Digital Lamang: Mga Young Adult

Giunsa sa Ginoo Pagtabang Kanako nga Masabtan ang Balaanong Bili atol sa Akong Diborsyo

Ngalan gipugngan

Samtang misalig ko sa Manluluwas latas sa akong mga pagsulay, nakat-onan nako ang pagtan-aw sa uban—ug sa akong kaugalingon—sa laing paagi.

babaye nga nagbasa og mga kasulatan dapit sa templo

Sa akong gigikanan sa South Africa, adunay piho nga mga gituohan bahin sa kultura nga naghatag og bili sa mga sumbanan sa panagway ug katahom, nga makapaguol ug usahay mipabati nako og kabalaka mahitungod sa akong panagway ug kon si kinsa ko. Ug akong nasayran nga daghan kaayong mga young adult sa tibuok kalibotan ang nanglimbasog bahin sa unsay tan-aw sa tawo sa iyang lawas ug usab sa bili sa kaugalingon.

Usa sa gamhanang mga taktika ni Satanas mao ang kabalaka bahin sa lawas. Mosulay siya og kombinser nato sa paghukom sa atong mga kaugalingon ug sa uban base sa panagway. Apan akong nadiskobrehan nga kon maningkamot ko sa pagsunod sa mga sumbanan sa kalibotan bahin sa katahom ug bili sa kaugalingon, dili gayod ako mobati og katagbawan o kalinaw kon kinsa ko.

Ang yawe aron makakaplag og pagsalig mao ang pagpaningkamot sa pagtan-aw sa akong kaugalingon ug sa uban sama sa pagtan-aw sa Langitnong Amahan. Nagtugot kini nako nga masabtan ang akong tinuod nga bili sa kaugalingon ug makaila usab sa bili sa uban.

Ang Sayop nga Pokus

Sa dihang nakigdeyt ko, nakakita ko og daghang sitwasyon diin ang bili sa uban gibase sa panagway. Kini nakapaguol nako nga makita nga ang pipila nako ka higala diyotay ra og kadeyt kay sa niadtong daw mihaom sa mga sumbanan sa kalibotan bahin sa katahom. Ug, walay swerte, sa akong kaugalingong pagpangaplag og mahangturong kapikas, ako usab adunay kaugalingong listahan sa mga kinaiya—lakip na ang hitsura—nga akong gipangita sa akong umaabot nga bana.

Sa kataposan, akong nakaplagan ang usa ka tawo nga minyoan didto sa templo. Ug sa sinugdanan, nagtuo ko nga nindot ang among kaminyoon. Apan akong nabantayan og sugod nga ang akong bana nanghambog ngadto sa uban kon giunsa niya nga naminyoan ang kinagwapahang babaye, apan wala gayod siya makasulti og bisan unsa nga maayo bahin sa akong panagway kon kami ra. Kanunay siyang mokomentaryo kon nausab ang akong timbang ug mosulti unsaon akong buhok ug unsay isul-ob.

Pipila ka bulan human sa pagkatawo sa among unang anak, wala damha ang akong bana misulti nga gusto siya og diborsyo. Wala gani ko masayod kon unsay problema. Bisan pa man sa akong pinakamaayong mga paningkamot, dili na siya maagni aron maluwas ang among kaminyoon, ug gibiyaan ko nga usa ka nag-inusara nga inahan.

Wala madugay, akong nadiskobrehan nga aduna siyay laing babaye samtang minyo pa kami, ug nahingangha ko sa pagkasayod nga pareho siya nako og dagway apan mas manghod og pipila ka tuig ug walay kausaban sa porma sa lawas nga nahitabo sa pagmabdos ug pagpanganak. Misugod ko sa paghunahuna kon nganong dili ko ingon ka maayo ug nagpokus sa akong mga problemang pisikal.

Pag-abot sa panahon akong nakat-onan nga ang akong sitwasyon dili ingon niana ka talagsaon. Samtang akong gibalikan ang sitwasyon sa pagpakigdeyt, nakadungog ko og daghang istorya bahin sa mga batan-on nga nagdiborsyo tungod kay “dili na ganahan” sa ilang kapikas nga “nanambok na” o tungod kay wala nay “pisikal nga kaibog”.

