Pe Ua Ou Vaai i le Aao o le Atua i Lo’u Olaga?
CES Devotional for Young Adults • March 3, 2013 • University of Texas Arlington
A ma malaga i le lalolagi ma lo’u toalua, ou te faanoanoa lava i le iloa e toatele tupulaga talavou e lagona le tuulafoaiina ma lē mautinoa e silafia e le Alii i latou taitoatasi pe alofa foi ia i latou. Sa ou tatalo e uiga i ni mataupu faavae e mafai ona ou faamamafaina i le po nei, o le a fesoasoani ia e iloa ai e silafia ma alofa le Alii ia te oe. Ou te tatalo mo le Agaga e fesoasoani mai ia te au i le tuuina atu o lenei savali.
O le a ou faaaogaina ia upu mai se pese a le seminare e avatu ai se auivi o la’u tautalaga:
E tatau ona i ai o tatou taliga e faalogo ai i le upu a le Alii,
Ma mata e vaai ai i Lana fuafuaga,
Vae e mulimuli ai i Lona ala,
Ma loto e malamalama ai.
(Steven K. Jones, “Hearts that Understand,” Hold to the Rod Songbook [1988], 20)
Taliga e Faalogo ai i le Upu a le Alii
Muamua, e tatau ona i ai o tatou taliga e faalogo ai i le upu a le Alii. E mafai ona tatou faalogo i le siufofoga o le Alii pe a tatou suesue i tusitusiga paia (tagai MF&F 18:34–36). Ao o’u pei o outou, sa avea Spencer W. Kimball ma Peresitene o le Ekalesia. Sa taialaina au i lo’u olaga atoa i sana saunoaga: “Ua ou iloaina a ou manatu faatalale i le ma fesootaiga ma lē e paia, ma a oo ina foliga mai e le o faafofoga mai le Atua ma leai se siufofoga paia o fetalai mai, o lona uiga ua ou matua mamao, mamao ese lava. Afai ou te faatofuina au lava i tusitusiga paia, ona vaapiapi ai lea o le va ma toe foi mai le faaleagaga” (Aoaoga a Peresitene o le Ekalesia: Spencer W. Kimball [2006], 67).
Ou te molimau atu afai e i ai o tatou taliga e faalogo ai i le upu a le Alii, o le a tatou lagonaina Lona alofa a o fetalai mai o Ia ia i tatou e ala i tusitusiga paia.
Mata e Vaai ai i Lana Fuafuaga
Lua, e tatau ona i ai o tatou mata e vaai ai i Lana fuafuaga. I se tasi aso sa ou mafaufau ai e uiga i se faifeautalai ua maea mai lana misiona, sa ou iloaina, ae tei ua faafuasei ona ou maua se imeli mai ia te ia. Sa ia faamatala mai ia te au ona lagona, sa faia ai e le Alii vavega e ala ia te ia i le misiona, ae talu ona taliu mai le misiona, e i ai taimi e tau manatunatu ai pe o Ia silafia moni o ia.
I la’u tali atu ia te ia, sa ou faamatala atu ai se fautuaga taua na tuuina atu e Elder Henry B. Eyring i le au aooga i le BYU-Idaho. Na ia saunoa: “Ou te faamanuia ia te outou i aso taitasi, afai o le a outou ole atu i le tatalo e faaali mai po o gafea o lou olaga i lena aso o faaaofia ai le Atua, ou te faamanuia ia te outou o le a outou vaai i ai. O le a faaalia lava ia te outou. O le a outou vaai o le a Ia taitaia ma taialaina outou, ma Na te silafia outou (“A Steady, Upward Course” [Brigham Young University–Idaho devotional, Sept. 18, 2001], web.byui.edu/devotionalsandspeeches).
Ona ou faamatalaina lea o le auala ou te tatalo ai i aso taitasi ia ou maua lenei faamanuiaga ma sa ou vaaia ai le aao o le Atua o aapa mai e pa’i mai ia te au e ala i lana imeli ma le manatu mai. Sa ou faamanatu atu ia te ia o le a faia foi e le Tama Faalelagi le mea e tasi mo ia.
