O le malamalama ma le Faaaofia Ai O o Tatou Uso ma Tuafafine LGBT
E alala le tusitala i Iuta, ISA.
E mafai e i tatou uma ona fesoasoani e faalotogatasia a tatou uarota ma nuu.
I nai masina muamua ina ua uma ona valaauina e avea ma se epikopo, sa faate’ia au ina ua o mai ia te au ni ulugalii se toatolu o ni matua, i se tulaga ma’oti e faailoa mai e i ai se latou tamaitiiti ua faafafine pe ua fesuiai itupa. I tulaga taitasi, sa faaalia e matua le alolofa faamaoni mo le la tama na faatasi ai ma ni tulaga eseese o le popole ina nei le talafeauga le la tama i le nuu o le uarota.
Mulimuli ane, na faasoa mai foi e isi aiga nei lava faamatalaga ma sa ou iloa ai e ui ina sa ou le masani ma nei aafiaga, ae i le avea ai ma epikopo sa ou maua le avanoa e fesoasoani ai i tagata uma o la’u uarota e fausia se nuu e sili ona lotogatasi, e tusa lava po o a o latou aafiaga.
Sa vave ona ou iloaina o le avea ma se epikopo e sili atu ona mataalia, e tatau ona ou naunau e taumafai ia malamalama i aafiaga o tagata o le Ekalesia o e ua faailoa mai o ni LGBT ma o latou aiga. O lea, e ala i talanoaga saoloto mai le loto, o tofotofoga ma mea sese, o le tele o le suesue, ma le faalagolago i le Alii mo le malamalama, sa ou aoaoina mea e tele e uiga i le ala e mafai ai ona ou tuuina atu le lagolago sili atu i tagata o le Ekalesia i nei tulaga a o latou taumafai e o mai ia Keriso.
Sa pupula o’u mata i le manaomia o le lotogatasi ma le malamalama, ma sa ou aoaoina ni nai lesona sa fesoasoani ia te au i le avea ai ma se epikopo, e faatuina se leo faaaofia ma le manatu i o matou uso ma tuafafine uma LGBT. Ou te faamoemoe a o faitau e taitai ma isi ia mea na ou aoaoina, o le a latou maua ai ni manatu aoga mo o latou lava tulaga.
Lesona 1: Mulimuli i Aposetolo Soifua
Sa vave ona ou iloaina le taua o le masani i aoaoga faaaposetolo aupito lata mai e uiga i le autu.
O se upumoni matagofie o Le Ekalesia a Iesu Keriso o le Au Paia o Aso e Gata Ai e faapea, o loo taitaia i tatou e Aposetolo ma perofeta soifua (tagai i le Mataupu Faavae ma Feagaiga 1:30). Ma ia te au, o le upu ola e ta’u mai ai ua ia i tatou le taitaiga i o tatou taimi mo le auala e faatatau ai le talalelei i manaoga o o tatou taimi. O le mea lea, afai tatou te faalagolago i le na o le gagana o le taimi ua tuanai, e mafai ona tatou misia le taitaiga matagofie ma le taua o loo saunia e le Alii e ala mai i o tatou perofeta o i ai nei.
O se tasi o punaoa na fesoasoani ia te au e toe iloiloina ai aoaoga faaaposetolo talu ai nei o le vaega o le uepisaite O Le Fesoasoani o le Ola a le Ekalesia, aemaise lava i itulau ua faaulutalaina “Tosina Atu i le Itupa e Tasi” ma le “Ua Fesuiai Itupa.” O nai faamatalaga na faapitoa ona tulai mai ia te au e aofia ai mea nei:
-
Na saunoa mai Elder D. Todd Christofferson o le Korama a Aposetolo e Toasefululua: “O le eseesega ua tatou maua i le taimi nei i le Ekalesia atonu ua na o le amataga lea. O le mea moni, ou te manatu o le a tatou vaaia se eseesega ua matua faateleina. … O le mea moni faapea e mafai e tagata ona aumaia meaalofa ma vaaiga eseese ma se tulaga lautele o talaaga ma luitau e feagai ma tagata o le a faaalia mai ai ia i tatou pe o a mea moni e tatau ai ma le talalelei a Iesu Keriso. Ma o le tele o mea na totoe na faapea ona maua i le aluga o taimi, ma e sili atu ona faaleaganuu nai lo o le faaleaoaoga faavae, e mafai ona see ese ma mafai ona tatou aoao moni e avea ma soo.”1
-
Na tuuina mai e Elder Quentin L. Cook o le Korama a Aposetolo e Toasefululua le valaaulia ina ia “taimua i le faaalia o le alofa, agaalofa, ma le aapa atu. Ia aua nei faaesea e o tatou aiga pe le faaaloalo i e ua filifili se ituaiga olaga e ese o se taunuuga o o latou lagona e uiga i lo latou lava itupa.”2
Ina ia uunaia la’u uarota e suesue i aoaoga faaaposetolo aupito lata mai nei i lenei autu, sa matou tuuto ai se tasi o a matou lesona tuufaatasi o le Aso Sa lona lima, e talanoaina ai pe mafai faapefea ona matou mulimuli atili i taiala. O lena lesona na avea o se aafiaga e matuai aoga lava, faamomoiloto, ma faagaeetia.