Mahadlok ko matag higayon nga makadungog ko og tawo nga moingon nga ang hitsura mao ang labing importante nga bahin sa usa ka kapikas. Sa higayon nga mahunahunaan nako ang mahitungod sa panglantaw sa kalibotan bahin sa katahom, maghunahuna ko kon dili ba ko angayan sa gugma tungod sa kausaban sa porma sa akong lawas nga nasinati atol sa pagmabdos.

Unsa ang Tinuod nga Katahom

Samtang namalandong ko sa kahulogan sa tinuod nga katahom, nakakita ko og usa ka kinutlo nga sukwahi sa panan-aw sa kalibotan bahin niini: “Taliwala sa ‘tanang pagpangilad’ nga sagad mahitabo sa pagpakigdeyt—naglakip sa kanunay nga pinakanindot kitang tan-awon—kinahanglang atong hinumdoman nga ang panagway ug istilo ‘dili gayod mahinungdanon.’”¹

Nakatabang kini kanako nga masabtan nga ang pagtan-aw sa mga espiritu sa matag usa, o sa unsay anaa sa sulod, mao gayod ang importante kon mangita og kapikas ug mao ang yawe sa paghigugma sa uban ug sa atong kaugalingon. Isip mga disipulo ni Jesukristo, kinahanglan kita nga mopokus sa kalig-on sa kinaiya ug sa atong mga kailhanan isip balaanon nga mga espiritu.

Nasakitan kaayo ko sa akong diborsyo, apan nakahatag usab kini nako og higayon aron susihon pag-usab ang kahulogan sa tinuod nga katahom ug balaanong bili. Kon naglisod kamo sa pag-ila sa inyong balaanong bili o sa uban, ikonsiderar ang mosunod nga mga tip, nga nakatabang nako nga maghunahuna mahitungod sa sitwasyon sa lahi nga paagi.

1. Motambong sa Templo Kanunay

Didto sa templo, dili na kita maghunahuna sa kalibotan ug magpokus sa kahangtoran. Kon mas kanunay kong motambong sa templo ug mohinumdom sa akong mga pakigsaad, ang akong limitado nga panglantaw mas mabalhin ngadto sa mahangturong panglantaw. Ang unsay daw importante sa kalibotanong mga sumbanan dili gayod ingon ka importante didto sa templo.

Apan kini nga kausaban dili mahitabo diha-diha dayon. Moabot kini pinaagi sa makanunayong tinuyo nga paggahin og panahon didto sa balay sa Ginoo. Sama sa gitudlo ni Presidente Russell M. Nelson: “Ang pagsunod sa pakigsaad sa templo dili mapugnganon apan makapahimong posible sa mga butang. Mobayaw kini kanato lapas pa sa mga limitasyon sa atong kaugalingong panglantaw ug gah[o]m.”²

2. Magkat-on sa Pagpaminaw sa Espiritu Santo

Si Presidente Nelson midapit usab nato sa “pagpalambo sa [atong] espirituhanong kapasidad sa pagdawat og pagpadayag. … Pilia ang paghimo sa espiritwal nga buhat nga maoy gikinahanglan aron sa pagtagamtam sa gasa sa Espiritu Santo ug mas kanunay ug mas klaro nga pagpaminaw sa tingog sa Espiritu.”³

Kon kita mopili sa pagpokus sa mga butang sa Epiritu labaw pa sa mga butang sa kalibotan, kita mas mahimong andam sa pagpaminaw sa Iyang mga pag-aghat ug mga kamatuoran.

3. Mag-ampo alang sa Espirituhanong mga Gasa

Pipila sa espirituhanong mga gasa makahatag nato og kahibalo ug panglantaw nga atong gikinahanglan aron masabtan ang atong bili ug ang bili sa uban. Ang Langitnong Amahan miawhag nato nga “pangitaa … sa matinguhaon nga paagi ang labing maayo nga mga gasa” ug misulti nato nga kon kita magtinguha ug mag-ampo alang niini, kita makadawat sa unsay atong gikinahanglan (Doktrina ug mga Pakigsaad 46:8; tan-awa usab sa bersikulo 9). Ang mga gasa sa pag-ila, gugmang putli, ug kaalam ang tanan mga gasa nga mahimong makatabang nga angayng tun-an ug iampo kon kamo nagtinguha nga mas masabtan ang kahulogan sa tinuod nga katahom ug balaanong bili.

