Mai le Misiona
O le Mea na Aoaoina ai A’u e le Tama Faalelagi e Uiga i le Suia o Loto
I se tasi o aafiaga faigofie, sa aoaoina ai a’u e le Tama Faalelagi e popole o Ia mo faifeautalai ma i latou o loo latou aoaoina—ma e mafai ona Ia suia so’o se loto.
Sa ou tilotilo ifo i lalo, ma na faatumulia o’u mata i loimata. O Yannick (ua suia le igoa) na faatoa uma lava ona tautala ma le faaiuga mulimuli: “E le mafai ona ou faamagaloina i latou. E le mafai ona ou lafoa’ia lenei tiga. E faigata tele lo’u loto.” E ui ina sa ou malamalama atoatoa i lana faaFarani, sa le mafai ona ou malamalama i ona lagona.
I le sefulu tausaga talu ai, sa auai ai Yannick i le Ekalesia e ui lava i le tete’e mai o lona aiga toatele. Sa ia te ia le lototele e alu ai i se misiona ma tulimata’i atu i se aafiaga e suia ai le olaga e ala i le tuuto atu i le lua tausaga i le Alii. Sa lei iloa e ia pe faapefea ona suia ai le olaga atoa. Na o ni nai masina talu ona alu ese atu mo lana misiona, sa toe foi ai Yannick i le fale. Na avea o ia ma taula’iga o tala tiga ma le le sa’o mai soa le usiusitai, sa talia o ia i le fale e tagata o le Ekalesia o e na aveina tala feavea’i ma meamoni. Sa lagona e Yannick le pei e leai se tasi na manao ia te ia i le lotu. Sa tonu ia te ia e le toe fo’i.
I le mavae ai o le 10 tausaga, sa tonu ai ia Yannick ua o’o i le taimi e lafoa’i ai ona tiga ma le ita. Sa ia sa’ilia faifeautalai i lana eria—o a’u ma la’u soa. Sa ma asiasi ia Yannick mo ni nai vaiaso, faasoa atu savali faaleagaga ma le iloiloina o mataupu faavae o le talalelei a o matou saofafa’i i le paolo o ona mago. E lei taofia lava e Yannick le suesueina o tusitusiga paia po o le aoaoina e uiga i le talalelei. E lei aveesea lava lana molimau e uiga i le Ekalesia, ae o le maasiasi na ia oo i ai ina ua mavae lana misiona na taofia ai o ia mai le olioli i faamanuiaga o le talalelei. Sa ou lagonaina sa auina atu a’u i lana eria mo se mafuaaga, atonu e fesoasoani ia te ia e toe iloa ai nei faamanuiaga.
Sa ou manatu ua i ai se alualu i luma, ae ina ua uma ona faalogo i mea sa ia fai mai ai e uiga i le le mafai ona faamagalo atu, sa vave ona ou iloaina o loo i ai pea se auala umi matou te ui ai.
Sa faatautau lo’u ulu, ma mafaufau po o le a se tala e fai atu. Sa tatagi upu a Yannick i ou taliga: “E faigata tele lo’u loto.” O laʻu soa na foliga mai ua le magagana e pei ona ou lagonaina. Sa ou tilotilo atu i le Tusi Paia i o’u vae, ma faalii le leoa ona o loo tusia i le faaFarani. I le mavae ai o le iva masina i le galuega faamisiona, sa lei lelei lava lo’u malamalama i mau i le Tusi Paia i le gagana Farani. Sa ou faia se tatalo i lo’u loto, ma aioi atu ia iloa po o le a se mea e mafai ona ou fai atu ai i lenei tagata na lagonaina o lona loto ua le mafai ona faamaloloina.
O le tali, “Esekielu mataupu 36,” na oo mai i lo’u mafaufau.
Sa ou taumafai e mafaufau, ma taumafai e manatua pe na ou taulotoina ni mau i le Esekielu. Ou te le i faia.
