Autalavou Matutua
Faafiaatoatoa O se Taaloga Oona o le “Vaai-i-Eseesega”
E alala le tusitala i Tasmania, Ausetalia.
E i ai taimi e tatou te manatu uma ai lava ua tatou le au i le fua. Ae e tatau ona tatou mautinoa o loo sa’o ona tatou fuatia i tatou lava.
Ata na tusia e Kelsey Garrity Riley
A o ou laitiiti lava, sa ou fiafia e taalo “Vaai-i-Eseesega” i le matou nusipepa o le lotoifale. E lua ata toeitiiti lava tutusa lelei, e i tafatafa o le isi le isi, sa tuuina mai o se lu’i e su’e ia eseesega laiti lava i le va o ata ia. Afai e te matuā latalata lau tulimata’i i vaega taitasi o le ata, e mafai ona e faamanuiaina e maua le tele, a le o mea uma, o eseesega. O le faamoemoega o lenei gaoioiga e lē ina ia talisapaia le ata pe ia faamae’aina le ata lona lua; o le faamoemoega ina ia vaaia vaega lē atoatoa uma i le kopi lēmae’a o le ata muamua.
O se luitau masani mo talavou matutua o le lagona ua toilalo ma lē āu i le fua o tulaga faatonuina ua matou vaai faalemafaufau i ai e tatau ona āu i ai. Ua faateleina lava ona matou faatusatusa i matou lava i isi ma vaai atu i se tasi tagata ua amataina se galuega faamanuiaina, o se isi ua ausia togi atoatoa i a latou aoga, o se isi ua i ai se lio o uo toatele atu, ma se isi ua matou vaai atu i ai e sili atu le agalelei, sili atu le poto, sili atu le lima foai ma faaaloalo nai lo i matou. Ae leiloa foi pe laitiiti atu nai lo matou! E matuā faigofie lava ona taaalo i le “Vaai-i-Eseesega” i le va o i matou ma tagata o loo siomia i matou ma i taimi uma lava o loo mafai ona matou tusia ai se lisi umi lava o mafuaaga e “lelei atu ai” isi tagata nai lo matou.
O lenei ituaiga o mafaufauga e patino lava lona ogaoga pe afai tatou te manatu o lo tatou lava taua e fua ia tatou taunuuga faamanuiaina, o tatou uiga, po o le tele o a tatou oa faalelalolagi. O le isi mea, o la tatou taaloga o le “Vaai-i-Eseesega” e seāseā lava faailoa mai ai malosiaga ma uiga faaKeriso ua tatou atinaeina i o tatou olaga ma lē amanaia le upu moni faavae faapea e ia i tatou uma lava le gafatia e atoatoa ai faapei o Keriso … i se aso. Ina ua fetalai le Faaola, “Ia outou atoatoa e pei lava o a’u, po o lo outou Tamā o le o i le lagi e atoatoa” (3 Nifae 12:48), ou te talitonu sa Ia saili e sii a’e la tatou vaai ma aumaia ia i tatou le faamoemoe—o le mea moni, o Ana valaaulia uma o se valaau ia salamo ma se faaali mai o Lona talitonuina o i tatou e mafai ona tatou ausia le mea ua Ia finagalo ia tatou faia. O le luitau tele mo i tatou o le siitia a’e lea i luga atu o manatu faanatura e fuā, tetee, faanoanoa, ma lē mautonu, ae ia filifili e lotomaualalo, salamo, faatuatua, ma faamoemoe.
Amiotonu Nei, Atoatoa Mulimuli
O se vaega o le foia o le “faafiaatoatoa” leaga lea o loo faatau atu e le fili o le malamalama lea po o le a moni lava le atoatoa. I se saunoaga a Peresitene Russell M. Nelson i le mataupu o le atoatoa, sa ia faamalamalama ai o le upu Eleni e mafua mai ai le atoatoa i le Mataio 5:48 o lona uiga o le “faaatoatoaina.”1 E leai ma se isi o i tatou e “faaatoatoaina” i lenei olaga faaletino; o le faaatoatoaina o le a oo mai i le faavavau.
