Ina Ia Tatou “Le … Solomuli” (MF&F 19:18)

David A. Bednar

O Le Korama a Aposetolo e Toasefululua

Faigalotu a le OAE mo Talavou Matutua • 3 Mati, 2013 • Iunivesite o Texas Arlington

Ou te talisapaia lo’u auai i lenei faigalotu faatasi ai ma talavou o le Ekalesia mai le salafa o le lalolagi. Ou te alofa ia te outou ma talisapaia lenei avanoa tatou te tapuai faatasi ai.

Ua uma ona talanoa atu Susan ma molimau atu i mataupu faavae taua, ma o le a faamanuiaina i tatou uma ma faamalolosia pe a tatou faaaogaina ana aoaoga i o tatou olaga i aso taitasi. O Susan o se tamaitai amiotonu, o se tamaitai filifilia, ma o la’u pele i lo’u olaga atoa.

Sa ou manatunatu loloto ma ole atu ma le naunau i lo tatou Tama Faalelagi ia ou iloa pe faapefea ona ou tautuaina outou i le mea sili i le po nei. Ou te tatalo ia tofusia i tatou ma le mana o le Agaga Paia---ia mafai ona tatou mafaufau i mea e tatau ona tatou mafaufau i ai, lagona mea e tatau ona tatou lagonaina, aoao mea e tatau ona tatou aoaoina ina ia mafai ai ona tatou iloa mea e tatau ona tatou faia ma avea moni ai i tatou ma tagata o loo faananau le Alii e avea ai i tatou.

O Se Soo Tuuto ma o se Faataitaiga o le Le Solomuli

O Elder Neal A. Maxwell o se soo pele o le Alii o Iesu Keriso. Sa avea o ia ma se tasi o le Korama a Aposetolo e Toasefululua mo le 23 tausaga, mai le 1981 i le 2004. O le mana faaleagaga o ana aoaoga ma ana faataitaiga o se soo faamaoni na faamanuiaina ai ma o loo faamanuiaina ai pea i se ala ofoofogia ia tagata o le Ekalesia toefuataiina a le Faaola ma tagata i le lalolagi.

Ia Oketopa o le 1997, sa ma talimalo ai ma Sister Bednar ia Elder ma Sister Maxwell i le Iunivesite o Polika Iaga---Idaho. Sa tuupoina e saunoa atu Elder Maxwell i tagata aooga, le au faigaluega, ma faiaoga i se faigalotu tuufaatasi. Sa faatalitali ma le naunautai tagata uma i le lotoa mo lana asiasiga ma tapena faamaoni ia maua lana savali.

O le amataga o lena lava foi tausaga, sa feagai ai Elder Maxwell i ao ma po e 46 ma ni togafitiga faigata mo le gasegase o le lukimia e faaaoga ai le leisa. E le’i umi ona maea ona togafitiga ma te’a i tua mai le falemai, ae ia saunoa puupuu atu i le konafesi aoao a le Ekalesia ia Aperila. Sa faasolosolo manuia lava lona tulaga ma ona togafitiga agai i masina o le tautotogo ma le taumafanafana, ae peitai o le malosi faaletino ma le aumalosi o Elder Maxwell sa le faatapulaaina ai o ia ina ua malaga atu i Rexburg. Ina ua uma ona matou feiloai ma Elder ma Sister Maxwell i le malaevaalele, sa ma faafeaoina atu ma Susan i la’ua i lo ma fale mo se malologa ma se taumafataga māmā a o le’i amataina le faigalotu.

A o matou talanoa i lena aso, sa ou fesili atu ia Elder Maxwell po o a ni lesona sa ia aoaoina e ala mai i lona gasegase. O le a ou manatua pea le tali tuusa’o ma le ootia sa ia tuuina mai. Sa ia fai mai “Dave, ua ou aoaoina o le le solomuli e sili atu le taua nai lo le ola pea.”

O lana tali i la’u fesili sa o se mataupu faavae lea sa ia maua ai le tele o aafiaga patino a o faagasolo ona togafitiga e faaaoga ai le leisa. A o agai atu Elder Maxwell ma lona faletua i le falemai ia Ianuari o le 1997, i le aso sa atofaina e amata ai lana faatinoga muamua o ona togafitiga, sa la afe i le paka o taavale ma nofonofo ai mo sina taimi patino la te mafuta ai. Sa umi se mapuea a Elder Maxwell ma tilotilo atu i [lona faletua]. Sa aapa atu o ia mo lona lima ma faapea atu …, ‘Ou te le fia ‘solomuli’ lava’” (Bruce C. Hafen, A Disciple’s Life: The Biography of Neal A. Maxwell [2002], 16).

