O Lo Tatou Perofeta: Thomas S. Monson
William R. Walker
O Le Fitugafulu
Faigalotu a le OAE mo Talavou Matutua • 5 Me, 2013 • Iunivesite o Polika Iaga–Idaho
“Ia Viia Oe le Atua, mo le Perofeta” (Viiga, nu. 10). O lenei viiga o se tasi o uiga tulaga ese o le Ekalesia. E moni tatou te faafetai mo se perofeta o taitaia i tatou i nei aso e gata ai.
O le mea moni e faapea ua tuuina mai e le Atua se perofeta mo i tatou lea e totonugalemu i le faatuatua ma le talitonuga o le Au Paia o Aso e Gata Ai i soo se mea. Ua tatou iloa o loo soifua le Atua ma e alofa o Ia ia i tatou. Ua tatou iloa na Ia auina mai Lona Alo, o Iesu Keriso, e avea ma o tatou Faaola ma Togiola, ma ua tatou iloa ua Ia tuuina mai ia i tatou se perofeta.
O i latou sa ola i le popofou o le Ekalesia sa lagonaina se lotofaafetai loloto i lo latou ola ai i le taimi o le Perofeta o Iosefa Samita. O savali ma molimau o le Toefuataiga sa tele lava o ni aafiaga na muai mauaina e na uluai Au Paia.
Sa tutupu ni mea ofoofogia i tausaga na pulefaamalumalu ai Polika Iaga i le Ekalesia a le Alii. Na o mai le Au Paia i sisifo ma atiae i latou lava i le totonugalemu o Mauga Papa, lea na uluola ai le Ekalesia. O i latou na ola i lena vaitau na faitauina lena mea o se faamanuiaga sili lo latou ola ai i le taimi o le perofeta o Polika Iaga.
Sa faaauau ai pea le mamanu lava lea e tasi ao auina mai e le Alii ia tamalii maoae ma malualii e taitai ia mataupu o Lana Ekalesia. Sa talanoa ou matua ma ou matua matutua i se migao loloto ma le mitamita e uiga i le perofeta o o latou aso—Peresitene Heber J. Grant.
Mo ma’ua ma Sister Walker, ma le toatele o o outou matua ma matua matutua, sa matou fiafia i faataitaiga sili ma aoaoga ofoofogia a le perofeta o Tavita O. MaKei. Sa sosoo mai ma ia ia: Iosefa Filitia Samita, Harold B. Lee, Spencer W. Kimball, Ezra Taft Benson, ma Howard W. Hunter. Sa saunia ma le ofoofogia nei tamalii taitasi e taitai le Ekalesia mo se vaitau na fuafuaina e le Alii Lava Ia. Sa alofagia ma lagolagoina i latou uma taitoatasi e tagata o le Ekalesia.
O le toatele o outou iinei i lenei afiafi o le a manatuaina ma le faamemelo le taitaiga maoae a Peresitene Gordon B. Hinckley. O se faamanuiaga lava le ola ai i lona taimi ao avea ma se Peresitene o le Ekalesia.
Na valaauina e le Alii ia Peresitene Hinckley e foi atu i le aiga i le lima tausaga talu ai ma avea ai Thomas S. Monson ma Peresitene o le Ekalesia—o le perofeta a le Alii i le lalolagi i aso nei. Oka, se faamanuiaga ina a tele mo oe ma au le ola ai i lenei taimi matagofie ao taitai ai i tatou e se perofeta maoae.
O le Ekalesia lenei a le Alii. Na ia fuafuaina soifuaga o nei Aposetolo maoae, ma Ia tuu i latou i le tofiga e taitai Lana Ekalesia. O le mea moni lava o se tasi o uiga auau mama tulaga ese o le Ekalesia a le Alii e faapea o loo i ai Ana aposetolo ma perofeta i le lalolagi i aso nei.
Sa faamatalaina e le Aposetolo o Paulo le Ekalesia o loo i ai “aposetolo atoa ma le au perofeta, [faatasi ma] Iesu Keriso o le maatulimanu lava lea” (Efeso 2:20). O le mea lava lena sa i ai ma o loo i ai lava. Ua tulaga ese lava le Ekalesia a le Alii i le i ai o aposetolo ma perofeta, faatasi ma Iesu Keriso Lava Ia o le maatulimanu. Ua molimau mai Peresitene uma o le Ekalesia o Iesu Keriso o le taiulu o lenei Ekalesia.
E le o i ai ni mea e tutupu fua, e le o i ai ni mea sese, ma e le o i ai ni faiga faatosina. A oo mai i le filifilia o se tasi e avea ma Peresitene e sosoo ai o le Ekalesia a le Alii, e pule la le Alii, ma e mautinoa lava e faia Lona finagalo.
Ou te molimau atu o le finagalo o le Alii lea ua taitaia ai i tatou i aso nei e Peresitene Thomas S. Monson, o le perofeta lea a le Alii i le lalolagi i aso nei.
E pei ona aoaoina i tatou e le perofeta o Ieremia o le Feagaiga Tuai e uiga i perofeta, ua tatou iloa ai le moni o lenei mea ia Peresitene Monson. O loo faapea mai tusitusiga paia, “Na a’u iloa oe a o lei faia oe e a’u i le manava; na a’u faapaiaina oe a o lei fanau mai oe, na a’u tofia oe e fai ma perofeta i nuu” (Ieremia 1:5).
Ou te fia talanoa atu ia te outou i le aso nei e uiga i le soifuaga ma le galuega a Peresitene Thomas S. Monson, le Peresitene lona 16 a Le Ekalesia a Iesu Keriso o le Au Paia o Aso e Gata Ai.
I le tausaga mulimuli o le soifuaga o Peresitene Hinckley, na ia tofia ai au e avea ma Pule Faatonusili o le Matagaluega o Malumalu, ma ua faamamaluina au e Peresitene Monson i le toe faatagaina o au e tumau ai i lenei tofiga. I le aluga o le ono tausaga talu ai, sa ou maua ai le faamanuiaga maoae ma le le mafaagaloina o le fesoasoani ia Peresitene Thomas S. Monson ma ona fesoasoani i mataupu faalemalumalu. Ou te nofo i ona talaane ao tuuina mai e Peresitene Monson ia te au le tele o fautuaga ma taitaiga e uiga i malumalu ma mataupu faalemalumalu i le lalolagi atoa. Na te valaauliaina au e faafeao o ia i faapaiaga o malumalu, suatiaina o eleele, ma asiasiga i nofoaga ua faamoemoe e fausia ai malumalu. Ua ou mauaina faamanuiaga o le faimalaga faatasi ma ia i le lalolagi atoa, i nofoaga mamao e pei o Kyiv, i Iukureini, ma Cebu, i Filipaina, ma isi nofoaga matagofie, e pei o Roma, i Italia.
