E Na’o le Faatekinolosi: Talavou Matutua

O Lo Matou Olioli mo se Malumalu Fou i Vanuatu

Ua faasoa mai e le autalavou matutua i lenei motu lo latou olioli ma le fiafia i le faasilasilaga o se malumalu i lo latou atunuu.

tamaitai talavou ma se fugalaau i lona lauulu o loo tu i fafo — Louisette Desire Waiane o Vanuatu

Na te Manatua Oe, O A‘u, ma Motu Uma o le Sami

“Ou te manatua lo‘u faalogo i le upu malumalu mo le taimi muamua ina ua valu o’u tausaga ma sa aoaoina a‘u e faifeautalai. Sa ou ola ae ma ni talitonuga eseese, ma e ui ou te lei malamalama i le uiga atoa o le upu malumalu i le anotusi o le talalelei a Iesu Keriso, sa ou aoaoina mulimuli ane po o a malumalu, aisea e taua tele ai, ma po o le a le auala e mafai ona saunia ai i tatou e faatino ia sauniga i totonu.

“Ou te fiafia lava e faitau i mekasini a le Ekalesia e uiga i le tele o aafiaga matagofie ma faavavega mai tagata o le Ekalesia o e ua mafai ona auai i le malumalu. O o latou aafiaga ua faamalosia ai lo‘u manao e ola agavaa, e ui lava e leai se malumalu i lo‘u motu. E i ai foi lo‘u agaalofa mo isi o e, e pei o a’u, e le o maua ni avanoa latalata i se malumalu. Ae e ese le pele ia te a‘u e tusa lava po o fea e te nofo ai, o faamanuiaga o le malumalu o le a oo mai pea lava pea i le taimi e tatau ai a le Alii lava ia.

“Sa ou iloaina lava i taimi uma o le a le taofia e le Alii le liligiina mai o Ana faamanuiaga i o tatou luga pe a tatou faamaoni ia te Ia, e tusa lava pe i ai se tatou malumalu e lata ane. Ma ua sili atu lo’u lotofaafetai mo le faigofie o se laasaga itiiti o le faatuatua—faapea e mafai ona tatou aoao ma le faamaoni ma faatalitali ma le onosai mo le Alii ‘i lea fuaitau i luga o lea fuaitau, ma lea mataupu i luga o lea mataupu’ (2 Nifae 28: 30). Ou te faailoa atu ma viia le taimi a le Alii ma Lana galuega maoae lea e finagalo o Ia ia avea ai au ma se vaega.

“Ina ua fofogaina mai e lo tatou perofeta pele, o Peresitene Russell M. Nelson, i le konafesi aoao ia Oketopa 2020 e faapea, o Port Vila, Vanuatu, o le a i ai se malumalu, sa ou lagonaina le filemu tele.

“O le a le galo ia te au le maligi ai o o’u loimata o le olioli. Ona e alofa o Ia ma e silafia Ana fanau, o loo Ia ‘manatua pea i latou o e o i motu o le sami’ (2 Nifae 29:7).

“Ou te tuuina atu la‘u molimau o loo i ai i le Alii ni faamoemoega ma ni fuafuaga tulaga ese mo atunuu uma i le salafa o le lalolagi. Na te silafia manaoga o Ana fanau ia maua faamanuiaga uma o le talalelei, e aofia ai faamanuiaga e o mai mai le malumalu. Mo i latou e le o i ai ni malumalu, ou te valaaulia outou ia faatalitali ma le onosai, ia faamaoni pea, ma tulimatai atu i faamanuiaga o loo i ai i le ala mo outou. Ou te fiafia tele i lenei talalelei ona o lona atoaga o le paia ma le malamalama.”

Louisette Desire Waiane, Siteki a Port Vila, Vanuatu

Ua Faanatinati e le Alii Lana Galuega, ma ua Ou I Ai Iinei e Fesoasoani

“O se lagona e le mafaamatalaina ma o se taimi o le a ou faamemelo ai mo le olaga atoa ina ua faasilasila mai e Peresitene Nelson o le a fausia se malumalu i Vanuatu. O se tala e lei faamoemoeina, ae ou te faalagolago i le Alii, Lana taimi, ma Lana galuega.

“Na oo ina ou iloa o loo faanatinatiina e le Alii Lana galuega i Lona lava atamai.

“Ina ua faia le faasilasilaga, na pau lava le mea na mafai ona ou mafaufau i ai o lo‘u aiga, uo, taitai, ma isi tagata uma sa ositaulaga e fesoasoani e fausia le malo o le Atua i Vanuatu. Sa sili atu ona ou talisapaia a matou lava paionia o e na saunia le ala. Ou te iloa o nisi o i latou ua tuua lenei olaga faaletino ma o loo olioli nei i le isi itu o le veli. Mo i latou ou te fai atu faafetai lava!

