao o le Aualofa, ina ia tatalaina laina o fesootaiga ma le Tama Faalelagi, fesili ifo ia te oe fesili nei:

Pe o fesiligia ea au fesili i le manatu o loo i ai ni tali?
Pe ua e naunau ea e faalagolago i le Alii ma atu ia te Ia lou talitonuga?

Ona ole atu lea i le Tama Faalelagi:

E aoao oe i le ala e talanoa mai ai ia te oe lava ia.
O Ona lagona e uiga ia te oe.

“Ona matau lea o le auala e avea ai o Ia ma faiaoga,” o lana tala lea. “e aofia ai tusitusiga paia o loo e tosina atu i ai, le faamamafa i savali o le konafesi aoao atonu na e misia le taimi muamua, ma isi mea faapena. … I le aluga o taimi, o le a Ia tau atu ia te oe, ma a o Ia faia, o le a e aoao atili ai e uiga i le iloatino o faaaliga e ala i le Agaga.”⁵

O nei fesili taua e lua ua faia ai se eseesega tele i lou tomai e iloa ai ma maua faaaliga.

5. Taofimau i Mea Ua e Iloa

O nisi taimi e le vave ona oo mai ni tali. O lau tali i le taimi nei atonu e na o le faalagolago i le Tama Faalelagi ma ia onosai. Manatua le fautuaga a Elder Uchtdorf ina ia “masalosalo i ou masalosaloga ae e te lei masalosalo i lou faatuatua.”⁶

Afai ua e lagona le lotovaivai, mafaufau i upumoni o loo e taofia i lou loto. Pe a ou tauivi, ou te manatua na taimi ina ua ou iloaina ma le mautinoa o au o se afafine faapelepele o ni Matua Faalelagi, e i ai se fuafuaga a le Atua mo au, ma o Iesu Keriso o lou Faaola.

A i ai ni au fesili, e mafai ona faigofie ona taulai atu i mea e te le malamalama i ai nai lo le mea e te faia. Ae afai ua e naunau e faamaluluina lou loto, ia tuu pea se vaaiga i le faavavau, ma faaogatasi lou loto ma le Tama Faalelagi, o le a ia taitaiina atu pea oe i le upumoni ma avatu ia te oe le faamoemoe seia oo mai se isi malamalama. Ma o le a e maua tali i au fesili uma i se aso (tagai Mataupu Faavae ma Feagaiga 101:32–36).