Autalavou Matutua
O Lo Tatou Faaosofia e Ola i le Talalelei
O le a i ai pea “aoaoga e faigata.” Ae o le a i ai pea foi le avanoa e filifili ai le faatuatua i luga atu o soo se masalosalo po o se le mautonu.
O le ala i le avea ma soo e tumu i faamanuiaga—o na faamanuiaga e vaaia a o isi e le mavaaia.”1 Ae e i ai taimi e le faigofie ai lena ala, e ui i ona faamanuiaga. O le avea ma soo o Iesu Keriso e manaomia ai le galue ma le ositaulaga, ma o nisi taimi e faigata ona maua le faaosofia e ola i poloaiga ma faia na osigataulaga.
I le avea ai o se talavou matua, atonu e te pisi foi oe e taumafai e fefulifulisa’i ia tiutetauave fou, faia faaiuga e fetuunai ai le olaga, ma tau fuafua po o le a tonu foliga o lou ala i le avea ai ma soo i aso o totoe o lou ola. I luga atu o na mea, atonu e i ai ni mea i aiaiga faavae o le Ekalesia po o le talafaasolopito po o aoaoga faavae o le talalelei e te le o malamalama lelei i ai ma faaosoosoga o loo e tauivi ai, faapea foi faamanuiaga o loo e faatalitali pe i ai ma fesili e uiga i le fuafuaga a le Atua mo oe.
Atonu o tau manatunatu nisi o i tatou pe o le ola ai i le talalelei e tusa ai ma faamanuiaga ua folafola mai ia te i tatou. Atonu tatou te finau atu e le fetaui ma i tatou, pe tele naua galuega, pe ua tele naua foi fesili nai lo tali o loo maua mai. Ae o le mea autu lava o loo faalagolago i ai o le faaosofia. Aisea e te faia ai mea o e faia ma ola i le ala o loo e ola ai? Aisea e te faaauau ai pea ona tausi i poloaiga, tusa lava pe le o i ai se tasi o matauina oe?
Tusa lava po o ai oe ma pe o le a le tulaga o le olaga o loo e i ai, o le filifiliga e sue lou faaosofia e ala i le atina’eina o lou faatuatua i le Faaola ma Lana talalelei o ia te oe lava.
A Matou Ō Ea Ia Te Ai?
O le sueina ma le tausisia o le faaosofia e ola i le talalelei e le o se lu’itau e fou i o tatou taimi. E oo lava foi i le taimi sa i ai le Faaola i le lalolagi, sa faigata lava i tagata ona malamalama ma sa usiusitai lava i mataupu faavae sa Ia aoaoina. E toatele Ona soo sa faalogologo a o Ia faamalamalama atu se manatu faavae sa foliga e faatiga ai ia te i latou—o Lana matafaioi o le “areto o le ola” (tagai Ioane 6:35–58). Sa latou tali atu ma le masalosalo, fai mai, “O le upu faigata lena; o ai ea se na te mafaia ona faalogologo i ai?” (Ioane 6:60).
Sa fesili atu Keriso, i le silasila atu sa faigata ia i latou ona talitonu pe taliaina lenei aoaoga faavae, “Tou te tausuai ea i lena mea?” (Ioane 6:61). Nai lo le faamuamua o lo latou faatuatua i lo latou masalosalo, o le toatele o Ona soo, “na toe foi ma e lei toe feoa’i i latou ma ia” (Ioane 6:66).
Peitai ina ua fesili atu Keriso i Ona soo na totoe “pe latou te o ese foi,” na tuu atu e Peteru le tali e tasi sa tatau moni ona tuuina atu: “A matou o ea ia te ai? o ia te oe upu o le ola e faavavau” (Ioane 6:67–68).
O Le Punavai o lo Tatou Faaosofia
Sa iloa e Peteru le punavai o lona faaosofia. Sa faalagolago i le mafuaaga autu o mea tatou te fai i le talalelei: o a tatou molimau ma le faatuatua ia Iesu Keriso. “Ua matou talitonu, ma ua matou iloa,” na tautino atu ai e Peteru, o oe o le Keriso, o le Alo o le Atua soifua” (Ioane 6:69; ua faaopoopo le faamamafa). O le mauaina o lena lava talitonuga maumaututu malosi ia Iesu Keriso, o Lona paia, ma Lana galuega, tatou te mafaia foi ona maua le faaosofia e faaauau ai ona ola i le talalelei—tusa lava pe foliga mai e faigata, tusa lava pe leai se isi o le a matauina, ma tusa lava foi pe tatou te le o mautinoa tatou te mananao ai.
O le a i ai pea “aoaoga e faigata.” Ae o le a i ai pea foi le avanoa e filifili ai le faatuatua i luga atu o soo se masalosalo po o se le mautonu. E pei ona saunoa Elder L. Whitney Clayton o le Au Peresitene o Fitugafulu, O le faaiuga e talitonu o le filifiliga aupito sili ona taua tatou te faia.”2
O le a la le mea tatou te faia pe a ta’u mai ia i tatou se tasi o na “upu faigata”?