“Ua faalotomaualaloina a‘u i le iloa ua mafai nei e lo’u aiga ona olioli i faamanuiaga ma sauniga o le malumalu. I le taimi nei, o tagata o le Ekalesia i Vanuatu e ositaulaga le tele o mea ina ia o atu i le malumalu i Fiti po o Niu Sila. O nisi e na o le faa-tasi ona auai i o latou olaga. O lenei ua faamanuiaina i matou i le fausiaina o le maota o le Alii i lo matou lava laueleele. Mo lena mea ua ou lotofaafetai ai e faavavau.

“Ou te manao e valaaulia i tatou uma ia saunia faaleagaga mo le taimi o le a tatou faafeiloaia ai maota o le Alii i o tatou lava laueleele. O le a tatou osia feagaiga e faavavau ma auai i le galuega o le faaolataga i itu uma e lua o le veli. Ou te iloa a o tatou taumafai ia agavaa mo le mafutaga faifai pea ma le Agaga Paia, o le a sili atu ona tatou saunia e ulu atu i le maota paia o le Alii.

“O le taimi nei o loo ou auauna atu o se failautusi a le itu. Ua uunaia au e fesoasoani i lo matou peresitene o le itu ma fanau a le Atua o e ua tuuina mai e le Tama Faalelagi i la tatou tausiga e saunia ai mo lena aso tele pe a tatala le Malumalu o Vanuatu. Ma ou te tatalo o lena lava Agaga e tasi sa ou lagonaina i le taimi na faia ai le faasilasilaga o le a avea ma se uunaiga e fesoasoani ia te au e agai i luma.

“Ou te talisapaia le avanoa e faailoa atu ai o‘u mafaufauga ma lagona e uiga i lenei faasilasilaga maoae faasolopito. Pau lava le mea ou te fai atu ai o le faafetai lea i le Tama Faalelagi, ma ia Peresitene Nelson mo le avea ai ma fofoga taumomoli o le Alii i le lalolagi i aso nei.”

Dack Tivles, Luganville District, Vanuatu

E Tuuina Mai e le Malumalu ia i Tatou se Vaaiga o le Lagi

“E sailia e tagata uma se mea e musuia pe faamalolo ai i latou, i le faaleagaga ma le faaletino, i lenei olaga faaletino. Mo au, o lena mea o le avea ai ma se tagata O Le Ekalesia a Iesu Keriso o le Au Paia o Aso e Gata Ai. Talu ona ou auai i le Ekalesia i le 12 tausaga talu ai, ou te lei salamo lava i lau faaiuga. Ua faamanuiaina ai lo’u olaga i le anoanoai o itu.

“Ina ua ou papatiso, sa amata ona ou faalogo soo e uiga i le malumalu. E talanoa pea isi tagata e uiga i le taua o lena mea ia i latou. O se mea na aumaia i taimi uma le filemu i lo‘u loto ma uunaia a’u e agai i luma. Sa ou iloaina sa ou manao ou te alu iina i se tasi aso ma lagonaina le olioli sa latou lagonaina.

“Mulimuli ane, sa ou filifili e auauna atu i se misiona ma sa valaauina au i le Misiona a Brisbane Ausetalia . O le ulufale atu i le Malumalu o Hamilton Niu Sila mo le taimi muamua o se lagona sili lea ona lelei. O le a le galo ia te au lena aafiaga. O upu o le a ou faaaogaina e faamatala ai ou lagona o le olioli, filemu, ma le fiafia. Sa ou lagonaina moni lava le alofa o le Tama Faalelagi mo au, ma sa malosi le Agaga. Sa faaosofia ai au ia tumau pea le malosi i taimi uma i la‘u misiona ma mulimuli ane.

“I le avea ai ma tagata o le Ekalesia i Vanuatu, sa matou moemiti lava i taimi uma i le i ai o se malumalu i lo matou atunuu, ae ina ua faasilasila mai e Peresitene Nelson, sa pei ua avea a matou miti ma se mea moni.

“O le i ai o se malumalu iinei i Vanuatu o lona uiga o le a sili atu ona pisi o matou olaga, ae i se auala lelei, aua o le a matou maua le tomai e faia ai nisi galuega o le malumalu ma talafaasolopito o aiga.

“Ou te manatua le faalogo atu i se lauga o le konafesi aoao e uiga i le i ai pea o le malumalu i la outou vaaiga.¹ Pe a e faia, ua ia te oe lena tagavai—o le a i ai lava se mea e te tulimatai atu i ai.

“E fesoasoani le malumalu ia i tatou e faatumauina le vaaiga faapea o le olaga e le faatapulaaina e faafitauli. O le vaaiga e faavavau iina e mafai ona tatou maua ai le uunaiga e taumafai pea, tumau i le talitonu, tumau i le faatinoina o le faatuatua, ma faalagolago pea i ai. Mo au, o le i ai o se malumalu iinei i Vanuatu o se faamanuiaga sili—o se vaaiga o le lagi.”

Eunice Hoiesi James, Siteki a Port Vila, Vanuatu