Ayaw Sipyata Kining Debosyonal
Yano nga Math alang sa Pagpaduol ngadto sa Ginoo
Gikan sa pakigpulong nga gihatag ngadto sa mga estudyante sa Ensign College sa Siyudad sa Salt Lake, Utah, USA, niadtong Disyembre 1, 2020. Basaha ang kompletong teksto sa ensign.edu.
Ang pagpalambo sa atong relasyon sa Ginoo dili kinahanglan nga komplikado.
Human sa miaging tuig, uban sa tanang mga kalamposan ug kapakyasan ug wala damha nga mga kausaban, mas maalamon alang nato ang pagsuta kon kita nagkat-on ba sa mga leksiyon nga kinahanglan ug mahimo natong makat-onan gikan niini nga pandemya ug ubang bag-ohay nga mga panghitabo. Si Elder Jeffrey R. Holland sa Korum sa Napulog Duha ka Apostoles mimantala niini nga mga hunahuna samtang namalandong siya sa unsay iyang nakat-onan pinaagi niining talagsaon kaayo nga panahon:
“Manghinaot ko nga kon ang mga butang mobalik na sa normal—bisan unsa pa ang mahimong normal—nga dili nako makalimtan ang mga pagbati ug mga kasinatian nga akong nasinati atol niini nga mga bulan sa pagpamalandong ug pag-inusara. …
“… Kita dili maalamon kon atong palabyon kining sagrado nga oportunidad sa pagtugkad sa atong mga kalag, paghimo og gamay nga paghinulsol, ug pagpangita og paagi kon unsaon nga kita mahimong mas maayo ug mas mabination.”1
Tungod niana isip usa ka sukaranan nga panghunahuna, magleksiyon ta og gamay sa math. Ganahan ko og math, tungod sa kinaadman ug katukma ug daling matag-an ang resulta niini, apan dili nato kini himoong lisod, tungod kay ang yano nga math mao lamang ang tanan nga akong mahimo karong mga panahona! Magdugang ta, magkaltas, magpadaghan, ug magbahin-bahin.
Magdugang
Tungod sa tanang dili makontrolar nga kaguliyang nga naglibot kanato, tungod sa managlahing mga tingog nga nag-agni sa atong pagtagad ug pagkamaunungon diha sa atong mga telepono, sa atong mga screen, ug gani sa sulod sa atong mga panimalay, kinahanglan kitang magdugang og usa ka balaan nga dapit sa atong kinabuhi. Hunahunaa kon asa ka nagpuyo; ihulagway kini sa imong hunahuna.
Anaa ka ba sa sulod sa usa ka apartment?
Nagpuyo sa panimalay uban sa pamilya?
Naa sa silong sa gambalay?
May kauban ba o walay mga kauban sa kwarto?
Asa man ka moadto alang sa kahilom, sa pag-ampo, alang sa pagkonektar ngadto sa Dios? Nagsilbi ba kini?
Bisan unsa pa ang sitwasyon sa imong panimuyo, makadugang ka og usa ka balaan nga dapit niini—usa ka luna diin ikaw makakaplag og kahilom aron makadungog sa tingog sa Dios; aron sa “pagpaminaw Kaniya,” sama sa gitambag sa atong propeta nga atong buhaton;2 aron makig-uban ug makakaplag og giya ug direksyon alang sa imong kinabuhi.
Asang dapita diha sa imong puloy-anan ikaw makadugang og balaan nga dapit? Sulayi sa pagpangita og usa ka piho nga dapit o furnishing nga himoon nimong balaan nga dapit. Tingali kini ang binordahan nga hapin sa higdaanan sa inyong kwarto human mobiya ang imong roommate anang adlawa, o usa ka piho nga lingkoranan nga duol sa panghaw diin mogula ang init nga hangin atol sa tingtugnaw. Tingali ang usa ka humok nga hapin sa salog nga imong nakaplagan sa online ug gibutang sa kilid sa imong higdaanan aron gamiton sa pagluhod. Kini nga balaang lugar mahimong buhaton nga usa ka sangtuwaryo alang kanimo. Sa pipila ka rason, ug ako namulong basi sa personal nga kasinatian, ang kalig-on ug kahupayan moabot kanimo gumikan sa kahibalo nga ang imong binordahan nga hapin sa higdaanan, imong lingkoranan, imong humok nga hapin sa salog, bisan unsa, nagrepresentar sa imong giisip gayod nga balaang dapit ug diin ang balaan nga mga butang mahitabo. Palonga ang kalangas. Pagmugna og kamalinawon— tuyoa gyod— aron makapaminaw Kaniya! Si Jesus mitudlo, “Kay ang tanan nga unod ania sa akong mga kamot; pagmalinawon ug hibaloi nga ako mao ang Dios”(Doktrina ug mga Pakigsaad 101: 16).