Ou te molimau atu, a tatou tatalo mo mata e vaai ai i Lana fuafuaga, o le a tatou iloa le aofia ai o le Atua i o tatou olaga ma iloa ai e Na te silafia i tatou.
Vae e Mulimuli ai i Lona Ala
Tolu, e tatau ona i ai o tatou vae po o le naunautaiga e mulimuli ai i Lona ala. E toatele talavou matutua ua le fiafia, ua leai se faamoemoe, ma ua lotovaivai ona e i ai mea sa latou mafaufau e tutupu i o latou olaga, ae lei tutupu lava. O nisi ua talitonu sese afai e lei tuuina atu e le Atua ia i latou le fiafia po o faamanuiaga sa latou moemiti i ai, pe ua manatu foi ua tatau ai mo i latou, o lona uiga e le o manatu mai o Ia. Ina ia faaalia lo latou le fiafia i le Atua, ua i ai nisi ua leai se faatuatua, ua le faamamaluina feagaiga, ua tuu lo latou faatuatuaga i fiafiaga o le lalolagi, ma ua fulitua ai i le Atua ae faalagolago ia i latou lava. Nai lo le i ai la o vae e mulimuli ai i le ala o le amiotonu, ua latou o ese mai le ala o le talalelei, ua feseseta’i ma leiloloa atu ai. Ua tatou iloa uma lava se tasi ua “aluese mai le ala.” E mafai ona tatou lagonaina le alofa o le Atua i o tatou olaga, pe a tatou vaai i le tali lelei mai o le toatele a o tatou aapa atu e auauna atu ma laveai mai.
Ua manino le makaina o le ala a le Alii e ala i aoaoga a perofeta, tagatavaai, ma talifaaaliga. I le masina a sau, o le konafesi aoao. Ou te molimau atu, afai tatou te saili ma le agaga tatalo ia iloa se fesili patino po o se popolega e ave i le konafesi, o le a tali mai le Alii e ala i savali ma Ana auauna faauuina. O le a tatou lagonaina Lona alofa ma le popole mai ma maua le lototele faateleina ma vae ua tutu mausali e mulimuli i Lona ala i le taimi nei ma le faavavau.
Loto ia Malamalama
Fa, tatou te manaomia loto ia malamalama i le meaalofa o le Togiola a Iesu Keriso. Na aoao mai e Elder Bednar: “E ese le iloa na afio mai Iesu Keriso i le lalolagi e maliu mo i tatou---lea e taua ma faavae i le aoaoga faavae a Keriso. Ae e tatau foi ona tatou talisapaia le finagalo o le Alii, e ala i Lana Togiola ma le Agaga Paia, ia afio i totonu ia i tatou---e le gata ina ia taitai ai i tatou ae ia aumaia foi ia i tatou le mana” (“The Atonement and the Journey of Mortality,” Ensign, Apr. 2012, 42).
Ia te au, o le Togiola a Iesu Keriso e maua ai e i tatou taitoatasi le mafanafana ma le faamaoniga mamana o le alofa o le Atua mo i tatou. E faamalolosia ai i tatou e faia mea faigata---o mea tatou te le manatu tatou te mafaia. E fesoasoani ai ia te i tatou e tumau pea pe a tatou le malamalama i le finagalo o le Atua ma lana taimi i o tatou olaga. Ou te molimau atu o loo soifua le Atua, ma o le a tatou lagonaina Lona alofa ma iloa Na te silafia i tatou pe a tatou tuuto atu o tatou loto ia malamalama atoatoa i faamanuiaga o le Togiola a Lona Alo o Iesu Keriso.
E tatau ona i ai o tatou taliga e faalogo ai i le upu a le Alii,
Ma mata e vaai ai i Lana fuafuaga,
Vae e mulimuli ai i Lona ala,
Ma loto e malamalama ai.
(Jones, “Hearts that Understand,” 20)
I le suafa o Iesu Keriso, amene.
© 2013 Puletaofia e le Intellectual Reserve, Inc. Ua taofia aia tatau uma. Faamaonia le faa-Peretania: 8/12. Faamaonia le faaliliuga: 8/12. Faaliliuga o le Have I Seen the Hand of God in My Life? Samoan. PD50045417 890