Mga Young Adult
Pagpalig-on sa Akong Relasyon sa Langitnong Amahan ug ni Jesukristo
Ang pagpalambo og mas lig-on nga relasyon uban Kanila ingon og dili kaayo nako masabtan pirmi, hangtod nga misulay ko og bag-o nga butang.
Litrato nga giposingan sa modelo
Samtang mas nagkatigulang ako, mas nakaamgo ako kon unsa kadako ang akong pagdepende sa mga relasyon—mga relasyon sa mga higala, pamilya, ug bisan sa mga tawo nga tighatod kinsa dili gayod mapakyas sa pagdala kanako sa akong labing ulahing order sa online (panalangini sila).
Ug sulod sa katuigan, nasayod ako nga ang kanunay nga tambag gikan sa atong mga lider sa Simbahan nga magpalambo og mga relasyon sa Langitnong Amahan ug sa Manluluwas tinuod ug importante.1
Apan wala lang gayod ako masayod kon unsaon sa pagbuhat niana.
Ang yutan-on nga mga relasyon sa akong mga higala ug pamilya naglakip og mga panagsultihanay, pagpakigbahin og mga komedya sa among grupo, ug paggahin og panahon nga magkauban. Mao nga ang hunahuna sa pagbaton og personal nga relasyon sa akong Langitnong Amahan ug ni Jesukristo, kinsa dili pisikal nga anaa, kanunay ingon og dili kaayo nako masabtan.
Apan, samtang namalandong ako, nakaamgo ako nga ang relasyon sa tanan ngadto sa Langitnong Amahan ug ni Jesukristo personal ug talagsaon [unique]. Mao nga unsa kaha kon ako mogamit og pipila ka praktikal nga mga pamaagi nga nakatabang kanako sa pagpalambo og lig-on nga mga relasyon sa akong mga minahal dinhi sa yuta ngadto sa akong relasyon Kanila?
Kana nga ideya mao ang pagdasig nga akong gikinahanglan.
Mihukom ako nga sulayan kini nga ideya ug sa pagtimbangtimbang sa akong relasyon ngadto Kanila human sa 10 ka adlaw.
10 ka Paagi sa Pagpalig-on sa mga Relasyon
Samtang namalandong ako og mga paagi nga mas maduol sa Langitnong Amahan ug sa Manluluwas, nagsiksik ako og 10 ka sukaranan nga mga sugyot sa relasyon nga kasagaran gihatag sa mga propesyonal ug mihiusa niini uban sa propetikanhong tambag aron sa paghatag niini og espirituhanon nga pokus.
Ania ang 10 ka sugyot:
-
Makig-istorya nga matinuoron, itingog, ug adunay tinuod nga katuyoan pinaagi sa pag-ampo.2
-
Mamahimong maayo nga tigpaminaw.3
-
Magpakita Kanila og pagpasalamat.4
-
Maghimo og mga sakripisyo alang Kanila.5
-
Magkat-on mahitungod Kanila.6
-
Maggahin og kalidad nga panahon uban Kanila.7
-
Magserbisyo og dungan.8
-
Mopakita Kanila og pagsalig ug pasalig.9
-
Moangkon kon ikaw nasayop.10
-
Magkat-on kon sa unsang paagi Sila nagpakita kaninyo og gugma.11
Sa pagsugod, akong gipilinga magkat-on mahitungod sa akong Langitnong Amahan ug sa Manluluwas (#5), maggahin og kalidad nga panahon uban Kanila (#6), ug magkat-on kon sa unsang paagi Sila mitanyag kanako og gugma (#10).
1. Pagkat-on mahitungod Kanila
Aron makakat-on pa og dugang mahitungod Kanila, mitutok ako sa pagtuon sa mga kinaiya Nila. Gitun-an nako “Ang Buhi nga Kristo,” mga istorya sa mga milagro diha sa Basahon ni Mormon, ug mga pakigpulong sa kinatibuk-ang komperensiya. Gitan-aw usab nako ang mga video sa Biblia ug sa Basahon ni Mormon sa Simbahan aron makakita og hulagway sa mga hiyas sa Manluluwas ug kon sa unsang paagi Siya mitudlo ug nakig-istorya sa uban.