“Esekielu mataupu 36.” Sa toe oo mai le tali, ma le leo i lou mafaufau.
Sa ou tatalaina la’u Tusi Paia ma susu’e atu i le Esekielu 36. Sa autilo o’u mata i le itulau; Ou te lei iloa se mea. Aisea na le mafai ai ona i ai i le Igilisi? O le a le mea na finagalo le Tama Faalelagi ou te sailia? Sa faaauau pea ona ou faia.
“Yannick, o loo i ai se mau i le Tusi Paia ou te fia faasoa atu ia te oe. I le Esekielu mataupu 36 …”
Sa ou le iloa po o le a le tala e fai atu, ae ina ua ou toe vaai atu i le itulau, sa tau tonu o’u mata i le vaega sao: “… fuaiupu 26.”
Na ou faitauina, “Ou te avatu foi ia te outou le loto fou, ma ou tuu i totonu ia te outou le agaga fou; ou te aveesea le loto maa’a ai o outou tino, ma ou avatu ia te outou le loto aano.”
Sa le na o au le tagata na tumu i loimata o’u mata. Sa tilotilo mai Yannick ia te a’u ma se faailoga o le ofo i ona foliga.
“Yannick, o lona uiga e mafai ona suia lou loto. E mafai e le Tama Faalelagi ona tuuina atu ia te oe se loto fou.”
Sa ia fetinai i lana tali. “E faapefea? Ta’u mai ia te a’u le mea e tatau ona ou faia.”
Na faafuasei lava, o se tagata ua saunia e lafoai, ua naunau nei e talitonu e mafai ona sui o ia. Sa faalogo Yannick i le folafolaga a le Alii i totonu o lena mau, na ta’u atu ia te ia e mafai ona ia lafoai ese le oona o lona loto ma faamagalo atu ia i latou o e na sese ia te ia.
I le aluga o masina na sosoo ai, na suia ai le loto o Yannick, mai sina mea itiiti lava i sina mea itiiti. Sa ia galue e faamagalo i latou o e na faatiga ia te ia ma sa mafai ai ona lafoai le tele o le oona ma le ita. O le faalagolago i le Tama Faalelagi, na ia malamalama atili ai e uiga i le matafaioi a le Faaola i le faamalologa ma le suia o loto. Ina ua mavae le silia ma le 10 tausaga, sa amata ona toe auai Yannick i le lotu, taliaina se valaauga, ma toe foi atu i le malumalu. Sa ia taliaina se valaaulia ma le loto e toe foi atu i le laulau a le Alii ma sa iu ina mafai ona ia olioli i faamanuiaga uma o le talalelei.
E ui lava o Yannick sa aoaoina patino e uiga i le suia o loto, sa ou aoaoina ni lesona taua mo a’u lava ia. Sa ou aoaoina e faataunuuina e le Tama Faalelagi Lana folafolaga e faapea, e ono mafai e ana faifeautalai ona “tautala atu i mafaufauga ia o le a tuu e [Ia] i [o latou] loto. … Aua o le a tuu … i le itula tonu lava, ioe, i le minute tonu lava, mea e te [lua] fai atu ai” (Mataupu Faavae ma Feagaiga 100:5–6). E alofa le Tama Faalelagi i Ana faifeautalai, faapea foi i latou o loo latou aoaoina, alofa matuai tele lava lea na Ia musuia ai se faifeautalai faatasi ai ma le mau tonu lava sa manaomia e se tasi o Ona atalii e aua ai ona lafoaia faamanuiaga e faavavau.
Sa ou aoaoina foi e finagalo le Tama Faalelagi e fesootai mai ia i tatou ma e mafai ona faia e ala i le Agaga Paia ma tusitusiga paia.
O le mea e sili ona taua, ou te iloa e oo lava i loto e sili ona faigata e mafai ona suia e ala i le Togiola a Iesu Keriso—o Yannick o se molimau ola lea o lena mea.