Lesona 2: Filifili le Faatuatua i lo le Fefe
O le mea e le masani ai e mafai ona taufaafefe. I le avea ai ma se epikopo fou, sa taufaafefe le aapa atu i se tagata o la’u uarota o le sa faailoaina o se faafafine ma e manaomia se fesoasoani faaleagaga. Sa faigata ona taitai ni talanoaga e uiga i lenei autu ma fautuaina ai matua o le autalavou o e sa tauivi ma o latou faasinomaga.
O le a oo mai se galu o mafaufauga popole i le mafaufau:
“Ae faapefea pe a ou fai atu se mea sese?”
“Ae faapefea pe afai ou te le taliaina se isi mea e ese mai agaifanua pe soona tele foi?”
“Pe ua lava ea mea ua ou iloa e fesoasoani ai?”
I se tasi aso a o ou mafaufau i ou popolega, sa tosina atu lo’u mafaufau i le suesueina o tusitusiga paia lea na ta’ua le fefe. Sa ou lagonaina le filemu ina ua ou faitau, “E lafo ese i fafo e le alofa ua atoatoa le fefe uma” (Moronae 8:16), ma “e leai se fefe i le alofa; ae o le alofa atoatoa e lafo ese ai i fafo le fefe ”(1 Ioane 4:18).
Na fesoasoani na upumoni ia te au e manatua ai afai ou te faatinoina le alofa faamaoni, e mafai ona ou talitonu i le mauaina o le taitaiga ma le fesoasoani mai le Alii.
E mafai ona ou molimau atu ina ua ou naunau ma le lotomaualalo e mulimuli i uunaiga a le Agaga Paia, e tusa lava pe sa ou lagona le le atoatoa i ni tulaga e le masani ai, na ou iloa lava le folafolaga o le a “faia mea vaivai ia avea ma mea malolosi” (Eteru 12:27).
Lesona 3: Faaaoga ni Faatinoga Faigofie — mo Taitai
E ala i le sailia o fautuaga mai punaoa faamaoni e faatatau i lenei autu, sa ou maua ai ni nai motugaafa aoga na i ai se tosinaga lelei i lo’u tomai o se epikopo e fausia ai se nuu e aofia ai. A o e faalagolago i le Agaga, atonu e te manao e fetuunai nisi o fautuaga nei e taulima ai manaoga o tulaga o lau uarota:
-
Aapa atu i tagata taitoatasi o e ua masani i faafitauli LGBT e fesoasoani ia te oe e aoao ma malamalama ai i o latou manatu. E mafai ona aofia ai lou peresitene o le siteki, lau aufono a le uarota, isi epikopo i la outou eria, uo faatuatuaina, ma tagata o lau uarota ua faailoa mai o ni LGBT ma o latou aiga. O le itulau uepi a le Ekalesia “Tosina Atu i le Itupa e Tasi” (ChurchofJesusChrist.org/topics/gay) e mafai foi ona maua ai le taitaiga. O loo i ai le tele o fesoasoani o loo siomia ai i tatou, ma e leai se tasi o i tatou o tuua toatasi ile faataunuuina o o tatou valaauga.
-
Faasoa atu ma le lotomaualalo lau molimau, ma e faapena foi aua le fefe e fesili atu e uiga i mea e te le malamalama atoatoa i ai. Tatou te ofoina atu le lagolago e oo lava i le naunau e faalogo ma aoao.
