Sa Digital Lamang: Mga Young Adult

Pagpakabuhi sa Pakigsaad: Usa Ka Giya alang sa Nauli na nga mga Misyonaryo [Covenant Living: A Guide for Returned Missionaries]

Ni Sadie Taylor-Jenks

Unsaon nako sa pagpahiayon sa pagpuyo og balik sa panimalay?

Ang matag misyonaryo mangutana sa ilang kaugalingon, “Unsaon nako nga mapadayong lig-on ang akong pagpamatuod human sa akong misyon?” Walay tawo nga magplanong mopauli ug mawala ang kamatuoran nga ilang gialimahan ug gitudlo matag-adlaw sa ilang misyon. Ang mga misyonaryo adunay impluwensyal nga mga kasinatian samtang nagpakabuhi sulod sa mga lagda nga anaa sa usa ka gamay nga puti nga handbook.

Apan ang estraktura sa usa ka misyon lahi ra kaayo sa estraktura sa panimalay.

Kon ang usa ka misyonaryo mouli na, molagpot sila ngadto sa usa ka kalibutan nga kaniadto pamilyar apan karon hingpit ang pagkalahi! Nan, sa unsang paagi, ang usa ka nauli na nga misyonaryo makakaplag og balanse tali sa paghikalimot sa ilang estilo sa pagkamisyonaryo ug pagpabiling matinuoron sa ebanghelyo ni Jesukristo? Sa gusto o dili, ang pagmata og alas 6:30 sa buntag matag adlaw, nga adunay 24/7 nga kompanyon, ug pagpamatuod ngadto sa matag tawo nga imong makita sa dalan tingali dili mahitabo kon wala ka nay name tag ug mobalik sa paglakaw ngadto sa tinuod nga kalibutan.

Nagserbisyo ko sa akong misyon sa Arkansas, USA. Mga usa ka bulan sa wala pa ko mauli, ang akong presidente sa misyon miingon: “Dili mahimo nga full-time nga misyonaryo ka sa hangtud. Gani, ma-full time nga misyonaryo ka lamang sulod sa usa ka gamay kaayo nga porsyon sa imong kinabuhi. Apan ang imong responsibilidad mao ang pagkahimong full time nga tigtuman sa pakigsaad hangtud sa hangtud.”

Kini nga mga pulong nakapausab kanako. Samtang gilantaw nako ang unahan, akong naamguhan nga ang pagpangandam sa pagpauli dili mahitungod kon unsaon nako sa pagtangtang ang akong name tag—mahitungod kini kon unsaon nako sa paggamit unsay akong nakat-unan ug nasinati sa akong misyon sa pagsunod sa akong mga pakigsaad.

Human niini nga pagkaamgo, militok ako og usa ka pag-ampo ug nagsugod sa paghimo og lista. Gibadlisan nako og linya paubos ang usa ka piraso nga papel. Ang diha sa wala nga bahin mabasa nga, “Kinabuhi sa Misyon ug mga Lagda.” Ang diha sa tuo nga bahin mabasa nga, “Pagsunod sa Akong mga Pakigsaad.” Mihimo ako og mga koneksyon tali sa duha ka mga lista aron malakip niini ang managlahing mga lihok nga kapanig-ingnan sa usag usa. Sa katapusang adlaw sa akong misyon, akong gikuha ang papel ug gigunting kini og katunga. Akong gibasa ang mga lagda nga akong gipaningkamutang masunod sa akong tibuok misyon, ug dayon gipilo kini ug giitsa sa layo. Akong gidala ang pakigsaad nga bahin sa papel ug gibitay kini sa akong bongbong sa balay.

Kini nga lista nakatabang kanako sa pagtuman sa mga pakigsaad diha sa akong hunahuna matag adlaw samtang nagpahiayon ako sa akong pagpauli sa panimalay gikan sa akong misyon. Ang anaa sa ubos nga lista naglakip sa mga ideya nga nakatabang kanako sa personal nga paagi, ug posibling makatabang usab kaninyo:

