Digital Lamang: Mga Young Adult
Pagbati sa Gugma sa Dios pinaagi sa Paghinulsol
Akong nakat-onan nga ang paghinulsol usa ka tinuod nga gasa sa gugma gikan sa atong Langitnong Amahan ug sa Manluluwas.
Niadtong nag-edad ko og 15, wala ko mohimo og labing maayo nga mga desisyon. Nakig-uban ko sa sayop nga grupo, ug kanunay nga gilibotan og daghang tentasyon—nagpadala ko sa pipila niini. Sa sinugdanan ang akong mga desisyon walay sangpotanan, apan sa kataposan akong nakaplagan ang akong kaugalingon nga anaa sa ngitngit kaayo nga dapit. Daghan ang akong gitago sa akong pamilya kabahin sa akong gibuhat, ug mibati og hilabihan nga pag-inusara. Dili ko sigurado kon asa modangop. Nagtuo gyod ko nga ang Dios wala mahigugma nako.
Sa usa ka partikular nga lisod nga adlaw, kalit lang kong nakahunahuna nga kinahanglan kong magsugod og basa sa Basahon ni Mormon. Nabasa na nako kini kaniadto, apan walay tinuod nga tinguha nga makakat-on gikan sa mga mensahe niini. Sa matag pahina mibati ko og kainit sa akong kasingkasing samtang nakaplagan nako ang mga kamatuoran gikan sa Manluluwas nga nagsulti nako nga mahimo kong mag-usab pinaagi sa Iyang tabang. Mibati ko nga gusto kong “[mo]awit sa awit sa matubsanon nga gugma” (Alma 5:26).
Human sa pagtuon sa Basahon ni Mormon ug sa mga mensahe niini nga nakasentro kang Kristo, nakabaton ko og kaisog nga akong gikinahanglan nga motug-an sa akong inahan mahitungod sa akong mga pagpili. Sa among pagpauli gikan sa estasyonan sa bus usa ka adlaw, nakig-istorya ko niya ug misulti niya mahitungod sa dili maayo nga mga desisyon nga akong nahimo. Nagtuo ko nga masuko siya, apan wala. Wala gani siya mohukom nako. Apan, siya mipahayag sa iyang dakong gugma alang nako, ug pinaagi sa iyang gugma, gibati usab nako ang gugma sa Dios sa unang higayon sa akong kinabuhi.
Samtang nagpadayon ko sa pag-ampo ug pagbasa sa mga kasulatan, nakabaton na usab ako og kaisog nga makigsulti sa akong bishop ug magsugod sa proseso sa paghinulsol. Sa dihang nangutana ko niya kon mahimo ba kong makig-istorya niya, gipasulod ko niya sa iyang opisina, ug nagsugod kami pinaagi sa pag-ampo. Human sa among panagsultihanay, nagsugod ko sa paghilak sa paagi nga wala pa nako mahimo sukad. Gisulti nako niya ang akong tanang sayop, ug tinuod nakong gibati ang gugma sa Langitnong Amahan ug ni Jesukristo nga mikuha sa kaulaw ug bug-at nga palas-anon nga akong gipas-an.
Ang akong bishop maloloy-on kaayo, nga maoy hinungdan nga ako mibati na usab sa gugma sa Langitnong Amahan ug ni Jesukristo. Siya mitudlo nako nga ang proseso sa paghinulsol mao ang paagi aron mabalaan ug, kauban niini, mapasaylo sa atong mga sayop. Nianang higayona, akong naamgohan nga ang paghinulsol usa gayod ka gasa sa gugma gikan sa atong Langitnong Amahan ug sa Manluluwas. Kanunay kong naghunahuna kon unsa ka dako sa Ilang gugma nako tungod sa kasulatan diha sa Doktrina ug mga Pakigsaad 19 diin ang Manluluwas nag-ingon, “Kay tan-awa, Ako, ang Dios, nag-ant[o]s niini nga mga butang alang sa tanan, nga sila unta dili mag-ant[o]s kon sila maghinulsol” (bersikulo 16).
Nagpasalamat ko nga tungod ni Jesukristo ug sa Iyang Pag-ula, kita adunay higayon nga molambo ug mahimong mas maayo. Nasinati nako ang kamatuoran nga ang atong mga kasingkasing mahimong mausab kon kita adunay sinsero nga mga tinguha ug makaamgo nga ang Langitnong Amahan ug si Jesukristo nahigugma nato.
Ang paghinulsol usa gayod ka gasa sa gugma gikan sa atong Langitnong Amahan ug sa Manluluwas. Ang mga panalangin nga akong naangkon gikan niini nga kasinatian ug sa daghan pa mas dagko pa kay sa akong gihunahuna, ug “ang akong kalag napuno sa hingpit nga kalipay labaw sa akong kasakit!” (Alma 36:20). Ang pagsinati sa makaayo nga gahom sa Manluluwas sa akong kinabuhi nagpahinumdom nako kon unsa gayod kita ka pinangga karon ug sa kanunay.