Usa ka hiyas sa Manluluwas nga gitun-an nako mao ang Iyang kaandam sa pagbuhat sa kabubut-on sa Amahan (tan-awa sa 3 Nephi 11:11). Dili nako matugkad ang usa ka tawo nga andam nga mag-antos ug mamatay alang sa tanang mga sayop, kasubo, mga sala, ug kasakit nga atubangon gayod sa tanan samtang kini nga indibidwal walay nahimo nga sayop. Ug bisan pa niana, usa ka tawo ang andam.
Siya andam.
Kanunay akong adunay hugot nga pagtuo diha Kaniya, apan ang pagpamalandong sa Iyang gugma ug kaandam sa paghatag sa Iyang kinabuhi alang kanako mipalambo sa akong hugot nga pagtuo, sa akong pasalamat, ug sa akong kaandam sa pagsunod Kaniya. Ug ang Iyang kaisog midasig kanako sa pagpadayon sa unahan uban sa hugot nga pagtuo ug paglaom, bisan og usahay mag-atubang og kabalaka ug kahadlok sa wala mahibaloi.
Ug dayon nagtuon ko sa kinaiya sa Langitnong Amahan.
Nagsagubang ako sa pagkaperpeksyonista sa dakong bahin sa akong kinabuhi, ug gihunahuna nako sa una nga masuk-anon Siya kon ako makapasagmuyo Kaniya sa akong mga kahuyang ug mga kasaypanan.
Apan samtang akong mas natun-an ang Iyang kinaiya, nakat-onan nga Siya dili usa ka binuhat nga walay kalooy (tan-awa sa Alma 32:22). Siya mapailobon ug mabination ug mahigugmaon (tan-awa sa 2 Pedro 3:9). Siya kanunay nga andam nga mopasaylo kanako (tan-awa sa Mosiah 26:29–31). Siya ang akong labing dako nga tigsuporta (tan-awa sa 2 Nephi 26:24).
Ug nakaamgo ako nga Siya gayod mao ang akong Amahan ug nga ako mao ang Iyang balaanon nga anak. Siya hingpit nga naghigugma kanako (tan-awa sa Juan 3:16–17) ug gusto lang nga ako mobalik.
Ang pagkat-on mahitungod sa kinaiya sa Langitnong Amahan ug ni Jesukristo nakapausab sa akong tibuok nga pagsabot kon unsa ang Ilang pagbati mahitungod kanako ug nga Sila anaa gayod sa akong kinabuhi. Ug nakaamgo ako nga Sila dili mga estranyo kanako—ako Silang nailhan sukad sa sinugdanan, ug Sila kanunay usab nga nakaila kanako.
2. Paggahin og Panahon uban Kanila
Litrato gikan sa Getty Images
Sama lang nga ako tingali mogahin og panahon sa pagbisita sa usa ka higala, migahin ako og panahon aron ikauban ang Langitnong Amahan ug ang Manluluwas matag adlaw. Nag-ampo ko sa kinasingkasing sa kusog nga tingog ug migahin og panahon sa pagpaminaw. Mipatukar ko ug namalandong sa akong paborito nga mga himno. Naghunahuna ako. Ug tungod kay ang mga templo sirado (tungod sa COVID-19), moadto ko sa malinawon nga mga paglakaw-lakaw.
Kasagaran ako adunay usa ka podcast o audiobook nga akong paminawon samtang ako maglakaw. Apan atol niini nga mga paglakaw-lakaw, ako mibulag sa kalibotan. Mipili ako sa pagpaminaw Kanila. Ang pagbuhat niini nakatabang kanako nga makakonektar sa Espiritu ug makaila ug makapamalandong sa makuti nga mga detalye sa kalibotan ug sa akong katuyoan.
Nakaamgo ako kon unsa ka dako nga paghunahuna ang gihimo sa Langitnong Amahan ug sa Manluluwas bahin sa mga linalang Nila—lakip kanako.
Mibati ako nga daghang espirituhanong gahom ang naggikan niana nga de kalidad nga hilom nga panahon uban sa akong Langitnong Amahan ug Manluluwas. Mas natino nako ang akong mga panalangin, nakakaplag ako og mas dakong pagpasalamat alang sa kinabuhi sa kinatibuk-an, nakadawat ako og dugang nga kasegurohan sa akong mga desisyon, ug nabati nako ang hilom nga kalig-on Nila nga nagpaluyo kanako.
