E Na’o le Faatekinolosi
O Le Ala e Faatatau ai le Alofatunoa o le Faaola ia te A‘u ma se Tagata o Lo’u Aiga e I Ai Manaoga Faapitoa
E alala le tusitala i Iuta, ISA.
O le tuputupu ae ma se uso e i ai manaoga faapitoa ua faigata ai le olaga i nisi taimi, ae ua ou matua latalata ai lava i lo‘u Faaola e ala i na mea uma.
Ata pue mai le faaaloaloga a le tusitala
E i ai sa‘u uo mamae. O lona igoa o Barbara. Ma te fiafia lava e matamata ma usu pese faatasi i ata tifaga. Ma te savavali faatasi ma vaavaai i fugalaau i lotoa o le malumalu. Ma te faitau faatasi i tala o purinisese i po uma. Pe a ou i ai faatasi ma Barbara, e mafai ona ou saoloto. E le gata o ia o la‘u uo pele, ae o ia foi o lo’u uso.
O Barbara e maua i le ma’i supa (cerebral palsy), o se tulaga e aafia ai o ia faaletino ma faalemafaufau. E le mafai ona savali o ia, ma e manaomia ona fafagaina o ia i se faagaau. E fiafia o ia e pese ae o loo tauivi e fesootai mai ona lagona, manaoga, ma mea e manaomia. Ma e ui e 29 tausaga o Barbara, ae faalemafaufau e pei o se tamaitiiti laititi.
Tauaveina o se Tiutetauave Maoae
E ui lava o Barbara e fa tausaga e matua ai ia te au, ae ou te lagona lava i taimi uma e pei o le “uso matua.” E totonugalemu o ia i le lalolagi o lo’u aiga. O ia o le la, ma o i matou o paneta o loo li‘o ai. E ui o le tulaga i nisi taimi e i ai ni penefiti ofoofogia—e pei o le mafai ona sikipi laina i paka faafiafia—o isi taimi o lona uiga o le faia o osigataulaga, e pei o le le alu i ni gaoioiga faapitoa po o le manaomia ona talimalo i ni mea e tutupu i lo matou fale. O aso taitasi matou te iloiloina ai a matou fuafuaga faatulagaina ia mautinoa ai o loo tausia pea e se tasi ia Barbara ma ona manaoga.
Ina ia fesoasoani i o‘u matua e tausia o ia, sa vave ona ma faatagatamatutua ma lo’u tuagane matua. Sa tatau ona ma aoao i le auala e iloa ai le taimi e oso ai le ma’i o Barbara ma le mea e fai, le auala e fafaga ai o ia e ala i se fagaau, auala e suia ai ona napekini, ma le auala e saunia ai ana fualaau a o ma laiti lava. E ui na fesoasoani lenei vave ona faatagata matua ia te au e maua ai le talitonuga ia te au lava ia, ae sa faia ai se fegalegaleaiga ma se tauiviga tele.
Sa matuai ese lava ou lagona mai tagata uma o la‘u tupulaga. E tusa lava pe na valaaulia au e tafafao ma uo ma uunaia a’u e o’u matua ou te alu, sa ou tauivi ia maua le fiafia aua sa ou lagona le tausalaina ona sa tele naua mea e fai e o’u matua i le fale. O isi taimi e faigata ai ona ou fiafia mo au lava a o tauivi Barbara ma lona soifua maloloina. O le tele lava o taimi, sa na ona ou manao lava i se uo ma te nonofo i lalo ma faalogo.