Ao ia faimalaga solo ai i le lalolagi atoa, ua faamanuiaina ai lava au e i ai iina e molimauina lona alofa tele mo tagata—e le na o tagata o le Ekalesia, ae o tagata uma. Ua ou molimauina lona toafilemu tumau ma le faauo, lona agamalu ma le magafagafa faaKeriso, aemaise lava mo tamaiti, tagata matutua, ma ē vaivai. O le tele o taimi ou te matauina ai Peresitene Monson, ou te maua lava le uunaiga: “O le ala le la e galue ai le Faaola. O le ala le la e taulimaina ai e le Faaola ia tagata.”
Ua ou molimauina lona maelega e le muta, lana uunaiga ma le naunautaiga, lona olioli i le olaga, ma lona naunau loloto e auauna i le Alii ma faia e pei ona finagalo ai le Faaola na te faia. E le vaivai lava o ia e fai galuega a le Alii.
I le Mataupu Faavae ma Feagaiga, vaega 52, fuaiupu 14, na fetalai mai ai le Alii, “O le a ou tuu atu ia te outou se ata i mea uma, ina ia le faaseseina outou.”
Ou te fiafia i le mau lenei, ona ua aoao ai au e faapea o le a saunia e le Alii se mamanu mo au ma faaali mai ia te au le aua e fai ai ni mea, le auala e faatino ai, le auala e ola ai. Ae e le faatatau ia te au. E faatatau ia i tatou uma taitoatasi. Ua faaali mai e le Alii ia i tatou le ala. Na te saunia ni mamanu i o tatou olaga taitoatasi e faaali mai ai ia i tatou le ala e ola ai.
Ou te talitonu o se tasi o mamanu taua i o tatou olaga o le soifuaga o le perofeta lea e taialaina ma taitaia le Ekalesia a le Alii i o tatou aso. E pei ona ou ta’ua muamua, mo au ao avea o se tagata talavou, o le mamanu o Peresitene Tavita O. MaKei. Sa ou alofa ia te ia ma lagolagoina o ia, tatalo mo ia, ma suesue ma le totoa i ana upu, ma sa ou manao ia avea atili e faapei foi o ia i le mea sili na mafai ona ou mafaufau i ai.
Ou te masalo o le toatele o o outou matua ao talavou, o la latou mamanu o Peresitene Spencer W. Kimball. Ioe, mo i tatou taitoatasi, o lo tatou manao silisili lava o le mamanuina lea o o tatou olaga i le Faaola—ia mulimuli ia te Ia, ia ola i Ana poloaiga, ma ia avea atili e faapei o Ia i le mea sili tatou te mafaia.
I le 3 Nifae, 27: 27, sa aoao mai ai Iesu: “O a ituaiga o tagata e tatau ona outou i ai? E moni ou te fai atu ia te outou, e pei lava o au nei.”
O la tatou sini autu lava lena—ia faapei o Ia.
E tuu i soo se puipui lava o ofisa uma sa faaaoga e Peresitene Monson talu ona valaauina o se epikopo se ata masani o le Faaola na valiina e Heinrich Hofmann. O se ata vali matagofie o le Faaola.
Ao saunoa ai e uiga i lenei atavali, sa faapea mai ai Peresitene Monson: “Ou te fiafia i le atavali, lea sa ia te au talu ona avea au o se epikopo e lua sefululua tausaga le matua ma lea ou te feaveaia lava i soo se mea e tofia au ou te galue ai. Ou te taumafai lava e mamanu lo’u olaga i le Matai. Soo se taimi lava e i ai se faaiuga e faigata ia te au ona fai, ou te tepa atu ai lava i taimi uma i lena ata ma fesili ifo ia te au lava, ‘O le a se mea Na te faia?’ Ona ou taumafai lea e fai” (i le Heidi S. Swinton, To the Rescue: The Biography of Thomas S. Monson [2010], 135).
Ou te iloa e mafaufau Peresitene Monson e uiga i le mulimuli i le faataitaiga a Iesu. I se tasi taimi sa ou i ai ma Peresitene Monson mo se sauniga ao lumanai ai le faapaiaga o se malumalu. Faatoa lele mai lava o ia i le aso lena, ma ao lamalama faaiu le sauniga i le afiafi, sa ou manatu ua vaivai ia Peresitene Monson, ma sa ou manao e faamautinoa ia lava sana malologa ao lumanai sauniga o le aso e sosoo ai. Ao amata usuina le viiga faaiu, sa ou soso atu ia Peresitene Monson ma faapea atu, “Peresitene, pe a maea le tatalo faaiu, afai tatou te oso atu i le faitotoa o i le pito, e mafai ona matou momoli vave atua lau susuga i le faletalimalo ma fai ai sina au malologa.”
Faatasi ai ma se foliga le mautonu, na ia faapea mai ai ia te au, “Elder Walker, ana faapea o i ai iinei Iesu, e te manatu o le a Ia oso i le faitotoa i le itu pe a uma le sauniga?”
Ou te lei toe faia atua lava lena fautuaga. E faapei lava ona faia e le Faaola pe ana o i ai, sa ia manao ai e faatasi ma tagata. Sa lei manatu lava o ia mo na o ia lava. Sa ia manatu i mea lelei e mafai ona ia faia.
Ou te lagonaina lava i taimi uma e mafai ona avea au ma se tagata sili atu pe a ou mamanuina lou olaga i olaga o tagata taitoatasi amiotonu e tuu e le Alii i lou ala: ou matua matutua, ou matua, ou epikopo, lou peresitene o le misiona, aemaise lava, le perofeta a le Atua lea e mafai ona ou vaaia ma faalogo i ai ma o lē foi ou te tatalo ai i aso taitasi. Ou te mautinoa o le toatele o outou e faia lea lava mea e tasi.
O se faamanuiaga matagofie i lou olaga le saili atu ia avea atili e faapei o le Alii ma saili atu ia avea atili e faapei foi o Lana perofeta—Peresitene Thomas S. Monson.
Ou te fia faasoa atu ia te outou nisi o aoaoga mai le soifuaga o Peresitene Thomas S. Monson, ma le faamoemoe, ao ou faia, o le a mafai ona outou iloaina ni uiga lelei o le a outou mananao e tuu i totonu o o outou olaga. O le a faamanuiaina i tatou uma i le saili atu lea e mamanu o tatou olaga ma aoao mai le perofeta a le Alii.
