Mga Young Adult
Akong Inadlaw-adlaw nga Pakigbatok sa Kamingaw
Ang tagsulat nagpuyo sa Prague, Czech Republic.
Sa daghang paagi, ang pagpamiyembro sa Simbahan nakapadugang sa kamingaw nga akong gibati sukad nagdiborsyo ang akong mga ginikanan. Apan kini usab nakatabang kanako nga makakita og paagi nga makalingkawas sa akong kamingaw.
Litrato gikan sa Getty Images
Sa labing taas nga panahon sa akong kinabuhi, mibati ko nga ingon og ako nag-inusara. Sa sinugdanan, ang kamingaw mao ang usa ka bag-ong pagbati alang kanako, tungod kay ako gikan sa usa ka pamilya nga lima, mao nga sa bata pa ko, kanunay akong nalingaw sa pundok ug kasaba palibut kanako sa panimalay. Nasayud ko nga ako wala mag-inusara.
Makaguol, sa akong pagkatin-edyer, ang akong mga ginikanan nagbulag. Human niana, nagsugod ko nga mibati nga nag-inusara. Naningkamot ko sa paghunahuna kon unsay buhaton, mogawas gikan sa akong hayahay nga kahimtang aron makighigala sa eskwelahan. Naglaum ko nga malingaw nga makaila og daghang mga tawo sa eskwelahan, sama sa akong nasinati sa panimalay. Apan bisan og gilibutan sa mga tawo, mibati gihapon ko nga nag-inusara. Kini nga pagbati mikunhod paglabay sa pipila ka tuig sa dihang akong nakaplagan ang Simbahan.
Usa ka adlaw ang mga sister missionary nanuktok sa akong pultahan ug ang akong mama mitubag. Nahinumdom ko sa iyang gisulti kanila, “Ah, ako dili interesado, apan basin ang akong anak nga babaye. Kadiyot, kuhaon nako siya.”
Sa dihang nagsugod ko sa pagpakig-istorya kanila, akong gibati ang Espiritu nga nagsulti kanako sa pagpaminaw. Human sa pipila ka bulan sa pagpaminaw ug pagkat-on, nasayud ko nga kini maoy akong gipangita. Bisan tuod wala nako batia sa pagsugod, ang akong desisyon nga magpabunyag nakatabang nako nga maduol dili lamang ngadto sa Ginoo ug apan usab hapit na mahuman ang akong nagpadayon nga pakigbatok sa kamingaw.
Pagbati nga Nag-inusara isip usa ka Kinabig
Sa dihang mihukom ko nga gusto kong magpabunyag, ang akong pamilya wala kaayo magtagad mahitungod niini. Bisan tuod ang akong inahan ug usa sa akong mga igsoong lalaki mitambong sa akong bunyag, ang ubang sakop sa pamilya misalikway kanako tungod kay dili na kami pareha og relihiyon.
Sa sinugdanan, lisud kaayo kini, ug ako mibati nga nag-inusara labaw pa kay sa kaniadto. Apan sa wala madugay, usa sa akong mga ig-agaw mihukom nga mahimong usa ka deboto nga Hindu, nga lahi usab sa unsay gipraktis sa among pamilya. Siya mitahud sa akong pagpili sa pag-apil sa Simbahan tungod kay siya mihimo og susama niini. Tungod sa iyang ehemplo sa gugma ngari kanako, ang ubang mga sakop sa pamilya wala na maglikay kanako.
Sa eskwelahan, ako nakaamgo nga ako wala na gayud mahiangay. Ug sa trabaho, ang mga tawo mitan-aw nako sa dili maayong paagi dihang giingnan nako sila nga ako nabunyagan. Wala ko mobati nga maulaw—ang akong desisyon dili sayop, ug ako nasayud gikan sa kinahiladman sa akong kasingkasing—apan ang akong mga higala wala makasabut sa mga kausaban sa akong kinabuhi, ug kadaghanan kanila mihukom sa paghunong sa pagpakighigala kanako.
Ang Pakighigala og Bag-ong mga Higala
Tungod niining tanang malisud nga mga kasinatian, nagpadayon ko sa pag-ampo, ug akong nabati ang kahupayan nga gisaad kanako pinaagi sa Espiritu sa usa ka panalangin sa pagkapari nga akong nadawat. Usa ka adlaw ako nangahas sa pagpangutana, diha sa pag-ampo, “Nganong gibati nako nga nag-inusara?” Ug ako nakadawat og tubag o, hinoon, usa ka saad—nga ako makakita og bag-ong mga higala, mga higala nga makasabut nako.