Faatoilaloina o le Tuuatoatasi
O nisi taimi ou te lagona ai le leai o se tasi na malamalama i le mea sa ou oo i ai. Ae o ni nai mea na fesoasoani e foia ai lena tuuatoatasi. Sa ou filifili o le a ou taumafai e aapa atu i tagata atonu o loo lagonaina foi faapena. Pe a ou alu i gaoioiga po o le lotu, sa ou taumafai e faaaofia i latou o e sa nonofo na o i latou po o e sa foliga mai sa le lelei o latou aso. E pei ona sa aoao mai Elder Gerrit W. Gong o le Korama a Aposetolo e Toasefululua, “E tutupu vavega pe a tatou tausia le tasi ma le isi e pei ona Ia faia.”1 Ma sa ou vaai i vavega ua oo mai i lo‘u olaga. Sa ou lagonaina le sili atu o le toafimalie i le alu i gaoioiga ma sa sili atu le fiafia pe a ou ofoina atu le alofa i isi.
O le isi mea na fesoasoani o le iloaina lea o le tele o le malamalama moni o le Faaola ia te au. Sa ou iloaina na Ia silafia lelei le mea sa ou oo i ai ma o le a faatasi pea ma au. Sa ou taulai atili atu i le iloaina o Ia e ala i tusitusiga paia ma le tatalo. O nisi taimi pe a ou tatalo, ou te vaai faalemafaufau ai sa ma nonofo faatasi ma le Tama Faalelagi ma faafofoga mai. Pe a i ai ni o‘u lagona faigata ma lagona le lofituina i le le talafeagai ai i nisi taimi o le tulaga o Barbara, ou te manatua o le a fesoasoani mai Keriso ia te a’u ia maua le filemu ma le faamautinoaga. Sa faamalamalama atoatoa mai e Elder Dale G. Renlund o le Korama a Aposetolo e Toasefululua lenei mea ina ua ia saunoa, “I tulaga le talafeagai, o se tasi o a tatou galuega o le faatuatuaina lea o ‘mea uma e le talafeagai e uiga i le olaga e mafai ona faasa’oina e ala i le Togiola a Iesu Keriso.’”2
Faalagolago i le Alofa Tunoa o le Faaola
O le i ai o se e pele e i ai se manaoga faapitoa e mafai ona manaomia ai se malosiaga e latalata i le tagata e sili ona malosi. E aafia ai lou olaga faaletino, faalemafaufau, faalelagona, tulaga tautupe, ma le faaleagaga. Mo le 29 tausaga ua mavae, e fagua ai ou matua toeitiiti lava o aso uma i le 2:00 i le taeao e tausia Barbara. Matou te o uma i le fale koleni e le aunoa ina ia mafai ai ona lava lo matou malosi e sii ai ma ave Barbara pe a tatau ai. Ma o le tele o isi tiutetauave e mafai ona afaina ai i matou uma.
E faapefea ona matou faia mea uma?
E mafai ona faamatalaina lenei mea i se upu se tasi: alofa tunoa.
“O le Grace [o le] mana gafatia ma le faamalologa faaleagaga ua ofoina mai e ala i le alofa mutimutivale ma le alofa o Iesu Keriso. …
“E fesoasoani le alofa tunoa o le Atua ia i matou i aso uma. Na te faamalosia i matou e faia galuega lelei e le mafai ona matou faia na o i matou.”3
O le a le mea e sili ona ou fiafia i ai e uiga ia Barbara? Faatasi ai ma ia ua ou aoao atili ai e uiga i le alofa o le Faaola mo i tatou. E te lagonaina lava lona alofa pe a e i ai faatasi ma Barbara. E ui lava i ona faigata uma, e ataata lava o ia i taimi uma, pesepese, ma faa‘ata i matou. Peitai, e i ai foi aso ou te lagona ai le leai o se faamoemoe, pe a foliga mai e leai se mea e maua ai e ia se lagona lelei sili atu. Ae ona o o‘u aafiaga, ua ou iloa ai ma le mautinoa e malamalama le Faaola i mea o loo ma aafia uma ai ma Barbara. Po o a lava o tatou tofotofoga faalelalolagi, o se vaega matagofie o le mana gafatia o le Faaola o le le gata ina mafai ona tuuina mai ia i tatou le malosi e iloa ai ma faatoilalo mea faigata ae ia faia uma foi ma le olioli.