I lana savali i le konafesi aoao ia Oketopa 1997, sa faaautuina “Faaaogaina o le Toto Togiola o Keriso,” sa aoao atu ai Elder Maxwell ma le faamaoni loloto: “A o tatou luiina o tatou lava tagata … i tofotofoga ma faigata, e mafai foi ona tatou aioi atu i le Tama, e pei foi ona sa faia e Iesu, ia tatou ‘le … solomuli—o lona uiga o le tuumuli pe toe solomuli (MF&F 19:18). O le le solomuli e sili atu le taua nai lo le ola pea! Ma le isi, o le inumia o se ipu oona e aunoa ma le ‘onā ai, e faapena foi le avea ai o se vaega o le faataitaiga a Iesu” (Ensign, Nov. 1997, 22).

O le tali a Elder Maxwell i la’u fesili na mafua ai ona ou tomanatu i aoaoga a Elder Orson F. Whitney, o lē sa avea foi o se sui o le Korama a Aposetolo e Toasefululua: “E leai se tiga tatou te mafatia ai, leai se tofotofoga tatou te oo i ai e maumauina. E fesoasoani lo tatou aoaoina i le atinaega o uiga faaalia e pei o le onosai, faatuatua, naunautai, ma le lotomaualalo. O mea uma tatou te tigaina ai ma mea uma tatou te onosaia, ae maise lava pe a tatou tumau i le faapalepale, e fausia ai o tatou tagata, faamama ai o tatou loto, faalautele ai o tatou agaga, ma fai ai i tatou o ni tagata e atili atu ona agamalu ma agaalofa, ma sili atu ona agavaa e ta’ua o fanau a le Atua … ma e ala i le faanoanoa ma puapuaga, tiga ma faigata, tatou te maua ai aoaoga ia ua tatou o mai iinei ia maua ai” (sii mai le Spencer W. Kimball, Faith Precedes the Miracle [1972], 98).

Ma o mau nei e uiga i puapuaga o le Faaola a o Ia ofoina mai le taulaga togiola e le i’u ma faavavau, ua sili atu ona musuia ma anoa ia te a’u:

“O lea ou te apoapoai atu ai ia te oe ia e salamo—salamo, ne’i ou taia oe i le tootoo o lo’u gutu, ma i lo’u toasa, ma i lo’u ita, ma tiga tele ai o’u mafatiaga—o le a le tetele o le tiga e te le iloa, o le a le malosi e te le iloa, ioe, o le a le faigata ona onosaia e te le iloa.

“Aua faauta, o A’u, o le Atua, na mafatia i nei mea mo tagata uma, ina ia latou le mafatia pe afai latou te salamo;

“Ae afai latou te le salamo, o le a latou mafatia e pei lava o a’u;

“O le mafatia lea na oo ai ia te a’u lava, o le Atua lava lea, o le ua silisili i tagata uma, le gatete ona o le tiga, ma tafe toto ai i pu afu uma, ma mafatia ai i le tino atoa ma le agaga—ma manao ai ia Ou le inuina le ipu oona, ma solomuli—

“E ui i lea, ia i ai i le Tama le viiga, ma sa Ou inu ma faauma ai a’u tapenapenaga mo le fanauga a tagata” (MF&F19:15–19).

Sa le’i solomuli le Faaola i Ketesemane po o luga o Korokota.

Sa le’i solomuli foi Elder Maxwell. Sa agai atu pea i luma ma le faamaoni lenei Aposetolo maoae ma sa faamanuiaina i taimi faaopoopo i le olaga nei e alofa atu ai, e auauna atu ai, e aoao atu ai, ma molimau atu ai. O na tausaga faaiu o lona soifua sa o ni faataitaiga faaopoopo o le avea ma se soo tuuto—e ala i ana upu ma ana galuega.

Ou te talitonu o le toatele o i tatou e pei ua manatu o se tamalii e i ai le gafatia faaleagaga, poto masani, ma le tulaga e pei o Elder Maxwell, ia feagai ma gasegase ogaoga ma le oti ma se malamalamaaga o le fuafuaga a le Atua mo le fiafia, ma se faamautinoaga ma le alofafua, ma le mamalu. Ma sa mautinoa sa i ai o ia i lena tulaga. Ae o lo’u faamoemoega i le asō o le molimau atu lea e faapea, o faamanuiaga faapena e le faapea ua faapolopoloina mo na o le Au Pulega Aoao pe mo ni nai tagata filifilia o le Ekalesia.