A tatou iloa o le atoatoa e lofituina ai, e mafai ona tatou la’a i ni sitepu i le ala i le atoatoa: mo se faataitaiga, a o tatou totogi atoa le sefuluai, e mafai ona tatou tausia le poloaiga o le sefuluai ma le atoatoa. A o tatou tatalo i aso uma, atonu tatou te iloa ai ua tatou atoatoa i le filifili lea e tatalo i aso taitasi. O la’a taitasi i luga o le ala i le atoatoa (e ta’ua foi o le ala o feagaiga) ua fuafuaina e aumaia ia i tatou le olioli. O iloiloga faifaipea faaletagata lava ia o le a toe faamautu maia ia i tatou o loo tatou alualu i luma ma o loo fiafia lo tatou Tamā i le āluga faaleagaga o o tatou olaga.
O le amiotonu ma le atoatoa e le ni upu uiga tutusa. O le atoatoa o se taunuuga, a o le amiotonu o se mamanu o le faatuatua ma le salamo lea tatou te filifili ai i aso taitasi. Afai o le atoatoa o se taunuuga, o lona uiga o a tatou feagaiga o o tatou tusifolau ma o le amiotonu o le faasitepu i le faigamalaga. Afai o la tatou vaaiga lea i le atoatoa, e mafai ona tatou faamoemoe i mea lelei e oo mai a o tatou atinae ma le onosai ma le filigā mamanu amiotonu.
Faamoemoe i le Toilalo, Alofa i le Salamo
Lata mai nei lava, sa ou tomanatu ai i se saunoaga a Elder Lynn G. Robbins o le Fitugafulu: “O le salamo e le o se fuafuaga faaleoleo [a le Atua] pe a te’i ua tatou toilalo. O le salamo o Lana fuafuaga lea, ma le silafiaina o le a tatou toilalo lava.”2 O le olaga lenei o le taimi faataitai ua tuuina mai ia i tatou e sauni ai mo le faavavau. O le salamo e saunia i tatou e ala i le suia o le auala tatou te vaai ai ia i tatou lava ma aumaia i tatou ia latalata atili atu i le Atua ma le Faaola. E tatau ona tatou faamoemoe e toilalo pe faia mea sese, masalo i aso uma; e le tatau ona le faamoemoe i ai, e le tatau foi ona taitaia i tatou i le faanoanoa. O le mea moni, e tatau ona tatou fiafia pe a tatou iloa o tatou vaivaiga ma sese a o i ai lo tatou avanoa e taitoalua ai ma Keriso i le suia o o tatou vaivaiga i malosiaga.
O le mea lea, e ui o le atoatoa o le sini, o le ala tatou te uia e aofia ai le salamo ma le alualu i luma i aso taitasi faatasi ma le ataata i o tatou foliga ma le faafetai i o tatou loto.
Tepa Atu ia Keriso
O Elder Neal A. Maxwell (1926–2004) o le Korama a Aposetolo e Toasefululua lea na saunoa, “O le mea tatou te mananao pea lava pea i ai, o le mea lena o le a avea ai i tatou, ma o le mea foi lena o le a tatou maua i le faavavau.”3 O a tatou filifiliga i aso taitasi e fuafuaina tagata o le a avea ai i tatou. Afai o lo tatou faanaunauga o le loto o le avea faapei o le Faaola ma o lo tatou uunaiga o le alofa mo Ia, o le a atagia mai ia tatou filifiliga lena faanaunauga ma o le a sui ai i tatou.
Pe a tatou fetaiai ma aualapoloka, pe a tatou faia mea sese, ma pe a tatou pa’ū atu i faaosoosoga, e mafai ona tatou tali atu e ala i le tepa ese mai ia Keriso, pe e mafai ona tatou tepa atu ia Keriso i le faatuatua, faamoemoe, onosai, se loto nutimomoia, ma se agaga salamo. O le tali i o tatou tulaga faigata e maua i taimi uma ia Keriso ma Lana talalelei. A o tatou tepa a’e ia Keriso, o le a Ia aoao i tatou ma suia i tatou.
