2:3

O Le A Le Upu Moni?

Dieter F. Uchtdorf

O Le Au Peresitene Sili

O’u uso ma tuafafine pele e, a’u uo talavou pele e, ua ou fiafia lava mo lenei avanoa e faatasi ai ma outou i lenei aso. O taimi uma lava ou te maua ai ni lagona lelei i le siomia ai e le autalavou matutua a le Ekalesia, ma ua outou musuia au e folafola atu, “Tuu atu ia ia Siona e tulai mai i lona matagofie.” Talu ai ua outou aumau i le lalolagi atoa, o lea ua faatusa ai le lumanai ma le malosiaga o le Ekalesia ia te outou i se ala matagofie. Ona o a outou faanaunauga amiotonu ma lo outou tautino e mulimuli i le Faaola, ua foliga mai ai o le a manuia le lumanai o lenei Ekalesia.

Ou te momoli atu alofaaga ma faamanuiaga a Peresitene Thomas S. Monson. E tatalo e le aunoa le Au Peresitene Sili mo outou. Matou te ole atu i taimi uma i le Alii e faamanuia, tausi, ma taiala outou.

O Alii Tauaso ma le Elefane

I le silia ma le selau tausaga ua mavae, sa fatuina ai e se fatusolo Amerika se solo mai se tala faafaataoto anamua. O le vaega muamua o le solo o loo talanoa e uiga i ni:

Alii Initositana se toaono
E ese le atamamai,
O e sa o e vaai le elefane
(E ui ina po uma a latou vaai),
E faamalie ai le mafaufau o le tagata lava ia
I lana lava iloiloga e fai.

Fai mai le solo, o alii nei e toaono e fetagofi atu i vaega eseese o le elefane ona faamatala atu lea i isi le mea e tau i ai.

Sa tau se tasi o alii i le vae o le elefane ma faamatala atu e lapotopoto ma talatala e pei o se laau. O le isi sa tagotago i le nifo maai e lala mai i fafo o le gutu ma faamatalaina le elefane o se tao. Sa mau le alii lona tolu i le siusiu ma finau mai o le elefane e pei o se maea. O le lona fa sa tau i le isu umi ma finau mai o le elefane e pei o se gata lapoa.

O loo faamatalaina e i latou taitoatasi le upu moni.

Ma talu ai o lana upu moni e sau mai aafiaga patino, na tausisi ai le tagata lava ia ua ia iloa lea mea ua ia iloa.

O le faaiuga o le solo:

Ma o nei alii mai Initositana
Sa umi ona fefinaua’i leotetele,
Sa taofimau lava le tagata ia
I lona lava malamalamaaga,
E ui i se isi itu sa sa’o ai i latou,
Ae na sese uma lava!1

Tatou te vaavaai atu i lenei tala ma lo tatou malamalama ua i ai ma ataata. Aua foi, ua tatou iloa foliga o se elefane. Ua tatou faitau e uiga i ai, ma matamata i ai i luga o ata, ma o le toatele o i tatou ua tatou vaaitino i ai. Ua tatou talitonu ua tatou iloa moni le mea e ta’u o le elefane. Ma o le faia e se tagata o se faaiuga e faavae i se upu moni e tasi ona faatatau lea i le mea atoa e foliga mai o se mea faavalevalea pe matuai le talitonuina lava. I se isi itu, pe tatou te le vaaia ai i tatou lava i nei alii tauaso e toaono? Pe na i ai ea se taimi na tatou tausalaina ai i tatou lava i ni manatu faapena?

Atonu ua ala ona tumau pea le lauiloa o lenei tala i le tele o atunuu ma i le mano o tausaga ona o lona faatatauga i le lalolagi atoa. Fai mai le Aposetolo o Paulo, o lenei lalolagi o le malamalama e muitiiti ma e na o se vaega o le upu moni tatou te vaaia e pei o loo tatou vaavaai atu ai “faanenefu i le faaata.”² Ae peitai e foliga mai e avea o se vaega o lo tatou natura o ni tagata soifua le faia o taumatematega e uiga i tagata, polokiki, ma talitonuga faalelotu e faavae i o tatou aafiaga le atoatoa ma e masani lava ona le sa’o.