Talu mai lo’u valaauga e faatumu le avanoa i le Korama a le Toasefululua lea na avanoa ona o le maliu o Elder Maxwell, o o’u tofiga ma femalagaaiga ua mafai ai ona ou masani i Au Paia o Aso e Gata Ai faamaoni, lototetele, ma totoa i le lalolagi atoa. Ou te fia ta’u atu ia te outou e uiga i se tasi alii talavou ma se tasi tamaitai talavou o e ua faamanuiaina lo’u olaga ma na ou aoaoina ai ni lesona faaleagaga taua e uiga i le le solomuli ma e uiga i le faatagaina o o tatou lava loto taitoatasi ina ia “tofatumoanaina i le finagalo o le Tama” (Mosaea 15:7).

E moni le tala, ma o tagata e moni foi. Ae peitai, o le a ou le faaaogaina ia suafa moni o tagata taitasi o loo aafia ai. O le a ou ta’ua le alii talavou o Ioane ae o le tamaitai talavou o Heta. Ua ou faaaogaina foi ina ua faatagaina ni faamatalaga filifilia mai a la’ua api talaaga patino.

Ia Aua Ne’i Faia Lo’u Loto Ae o Lou Finagalo

O Ioane o se alii agavaa ua umia le perisitua ma sa auauna faamaoni atu o se faifeautalai faamisiona. Ina ua foi mai lana misiona, sa faamasani ma faaipoipo atu i le tamaitai amiotonu ma amiolelei o Heta. O Ioane sa 23 ona tausaga ae o Heta sa 20 i le aso sa faamauina ai i la’ua mo le olaga nei ma le faavavau atoa i le maota o le Alii. Faamolemole ia manatua le matutua o Ioane ma Heta a o faagasolo lenei tala.

Pe a ma le tolu vaiaso talu ona uma le la faaipoipoga i le malumalu, ae maua loa Ioane i le kanesa o ponaivi. Sa maua foi ni patu i ona māmā, ma sa le tulaga lelei le tala mai.

Sa tusia e Ioane i lana api talaaga: “O le aso sili lenei ona ou fefe ai i lo’u olaga. E le gata ona sa ta’u mai ua ou maua i le kanesa, ma le isi foi, ona sa faatoa ou faaipoipo lava ma i se isi itu, sa ou manatu ua ou toilalo o se tane. O a’u o le tagata e tuuina atu le tausiga ma le puipuiga o le ma aiga fou, ae o lenei—e tolu vaiaso agai atu i lena matafaioi—ua ou lagonaina e pei ua ou toilalo. Ou te iloa o lena manatu e leai se uiga, ae o se tasi lea o mea faavalevalea sa ou ta’uina ia te a’u lava i se taimi o faigata.”

Sa tusia e Heta: “O se tala matuai le lelei lenei tala, ma ou te manatua le suia tele ai o a ma vaaiga mamao. Sa ou i ai i totonu o se potu faatalitali o le falemai ma sa ou tusitusia ai ni faamatalaga faafetai o le faaipoipoga a o ma tatalia taunuuga o suesuega o [Ioane]. Ae ina ua iloa ane le tulaga o le kanesa o [Ioane], sa foliga mai ai ua le toe taua tele ia ulo-uila ma ulo ma falai. O le aso sili lenei ona leaga o lo’u olaga, ae ou te manatua lo’u alu ou te moe i lena po ma le lotofaafetai mo la ma’ua faamauga i le malumalu. E ui ina sa ta’u atu e fomai ia [Ioane] e na o le 30 pasene le avanoa e ola ai, sa ou iloaina afai e tumau lo ma faatuatua e 100 pasene le avanoa ou te faatasi ai ma ia e faavavau.”

Pe tusa e tasi le masina mulimuli ane na amata ai togafitiga o Ioane e faaaoga ai le leisa. Sa ia faamatalaina lona aafiaga: “O togafitiga sa atili ai ona ou ma’i nai lo se isi lava taimi o lo’u olaga. Sa toulu lo’u lauulu, sa lusi o’u pauna e 41, ma sa pei ua salalautasi lo’u tino. O le kimo foi sa ou aafia ai faalelagona, faalemafaufau, ma faaleagaga. O le olaga sa pei o se tietiega e alu i luga ma lalo i le aluga o masina o togafitiga i leisa o taimi ua lelei, ma taimi faalelelei, ma isi mea uma i le va. Ae o na mea uma, sa tumau ai lava lo ma faatuatua ma [Heta], o le a faamalolo a’u e le Atua. Sa ma iloaina lava.”

