Autalavou Matutua
“Ou Te Le Iloa le Uiga o Mea Uma,” ma E le Afaina Lena Mea
A tatou le iloa tali uma, o le faatuatua o le tali lea.
O le a le galo lava ia te au se lesona sa ou faia ma se tamaitai talavou i lau misiona.
Sa ia fesili pea mo faamaoniga faaletino pe vaaia o le moni o le Tusi a Mamona. Ma sa ou saofai ai iina, ma le le mautinoa pe faapefea ona tali atu i ana fesili ma tuuaiga. Sa avea au ma se faifeautalai talavou, naunautai, ma na pau le mea na ou iloa e moni le Tusi a Mamona. Sa ou lagona le lotovaivai ona sa ou le iloa tali uma i ana fesili. Ae sa ou iloaina, semanu e le afaina pe ana i ai sau faamaoniga faaletino e faamaonia ai e moni le Tusi a Mamona. O le faamaoniga o le a le tuuina atu ai ia te ia le faatuatua.
Na aoao mai Elder D. Todd Christofferson o le Korama a Aposetolo e Toasefululua: “O le a le oo mai le faatuatua mai le suesueina o anotusi anamua i le na o se taumafaiga lava faaleaoaoga. O le a le oo mai mai elieliga ma le mauaina o mea mai lalo o le eleele. O le a le oo mai mai suesuega faasaienitisi. O le a le oo mai foi mai le vaaitino i vavega. O nei mea e ono fesoasoani e faamaonia le faatuatua, po o nisi taimi e luitau ina ai, ae latou te le fatufatuina le faatuatua.” 1
O le a le faigofie pe ana mafai ona tatou faaali atu papatusi auro i le lalolagi atoa? O nisi tagata e mautinoa lava o le a auai i le Ekalesia, ae o isi atonu e le auai, aua o faamaoniga faaletino e le na o le pau lea o mea e manaomia e fausia ai le faatuatua ia Iesu Keriso ma Lana talalelei. Mulimuli ane, e pei ona sa fetalai le Faaola ia Toma, “Amuia o e le vaai mai, ae talitonu mai pea” (Ioane 20:29).
O Le A La Le Faatuatua?
O le faatuatua e le na o le talitonu—o se mataupu faavae o le faatinoga. “O le faatuatua ia Keriso e tau atu i faatinoga. E tau atu i le suia faamaoni ma tumau.” 2 Ma e ui ina fai mai le lalolagi o le faatuatua o le mulimuli tauaso, ua ou malamalama o le faatuatua o le faalagolago lea o le a tuuina mai e le Atua ia te au ni faamautinoaga o le upumoni pe a ou faatinoina.
“O le i ai o le faatuatua ia Iesu Keriso o lona uiga o le faalagolago atoa atu lea ia te Ia—faalagolago i Lona mana, atamai, ma le alofa. E aofia ai le talitonu i Ana aoaoga. O lona uiga o le talitonu e tusa lava pe tatou te le malamalama i mea uma, e malamalama i ai o Ia.” 3
E le o ia i tatou tali uma, ae a tatou faalagolago i lo tatou Tama Faalelagi e silafia mea uma, o le a Ia taitai atu i tatou i le mea moni (tagai Upu a Mamona 1:7).
Taula’i Atu i Mea Ua E Iloa
E mafai ona lagona le lofituina e faalogo i fautuaga e fausia se faatuatua e le maluelue i se lalolagi o loo taumafai pea e luluina i tatou. Ae o le fausiaina o le faatuatua e le maluelue e mafai. O le faatuatua o se filifiliga. Pe a tatou filifili e le aunoa ma le loto i ai e ola i le faatuatua i aso taitasi, tatou te fausia se faavae malosi ma se molimau mausali.
Na aoao e le Tupu o Peniamina lona nuu i se fua mo le fatuina o le faatuatua e le maluelue: “Ia talitonu i le Atua; … ia talitonu ua ia te ia le poto uma, ma le mana uma, i le lagi ma le lalolagi; ia talitonu e le mafai e le tagata ona malamalama i mea uma e mafai ona malamalama i ai le Alii” (Mosaea 4:9).
Mo au, pe a ou taliaina e i ai mea atonu ou te le malamalama atoatoa i ai i lenei olaga ma taulai atu i mea ua ou iloa, o isi mea e le luluina ai lau molimau i le alofa o le Atua mo au ma le moni o lenei Ekalesia.
Ou te toe ta’u atu upu a Elder David A. Bednar o le Korama a Aposetolo e Toasefululua:
“Ou te le iloa ia mafuaaga uma, ia faamoemoega uma, ma ou te le iloa mea uma e uiga i le taimi a le Alii. Faatasi ai ma Nifae, e mafai e oe ma a’u ona faapea atu, matou te “le iloa le uiga o mea uma” (1 Nifae 11:17).
“Ae ou te iloa lelei lava nisi o mea. Ou te iloa o i tatou o atalii ma afafine agaga o se Tama Faalelagi alofa. Ou te iloa o le Tama e Faavavau o le mataisau o le fuafuaga o le fiafia. Ou te iloa o Iesu Keriso o lo tatou Faaola ma le Togiola.” 4
O nei mataupu faavae autu o ni vaega taua o la‘u molimau. Ua faaali mai e le Atua le tele o mea silisili ma le taua; aua nei pa’ulia i mealilo e lei faaalia mai e Ia (tagai Mataupu Faavae o le Faatuatua 1:9).