Ug ako nakakita gayud! Nakakita ko og bag-ong mga higala, ang uban kinsa dili mga miyembro sa Simbahan apan sa gihapon nagtahud ug nahigugma kanako. Nakakita usab ako og mga higala sa Simbahan kinsa nahimong sama sa akong pamilya.
Ingon nga usa ka maulawon ug ang pagpakigsulti sa mga tawo dili kaayo sayon nga butang alang kanako. Kasagaran ang mga tawo maoy moduol kanako, apan sa high school wala kaayoy daghang tawo ang gusto nga makigsulti nako. Mao nga nalipay ko nga ako nakahinumdom niining karaan nga paagi nga akong nakat-unan—mopahiyum ko. Kon mas mopahiyom ang usa ka tawo, mas maduolan kana nga tawo. Nakaamgo ko nga kon mas mopahiyum ko sa mga tawo, mas makigsulti sila kanako ug kini nahimong mas sayon alang kanako nga mahimong ilang mga higala.
Pagbarug uban sa Langitnong Amahan
Usa ka mas maayong tubag sa akong pag-ampo mao ang pakigpulong ni Presidente Thomas S. Monson (1927–2018) “Magmaisugon sa Pagbarug nga Mag-inusara” (Liahona, Nob. 2011, 60–67). Paglabay sa panahon, kini nga pakigpulong nagtudlo kanako og usa ka mahinungdanon kaayo nga mga butang mahitungod sa kamingaw: kamo dili gayud magbarug nga mag-inusara kon kamo mobarug uban sa Ginoo.
Aduna gihapoy mga adlaw nga lisud alang nako nga magbarug uban Kaniya. Ang kahadlok sa ubang tawo nga nagbiay-biay kanako ug sa akong mga gituohan lisud. Adunay mga tawo nga nagsulti kanako nga bisan unsang relihiyon walay pulos ug nga ako ingon og sama sa amang nga karnero. Human makasusi sa akong relihiyon, ang ubang mga tawo mitratar nako ingon og ako adunay usa ka grabe nga makatakod nga sakit. Niining tanang kasinatian mihimo kanako nga mobati og gamay nga walay kasiguroan ug nag-inusara. Mao kini ang inadlaw-adlaw nga panag-away, apan kini mao ang akong nadag-an matag adlaw, pag-usab, uban sa tabang ug hingpit nga suporta sa Ginoo.
Kada adlaw, ako naningkamot sa pagsunod sa Espiritu. Matag higayon nga ako maminaw sa Espiritu ug makigsulti sa mga tawo, ang inspirasyon gikan sa Espiritu makapahimo kanako sa pagserbisyo sa uban. Kini naghatag kanako og kahigayunan sa paghinumdom nga ako wala mag-inusara. Labing importante, ang pagpaminaw sa Espiritu sa kanunay naghatag kanako og kahigayunan sa pagpakigbahin sa akong pagpamatuod. Nakaamgo ko nga ang pagpakigbahin sa akong pagtuo niini nga paagi makatabang nako nga dili kaayo mahadlok ug mas makasabut sa uban. Sa wala pa ako makaamgo niini, nga wala ako mag-inusara—sa pagpakig-istorya ni bisan kinsa nga akong gikaistorya nianang higayuna—nagbarug ko uban sa Espiritu. Uban sa Espiritu sa inyong habig, kamo dili gayud mag-inusara.
Sa daghang mga tuig ug sa mga higayon nga mibati nga nag-inusara, ang Ginoo nagsulti kanako balik-balik nga ako mao ang Iyang pinalanggang anak nga babaye ug nga Siya nahigugma kanako. Nganong mobati ako nga mag-inusara kon ang akong Amahan nagbarug uban nako? Nganong mobati ko nga mag-inusara kon Siya usa lang ka pag-ampo ang gilay-on?
Sa akong inadlaw-adlaw nga pakig-away batok sa kamingaw, mitawag ko sa akong Langitnong Amahan nga dili lamang mobarug kanako apan sa pagtabang kanako kanunay nga mobarug tupad Kaniya. Ako nasayud nga Siya wala gayud mobiya kanako aron makig-away nga mag-inusara ug kanunay mibarug tupad kanako, naghigugma kanako.