Sa faamatala mai e Heta ona mafaufauga ma lagona: “Sa le mafai ona ou tatalia le tuua o [Ioane] e nofo toatasi na o ia i le po i le falema’i, o lea ou te moe ai i po uma i luga o se nofoaumi laitiiti i totonu o lona potu. E toatele a ma uo ma aiga e asiasi mai i le ao, ae o po sa sili ona faigata. Ou te sioa i luga o le taualuga ma manatunatu po o le a le fuafuaga a le Tama Faalelagi mo i ma’ua. O nisi taimi e feosofa’i solo ai lo’u mafaufau i nofoaga pogisa, ma o lo’u fefe i le aveesea atu o [Ioane] na toetoe lava a manumalo ia te a’u. Ae sa ou iloaina o nei mafaufauga sa le mai le Tama Faalelagi. Sa oo ina fai soo a’u tatalo mo le faamafanafanaga, ma sa tuuina mai e le Alii ia te a’u le malosi e faamalosi ai pea.”

O le tolu masina mulimuli ane, sa faia ai se taotoga o Ioane e aveese ai se patu lapoa mai lona vae. Fai mai Ioane: “O le taotoga sa o se mea telē lea mo ma’ua aua, sa tatau ona faia ni suesuega o le toto i le patu, e iloa ai po o le a le tele sa aoga i ai le taotoga ae o le a foi le tele o le kanesa ua mate. O lenei iloiloga o le a tuuina mai ai ia i maua le faailoga muamua o le aoga o le togafitiga i le leisa ae o le a foi le malosi e tatau ona ma i ai i isi togafitiga i le lumanai.”

E lua aso talu ona uma le taotoga, ae ou asiasi atu ia Ioane ma Heta i le falemai. Sa matou talanoa e uiga i le taimi muamua sa ou feiloai ai ia Ioane i totonu o le misiona, e uiga i le la faaipoipoga, e uiga i le kanesa, ma e uiga i lesona e faavavau le taua tatou te aoaoina e ala i tofotofoga o le olaga nei. A o faaiuiu lo matou taimi faatasi, sa talosaga mai Ioane pe mafai ona ou faia sona faamanuiaga faaleperisitua. Sa ou tali atu o le a ou fiafia e tuuina atu se na faamanuiaga, ae e manaomia ona ou fesili atu i ni fesili.

Ona ou tuuina atu lea o ni fesili ou te le’i mafaufauina e fesili atu ma ou te le’i muai fuafuaina: “[Ioane], e i ai sou faatuatua e le faamaloloina oe? Afai o le finagalo o lo tatou Tama Faalelagi e te siitia atu e ala i le oti i lou talavou i le lalolagi o agaga e faaauau ai au galuega, pe ua ia te oe le faatuatua e usitai ai i Lona finagalo ma lē faamaloloina ai?”

O le mea moni sa ou te’i i fesili sa musuia a’u e fai atu i lenei ulugalii faapitoa. E tele taimi i tusitusiga paia, sa faatino ai e le Faaola po o Ana auauna le meaalofa faaleagaga o le faamalologa (tagai 1 Korinito 12:9;MF&F 35:9; 46:20) ma faapea ai ua i ai i se tagata le faatuatua e faamaloloina ai (tagai Galuega 14:9; 3 Nifae 17:8; MF&F 46:19). Ae a o matou talanoa faatasi ma Ioane ma Heta ma tauivi ma nei fesili, sa faateleina ona matou malamalama e faapea, afai o le finagalo o le Atua e mo lenei alii talavou ina ia faamaloloina, o lea la o lena faamanuiaga e pau lava le auala e maua ai, pe afai lena e i ai muamua i lenei ulugalii lotototoa le faatuatua e le faamaloloina. I nisi faaupuga, sa manaomia e Ioane ma Heta ona faatoilalo, e ala i le Togiola a Iesu Keriso, le lilifa atu i le “tagata natura” (Mosaea 3:19) o loo i totonu o i tatou uma o le poloai atu ma le le to’a ma le le mapu o le faatauanau atu mo faamanuiaga tatou te mananao i ai ma talitonu ua alagatatau mo i tatou.