Sama lamang sa bisan unsa nga mga relasyon, ang paghatag og prayoridad sa de kalidad nga panahon mas nakapasuod kanamo.
3. Pag-ila Kon sa Unsang Paagi Sila Nagpakita og Gugma Kanako
Kitang tanan adunay labing maayong mga paagi sa pagdawat sa gugma nga gipakita sa ubang mga tawo.12 Naghunahuna ko kon giunsa sa ubang mga tawo sa pagpakita kanako og gugma ug unsay mas labing nakaapekto kanako sulod sa katuigan, ug naamgohan nako nga kanunay nakong gibati nga gihigugma og maayo pinaagi sa makahuloganon nga mga pulong sa uban.
Ug sa dihang ako kining naamgohan, ako usab nakaamgo nga alang kanako, ang labing halawom nga mga tubag sa pag-ampo o ang labing dako nga kahupayan gikan sa Langitnong Amahan o sa Manluluwas kanunay nga pinaagi sa mga pulong, bisan kon kadto nga mga pulong naggikan sa usa ka tawo kinsa naaghat sa pakig-istorya kanako, pinaagi sa mga kamatuoran diha sa mga kasulatan, pinaagi sa mga basahon, o pinaagi sa maanindot nga mga kinutlo gikan sa mga propeta ug mga apostoles. Ang mga pulong kanunay nga mipuno sa akong kalag ug mihatag kanako og kahupayan nga labaw pa sa bisan unsang butang.
Naghunahuna usab ako kon sa unsang paagi Sila mitanyag kanako og gugma pinaagi sa ubang mga paagi, sama sa pinaagi sa akong mga minahal, pinaagi sa mga estranyo, ug gani pinaagi sa makapahimuot nga “mga sulagma” ug mga kalooy. Nakahilak ako sa dihang akong nakita kon giunsa gayod Nila pagpakita kanako og gugma sa daghan kaayong paagi, apan ilabi na sa mapasalamatong paagi nga ako kining gidawat. Nakaila gayod Sila kanato ug unsaon sa pagtabang kanato sa personal ug epektibong paagi.
Kita usab mahimong makapakita Kanila og gugma sa labing maayo nga mga paagi nga kita nahibalo—pinaagi sa pagpaambit sa ebanghelyo, pagsunod Kanila, ug pagserbisyo sa uban.
Kon nagkinahanglan kamo og tabang sa pagtino kon giunsa Nila sa pagpakita kaninyo og gugma, pangayo sa Langitnong Amahan og tabang sa pag-ila niini. Ipakita Niya kini kaninyo.13
Pag-ugmad og Tinuod nga mga Relasyon
Kini nga kasinatian nakahatag kanako og gamay nga panabot kon unsa ka dako nga espirituhanong kalig-on ang akong maangkon pinaagi sa paghatag og prayoridad sa akong relasyon sa Langitnong Amahan ug sa Manluluwas.
Ug nagplano ko sa pagpadayon og gamit niini nga mga sugyot bahin sa relasyon. Ako karon nakakita na gayod sa akong relasyon uban Kanila isip tinuod, gamhanan, bililhon ug walay kataposan. Dili Sila mga dili mahikap, ingon nga ako naghunahuna kaniadto.
Sila anaa uban kanato. Sila anaa sa mga detalye. Andam Sila nga mobubo kanato og kalig-on, kahupayan, kaalam, giya, ug kalinaw, ilabi na kon mogahin kita og panahon ug luna alang Kanila sa atong kinabuhi.
Sulayi ang inyong kaugalingong mga pamaagi aron mas maduol ngadto Kanila ug tan-awa unsay mahitabo! Makapamatuod ako nga kon atong hatagan og prayoridad kining mahinungdanon nga mga relasyon ug mosunod Kanila, makagamit kita sa makaayo nga impluwensya sa Manluluwas, makapadayon uban sa hugot nga pagtuo (tan-awa sa mga Taga-Filipos 4:13), ug makakaplag og mas dakong pagsalig ug hingpit nga kalipay.
Nasayod ako nga ako napanalanginan niini.