Digital Lamang: Mga Young Adult
Pagkamabination: Usa ka Butang nga Gikinahanglan sa Tibuok Kalibotan
Pinaagi sa pagkamabination, makatabang kita pinaagi sa atong kaugalingong gamay nga paagi sa pag-usab sa kalibotan aron mahimong mas maayo.
Litrato gikan sa Getty Images
Sa dihang miabot ang panahon sa pagpanalangin sa akong anak nga babaye, si Amelia, daghan kaayo ang gusto nakong ilakip sa iyang panalangin. Samtang namalandong ko daan kon unsay isulti, gibati nakô nga kinahanglan akô siyang panalanginan nga motubo nga himsog ug lig-on. Mibati usab ko og kadasig sa pagpanalangin kaniya nga ang iyang kinabuhi makasentro sa ebanghelyo ni Jesukristo.
Samtang ako nagbarog diha sa sirkulo sa miting sa sakramento ug misugod sa pagpanalangin sa akong gamayng anak nga babaye, akong gipakigbahin kining tanan ug uban pang espirituhanong mga impresyon. Dayon sa kalit, gibati nako nga naaghat sa pagdugang og usa ka butang. Nasurprisa kaayo ko sa kakusog niini nga pag-aghat ngari kanako.
Nagsapwang ni Amelia sa akong mga bukton, miingon ko, “Usahay, ang mga tawo dili magmabination kanimo, apan ako mopanalangin kanimo nga ikaw mosunod sa ehemplo sa Manluluwas ug kanunay nga magmabination.”
Nagsige ko og hunahuna mahitungod niini nga bahin sa panalangin ni Amelia sukad niadto. Nakaamgo ko nga ang pagkamabination dili usa ka butang nga akô lamang gipangandoy alang sa akong anak nga babaye. Ang pagkamabination usa ka butang nga gikinahanglan sa tibuok kalibotan. Kasagaran ingon og ang kabangis ug pagkadili manggihunahunaon anaa bisan asa, apan aniay pipila ka paagi nga kita makahimo sa kalibotan nga madugangan og dyutay nga pagkamabination.
1. Pagmabination sa Uban Bisan Kon Kamo Dili Mouyon Kanila
Pagtan-aw og usa ka bag-ong balita sa internet [newsfeed] ug sa dili madugay makita ninyo ang mga tawo nga dili mabination sa usag usa. Ang uban motan-aw niini sa lain-laing panglantaw isip pagka inosente, pagkasayop, o gani pagkadautan. Para nila walay dapit alang sa managlahi nga opinyon, ug ang pagrespetar sa panglantaw sa uban sa kasagaran giisip nga kahuyang. Apan dili kinahanglan nga ingon niana.
Si Presidente Dallin H. Oaks, Unang Magtatambag sa Unang Kapangulohan, miingon: “Ang mga sumusunod ni Kristo kinahanglan nga maoy ehemplo sa kabuotan. Kinahanglang higugmaon nato ang tanan, maminaw og maayo, ug magpakabana sa sinsero nilang mga gituohan. Bisan og supak kita, kinahanglan dili kita makapasakit”1
Ang pagkamabination nga walay pagsapayan sa atong mga opinyon makatabang kanato sa pagtan-aw sa pinakamaayo sa usag usa ug mobati nga mas suod.
2. Ipunting ang Imong Atensyon sa Pagkamabination diha sa Panimalay
Si Presidente M. Russell Ballard, Akting nga Presidente sa Korum sa Napulog Duha ka Apostoles, sa makausa miingon, “Sama sa pinong tipaka sa bulawan nga matigum sa kadugayan ngadto sa dakong bahandi, ang atong gagmay ug yanong mga buhat sa kamabination ug pagserbisyo matigum ngadto sa kinabuhi nga puno sa gugma alang sa Langitnong Amahan, debosyon sa buhat ni Ginoong Jesukristo, ug pagbati sa kalinaw ug kalipay sa matag higayon nga kita motabang sa usag usa.”2
Ang usa ka panimalay nga puno sa pagkamabination mao ang dapit sa gugma, kalooy, ug maayong pagbati. Atol sa mga hagit sa kinabuhi, ang pagkamabination mohatag sa mga pamilya og mga pagbati sa kahupayan, pagsinabtanay, ug pag-amuma. Kini mopalambo sa relasyon sa pamilya ug mahinungdanon kon gusto kita nga magmugna og malinawon ug mahigugmaong panimalay.