Sa matou iloa se mataupu faavae e fetaui i soo tuuto uma: o le faatuatua malosi i le Faaola o le taliaina ma le usiusitai o Lona finagalo ma [Lana] taimi i o tatou olaga—e tusa lava pe o le tali e le o le mea lea sa tatou faamoemoe pe mananao i ai. E mautinoa lava, o le a mananao, moomoo, ma aioi atu Ioane ma Heta mo le faamalologa ma o laua manatu, mafaufau, ma le malosi atoa. Ae o le mea e sili atu le taua, o le a laua “loto ina usitai uma ua silafia e le Alii e tatau ona faaoo mai i [o laua] luga, e pei ona usitai atu se tamaitiiti i lona tama” (Mosaea 3:19). E moni, o le a la naunau e “tuu atu o [laua] agaga atoa e fai ma taulaga ia te ia” (Ominae 1:26) ma tatalo ma le lotomaualalo, “Lo’u Tama e, a e finagalo i ai, ia e ave ese lenei ipu ia te a’u: ae aua le faia lo’u loto, a o lou finagalo” (Luka 22:42).

O le mea sa foliga muamua mai ia Ioane, Heta ma a’u o ni fesili faigata na avea ma se vaega o se mamanu o mataupu faavae e foliga mai e feteenai o le talalelei. Mafaufau i le apoapoaiga a le Faaola: “O lē maua lona ola, e maumau ai ia te ia: a o le faamaumau i lona ola ona o a’u, e maua e ia” (Mataio 10:39). Sa Ia folafola mai foi, “A e toatele o e ua muamua e avea ma mulimuli; o e ua mulimuli foi e avea ma muamua” (Mataio 19:30). Ma sa fautuaina e le Alii Ona soo i aso e gata ai, “Ma o lau upu o le a faamaualalo ai le toatele o tagata maualuluga, ma o lau upu o le a faaea ai le toatele o e maualalalo” (MF&F 112:8). O lea la, o le i ai o le faatuatua ina ia le faamaloloina e foliga mai e fetaui lelei lava i se vaega o mataupu faavae o le talalelei e foliga mai e feteenai lea e manaomia ai i tatou ia ole atu, ia saili, ma ia tu’itu’i atu ina ia mafai ona tatou maua le poto ma le malamalama (tagai 3 Nifae 14:7).

Ina ua uma ona faaaluina le taimi manaomia e mafaufau loloto ai i a’u fesili ma talanoa atu i lona toalua, sa fai mai loa Ioane ia te a’u: “Elder Bednar, ou te le fia oti. Ou te le manao e tuua [Heta]. Ae afai lava o le finagalo o le Alii ia siitia atu a’u i le lalolagi o agaga, ou te matea ua ou naunau foi i ai.” Sa tumu lo’u loto i le faafetai ma le faamemelo a o o’u molimauina lenei ulugalii talavou o faafetaia’ia le tauiviga sili ona faigata o tauiviga faaleagaga uma—o le gauai atu ma le usiusitai o o la’ua loto i le finagalo o le Atua. Sa faamalosia lo’u faatuatua a o o’u molimauina lenei ulugalii o faatagaina o la’ua naunautaiga malolosi ma malamalama mo le faamalologa ina ia “tofatumoanaina i le finagalo o le Tama” (Mosaea 15:7).

Sa faamatalaina e Ioane lana tali i le matou talanoaga ma le faamanuiaga sa ia mauaina: “Sa faasoa mai e Elder Bednar ia i ma’ua le manatu mai ia Elder Maxwell e faapea, e sili atu le le solomuli nai lo le ola pea. Ona fesili mai lea o Elder Bednar ia i ma’ua, ‘Ou te iloa ua ia te oe le faatuatua e faamaloloina ai, ae o ia te oe ea le faatuatua e le faamaloloina ai?’ E fou lenei manatu ia te a’u. O le mea moni sa ia fesili mai pe sa ia te a’u le faatuatua e talia ai le finagalo o le Atua, pe afai o Lona finagalo ia ou le malolo? Afai na oo mai le taimi ia te a’u ou te ulu atu ai i le lalolagi o agaga e ala i le oti, pe na ou saunia ea e usitai ma talia?”

Sa faaauau le faamatalaga a Ioane: “O le i ai o le faatuatua e le faamaloloina na foliga mai e le tusa ai ma le mea e masani ona faamoemoeina; ae o lena vaaiga sa suia ai le ala sa ma mafaufau ai ma lo’u toalua, ma mafai ai ona ma tuu atu atoa lo ma faatuatuaga o le Alii e pule po o le a lava le tali e i ai, ma o le a Ia taialaina i maua mai le tulaga o loo ma i ai i le mea e manaomia ona ma i ai. A o ma tatalo, sa suia a ma aioiga mai le ‘Faamolemole e faaatoatoa mai a’u’ i le ‘Faamolemole tuu mai ia te au le faatuatua e talia ai po o le a lava le tali ua fuafuaina e Lau Afio mo a’u.’