Si Presidente Russell M. Nelson miingon, “Dapiton ko kamo … sa paghimo sa inyong apartment, inyong dormitoryo, inyong panimalay, o inyong kwarto nga usa ka balaan nga dapit diin makahiklin kamo nga luwas gikan sa daotan nga mga kalinga sa kalibotan.”3
Kaltasan
Ang sunod mao ang pagkaltas. Hunahunaa kon giunsa nimo paggamit ang 24 ka oras nga gihatag kanimo kada adlaw. Daghan nianang mga orasa ang gigahin sa pagkatulog (tingali dili kutob sa inyong gusto!), ug daghang mga oras ang gigahin sulod sa klase ug sa pagtuon. Daghang mga oras ang gigahin sa pagtrabaho ug pagpangita og kwarta aron mabuhi. Ang mga oras (o mga minuto!) nga mahabilin para nimo human sa imong nagkalain-lain nga mga pasalig [commitments] sa eskwelahan, sa trabaho, ug sa pamilya mahimong tawagon nimo nga imong “oras para sa bisan unsa nga gusto nimong buhaton.” Mao kini ang oras diin ikaw adunay hingpit nga gahom sa paghimo og desisyon. Unsaon nimo sa paghukom sa paggamit niana nga oras?
Paghimo og usa ka lista diha sa imong hunahuna kon giunsa nimo paggamit ang imong oras nga para sa bisan unsa nga gusto nimong buhaton sulod sa nangaging mga adlaw. Dayon hunahunaa kon unsay angay ikaltas gikan sa imong gibuhat atol nianang oras nga para sa bisan unsa nga gusto natong buhaton. Aduna bay mga kalingawan o media nga mga pagpili o pag-usik-usik sa oras nga mas maayong tangtangon sa lista o limitahan? Unsay kinahanglan nga kaltason gikan sa imong kinabuhi? Kana ang usa ka pangutana nga mahimo nimong pamalandongon ug ipangutana ngadto sa Langitnong Amahan kon anaa ikaw nianang balaan nga dapit nga imong idugang!
Kaltason nato ang bisan unsa nga butang gikan sa atong kinabuhi, ilabi na gikan sa atong oras nga para sa bisan unsa nga gusto natong buhaton, nga makapasilo sa Espiritu, bisan kon aktuwal ba kana nga mga kalihokan o mga pamatasan o kinaiya, o mga hunahuna o mga kinaiya o ang pinulongan ba nga atong gamiton usahay. Kon kana makapasilo sa Espiritu, ikaltas kana. Biyai kana. Kuhaa kini gikan sa imong kinabuhi. Ug pagdugang og mas balaan nga mga butang.
Padaghanon
Mopadayon kita ngadto sa pagpadaghan. Unsay atong gusto nga padaghanon sa atong kinabuhi? Unsa sa imong kinabuhi ang gusto nimo nga padaghanon pa, ug buot nakong ipasabot, mas padaghanon pag-ayo? Tingali ang unang butang nga miabot sa imong hunahuna mao ang kwarta! Dili ba nindot nga padaghanon ang balanse sa imong kwarta sa bangko o ang sweldo nga imong madawat, bisan og kaduhaon o katuloon lang?
Apan hunahunaa gyod pag-ayo. Unsay gusto nimong padaghanon sa imong kinabuhi? Ang gugma kaha ug mahigugmaong mga relasyon? Ang pagbati kaha sa kalinaw ug hingpit nga kalipay? Ang pagpasaylo kaha ug pagkaayo? Dili ba kitang tanan gusto og daghan pa niining mga butanga? Mahimo natong isulat kining tanan ubos sa ulohan nga “mga panalangin.” Dili ba gusto gyod nato nga pagdaghanon ang atong mga panalangin—tanang maayo nga butang sa atong kinabuhi?