3. Pagmapailubon sa Uban—ug sa imong Kaugalingon—Kon Adunay Mahimo nga Sayop
Kon kadtong anaa sa atong palibot mobuhat og mga butang nga makapasuko kanato, makapili gihapon kita nga mahimong mapailubon ug mabination ngadto kanila, sa samang paagi nga gusto kita nga tagdon nila. Makapili usab kita nga magmabination kon kadtong atong gihigugma ug giamuma mopalayo gikan sa mga butang nga gusto sa atong Langitnong Amahan nga atong buhaton.
Si Elder Dieter F. Uchtdorf sa Korum sa Napulog Duha ka Apostoles miingon nga ang atong katungdanan mao ang “paghigugma sa Dios ug sa [atong] mga silingan.” Kon buhaton nato, ang “Dios mohimo og mga milagro pinaagi [kanato] sa pagpanalangin sa Iyang bililhong mga anak.”3
Kinahanglan usab kitang magmabination sa atong mga kaugalingon. Si Elder Jeffrey R. Holland sa Korum sa Napulog Duha ka Apostoles miingon, “Isip mga anak sa Dios, kinahanglang dili nato ipakaubos o dauton ang atong kaugalingon, nga daw ang pagsilot nato sa atong kaugalingon makahimo kanato nga tawo nga maoy gusto sa Dios nga kita mamahimo.”4 Ang tanan angayan nga pakitaan og pailob ug pagkamabination, ug kana naglakip kaninyo.
4. Kon ang Uban Dili Mabination, Pagmabination Lang Gihapon
Usahay, ang mga tawo dili maayo og pagtagad ngari nato. Kon mahitabo kana, bisan malisod man kini, kinahanglan kitang maningkamot nga mahimong mabination gihapon.
Ang Manunubos mitudlo, “Higugmaa ang inyong mga kaaway ug pag-ampo kamo alang sa mga tawo nga nagpasipala kaninyo” (Mateo 5:44).
Wala kini magpasabot nga tugotan nato ang uban nga motunob-tunob nato sama sa tumbanan [doormat]—importante kanunay ang pagmintinar og minaayo nga mga utlanan. Apan kita kinahanglang maningkamot sa pagtratar sa matag tawo isip anak sa Langitnong Amahan, ug kinahanglan natong hinumdoman nga ang tanan adunay mga hagit, daghan nga dili nato makita.
Pinaagi sa mabination nga pagtabang ug sa pagserbisyo niadtong dili mabination, kamo makatabang kanila nga mausab. Apan bisan kon dili sila mag-usab, ang pagpakita og kamabination makahimo og kausaban alang kaninyo. Ang pagpili nga mahimong mabination mopalingkawas kaninyo gikan sa kanunayng paghunahuna sa pagkadili mabination sa uban. Motugot usab kini kaninyo sa pagpangita og mga paagi sa pagtabang niadtong naglibot kaninyo ug makasinati og kalipay samtang nagbuhat niini.
Sunda ang Paagi sa Manluluwas
Adunay daghang mga paagi sa pagkat-on nga mahimong mas mabination, apan ang pinakamaayong paagi mao ang pagtan-aw sa Manluluwas ug pagsunod sa Iyang ehemplo.
Siya mipakita og pagkamabination diha sa tanan nga Iyang gisulti ug gibuhat. Kon kita motan-aw sa gawas sa atong kaugalingon ug molihok nga mabination, bisan ngadto niadtong kinsa dili mabination, makatabang kita pinaagi sa atong kaugalingong gamay nga paagi sa pag-usab sa kalibotan aron mahimong mas maayo.
Samtang kita magsunod sa Manluluwas ug mobati para sa uban, makakaplag kita og mga oportunidad sa pagtabang sa mga tawo kinsa nanginahanglan niini. Ug pinaagi sa pagserbisyo sa uban, kita mas maduol sa Manluluwas ug mouswag pa og dugang diha sa gugma ug pagkamabination. Si Elder Gary E. Stevenson sa Korum sa Napulog Duha ka Apostoles miingon: “Samtang molantaw kita pinaagi sa panglantaw sa ebanghelyo, kita makaila nga kita usab gibantayan sa usa ka manggiluy-on nga tig-amuma, nga naghalad sa Iyang Kaugalingon uban sa kamabination ug maamumahon nga espiritu.”5
Busa ako modapit kaninyo, uban ni Amelia, sa pagpakatap sa usa ka gamay nga pagkamabination ug mohimo og kausaban sa adlaw sa usa ka tawo! Samtang si Presidente Gordon B. Hinckley (1910–2008) kausa miingon, “[Ang mga] milagro mahitabo kon adunay pagkamaloloy-on, respeto, ug paghigugma.”6