E faapei o Nifae, ma faapea foi le toatele o outou, na fanau mai Thomas S. Monson i ni matua lelei. Sa fanau mai o ia i le Aai o Sate Leki i le aso 21 Aokuso, 1927. Sa ola ae o ia i ni tulaga faatauvaa. Na te lei taumafai lava e toe faauigaina le mea e sau ai o ia. Faatasi ai ma ona uiga tauagafau ma agamalie, na tuufaatasi ma lona toafimalie atoatoa i le ituaiga tagata e i ai o ia, e masani lava ona faapea mai Peresitene Monson sa le manaomia ona ia popole pe o fea le pito o le auala nofoaafi e sau ai—ona sa ola ae o ia i le va o na auala nofoaafi.
Sa faagaeetia pea lava au i le auala na te talanoa ai i taimi uma ma le faamemelo tele i lona talavou. Ou te manatu sa pei lava o ia o Nifae. Sa lelei tele Lamana ma Lemuelu i le vaaia o faafitauli ma mafaufau ai i mea uma ua le lelei. Ae o Nifae, sa manatu i itu lelei, faamoemoe, ma lotofaafetai. Sa ia vaaia le lelei i mea uma na siomiaina o ia. O le auala lena na ola ae ai Tommy—ma sa faapena ai lava i lona olaga atoa!
O ia o se tamaitiiti aoga lelei, ma e masalo o le mea e sili atu ona taua, o ia o se tama lelei. Sa ia faaalia lava lona manao ia lelei lana auaunaga i le Alii ina ua valaauina o ia e auauna atu o se failautusi i le korama a tiakono i lana uarota. Toeitiiti 70 tausaga mulimuli ane, i le avea ai ma Peresitene o le Ekalesia, sa ia mafaufau ma sina mitamita i lona naunau ia tusia minute o lana korama a tiakono i le mea sili e mafai ona oo i ai. Sa leai sona manatu e uiga i le “Aisea ua avea ai au ma failautusi ae le o le peresitene o le korama?” Sa na ona ia manao e fai lelei lana galuega. Sa valaauina o ia i se tofiga i le Ekalesia a le Alii, ma sa ia manao e faia le mea sili na te mafaia. Sa ia manao ia mama le tusiga o minute ma faatulaga lelei, ma o lea sa ia taina ai minute mo lana korama o tiakono. Ao avea ma se taulealea 12 tausaga le matua, sa ia faia se faataitaiga matagofie mo i tatou.
Afai e fai si ofoofogia o le mea lenei ia te oe, ou te le te’i. Sa ofoofogia foi i lana peresitene o le siteki o lē, ina ua ia faalogo atu i galuega silisili a Tommy, na ia valaauina o ia e lauga atu i le konafesi a le siteki—o se failautusi a le korama a tiakono. Pe na e faalogo ea i se failautusi a se korama a tiakono o lauga atu i se konafesi a se siteki? O se faataitaiga maoae mo i tatou uma!
Na maea lana aoga maualuga ona auai atu lea i le Neivi a le Iunaite Setete. Sa ia tautuaina lona atunuu, ma ao faia lena mea, sa ia faatumauina lona mama ma le paia. Sa ia foi mai lana tautua faamiliteli ma galue malosi ia maua se aoaoga lelei. Sa avea o ia ma se tagata aoga lelei—o se isi faataitaiga maoae lea mo i tatou uma! (O le faataitaiga o le avea ma se tamaitiiti aoga lelei atonu e sili atu ona taua mo nisi o outou nai lo isi.)
Sa ia faamasani ma alofa faamamai i se teine lalelei o le Au Paia o Aso e Gata Ai e suafa ia Frances Johnson, ma e lei pine ae talosagaina o ia la te faaipoipo. Sa la faaipoipo i le Malumalu o Sate Leki i le aso 7 Oketopa, 1948, i le 21 o tausaga. Oka se faataitaiga maoae mo i tatou uma! (E toe faapea atu, masalo e sili atu ona taua lenei mea mo nisi o outou nai lo isi.)
E ui sa na o le 18 masina talu ona faaipoipo, ma ao taumafai e faigaluega ina ia siitia i se galuega fou, ae sa ia taliaina le valaauga mai le Alii e auauna atu o se epikopo o se uarota tele i le aai tutotonu. O le uarota lea na ia ola ae ai. (Mafaufau i lena mea! Sa lei fai atu o ia, “E le o sao le taimi” pe “Ou te laitiiti tele”; sa na ona ia talia o le valaauga, faalagolago i le Alii, ma lafo atu o ia lava i le tofiga faatasi ai ma lona malosi atoa ma taleni na tuuina atu e le Alii ia te ia. Sa ia manao e avea o ia ma tagata aupito silisili i le galuega a le Alii.
Sa oo ina fiafia Epikopo Monson i se mau lea e mafai ona faamanuiaina ai o tatou olaga taitoatasi, e pei ona faamanuiaina ai lona olaga:
“Ia e faatuatua ia Ieova ma lou loto atoa; a e aua le faalagolago i lou lava atamai.
“Ia e manatua o ia i ou ala uma, ona faatonuina ai lea e ia lava ou ala” (Faataoto 3:5–6).
E oo mai i lenei aso, o loo taulotoina lava e Peresitene Monson lena mau i le tele o taimi ma soifua ai lona olaga e tusa ma mea o loo aoaoina ai tatou. O se faataitaiga sili lava o ia mo i tatou uma! O le a tatou lelei pe a tatou manatuaina lena mau ma faia o se vaega taua o lo tatou olaga faalefilosofia—e pei lava ona faia e Peresitene Monson.
E silia ma le 1,000 tagata sa i ai i le uarota a Bishop Monson, e aofia ai tina ua oti a latou tane e 84. Ua faamanuiaina lava i tatou i konafesi aoao ma isi sauniga i le faalogo atu ia te ia i le tele o taimi o faamatala mai nisi o aafiaga matagofie na ia oo i ai ao ia tausia nei tuafafine sa faamanuiaina i lalo o lana tausiga.
Mo au, o taimi uma lava ou te faalogo atu ai o ia saunoa mai i se tasi o ona aafiaga ao epikopo, ou te iloaina, ma e matua faagaeetia ai lava au, o lona alofa ma le popole mo tagata o lana uarota sa lei faamutaina ina ua faamaloloina o ia o se epikopo. Sa valaauina o ia i le au peresitene o le siteki i le 27 o tausaga, ae e ui foi lava i le tele o tausaga mulimuli ane (ina ua maea lona valaauga o se peresitene o se misiona ma se Aposetolo), sa ia faaauau pea ona alofa atu, tausi, ma popole mo tagata matutua o lana uarota. Sa manino lava na te lei tau na ona alofa atu ma popole mo i latou ona o lona tofiga. O lona alofa ma le popole mo i latou na gotouga ifo i lona loto ma sa lei mafai ona aveesea e soo se suiga o tofiga.