“Sa ou mautinoa ona o Elder Bednar o se Aposetolo, o le a ia faamanuiaina elemene o lo’u tino ia toe ogatasi, ma o le a ou oso ese mai le moega ma amata ona ou siva pe fai se mea ofoofogia faapena! Ae a o ia faamanuiaina a’u i lena aso, sa ou maofa i upu sa ia saunoa ai, sa toetoe lava a tutusa ma upu a lo’u tama, tama o lo’u toalua, ma lo’u peresitene o le misiona. Sa ou iloa mulimuli ane ai, e le afaina po o lima o ai e tuu i luga o lo’u ulu. E le suia le mana o le Atua, ma e faaali mai Lona finagalo ia i tatou taitoatasi ma e ala mai i Ana auauna faatagaina.”

Sa tusia e Heta: “O lenei aso sa tumu o’u lagona i lagona fefiloi. Sa faatalitonuina a’u e faapea o le a tuu e Elder Bednar ona lima i luga o le ulu o [Ioane] ma faamalolo atoatoa ai o ia i le kanesa. Sa ou iloa e ala mai i le mana o le perisitua e mafai ai ona faamaloloina o ia, ma sa matuai ou manao lava ia tupu lena mea. Ina ua uma ona ia aoaoina i maua e uiga i le faatuatua e le faamaloloina, sa matuai o’u atuatuvale lava. Na oo lava i lena tulaga, sa le’i mafai lava ona ou taulimaina le mea moni e faapea, o le fuafuaga a le Alii e ono aofia ai le maliu o lo’u toalua fou. Sa faalagolago lo’u faatuatua i tali sa ou manao i ai. I se faaupuga, sa pito-tasi. E ui ina sa ou atuatuvale i le taimi muamua, ae o le manatu o le i ai o le faatuatua e le faamaloloina sa mulimuli ane faasaolotoina ai a’u mai le popole. Sa faataga ai a’u ia i ai lo’u faatuatuaga atoa e sili atu le silafia o lo’u Tama Faalelagi nai lo mea sa ou iloaina, ma o le a Ia faia le mea e sili ona lelei mo ma’ua ma Ioane.”

Sa tuuina atu se faamanuiaga, ma sa mavae atu vaiaso, masina, ma tausaga. Sa faavavega le le toe i ai o ni āuga o le kanesa. Sa mafai ona ia faamaeaina ana aoaoga i le iunivesite ma maua se galuega totogi lelei. Sa faaauau ona faamalosia e Ioane ma Heta le la mafutaga ma fiafia faatasi i le olaga.

O se taimi mulimuli ane, sa faapea ona maua mai ai sa’u tusi mai ia Ioane ma Heta e ta’u mai ai ua toe ola le kanesa. Sa toe faaauau togafitiga i le leisa ma atofa se taotoga. Sa faamatala mai e Ioane: “Sa le gata ina oo mai lenei talafou o se mea sa ma le fiafia ai ma [Heta], ae sa ma le malamalama i ai. Pe o se mea ea ma te le’i aoaoina i le taimi muamua? Pe sa sili atu nisi mea sa finagalo ai le Alii mai ia i ma’ua? O le tutupu a’e o ni Au Paia o Aso e Gata Ai, sa o se mea masani o le alu i le lotu ma faalogo i le fuaitau, ‘o tofotofoga uma e tuuina mai e le Atua ia i tatou e mo lo tatou lelei.’ Ia, e faamaoni lava, sa ou le iloaina pe faapefea ona avea lenei mea ma mea lelei ia te a’u!

“O lea sa amata ai ona ou tatalo mo le manino ma mo le Alii e fesoasoani mai ia te a’u ia ou malamalama pe aisea na toe oo mai ai lenei kanesa. I se tasi aso a o o’u faitau i le Feagaiga Fou, sa ou maua ai la’u tali. Sa ou faitau i le tala ia Keriso ma Ana Aposetolo i luga o le sami ae to loa se afā. O le fefefe ina ne’i sa’e le vaa, sa o atu ai le au soo i le Faaola ma fai atu, ‘Le Matai e, e te le popole mai o le a matou fano?’ O le lagona tonu lava lenei sa ou lagonaina! E te le popole mai i lo’u maua i le kanesa? E te le popole mai i lo ma mananao e amata se aiga? Ae a o o’u faitau atili i le tala, sa ou maua ai la’u tali. Sa silasila atu le Alii ia i latou ma fetalai atu, ‘Outou na o e faatuatua itiiti,’ ma faaloaloa atu Lona aao ma faatoafilemu le sami.