Kinabuhi sa Misyon ug mga Lagda	Mga ideya alang sa Pagsunod sa Akong mga Pakigsaad
Mobangon alas 6:30 sa buntag matag adlaw.	Naningkamot ako nga magpuyo og kinabuhi nga gipahinungod ngadto sa Dios. Momata gayud ako og sayo igo nga akong mapuno ang adlaw sa katuyoan.
Mobisita sa mga investigator ug dili kaayo aktibong mga miyembro sa matag adlaw.	Maningkamot ako nga magbangutan uban niadtong nagbangutan ug mohupay niadtong nagkinahanglan og kahupayan. Makig-ilaila ako, mobisita, ug mohigugma niadtong mga anaa sa akong palibut.
Motaod sa akong name tag ug mga pangmisyonaryo nga mga sapot.	Ang akong endowment mipanalangin kanako og garment sa templo. Magsul-ob ako og bisti sa paagi nga marespeto ang akong garment ug motagamtam sa pagsul-ob og normal nga mga bisti pag-usab.
Moadto sa mga misyonaryo nga miting matag semana.	Aduna akoy kahigayunan nga makabag-o sa akong mga pakigsaad matag semana kon mangandam ako alang sa sakramento ug sa pag-ambit sa sakramento.
Molakaw ug mopamatuod sa tanang tawo nga imong mahimamat.	Ako nakigsaad nga maningkamot nga mahimong sama sa akong Manluluwas. Gisaaran ako nga kon ako mohinumdom Kaniya ug motuman sa Iyang mga sugo, ako kanunay nga makabaton sa Iyang Espiritu uban kanako. Maningkamot ako nga matagad ang matag usa isip mga anak sa Dios ug mosunod sa Espiritu aron mahibalo unsaon nako sa pagtabang ug pagserbisyo kanila.
Walay pakig-date (o bisan unsang romantiko nga mga pakigrelasyon).	Mahimo nakong trabahoon ang akong tumong nga masilyo sa templo pinaagi sa pagpakig-date niadtong kinsa adunay susama niana nga tumong ug magtukod og makahuluganong mga relasyon sa uban.
Walay social media, TV, mga sine, paghugoy-hugoy, ug uban pa.	Mogamit ko og maayong media sa pagkat-on, paglig-on sa uban, ug paglingaw sa kinabuhi.
Magtuon sa mga kasulatan sulod sa duha ka oras matag adlaw.	Ganahan ko sa Espiritu ug sa kahibalo nga moabut tungod sa akong pagtuon sa kasulatan. Magtuon ako sa mga kasulatan matag adlaw sulod sa dili mominos 10 ka minuto.

Ang akong misyon nag-andam kanako sa dili mahanduraw nga mga paagi aron makatuman sa akong mga pakigsaad. Naghimo na ako karon sa unsay angay nakong buhaton aron mapadayong lig-on ang akong pagpamatuod. Ang mga misyon dili maoy dag-anan o butang nga hikalimtan na lang human sa imong pagpauli. Ang mga misyon usa ka latayanan sa imong kinabuhi isip usa ka tighupot sa pakigsaad ug tibuok kinabuhing pagdisipulo ni Kristo. Gahini og panahon ang pagpangutana sa imong kaugalingon kon ikaw nakasabut ba gayud, nagtutok, ug nagsunod sa imong mga pakigsaad. Kadto nga mga pakigsaad nagsumpay kanato ngadto sa Langitnong Amahan, naghatag kanato og kalig-on gikan sa kalangitan, ug nagtanyag og dakong kahayag sa atong inadlaw nga pagpakabuhi.

Si Sadie Taylor-Jenks nagpuyo sa Indiana, USA, kauban sa iyang bana. Bag-ohay lang siyang migradwar sa iyang master‘s degree sa criminal justice reform ug nagtudlo og sayo sa buntag nga seminary ngadto sa iyang walay kupas nga paboritong mga kabatan-onan! Nagpadagan siya og usa ka lokal nga catering nga negosyo ug nanginlabot kaayo sa buluhaton sa pagpangsagop sulod sa iyang komunidad.

Pagdiskobre pa og Daghan

Makakita ka og daghan pa nga mga artikulo mahitungod sa pagmaniobra sa mga transisyon sa kinabuhi diha sa Mga Young Adult nga seksyon sa Pebrero 2021 nga Liahona.

Susiha ang YA Matag Semana, nga makita sa seksyon diha ubos sa Mga Tigbasa [Audiences] diha sa Gospel Library nga app, alang sa bag-o, makapadasig nga sulod alang sa mga young adult matag semana.

Mahimo kang mosumiter sa imong kaugalingon nga artikulo, mga ideya, ug feedback diha sa liahona.ChurchofJesusChrist.org. Mahinamon kami nga makadungog gikan kanimo!