I lenei mea, ua faaali mai ai e Peresitene Monson ia i tatou le ala. O se ala sili atu; o le ala lava a le Alii. E alofa o ia i isi ma popole mo isi—e pei lava ona aoao ai i tatou e le Alii i le mea e tatau ona tatou faia. O se faataitaiga maoae lava o ia mo i tatou uma!
I le 31 o tausaga, na valaauina ai Peresitene Monson e avea ma peresitene o le Misiona a Kanata, sa faatutotonu i Toronto, Ontario. Ma e pei lava ona sa ia faia ao epikopo, sa ia lafo atu foi o ia i lona tofiga, tuu atu i ai mea uma na ia te ia, ma faalagolago i le Alii i lona loto atoa. Sa iloa uma e tagata na siomia o ia lona alofa mo le Alii, lona alofa mo lona faletua ma lana fanau, lona alofa mo faifeautalai ma tagata o le ekalesia, atoa ai ma lona alofa mo Kanata, le laueleele na valaauina o ia e auauna ai. O ana uunaiga o se peresitene o le misiona sa matua loloto ma e oo mai i le asō e le o mafai ona fuatiaina. Sa alolofa ana faifeautalai ia te ia ma saili atu e ola i ni olaga o le a mitamita ai lo latou peresitene o le misiona. E mafai ona tatou aoao uma mai lena mea.
E pei lava ona ia faia ina ua faamaloloina o ia o se epikopo, sa ia faaauau pea ona taofimau i lona loto ona lagona ma aafiaga mo ana faifeautalai ma le Au Paia sa faamanuiaina i lalo o lana tausiga. E avea pea au ma se molimau i aafiaga le faaitiitia a Peresitene Monson ma lona fiafia i faifeautalai na auauna atu i lalo o lana taitaiga i le Misiona a Kanata. E maeu lenei faataitaiga!
Ou te iloa o loo taumafai ia faifeautalai na faamanuiaina i le avea ai o Thomas S. Monson ma o latou peresitene o le misiona e mulimuli i le mamanu o auaunaga amiotonu i le malo o le Alii lea na faataitai i ai e Peresitene ma Sister Monson ia i latou. E fai ma faataitaiga, ou te faasoa atu ia te outou le mea moni ofoofogia e faapea i le 141 o peresitene o malumalu o loo auauna i le taimi nei i le lalolagi atoa, e toalima i latou sa avea ma faifeautalai talavou na faamisiona i lalo o Peresitene Monson i le Misiona a Kanata.
O le faitau afe o outou o loo faatasi ma i tatou i lenei afiafi o faifeautalai ua foi mai i misiona. Ou te tatalo o le a tatou tau fai mulimuli uma i le faataitaiga a nei peresitene o malumalu e toalima ma tauivi ia faamaoni ma savavali i le ala o auaunaga amiotonu o loo faataitai mai e o tatou peresitene o misiona.
Sa ootia lava au talu ai nei i le vaaia o se ata o Peresitene Monson i le Church News o asiasi atu i se alii i se falemai i Toronto i Kanata (tagai i le “Teachings of the Prophet,” Church News, Feb. 3, 2013, 7). O lenei tamalii sa auauna faatasi ma Peresitene Monson i le 50 tausaga talu ai. E lei galo lava ia Peresitene Monson o ia. Sa lei faagaloina lava e Peresitene Monson i le tele o tausaga ma le tele o maila ia lagona matagofie o le alofa ma le talisapaia lea e oo mai ia i latou e auauna faatasi i le Alii. Ou te faamoemoe o le a tatou tau fai mulimuli uma i lana faataitaiga ma aua nei galo i latou sa faamanuiaina o tatou olaga i tausaga na muamua atu.
I le 1963, ina ua 36 ona tausaga, sa valaaulia ai Thomas S. Monson e susū atu i le ofisa o Peresitene Tavita O. MaKei, o le sa avea ma Peresitene o le Ekalesia i lena taimi. O le fono lea sa valaauina ai o ia e Peresitene MaKei e avea o se Aposetolo a le Alii o Iesu Keriso.
Ua na o Peresitene Monson lava le Aposetolo na valaauina i le Toasefululua i lona talavou tele i totonu o le 100 tausaga ua alu. E mautinoa lava, na taitaia e le aao o le Alii le valaauga o lenei Aposetolo talavou, ona sa silafia e le Alii o le a taitaia e Thomas S. Monson le Ekalesia i o tatou aso.
O le konafesi aoao ia Oketopa a sau nei o le a faailoga ai le 50 tausaga talu ona valaauina ia Thomas S. Monson e avea ma Aposetolo. E maeu lena mea! (E lei toe i ai lava se Aposetolo talu mai Iosefa Filitia Samita ua faamanatuina le 50 tausaga o i ai i le Toasefululua.)
E 22 tausaga o auauna atu Peresitene Monson o se fesoasoani i Peresitene e toatolu o le Ekalesia: Ezra Taft Benson, Howard W. Hunter, ma Gordon B. Hinckley. I le aso 3 o Fepuari, 2008, na faauuina ma vaetofia ai Thomas S. Monson e avea ma Peresitene o le Ekalesia. E toalua ona fesoasoani malualii ma maoae o loo tutu i ona talaane: Peresitene Henry B. Eyring ma Peresitene Dieter F. Uchtdorf. O i latou ia o faitaulaga sili pulefaamalumalu e toatolu o loo taitaia le Ekalesia a le Alii i le lalolagi i aso nei (tagai MF&F 107:22).
O le auaunaga ofoofogia a Peresitene Monson ua faamatalaina soo i le faaupuga “ō e laveai mai.” Sa tusia e Heidi Swinton se talaaga ofoofogia o lona soifuaga, ma sa onomea lelei lona faaulutalaina i le To the Rescue. O le talaaga o le soifuaga na lolomiina ma faasalalauina i le 2010. Afai e te lei faitauina, ou te matua fautuaina atu ia te oe. O le a faamanuiaina ai lou olaga.
O le savali lava ia, o le savali lava e tasi lea na tuu mai e Iesu ia i tatou i le Luka: tuu le “ivagafulu ma le iva” ma o atu e laveai mai le tasi (Luka 15:4). O le ute lea o le talalelei a Iesu Keriso, ia alolofa i o tatou uso a tagata ma faia mea uma tatou te mafaia e faamanuiaina ai o latou olaga. O loo aoao mai pea e Peresitene Monson nei mataupu faavae, ae o le mea e sili ona taua, o loo soifua ai o ia i lena ala. Ua faatumuina lona soifuaga i faataitaiga le mafaitaulia o le aapa atu e asiasi, faamafanafana, pe fesoasoani ia i latou ua sili ona mafatia: o tina ua oti a latou tane, o fanau, o e mamai, o e mafatia, ma i latou ua tuuatoatasi pe ua lotonutimomoia.