4. Mosunod sa Pulong sa Kaalam

Ang atong mga lawas matahom nga gasa gikan sa Langitnong Amahan. Si Satanas, kinsa nagtinguha sa pagguba sa plano Dios ug dili gayod makabaton og iyang kaugalingong lawas, moataki niining sagrado nga gasa. Ang pagtratar sa atong lawas nga may pagtahod ug ang pagdiskobre sa unsay mabuhat niini kon kita mo-ehersisyo ug molikay sa makadaot nga mga butang makatabang nato sa paghatag og bili sa atong mga lawas ug, pinaagi niini nga ehemplo, makatabang sa uban sa pagbuhat sa ingon.

5. Mopukos sa Manluluwas

Kon kita mosalig ni Jesukristo, atong makita ang atong mga kaugalingon kon si kinsa gayod kita—balaanong mga anak sa langitnong mga ginikanan. Samtang magkat-on kita sa paghigugma sa atong mga kaugalingon ug magmabination sa atong kaugalingon bisan kon makahimo kita og mga sayop, ang Manluluwas makatabang nato nga mopadayon sa pagpatubo ug pagpalambo sa Iyang mga hiyas.

Si Sister Joy D. Jones, kanhi Kinatibuk-ang Presidente sa Primary, miingon, “Kon ang gugma nga atong gibati alang sa Manluluwas ug sa unsay Iyang gibuhat alang nato mas dako pa kay sa enerhiya nga atong gihatag sa mga kahuyang, pagduha-duha, o dili maayong kinaiya, nan motabang Siya nato nga mabuntog ang mga butang nga nakaingon sa pag-ant[o]s sa atong kinabuhi.”⁴

Sa pagpaningkamot nga motan-aw sa uban kon si kinsa gayod sila, nagsugod ko sa pagpraktis nga motan-aw nila sa lahi nga paagi. Kon makabantay ko sa akong kaugalingon nga naghukom og tawo base sa ilang panagway, mas motan-aw ko og maayo ug maningkamot sa pagtan-aw sa unsay pagtan-aw sa Langitnong Amahan. Nahingangha ko sa paagi sa Dios sa pag-abli sa akong mga mata. Wala na ko magtan-aw sa pisikal nga mga hiyas ug nagsugod sa pagsabot kon unsa ang tinuod nga katahom ug bili—ang Kahayag ni Kristo nga anaa sa matag usa kanato.

Mas Mopaduol ngadto ni Kristo

Bisan kon nakasinati ko og sakit kaayo nga mga kasinatian, akong nakat-onan nga tugotan si Kristo nga moayo nako ug nga higugmaon nako ang akong lawas ug akong espiritu. Si Presidente James E. Faust (1920–2007), kanhi Ikaduhang Magtatambag sa Unang Kapangulohan, mitudlo: “Ang pagtuo nga ikaw usa ka anak nga babaye [o lalaki] sa Dios makahatag kanimo og pagbati sa kahupayan sa imong bili sa kaugalingon. Kini nagpasabot nga makakaplag ka og kalig-on diha sa kalinaw nga nagagikan kang Kristo. Kini makatabang nimo nga matubag ang mga kasakit ug mga hagit pinaagi sa hugot nga pagtuo ug kalinaw.”⁵

Ang kalibotan tingali adunay kaugalingon niining mga ideya mahitungod sa kahulogan sa katahom ug balaanong bili, apan kon kita mas mopaduol ngadto sa Langitnong Amahan ug ni Jesukristo, ang atong kapasidad sa pagtan-aw sa pagtuis sa kalibotan ug pag-ila sa tinuod nga katahom molambo. Hinaot nga kita unta mapanalanginan sa pagtan-aw sa katahom sa uban ug sa atong kaugalingon sa tukmang paagi—sama sa Ilang pagtan-aw kanato.