Nagtuo kita sa usa ka Dios sa kaabunda, usa ka Dios sa mahangturon ug walay kinutoban nga kapasidad ug mga kapanguhaan—gugma, kaalam, ug kaayo. Wala na Siyay labaw pa nga ganahan kay sa pagpadaghan sa atong mga panalangin sa maloloy-on nga paagi, apan kinahanglan kita nga magpaduol ngadto Kaniya pinaagi sa usa ka estelo sa kinabuhi sa paghinulsol ug pagsunod sa Iyang mga sugo. Samtang atong palamboon ang atong aktibong pagtinguha sa kahayag, serbisyo, ug sa kinaiya ni Jesukristo sa atong kinabuhi, samtang atong padaghanon ang atong tinguha sa paghinulsol ug pagkamasulundon, ang atong Amahan milagrosong mopadaghan dayon sa atong mga panalangin. Sayon ra kini nga pamaagi sa pagsubay.
Ug kini nga mga panalangin mapadaghan pag-usab samtang kita mopakigbahin sa atong hingpit nga kalipay ug hugot nga pagtuo ug kalinaw ngadto sa uban. Kita makatabang sa pagpadaghan sa ilang mga panalangin ug kamaayo sa ilang kinabuhi kon kita mohatag sa atong gugma ug tinguha sa pagbuhat og maayo, pagbayaw sa uban, ug sa paghupay sa pag-antos. Kining tanan mapadaghan pa gihapon kon kita makigtambayayong sa uban kansang tumong sama ra sa atong tumong. Ug padayon pa nga magkadaghan ang mga panalangin.
Bahinon
Karon sa pagbahin-bahin. Kadiyot lang. Ganahan ba kita og pagbahin-bahin sa atong kinabuhi? Si Jesus klaro nga mitudlo kanato nga kon kita dili magkahiusa, kon kita dili magkahugpong, dili kita Iya. Siya gusto nga kita mahiusa sa usag usa, aron makamugna og gamhanan nga kahiusahan gikan sa atong matahom nga mga panaglahi, aron nga kita mahimong usa uban Kaniya. Aron makab-ot kini nga matang sa kahiusahan ug pagkausa, oo, adunay pipila ka mga butang diin kinahanglan atong ipahimulag ang atong kaugalingon.
Si Jesus mitudlo, “Siya nga may espiritu sa panagbingkil dili gikan kanako apan gikan sa yawa, kinsa mao ang amahan sa panagbingkil, ug siya nagkutaw sa mga kasingkasing sa mga tawo sa panagbangi uban ang kasuko sa usag usa” (3 Nephi 11:29). Mao nga kinahanglan atong ipahimulag ang atong kaugalingon gikan sa panagbingkil, gikan sa pagkasuko batok niadtong naglibot kanato.
Si Jesus mitudlo usab nga, “Higugmaa ang inyong mga kaaway, pagpanalangin kanila nga nagtunglo kaninyo, pagbuhat og maayo ngadto kanila nga nagdumot kaninyo, ug pag-ampo alang kanila kinsa nag-amung-among kaninyo ug nanggukod kaninyo” (3 Nephi 12:44). Gani aron magsugod sa pagsunod nianang sugo nga mahimong sama kang Kristo, kinahanglang atong ipahimulag ang atong kaugalingon gikan sa atong garbo, gikan sa atong pagkahakog, gikan sa atong pagkamahukmanon, sa bisan unsang ngil-ad nga kinaiya ngadto sa grupo nga lahi kay kanato, ug ilabi na gikan sa bisan unsa nga matang sa diskriminasyon batok sa ubang kaliwatan. Sigurado ko nga kitang tanan makahinumdom unsa ang gibati nga nakadungog ni Presidente Nelson nga miingon: “Naguol ko nga ang atong Itom nga mga kaigsoonan sa tibuok kalib[o]tan nag-ant[o]s sa mga kasakit sa diskriminasyon ug pagkamapihigon. Karon moawhag ko sa atong mga miyembro bisan asa nga manguna sa pagbiya sa mga kinaiya ug binuhatan sa diskriminasyon.”4 Ug busa kinahanglan ipahimulag nato ang atong mga kaugalingon gikan sa panagbingkil, garbo, ug diskriminasyon.