Sa tusia e le Aposetolo o Iakopo e faapea, “O lenei lava le amio Atua e lelei ma le faamaoni i luma o le Atua o le Tama lea, ina ia tauasiasi atu i e matua oti ma fafine ua oti a latou tane i o latou tiga, ia leoleo foi o ia ia te ia, ina nei pisia mai o ia i le lalolagi” (Iakopo 1:27).
O le ala lea o loo soifua ai Peresitene Monson i lona soifuaga. O le lesona mo i tatou, e le tau manaomia le avea ma se Aposetolo ina ia ola ai i lenei ala. E mafai ona tatou ola i la tatou tapuaiga, e mafai ona tatou asiasi atu i e matuaoti ma fafine ua oti a latou tane, ma e mafai ona tausia o tatou olaga ia le pisia mai le lalolagi. E mafai ona tatou vaai atu i lo tatou perofeta e iloa ai le auala e mafai ai ona tatou faia lenei mea! E mafai ona tatou faapea ifo ia i tatou lava, “O le ituaiga tagata lena ou te fia avea ai.”
I nai tausaga ua mavae, ao lumanai le konafesi aoao, sa aoao mai ai e Peresitene Monson se isi foi lesona matagofie. O le taimi la lea o Pulega Aoao ua potopoto, sa faimalaga mai i le Aai o Sate Leki, e toatele sa malaga mai nofoaga i le salafa o le lalolagi lea sa latou auauna ai i Au Peresitene o Eria. O se fonotaga taua tele. Sa matou o mai faatasi ina ia aoaoina e le Au Peresitene Sili ma le Toasefululua.
Ao latalata ona amata le fonotaga, na foliga mai ua auai uma tagata sei vagana ai Peresitene Monson, e lei taunuu atu lava. I ni nai minute ona amata lea o le fonotaga, sa faauma loa a matou talanoaga ae nonofo ma le faaaloalo ma faalogologo i le musika o loo muai taina—ma le faamoemoe ua toeitiiti taunuu mai le perofeta.
Sa matou faatalitali ma le onosai ina ua ta le 9 i le taeao ma te’a atu. Sa savali atu se tasi i le faitotoa i le pito—ia siaki ma le mautinoa pe le o manaomia sina fesoasoani. Ina ua toe foi mai i le potu, sa tau mai ia i matou “ua le o toe mamao ona matou faatasi lea ma Peresitene Monson.”
Pe tusa ma le 15 minute sa tatau ai ona amata le fonotaga ae ulufale mai loa Peresitene Monson i le potu. I le faaaloalo, sa matou tutu ai ao ia ulufale mai. Sa matou fiafia e vaai atu ia te ia ma iloa o loo manuia o ia. Sa lei foliga mai na i ai se mafuaaga iloga i le mea ua tuai mai ai.
Sa alu sao lava Peresitene Monson i le pulelaa ma faapea mai, “Uso e, faamalie atu ua ou tuai, ae sa manaomia au e lou toalua i lenei taeao.”
Sa matuai faagaeetia lava au ma faamaualaloina. Sa le mafai ona taofi lou mafaufau pea i upu a Peresitene Monson. O se fonotaga taua tele lenei. Sa aofaga potopoto taitai sinia uma o le Ekalesia, ae sa faia e Peresitene Monson se faataitaiga mo i matou uma. Sa manaomia o ia e lona faletua, ma sa ia faaalu le taimi talafeagai e faatasi ai ma ia. O se lauga maoae. Ou te lei manatuaina se isi mea sa tautalagia i lena aso, ae ou te manatua lena lauga: “Sa manaomia au e lou toalua.”
Sa toe faamamafaina lenei lauga i se isi sauniga ina ua faapea mai Peresitene Monson, “A ou faalogo atu i alii o latou faapea mai e alolofa i o latou taitoalua, ona ou faapea atu lea ia i latou, ‘Ia faamaonia la lena mea i le auala e te taulimaina ai o ia ma le auala e te auauna atu ai ia te ia.’”
O le ala lava lena a Peresitene Monson: E popole lava o ia mo isi. Na te faaalia lava i taimi uma le agalelei mo isi.
E te le tau i ai i talaane o Peresitene Monson mo se taimi umi ia lagona ai lona alofa loloto ma le tuuto i lana manamea, Sister Frances Monson. Soo se taimi lava na te ta’ua ai o ia, e susulu lava ona fofoga ma se ataata tele i ona foliga. Ua outou iloa o le alofa o lenei tamalii i lona faletua o se faataitaiga ia i tatou uma taitoatasi. Ua faaali mai e Peresitene ma Sister Monson ia i tatou le faataitaiga o se alii ma se tamaitai e tauave faatasi lo la alolofa i le Alii ma lo la naunau e auauna ia te Ia i le amiotonu.
Ou te fia avea atili e pei o le Alii, ae ou te fia avea atili foi e pei o Lana perofeta.
Afai tou te tau manatunatu po o le a le mea e finagalo ai Peresitene Monson mo outou taitoatasi, atonu la o le faasoaina atu o le aafiaga lenei o le a fesoasoani ai ia te oe ia iloaina:
Ia Novema talu ai sa saunia ai le Malumalu matagofie o Boise Idaho mo le toe faapaiaina ina ua maea le 18 masina sa tapunia ai mo le toe faamatagofieina ma le faafouina o le malumalu. I le maea ai o le 30 tausaga o le faaaogaina ma le ofoofogia e le Au Paia faatuatua i lena vaega o Idaho ma nofoaga lata ane, sa matua manaomia ai ona toe faafouina le malumalu. Ina ua maea, ma e pei lava ona masani ai i le faailogaina o le sauniga o le toe faapaiaga o le malumalu, sa valaaulia ai le autalavou o le itu o le malumalu e fai se faafiafiaga tele faaleaganuu. O se afiafi o pesega ma siva ma le faailoaina o le faatuatua ma le lotofaafetai mo le malumalu.
Sa ou nofo i talaane o Peresitene Monson ao ma matamata i faatinoga matagofie a siteki eseese. O se tasi o siva sa faia e se vaega matagofie o tamaitai talavou. Ao fiafia Peresitene Monson i le faafiafiaga, sa ia soso mai ia te au ma faailoa mai lagona o lona loto. Sa ia fai mai, “O lou faamoemoe mo i latou uma taitoatasi ia faaipoipo i le malumalu. Ua matuai ou manao lava ia i latou taitoatasi ia maua lena faamanuiaga—ia faaipoipo i le malumalu.”