1. Mulimulil i le faataitaiga a Peteru ma isi soo o e sa tumau faamaoni tusa lava pe na foliga faigofie ona “o ese.” Faalogo i fautuaga a perofeta, aposetolo, ma isi taitai:
“I taimi o le atuatuvale po o le le mautonu po o taimi e fesouaiina ai, tausisi pea i le faatuatua lena ua e atina’eina. … Pipiimau i mea ua uma ona outou iloa ma tutu malosi seia oo ina oo mai le malamalama sili atu.”3
“Ia faia se la’a se tasi faigofie agai i luma i le faatuatua—ona sosoo ai lea ma le isi. … Ia taulai i upumoni ua [e] talitonu i ai ma tuu na upumoni e faatumulia ai lou mafaufau ma le loto. …
“… Amata i upumoni faavae o le talalelei.”4
2. Tumau lou faalatalata i tusitusiga paia ma mulimuli i a latou aoaoga.
“Ia suesue ma le agaga tatalo ma mafaufau loloto i le Tusi a Mamona i aso taitasi.”5
“Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava au” (Ioane 7:17).
“A ia fai outou ma e anaana i le upu, a e aua le na ona faalogologo i ai” (Iakopo 1:22).
3. Tumau pea i le tausiga o poloaiga.
“O tali i a tatou fesili faamaoni e oo mai pe a tatou saili ma le naunautai ma pe a tatou ola i poloaiga. … E mafai ona fesoasoani lo tatou faatuatua e talitonu i mea tatou te le malamalama i ai i lena taimi.”6
“A o faaauau pea ona e usiusitai, … o le a tuuina atu ia te oe le poto ma le malamalama o loo e sailia.”7
I le faaiuga, e maua mai lo tatou faaosofia i le na o le faalagolago i le mea na ta’ua e Peteru. Pe tatou te talitonu o Iesu o le Keriso, Na te taitaia Lana Ekalesia, ma o loo i ai upu o le ola e faavavau? Pe o sili atu ea lo tatou faatuatua ia te Ia nai lo “upu faigata” atonu tatou te le malamalama i ai i le taimi nei?
O Taui o le Ola ai i le Talalelei
Pe a tatou filifili e alolofa ma mulimuli i le Atua ma Iesu Keriso ma tausia ia poloaiga tusa lava pe tatou te le malamalama atoatoa i ai, e le mafuatiaina ia taui. E fesili le tagata natura, “O le a se mea ou te maua mai ai?” Ua tali mai aoaoga o le talalelei: “O le filemu i le lalolagi lenei ma le ola e faavavau i le lalolagi a sau”; o se nofoaga ua saunia mo outou i maota o le Atua; o mea uma o i le Tama Faalelagi; ‘o le fiafia e le uma” (tagai MF&F 59:23; Eteru 12:34; MF&F 84:38; Mosaea 2:41); ma, faapei ona tau mai e Dieter F.Uchtdorf o le Korama Aposetolo Toasefululua: “I [totonu o le Ekalesia] o le a e maua ai se mea silisili ona taua nai lo se taui. … O iinei o le a e maua ai upu o le ola e faavavau, le folafolaga o le togiola faamanuiaina, ma le ala o le filemu ma le fiafia.”8 Ua na o ni nai mea ia.
A tatou tuuto atu i tatou lava e mulimuli ia Keriso ma usiusitai i Ana poloaiga, ua folafola mai ia i tatou nei mea uma ma isi. E le faapea ai o le ala o le a faigofie i taimi uma pe malamalama ai foi i taimi uma, ae o faamanuiaga ua folafola mai ia i tatou mai le tumau malolosi o le a faaauau pea ona tatala mai i le gasologa o o tatou olaga ma le faavavau
Peitai, po o le a le ofoofogia o nei faamanuiaga, e le tatau ona avea ma o tatou faaosofia faavae mo le ola ai i le talalelei. Tusa lava po o a ni au fesili o i ai, tusa lava po o le fea aoaoga faavae e te le o malamalama ai, o lou faatuatua ia Iesu Keriso ma Lana Togiola o le ki lea i lou faaosofia e ola i Lana talalelei, e faapei lava foi na i ai mo Peteru ma isi.
“O o tatou faamoemoega ma mafaufauga e laualuga i le tosinaina o a tatou taga fai,” na saunoa ai Elder Uchtdorf. “O le molimau i le moni aiai o le talalelei toefuataiina a Iesu Keriso, o le malosiaga aupito mamana lea o le faaosofia i o tatou olaga. Ua faafia ona faamamafa mai e Iesu le mana o mafaufauga lelei ma faamoemoega tatau: ‘Ia faalagolago ia te a’u i manatunatuga uma; aua le masalosalo, aua le fefe’ (MF&F 6:36).
“O le molimau ia Iesu Keriso ma le talalelei toefuataiina o le a fesoasoani i o tatou olaga e aoao ai i le fuafuaga patino a le Atua mo i tatou ona faatino ai lea e tusa ai. E aumaia ai ia i tatou le faamautinoaga o le moni, upumoni, ma le agalelei o le Atua, o aoaoga ma le Togiola a Iesu Keriso, ma le valaauga paia o perofeta o aso e gata ai.”9
Mo a’u, o le a ou taumafai pea, tusa lava pe faigata. O le a ou faia pea a’u tatalo ma suesue i a’u tusitusiga paia. O le a ou faia se taumafaiga e faamalosia ai la’u molimau i le Faaola i aso uma. Ma o le a ou taumafai pea e ola e pei ona Ia finagalo ai ma faalagolago i Ana afioga ma Ana perofeta soifua ma aposetolo e aoao mai au i le ala, ma faalagolago i le faaosofia e puna mai e le gata mai lo’u faatuatua ia te Ia ma le alofa mo Ia ae mai Lana taulaga e faavavau ma le alofa mo au.