“I lena taimi sa ou fesili ifo ai ia te a’u lava, ‘Pe ou te talitonu moni i lenei mea?’ Pe ou te talitonu moni sa Ia faafilemuina le sami i lena aso? Pe ua na o se tala manaia i le faitau?’ O le tali o le: Ou te talitonu, ma ona ua ou iloa sa Ia faafilemuina le sami, sa ou iloa ai foi i le taimi lena e mafai ona Ia faamaloloina a’u. Ae e oo mai i le taimi nei, sa faigata ia te a’u ona faaleleia le manaomia ona ou faatuatua ia Keriso faapea ma le mautinoa o Lona finagalo. Sa ou vaaia ia mea o ni mea eseese se lua, ma o nisi taimi sa ou lagonaina e pei e tetee le tasi mea i le isi. Sa ou fesili faapea, ‘Aisea e tatau ai ona ou faatuatua pe afai o le a iu lava ina manumalo Lona finagalo?’ Ina ua mavae lenei aafiaga, sa ou iloa ai o le i ai o le faatuatua—i lo’u tulaga lea—sa le o le iloaina lea o le a Ia faamalolo ia te a’u, ae o le, e mafai ona Ia faamalolo ia te a’u. Sa tatau ona ou talitonu e mafai ona Ia, ma pe afai e tupu, sa pule lava o Ia.

“A o o’u faatagaina na manatu e lua ia i ai faatasi i lo’u olaga, o le taulai atu i le faatuatua ia Iesu Keriso ma le gauai atu atoatoa i Lona finagalo, sa ou maua ai le faamafanafanaga ma le toafilemu sili atu. Sa matua ofoofogia le vaaia o le aao o le Alii i o ma’ua olaga. Ua sologa lelei mea uma, na tutupu vavega, ma o loo faaauau pea ona faalotomaualaloina i ma’ua i le vaaia o le faataunuuina o le fuafuaga a le Atua mo i ma’ua.”

Ou te toe faamamafa atu le faamatalaga a Ioane: “A o o’u faatagaina na manatu e lua ia i ai faatasi i lo’u olaga, o le taulai atu i le faatuatua ia Iesu Keriso ma le gauai atu atoatoa i Lona finagalo, sa ou maua ai le faamafanafanaga ma le toafilemu sili atu.”

O le amiotonu ma le faatuatua ua mautinoa lava le aoga e fuliese ai mauga po o mea faalavefau—pe afai o le fulieseina o mauga e ausia ai faamoemoega o le Atua ma ua tusa ai ma Lona finagalo. O le amiotonu ma le faatuatua e mautinoa lava e aoga i le faamaloloina o e mamai, tutuli, pe pipili—pe afai o faamalologa faapena e ausia ai faamoemoega o le Atua ma ua tusa ai ma Lona finagalo. O le mea lea, e oo foi i le faatuatua malosi, e tele mauga o le a le aveesea ai. Ma e le o ma’i uma ma lē atoatoa o le a faamaloloina. Afai e faatapulaaina mea faafeagai uma, afai e aveesea uma ia faafitauli, o lona uiga o le a le faataunuuina faamoemoega autu o fuafuaga a le Tama.

O le tele o lesona e tatau ona tatou iloa i le olaga nei e pau lava le auala e mafai ona maua ai o le ala mai lea i mea tatou te oo i ai ma o nisi taimi e pagatia ai. Ma ua faamoemoe ma talitonu le Atua tatou te fetaiai ma faigata lē tumau o le olaga nei faatasi ai ma Lana fesoasoani ina ia mafai ona tatou aoaoina mea e tatau ona tatou iloa, ma avea ai ma tagata e tatau ona avea ai i tatou i le faavavau.

O Le Uiga o Mea Uma

O le tala lenei e uiga ia Ioane ma Heta o se tala masani ma e maoae foi. O lenei ulugalii talavou ua fai ma sui o le faitau miliona o le Au Paia o Aso e Gata Ai faamaoni, ma tausi feagaiga i le salafa o le lalolagi, o e o loo fetaomi atu i luma i le ala sa’o ma le vaapiapi ma le faatuatua mausali ia Keriso ma se malamalama atoatoa o le faamoemoe. Sa le’i auauna atu Ioane ma Heta i ni tulaga iloga faaleautaitai i le Ekalesia, e le aiga i la’ua i ni Pulega Aoao, ma o nisi taimi sa i ai ni o la masalosaloga ma atuatuvalega. I le tele o nei tulaga, o la la’ua tala o se tulaga masani lava.