Sa ou mafaufau: “Pe le matagofie ea lenei mea. Ua i ai iinei le perofeta a le Atua e molimauina le faamanatuina e le autalavou o pese ma siva, ma mo ia sa matuai manino lava le fesootai atu i le malumalu o le a ia faapaiaina i le taeao e sosoo ai. O lona faamoemoe e mo tagata uma o i latou ia faaipoipo i le malumalu.” Afai la o le faanaunauga lena o le perofeta mo i tatou, ma o lena lava, ona tatau lea ona mananao i tatou taitoatasi i lena mea mo i tatou lava, ma e tatau ona avea ma se sini aupito sili ona taua i o tatou olaga taitoatasi.
Ou te fia faasoa atu se isi aafiaga ia te outou:
Sa malaga atu Peresitene Monson, Peresitene Eyring, ma Elder Quentin L. Cook o le Korama a Aposetolo e Toasefululua i Laie, Hawaii, mo le toe faapaiaina o lena malumalu ofoofogia ia Novema o le 2010. O le po ao lumanai le faapaiaga o le malumalu, sa matou potopoto ai i le Cannon Center i le lotoa o le BYU–Hawaii mo se faafiafiaga faaleaganuu. Sa matagofie le polokalama. Sa auala mai i pese, siva, ma tala, sa faamatala ai e le autalavou o le itu o le malumalu le talafaasolopito o le Ekalesia i Hawaii. Sa latou faamatalaina uluai faifeautalai ma uluai tagata liliu mai. Sa latou faamatalaina le tala ofoofogia o le perofeta i le lumanai o Iosefa F. Samita lea sa valaauina e auauna atu i se misiona i Hawaii i le 1854, ae sa na o le 15 ona tausaga. Sa foi mai le taulealea o Iosefa F. Samita mai lana misiona e tolu tausaga ae toeitiiti atoa lona 19 tausaga. (Ma ua outou manatu o le suiga talu ai nei o tausaga faamisiona i le 18 ua ofoofogia, a ea?)
Sa faaauau pea le faafiafiaga faaleaganuu ao faatino e le autalavou le tuputupu ae o le Ekalesia i tagata Polenisia ma faamatala le toe foi atu o Peresitene Iosefa F. Samita i Hawaii i le silia ma le 50 tausaga mulimuli ane o le Peresitene o le Ekalesia ma faapaiaina le lotoa ma suatia le eleele mo le fausiaina o le Malumalu o Laie Hawaii.
Sa matagofie le faafiafiaga faaleaganuu, ma sa fiafia lava Peresitene Monson i vaega uma. Sa ia fiafia i se faatinoga sa i ai le pese siva lauiloa o le Taua Lona Lua a le Lalolagi le, “Boogie Woogie Bugle Boy” ona sa faamanatu atu ai ia te ia lona taimi i le Neivi a le Iunaite Setete. O isi pese sa taulai atu i siva eseese o tagata o atumotu.
O se pese sa faatino ai se siva hula matagofie. O se tasi o tamaitai talavou sa aofia ai i lenei siva sa nofo i se nofoa faataavale. Sa aulelei tele o ia, ma e ui sa le manaomia le faaaoga o ona vae, ae sa ia faatinoina lava ma le matagofie le siva. Sa faasino mai e Peresitene Monson o ia ia te au ma saunoa mai i lona lelei ma le matagofie o lona faatinoina o le siva.
Ina ua maea le polokalama, sa fiafia tagata uma i faatinoga maoae sa faia. Ao matou tuua le tulaga, sa toe foi uma atu au sisiva i le fola, e aofia ai ma le au siva hula. Sa lei mulimuli Peresitene Monson i le ala sa fuafuaina e o ese ai i fafo ae savali sao atu i le fola e faailoa atu lona faafetai i le autalavou, aemaise lava sa ia savali sao atu i le teine aulelei i le nofoa faataavale e faamalo i ai ma faailoa atu i ai lona alofa mo ia.
E oo lava i le lotolotoi o faafiafiaga ma le tumutumu o tagata, sa toe faaalia ai foi e Peresitene Monson le alofa mama o le Faaola. Sa ia alu atu i le tasi. Sa ia punou ma sogi atu ia te ia i le muaulu. Sa ou manatu: “E le matagofie ea lenei mea. Ua toe faaalia foi e le perofeta a le Atua ia i tatou le auala e aapa atu ai ia i latou o siomia i tatou, le auala e agalelei atu ai ma agaalofa, ma le auala e uunaia ai ma sii isi i luga.” Sa ou manatu: “O le ala lenei e faatino ai e Iesu. O le ala lenei e finagalo le Faaola tatou te taulimaina ai isi.”
Ou te fiafia i le pese a le Peraimeri o loo faapea mai, “Ou te taumafai e avea e faapei o Iesu” (“O Loo Ou Taumafai e Avea e Pei o Iesu,” Tusi Pese a Tamaiti, 40). Ma ou te fia faaopoopo atu i lena, “Ma ou te taumafai ia pei o Lana perofeta.”
Ou te fia fautua atu ni auala se lima e mafai ona tatou mulimuli ai i le faataitaiga a Peresitene Monson:
Muamua, e mafai ona tatou mafaufau i le itu lelei, ma e mafai ona tatou fiafia.
I le Peina Tau Tele, o loo faamatalaina ai le Perofeta o Iosefa Samita o se tagata e foliga fiafia (tagai Iosefa Samita—Talafaasolopito 1:28). E faamatalaina foi e lena mea ia Peresitene Monson. E i ai moni lava sona foliga fiafia.
I se tasi taimi sa saunoa ai Peresitene Monson: “E mafai ona tatou filifili ia i ai se uiga lelei. E le mafai ona tatou faatonuina le matagi, ae e mafai ona tatou fetuunaia folauga. I se isi faaupuga, e mafai ona tatou filifili ia fiafia ma vaai i itu lelei, e tusa lava po o a mea e oo mai ia i tatou” (“Messages of Inspiration from President Monson,” Church News, Sept. 2, 2012, 2).