-
Aua e te fefe e faatoese atu pe afai na e fai atu pe faia se mea e faatiga ai, e tusa lava pe sa lei faamoemoeina. O le fefaaalia’i saoloto e fausia ai le faatuatuaina.
-
Afai e faia e se uo po o se tagata o le uarota ni faamatalaga faatiga e uiga i tagata LGBT, mafaufau i le auala sili e tali atu ai. O le tele lava o taimi o nei faamatalaga e sau mai i le le iloa ma e le o faamoemoeina o se le faaaloalo. O le tuuina atu o le taitaiga e le faalauaiteleina e mafai ona fesoasoani.
-
Ia faaeteete ina ia ogatasi lau gagana i fanau uma a le Atua ma au feagaiga ma valaauga, e tusa lava po o ai o loo e talanoa i ai.
-
A faasoa mai e tagata o le uarota o latou aafiaga, e matuai patino lava. Aua le faasoa maia a latou faamatalaga patino e aunoa ma la latou faatagaga.
-
Manatua o mea e lagona e se tagata ma pe faapefea ona latou filifili e tali atu i na lagona e le o le mea lava e tasi. O loo faamatala mai i le tusiga o Autu o le Talalelei: “Ua tuueseese e le Ekalesia le tosina atu i le itupa e tasi ma amioga faatauatane. O tagata e lagona le tosina atu i le itupa e tasi pe ua faailogaina o se tane e tosina atu i se tane (gay), po o se tamaitai e tosina atu i se tamaitai (lesbian), pe tosina atu i itupa uma e lua (bisexual) e mafai ona osia ma tausia feagaiga ma le Atua ma auai atoatoa ma le agavaa i le Ekalesia. O le faailoaina o se tane e tosina atu i se tane (gay), tamaitai e tosina atu i se tamaitai (lesbian), pe tosina atu i itupa uma e lua (bisexual) pe lagonaina le tosina atu i le itupa e tasi e le o se agasala ma e le faasaina ai se tasi mai le auai i le Ekalesia, umiaina o ni valaauga, pe auai i le malumalu.3
-
Ia faaeteete ia aua nei faatapulaaina avanoa o tagata o le Ekalesia e saofaga ai pe afai latou te faailoa mai o se faafafine pe ua fesuiai itupa. O le a maua e tagata uma o le uarota ni aafiaga tulaga ese ma ni manatu e mafai ona aoga i lau uarota. E pei ona aoao mai e Elder Christofferson, “O se tasi o loo gauai atu i paega masani o le ola mama—o se tasi o loo mulimuli i feagaiga ma tulaga faatonuina ma aoaoga o le talalelei a Keriso—e ui atonu o loo latou feagai ma le tosina atu i le itupa e tasi—e leai lava se mafuaaga e le mafai ai ona latou auai atoatoa, o se tagata e auai atoatoa o le Ekalesia ma umia valaauga ma tautala atu ma ulu atu i le malumalu ma auauna atu ai iina, ma o le a avanoa mo i latou isi avanoa ma faamanuiaga uma ia e mafai ona maua mai le avea ai ma tagata o le Ekalesia”.4
Faaauau Ona Aoao Mai ma Alofa
I le taimi talu ona valaauina au e avea ma se epikopo, ua ou matua talitonu malosi ai o o tatou uso ma tuafafine taitoatasi e i ai se sao matagofie ma tulaga ese e faia i le talalelei a Iesu Keriso, i o tatou nuu, ma i o tatou olaga taitoatasi. Ma e tusa lava po o a a tatou matafaioi i le uarota, o se tiutetauave faamanuiaina ma se avanoa e fausia ai se nuu e sili atu ona lotogatasi e ala i le saili atu i le alofa sili atu, malamalama, ma lagolagoina o tatou uso ma tuafafine faaleagaga taitasi.
Pei ona molimau mai Peresitene Jean B. Bingham, le Peresitene Aoao o le Aualofa: “Afai e tatala lou mafaufau ma lou loto, e te iloa ai le mau mea matagofie e uiga i tagata semanu e te le faamoemoeina ai lava. Pe a oo ina e maua le poto masani, pe a oo ina e vaaia, pe a oo ina tatala lou loto i isi tagata, e te iloa ai o i tatou uma lava o ni o”5