Ae uso e ma tuafafine, o lenei alii ma le tamaitai talavou sa faamanuiaina i ni auala tulaga ese, e aoao ai lesona taua mo le faavavau e ala i puapuaga ma faigata. Ua ou faasoa atu ia te outou lenei mea na tupu ona o Ioane ma Heta, o e e pei lava o le toatele o outou, na oo ina malamalama o le le solomuli e sili atu le taua nai lo o le ola pea. O le mea lea, o lo la aafiaga sa le faaautu i le ola ma le oti; ae, sa faatatau i le aoaoina, ola ai, ma le avea ai.

O le tuufaatasiga faaleagaga malosi o le faatuatua i le, ma, i le suafa paia o Iesu Keriso, o le gauai agamalu atu i Lona finagalo ma [Lana] taimi, o le fetaomi pea i luma “ma le filiga e le faavaivai” (Helamana 15:6), ma i le faailoaina o Lona aao i mea uma, e selesele ai mea toafilemu o le malo o le Atua lea e aumai ai le olioli ma le ola faavavau (tagai i le MF&F 42:61). A o feagai lenei ulugalii ma luitau e foliga mai e lofituina, sa la ola i se olaga “filemu i le amio Atua uma lava ma le amio matagofie” (1 Timoteo 2:2). Sa la savavali ma le filemu (tagai i le Moronae 7:4) faatasi ma le fanau a tagata. “O le manuia foi mai le Atua, o loo silisili lava i mea uma e manatu i ai, e [leoleoina ai o laua] loto atoa ma mafaufau ia Keriso Iesu” (Filipi 4:7).

Mo le toatele o outou, o la la’ua tala e mafai foi ona avea ma a outou tala. O loo outou feagai, sa feagai, pe o le a outou feagai ma ni luitau faapenei i o outou olaga, faatasi ma le lototele ma le faamoemoe faaleagaga lea sa i ai ia Ioane ma Heta. Ou te le iloa pe aisea e aoao ai e nisi tagata ia lesona o le faavavau e ala i tofotofoga ma mafatiaga—ae aoaoina e isi ia lesona talitutusa e ala i le laveaiga ma le faamalologa. Ou te le iloa mafuaaga uma, faamoemoega uma, ma ou te le iloa mea uma e faatatau i le taimi a le Alii. Faatasi ai ma Nifae e mafai e oe ma a’u ona faapea ifo tatou te “le iloa le uiga o mea uma” (1 Nifae 11:17).

Ae ou te iloa lelei nisi o mea. Ou te iloa o i tatou o atalii ma afafine agaga o se Tama Faalelagi alofa. Ou te iloa o le Tama e Faavavau o le pule o le fuafuaga o le fiafia. Ou te iloa o Iesu Keriso o lo tatou Faaola ma le Togiola. Ou te iloa ua faataunuu e Iesu le fuafuaga a le Tama e ala i Lana Togiola e le iu ma faavavau. Ou te iloa o le Alii, o lē sa “tiga, mafatia, [ma] faalavaau mo tatou” (“Jesus of Nazareth, Savior and King,” Hymns, no. 181), e mafai ona fesoasoani ma faamalolosia “ai ona tagata, e tusa ma o latou vaivaiga” (Alema 7:12). Ma ua ou iloa se tasi o faamanuiaga silisili o le olaga nei o le, ia aua ne’i solomuli ma ia faatagaina o tatou loto taitoatasi ina ia “tofatumoanaina i le finagalo o le Tama” (Mosaea 15:7).

E ui ina ou le iloa mea uma i le auala ma le taimi ma le nofoaga ma le pogai e tutupu ai nei faamanuiaga, ae ua ou iloa ma ou te molimau atu e moni ia. Ou te molimau atu o nei mea uma ua moni—ma ua lava mea ua tatou iloa e ala i le mana o le Agaga Paia e tuuina atu ai le molimau mautinoa o lo latou paia, moni, ma le taua. Ou uso e ma tuafafine pele, ou te talosagaina ia i o outou luga lenei faamanuiaga: a o outou fetaomi atu i luma i o outou olaga ma le faatuatua mausali ia Keriso, o le a outou maua le mana e le solomuli ai. Ou te tuuina atu lenei molimau ma ou talosagaina lenei faamanuiaga i le suafa paia o le Alii o Iesu Keriso, amene.

© 2013 e le Intellectual Reserve, Inc. Ua taofia aia tatau uma. Faamaonia le faa-Peretania: 8/12. Faamaonia le faaliliuga: 8/12. Faaliliuga o le That We Might “Not … Shrink.” Samoan. PD50045417 890