O se tasi aso sa ou faatalitali ai i fafo o le potufono a le Au Peresitene Sili. Sa valaaulia atu au iina ia auai i se fonotaga e talanoaina mataupu faalemalumalu. Sa ou nofo toatasi ma le filemu i fafo o le potu. Sa ou manatu ua amata le fonotaga a le Au Peresitene Sili ma o le a valaaulia mai au e auai atu i ni nai minute. Ao ou saofai ai iina sa mafai ona ou lagonaina se tagata o savali mai le alasavali ma mapumapu. Sa ou faapea ifo ia te au: “E le o malamalama le tagata lea i tulafono. E te le savalivali solo ma mapumapu i fafo o le ofisa o le Peresitene o le Ekalesia.” Sina taimi mulimuli ane sa savali mai ai le tagata mapumapu lea i le tulimanu—o Peresitene Monson. Sa fiafia o ia, ma mafaufau lelei. Sa ia faafeiloaia au ma le agalelei ma faapea mai, “Ou te manatu o le a tatou amatalia le fonotaga i ni nai minute.” E ui lava i le mamafa o le Ekalesia atoa i ona tauau, ae o ia lava o se faataitaiga o le fiafia ma e i ai i taimi uma sona uiga lelei. E tatau foi ona tatou faapena.
Lua, e mafai ona tatou agalelei ma agaalofa i tamaiti, i le ala o faia ai e Peresitene Monson.
E tele lava ina fetalai Iesu e uiga i tamaiti. O Lana perofeta, o Peresitene Monson, e faapena foi ona saunoa soo e uiga i tamaiti, ma ou te vaaia patino lena mea i faapaiaga o malumalu i le auala e alofa ai o ia i tamaiti ma, e ala i lana faataitaiga, na te aoao ai i tatou i le auala e taulimaina ai i latou. I faapaiaga uma o malumalu e taulai atu ai lava o ia i tamaiti. E fiafia lava e faaaofia i latou i le sauniga o maa tulimanu ma na te valaaulia i taimi uma nisi o i latou e tuu sina simā i le maa faamanatu ia auai ai i le faamaeaina iloga o le malumalu. Na te faia ia fiafia ai i latou. Na te faia ia latou manatuaina pea. E i ai lava sana ataata tele mo i latou. Na te faamalosiau ma faamalo atu ia i latou. O se mea matagofie lena i le vaai.
O ana faafeiloaiga mālū e aofia ai i nisi taimi le high five, faaminoiina o ona taliga, ma uunaiga ia auauna atu faamisiona ma faaipoipo i le malumalu. E olioli moni lava o ia i le olaga—ma pe le tatau ea mo i tatou uma?
I ni nai tausaga talu ai, na fuafua ai e faapaia e Peresitene Monson le Malumalu o Oquirrh Mountain i lona aso fanau. Ina ua ia taunuu atu i le malumalu ma latalata atu i le faitotoa i luma o le malumalu, sa potopoto iina se vaega o le autalavou. Sa latou iloaina o le aso soifua o Peresitene Monson, ona sa amata ona latou usuina atu le “Manuia Lou Aso Fanau” ia te ia. Sa fiafia o ia. Sa ia tu ma faasaga atu ia i latou i se laufofoga fiafia tele. Sa amata ona talotalo atu ona lima, e pei o loo ia taitaia la latou pese. I le faaiuga sa latou faaopoopo i ai le tali “Ma nisi aso fanau se tele.” Sa fiafia foi i ai ia Peresitene Monson, ina ua ia fai mai, “O le vaega lena e sili ona ou fiafia i ai.”
E alolofa tamaiti ma le autalavou o le Ekalesia ia te ia, ma ou te manatu ona latou te le masalosalo lava e alofa o ia ia i latou! E alofa Iesu i tamaiti laiti, ma e alofa Lana perofeta i tamaiti laiti. O se faataitaiga maoae lena mo i tatou taitoatasi!
Tolu, e mafai ona tatou mulimuli i uunaiga a le Agaga, e pei o Peresitene Monson.
O le tuuto o Peresitene Monson i le Alii ma lana tautinoga e mulimuli i uunaiga a le Agaga sa faamatalaina ma le matagofie e le perofeta lava ia i upu nei: “O le aafiaga aupito sili ona suamalie ua ou iloa i le olaga o le lagonaina lea o se uunaiga ma faatino, ma mulimuli ane iloaina o se faataunuuga o se tatalo a se tagata po o se mea na manaomia e se tasi. Ma ou te manao lava ia silafia e le Alii afai Na te manaomia ona faia se feau, o le a faia lena feau e Tom Monson mo Ia” (On the Lord’s Errand [DVD, 2008]). O le mamanu lena e tatau ona mulimuli ai i tatou taitoatasi.
Fa, e mafai ona tatou fiafia i le malumalu, e pei ona fiafia Peresitene Monson i le malumalu.
O le a faamauina Peresitene Monson i le talafaasolopito o se tasi o fau malumalu maoae i le talafasolopito o le Ekalesia. Talu ona avea ma Peresitene o le Ekalesia ia Fepuari 2008, o loo faaauauina pea le galuega maoae o le fausiaina o malumalu. O nisi o malumalu na ia faasilasila mai ua i ai faatasi ma le tele o malumalu aupito sili ona tautaua: “O lenei taeao ou te fiafia lava e faasilasila atu ni malumalu fou se lima lea ua maua o latou nofoaga ma, i masina ma tausaga o le a oo mai, o le a fausia ai i nofoaga nei: Calgary, Alberta, Kanata; Córdoba, Atenitina; le eria tele o le Aai o Kansas; Philadelphia, Penisilivania; ma Roma, Italia” (Thomas S. Monson, “Susu Maia ma Talaaao mai i le Konafesi,” Ensign po o le Liahona, Nov. 2008, 6).
I le lima tausaga talu ona avea ma perofeta, ua faasilasila mai ai e Peresitene Monson ni fuafuaga e fausia ni malumalu fou se 33. O le masina na sei mavae atu nei i le konafesi o Aperila, na ia faasilasila mai ai ni fuafuaga mo ni malumalu fou se lua: o le tasi i Cedar City, Iuta, ma le tasi i Rio de Janeiro, Pasila.
Faatasi ai ma le faapaiaga o le Malumalu o Tegucigalpa Honduras ia Mati, ua atoa ai nei le 141 malumalu i le Ekalesia, faatasi ai ma le isi 29 o le a fausiaina i le taimi nei pe o loo fuafuaina. O se taimi sili lenei o le fausiaina o malumalu ma tapuaiga i malumalu i le Ekalesia a le Alii. Ua ou faalogo o tau atu e Peresitene Monson i le autalavou lea e laiti tele e ulu atu i le malumalu ina ia o atu ma pai atu i puipui o le malumalu ona “tuu atu lea i le malumalu e pai atu ia te oe.”