O le tele o luitau o le olaga e pa’ū i vaega e lua: o i latou o e o le a faafoia i le olaga lenei ma i latou o e o le a faafoia i le olaga a sau, atonu o se lē atoatoa, faanoanoa po o le atuatuvale, po o se faaosoosoga faifaipea. E ia Iesu Keriso le mana e faaatoatoa ai i tatou. Ma e ia te Ia le mana e suia i tatou. A o tatou filifilia le lotomaualalo, ua tatou talia le taimi a le Alii ma Lona finagalo ma afai tatou te saili ma le faamaoni i Lana fesoasoani ma le taitaiga, tatou te maua le malosi, faamalosiauga faalelagi, ma le filemu.
Ia Faaeteete i le Faamaualuga
E lē ofoina mai lava e le fili ni tali lelei i o tatou luitau. A oo ina tatou iloaina o tatou toilaloga ma vaivaiga, na te faamalosiauina i tatou e nanā i latou mai isi auā tatou te mananao e foliga atu tatou te matuā atoatoa lava. O se tasi lea o foliga o le faamaualuga. E ofoina mai e Keriso i taimi uma lava tali lelei i o tatou luitau, ae peitai, e lē faapea o le a faigofie ai Ana tali. Mo se faataitaiga, ua valaaulia i tatou e le Alii e faatuatuaina o Ia a o tatou faasoa atu le talalelei ae o loo ta’u mai e Satani ia i tatou e le tatau ona tatou faasoa atu le talalelei auā tatou te lē tautala poto. Ae ua folafola mai e le Alii o le a Ia tuuina mai ia i tatou le tala e fai “i le minute tonu lava” (Mataupu Faavae ma Feagaiga 100:6). O le mea moni, e fafaga e le fili o tatou masalosaloga ae fafaga e le Alii lo tatou faatuatua.
Nai lo le faapisi o i tatou lava i le taaalo i le “Vaai-i-Eseesega” ma le “Nanā-le-Vaivaiga,” e finagalo Keriso ia tatou tepa atu ia te Ia ma galulue i le “Suia-le-Vaivaiga.” O le faamaualuga e faavae i le faatauvā; ae peitai, o le olaga e le i fuafuaina e fai o se tauvaga. A o tatou filifilia Keriso e fai ma o tatou faataitaiga, uō, ma lagolagosua, e mafai ona tatou tuu esea a tatou faatusatusaga leaga ae saili le filemu o i le ala i le atoatoa.
Manatua, i le olaga tatou te feagai uma lava ma le luitau o le lē atoatoa ma ona vaivaiga e o mai faatasi ai. Afai tatou te vaai atu i isi o loo tauivi, e mafai ona avea i tatou ma malosiaga lelei e siitia maualuga i latou. Afai tatou te vaai atu i isi ua faamanuiaina, e mafai ona tatou ofo atu ni viia faamaoni. Ae e leai lava se avanoa tatou te manuia ai i le taumafai lea e fuafua pe tutusa lelei lo tatou amiotonu ma se isi tagata pe leai. Atonu e lē iloa mai e isi lo tatou tāua, ae e silasila mai i ai le Atua: ia Ia o i tatou e faavavau lo tatou taua. O tatou lava o Ana fanau i taimi uma. E alofa lē faatuaoia o Ia ia i tatou, ma ua fiafia o Ia ia tatou taumafaiga amiotonu e avea faapei o Ia.
O Iesu Keriso e lē o se tagata matamata e lē auai i o tatou olaga. O Ia o lo o auai, silafia, ma galue e faaolaina i tatou ma taitai i tatou e toe foi atu i se aiga selesitila. O Lona malosi e mafai ai ona tatou faia o mea uma ma e ala ia Iesu Keriso e leai se mea e lē mafai. I lenei olaga ua faamatalaina i le lē atoatoa, o le Alii o lo tatou faamoemoe ma le faataitaiga ma o le a Ia lē faamasinoina i tatou e ala i le faatusatusa lea o i tatou i o tatou uso ma tuafafine. E silafia e Ia o tatou loto ma o le a Ia tuu le matagi i lā o o tatou vaa i le faigamalaga alualu pea i luma i le faaatoatoaina. Ia tatou galulue i le faatuatua, salamo ma le tepa atu ia Keriso ma le faamoemoe i Lana folafolaga faapea i le iuga, e mafai ona tatou faaatoatoaina ia te ia” (Moronae10:32).