Pabaliktad nga Paagi
Adunay usa ka dugang nga operasyon sa math nga gusto nakong susihon: ang pabaliktad nga paagi. Kon imong isulat ang numero 5, sama pananglit, nga sa tinuod 5/1, ang baliktad mao ang 1/5. Nakahinumdom ka niana? Sama ra kana sa kaatbang—imo lamang balihon ang numero. Mao nga, kon ikaw nag-atubang og kalisod, nga hapit tanang panahon anaa sa lain-lain nga matang, gamita ang pabaliktad nga paagi ug baliha kini! Imbis mangutana, “Nganong ako man? Nganong kini nga malisod nga butang nahitabo man nako?” sulayi ang pagpangutana, “Nganong dili man ako? Unsay akong makat-onan gikan niini? Unsa ang mahimo nakong usbon? Unsaon nako pagtubo pinaagi sa hugot nga pagtuo kang Jesukristo?” Adunay gahom niini nga paagi.
Kon nag-atubang ka og problema nga nakahatag nimo og pagduda sa imong hugot nga pagtuo, gamita ang pabaliktad nga paagi. Sa tanang paagi, tun-i sa hingpit ang imong mga pangutana, apan baliha ang pagkamadudahon pinaagi sa pag-atubang sa imong mga pangutana gikan sa anggolo sa hugot nga pagtuo, gikan sa mahangturong panglantaw, gikan sa usa ka pag-ila nga ang mga pamaagi sa Dios mas labaw kay sa imong pamaagi, ug ang Iyang mga hunahuna mas labaw kay sa imong mga hunahuna, o ni bisan kinsa nga mga hunahuna, bahin nianang butanga (tan-awa sa Isaias 55: 8–9).
Sigurado nga makakita ka og ubang mga paagi nga imong magamit ang pabaliktad nga paagi ug balihon ang dili kaayo matinud-anong panglantaw aron mahimong labing matinud-anon!
Ipatigbabaw ang Dios Labaw sa Tanan
Kitang tanan nakahinumdom sa pagdapit ni Presidente Nelson nga ipatigbabaw ang Dios labaw sa tanan dinhi sa atong kinabuhi. Siya nangutana og sunod-sunod nga mga pangutana: “Andam ba kamo nga ipatigbabaw ang Dios labaw sa tanan diha sa inyong kinabuhi? Andam ba kamo nga tugutan ang Dios nga maoy mahimong labing importante nga impluwensya sa inyong kinabuhi? Tugutan ba ninyo ang Iyang mga pulong, Iyang mga sugo, ug Iyang mga pakigsaad nga moimpluwensya sa inyong buhaton matag adlaw? Tugutan ba ninyo ang Iyang tingog nga maoy prayoridad kay sa bisan unsa pang uban? Andam ba kamo nga himoon ang bisan unsa nga Iyang ipabuhat kaninyo nga mas importante kay sa bisan unsang ambisyon? Andam ba kamo nga ipatuhop ang inyong kabubut-on ngadto sa Iyang kabubut-on?”5
Ang pagpatigbabaw sa Dios labaw sa tanan dinhi sa atong kinabuhi mao ang paggamit sa pabaliktad nga paagi kon kita mag-atubang og kalisod ug pagduda ug mohukom nga baliktaron kini aron mahimong positibo!
Busa, sa pagrebyo, kini nga leksiyon sa math nagtudlo kanato sa
-
pagdugang og usa ka balaan nga dapit ug maminaw Kaniya;
-
pagkaltas sa bisan unsa nga makapasilo sa Espiritu;
-
pagpadaghan sa atong mga panalangin pinaagi sa pagpaduol ngadto sa Ginoo pinaagi sa paghinulsol ug pagkamasulundon;
-
pagpahimulag sa atong kaugalingon gikan sa panagbingkil, garbo, kahakog, pagkamahukmanon ug diskriminasyon sa kaliwatan; ug
-
paggamit sa pabaliktad nga paagi ug ipatigbabaw ang Dios labaw sa tanan.
Si Jesus, ang Batid sa Matimatika, mao ang atong Manluluwas ug Hari. Ang Iyang gugma alang kaninyo tinuod, makapausab sa kinabuhi, ug makaluwas sa kinabuhi. Ipatigbabaw Siya sa inyong kinabuhi labaw sa tanan, ug kamo makakaplag og dili matukib nga kalipay.