Ua saunoa mai Peresitene Monson, “Tau ina ia tatou ola uma i ni olaga agavaa, ma ni lima mama ma loto mama, ina ia mafai ona pai mai le malumalu i o tatou olaga ma o tatou aiga” (“Blessings of the Temple,” Ensign, Oct. 2010, 19).
Sa ia tuuina mai foi lenei folafolaga matagofie: “A tatou fiafia i le malumalu, pai atu i le malumalu, ma auai i le malumalu, o le a atagia mai i o tatou olaga lo tatou faatuatua. A tatou o mai i nei maota paia o le Atua, a tatou manatuaina feagaiga tatou te osia i totonu, o le a mafai ona tatou tatalia tofotofoga uma ma faatoilalo faaosoosoga taitasi” (Be Your Best Self [1979], 56; faaopoopo le faamamafa).
Ia tatou mulimuli i le mamanu ua faatuina e le perofeta mo i tatou i le fiafia lea i le malumalu.
Lima, e mafai ona tatou agalelei, magafagafa, ma alolofa i isi, e pei ona faia e Peresitene Monson.
O Peresitene Monson o se faataitaiga matagofie o le alofa atu i isi. O lana auaunaga atoa ua faatumulia i asiasiga i aiga, faaee atu o ona lima i luga o ulu ma tuu atu faamanuiaga, faia o telefoni e lei mafaufauina e faamafanafana atu ai ma faamalosiau; auina atu o tusi o faamalosiauga, faamālō ma le faafetai; o asiasiga i falemai ma nofoaga mo tagata matutua; ma le mauaina o le taimi e malaga ai i falelauasiga ma sauniga faaleaiga e ui i lona pisi tele.
Sa ou taua muamua ia tina e 84 ua oti a latou tane mai le uarota a Peresitene Monson ao avea ma epikopo. I le aluga o tausaga e tele ia na sosoo mai ma lana auaunaga o se epikopo, i se faailoaga maoae o le tuuto, na tuufaatasia ma taunuuga o le tele o a latou tatalo, sa mafai ai e Peresitene Monson ona auai i falelauasiga o i latou uma taitoatasi. Mafaufau i lena mea.
E pei lava ona faia e le Faaola, sa femaliuai ai Thomas Monson e faia mea lelei, i le faamanuiaina ma le alofa atu i isi e pei o le uunaiga malosi lena i lona olaga. E mafai ona tatou aoao mai lenei mea ao tatou saili e mulimuli i ona tulagaaao.
Sa tupu se faataitaiga maoae o le agalelei o Peresitene Monson i le tausaga ua tea. Ao latalata ona faamaea le Malumalu matagofie o Brigham City, Iuta, sa ou feiloai ai ma le Au Peresitene Sili e talanoaina ni fuafuaga mo le faapaiaga o le malumalu. Ona o Brigham City e na o le tasi le itula i matu o le Aai o Sate Leki, o lea e faigofie tele ai mo Peresitene Monson ona malaga i ai mo le faapaiaga. Ae sa faapea mai Peresitene Monson, “O Brigham City o le nuu moni lea o Peresitene Boyd K. Packer, le Aposetolo maoae lea o loo nofo i ou talaane mo le tele o tausaga i le Toasefululua. Ou te manao ia te ia e maua le mamalu lea ma le faamanuiaga e faapaiaina ai le malumalu i lona nuu. O le a ou faatafaese, ma tofia Peresitene Packer e faapaia le Malumalu o Brigham City. Ou te manao e avea ma se aso faapitoa mo ia.”
O se aso matagofie lea mo Peresitene Packer ma Sister Packer, o e sa ola ae i Brigham City. Sa ootia lava au i le agalelei o Peresitene Monson ma ona uiga agaalofa i lona uso a Aposetolo. E mafai ona avea uma i tatou faapena. E mafai ona tatou faasoa atu ma le agalelei ma le le manatu faapito ia i tatou lava—ae mafaufau atili ia i latou o siomia i tatou.
Ou te fiafia i le pese a tamaiti “Mulimuli i le Perofeta.” E iva ona fuaiupu matagofie, ae ua utiuti le taimi o lea ou te faitaua ai na o le fuaiupu mulimuli:
Lenei lalolagi e fenumiai.
A e fia talitonu vaai i talafou.
E mafai ona taitai i tatou,
Pe a faalogo i perofeta—.
…………………………………
Ia aua nei sese ai.
………………………………
Na te iloa le ala.
(Tusipese a Tamaiti, 58)
E silafia e Peresitene Monson le ala. O le ala sao o le ala lena a le Alii. “O le ala sao o le talitonu lea ia Keriso” (2 Nifae 25:29).
Ua aoao mai ia i tatou e Peresitene Monson le ala e ola ai o tatou olaga i ana savali matagofie ma musuia i konafesi aoao. Ua ia aoao mai ia i tatou le auala e avea ai ma soo o Iesu Keriso e ala i ana faataitaiga patino ofoofogia ma matagofie. E moni lava ua tuuina mai e le Alii ia i tatou se mamanu i mea uma, ma o se tasi o mamanu e tatau ona tatou saili e mulimuli ai o le mamanu lea o lo tatou perofeta pele.
Ou te molimau atu o loo i ai se Atua i le lagi e silafiaina ma alofa ia i tatou. Ua Ia tuuina mai ia i tatou se perofeta e taiala i tatou, aoao i tatou, ma taitai i tatou i nei aso e gata ai. Ou te molimau atu o Iesu Keriso o le Alo o le Atua ma o le Faaola o lenei lalolagi. Ou te talitonu ua faamoemoeina i tatou e le Alii ia alolofa i le perofeta, ia lagolagoina o ia, ma ia mulimuli i lana faataitaiga.
Matou te faafetai lava i lau Afio, le Atua e, mo se perofeta. Matou te faafetai atu i Lau Afio mo lenei perofeta. Ou te faitauina o se faamanuiaga tele le ola ai i le vaitaimi nei o loo avea ai Thomas S. Monson ma perofeta a le Alii. A tatou mulimuli i le perofeta ma taumafai ia avea atili e pei o ia, o le a mautinoa lava e faamanuiaina i tatou i le avea ma ni soo faamaoni sili atu o le Alii o Iesu Keriso.
O se faamamaluga le lauga atu ia te outou i lenei afiafi ma ou te tatalo ia faamanuia tele outou taitoatasi e le Alii, ma ou te molimau atu o le galuega lenei a le Alii, i le suafa o Iesu Keriso, amene.
© 2013 Puletaofia e le Intellectual Reserve, Inc. Ua taofia aia tatau uma. Faamaonia le Faa-Peretania 9/12. Faamaonia le faaliliuga: 9/12. Faaliliuga o le Our Prophet: Thomas S. Monson. Samoan. PD50046139 890