E tele mea tatou te lei iloaina. Ma e le afaina lea!
Na saunoa mai Elder Neal A. Maxwell (1926–2004) o le Korama a Aposetolo e Toasefululua: “E moni e le mafai ona tatou malamalama atoatoa i nei mea uma i le taimi nei! Ioe, e le mafai ona tatou iloa le uiga o mea uma i le taimi nei. Ae e mafai ona tatou iloa, i le taimi nei, e silafia i tatou e le Atua ma e alofa ia i tatou taitoatasi!” 5
Faatino i le Faatuatua Nai lo le Masalosalo
E toatele tagata faamaoni o le ekalesia e vaivai pe a latou faatagaina o latou masalosaloga e leotetele atu nai lo o latou faatuatua. O le taulai atu i le masalosalo e ono afua ai ona tatou autilo “i tala atu o le faailoga” (Iakopo 4:14).
O le tamaitai talavou sa ou aoaoina i la‘u misiona o le a na ona talitonu e moni le Ekalesia pe afai ma te faaleaogaina ma la’u soa ana tuuaiga uma. Ae na pau lava le mea e mafai ona ou faamaonia atu ia te ia o le mea moni o le sailia o tali e ala i faaaliga faaletagata lava ia. 6
E mafai ona ou molimau atu i le faamaoniga mamana a le Agaga Paia i lo‘u olaga. Ou te iloa e moni le Tusi a Mamona, e le faapea ona ua ou iloa tali uma ae ona ua molimau mai le Agaga ia te au e le mafaafitia lona moni. E lei oo mai la‘u molimau i se faaaliga faavavega ae i le aluga o taimi, e ala i le suesue ma le tatalo e le aunoa. I se isi faaupuga, e lei oo mai la‘u molimau ona o faamaoniga faaletino, ae ona sa ou faatinoina i le faatuatua ma o le a faaauau pea ona faia.
O le a la le mea tatou te faia pe afai e le mafai ona tatou maua tali i a tatou fesili? Sa faasoa mai e Sister Camilla Kimball, le faletua o Peresitene Spencer W. Kimball, lana fuafuaga mo le faatalitali ai mo tali i fesili faigata. Sa i ai sana fata faafaatusa mo mea na te lei iloaina ia tali i ai. Ma a o ia taofi mau i mea sa ia iloa a o suesue foi ma tatalo e uiga i ana fesili, sa mafai ona ia maua se malamalama sili atu.
“O loo i ai pea au fesili i luga o lena fata,” na ia fai mai ai, “ae ua ou malamalama i le tele o isi mea i loʻu olaga ua ou naunau ai e faatali mo tali o totoe.” 7
Toe Foi i Mea Faavae
Sa i ai taimi sa ou le malamalama ai i ni poloaiga faapitoa. O taimi na i ai ni a‘u fesili e uiga i le faia o ava e toatele, tosina atu i le itupa tutusa, po o isi mea.
Ae sa ou aoaoina se lesona mamana mai le ala na aoao atu ai e le Atua ia Atamu ma Eva.
Ua aoaoina i tatou e faapea “Na tuuina mai ai e le Atua poloaiga ia te i latou, ina ua uma ona ia faaali mai ia te i latou le fuafuaga o le togiolaina” (Alema 12:32, ua faaopoopo le faamamafa).
O le a le faateia ai au pe ana tele ni fesili a Atamu ma Eva e uiga i poloaiga na talosagaina i laua e mulimuli ai. Ae a o lei mafai ona la malamalama i poloaiga, sa muamua ona la aoao e uiga i le fuafuaga o le faaolataga.
O le a le lelei o lou malamalama i le fuafuaga o le faaolataga? A i ai ni au fesili, pe e te toe foi i mataupu faavae autu o le fuafuaga a le Atua? A o ou saili mo tali i au fesili, o le suesueina o le fuafuaga o le faaolataga ua fesoasoani ou te maua ai ni vaaiga o tali a le Atua.
Pe a ou taulai atu i upumoni autu ou te iloa, e mafai ona ou tu i luga o se faavae mautu. Ou te le faatagaina ni mea faatauvaa e luluina ai lo‘u faatuatua. Ou te le iloa mea uma, ae ua lava mea ua ou iloa. 8
E Mafai Ona Tatou Filifili i Taimi Uma le Faatuatua
Sa faaiu la matou lesona ma lena tamaitai talavou i la‘u misiona e ala i le molimau atu ma le lototoa i le Tusi a Mamona. Sa ou tau atu ia te ia le auala e tasi e mafai moni ai ona ia maua tali i ana fesili uma o le fesili lea i le Tama Faalelagi pe moni le Tusi a Mamona. Seia oo ina malamalama o ia i mea faavae o le talalelei a Iesu Keriso, e mafai ona ia tuuina isi ana fesili i luga o le fata ma toe vaai i ai mulimuli ane ma se malamalama sili atu ma le faatuatua. Ae o le mea moni, pe le faatatau ea lena mea ia i tatou uma? E mafai moni lava ona faateleina lo tatou faatuatua e ala i le faatinoina o le faatuatua.
Ua faamanuiaina au i taimi uma ou te filifilia ai le faatuatua pe a feagai ma mea e le mailoa. Ma a ou faalagolago i le Tama Faalelagi e faaali mai tali i Lona lava taimi, ou te iloa o le a ou lagonaina le fiafia ma le olioli i le ola ai i le talalelei—e tusa lava pe aunoa ma le iloaina o tali uma.