Ou te manatua ai se tala e uiga i se ulugalii sa faaipoipo mo le 60 tausaga. Sa seāseā ona finau i lena taimi, ma sa mavae atu o la aso na nonofo faatasi ai i le fiafia ma le lotomalie. Sa la faasoa i mea uma ma sa leai ni mea faalilolilo i lo laua va—vagana ai le tasi. Sa i ai se atigipusa a le fafine sa ia teuina i le pito i luga o se kapoti e i autafa o le moega, ma sa fai atu o ia i lona toalua ina ua la faaipoipo e le mafai ona ia tilotilo i ai i totonu.

A o mavae atu le tele o tausaga, na oo mai le taimi sa ave ifo ai e le tane le atigipusa ma fai atu pe mafai ona ia iloa mea sa i ai i totonu. Sa malie i ai le fafine, ma sa ia tatalaina ma maua ai ni fala laiti e mamanu teuteu se lua ma le $25,000. Ina ua ia fesili atu i lona toalua pe o le a le uiga o lenei mea, sa tali o ia, “Ina ua ta faaipoipo, sa fai mai lo’u tina soo se taimi lava ou te ita ai ia te oe pe o soo se taimi lava e te tautala pe faia ai soo se mea ou te le fiafia ai, ia ou lalagaina se tamai fala, ona ou talanoa atu ai lea ia te oe.”

Sa ootia le tane ma maligi ona loimata i lenei tala matagofie. Sa ofo o ia ona o le 60 tausaga o le la faaipoipoga, sa na o le lua ni fala na lalagaina e lona toalua, i lona faatiga ia te ia. O le lagonaina o ni lagona fiafia ma lelei e uiga ia te ia lava, sa ia uuina ai le lima o lona toalua ma fai atu, “O lena la ua faamalamalama ai ia fala mamanu, ae faapefea le $25,000?”

Sa ataata malie si ona toalua ma faapea atu, “O le tupe lena sa ou maua mai i le faatauina atu o fala mamanu uma sa ou lalagaina i le aluga o tausaga.”

E le gata ina aoao mai e lenei tala se auala manaia e taulima ai ni feeseeseaiga i ulugalii, ae ua faaalia ai foi le faavalevalea o le oso i faaiuga e faavae i faamatalaga tapulaa.

E masani lava o “upu moni” tatou te ta’uina ia i tatou lava ua na o ni vaega o le mea moni, ma o nisi taimi e le moni lava.

O le asō ou te fia talanoa atu ai e uiga i upu moni. A o o’u faia, ou te valaaulia outou ia mafaufau loloto i nai fesili taua nei.

O le fesili muamua “O le a le upu moni?”

Lona lua, “Mata e mafai ona iloa le upu moni?”

Ma le lona tolu, “E tatau faapefea ona tatou tali atu i ni mea e feteenai ma upu moni sa tatou aoaoina muamua?”

O Le a le Upu Moni?

O le a le upumoni? Ina ua lata i taimi mulimuli o Lona soifuaga, sa aumai ai le Faaola i luma o Pilato. Sa tuuaia e toeaiina Iutaia ia Iesu i le tetee ma le faalata i Roma ma vilivilitai ai e fasioti o Ia.

Ina ua faafesagai Pilato ma le Tagata o Kalilaia, sa ia fesili atu, “Se tupu ea oe?”

Na tali atu Iesu, “O le mea foi lenei na ou sau ai i le lalolagi, ina ia ou molimau i le upu moni. O i latou uma lava o i le upu moni, e faalogo mai i latou i lo’u leo.”³

Ou te le iloa pe o le a le ituaiga tagata sa i ai Pilato, pe ou te iloa foi le mea sa mafaufau i ai o ia. Ae ui o lea, ou te masalo sa aoaoina lelei o ia ma sa vaaia le tele o mea o le lalolagi lauiloa.

Ou te lagona i le tali a Pilato se ituaiga masalosalo faaseseina. Ou te lagona i ana upu le leo o se tagata o lē atonu sa i ai se taimi sa avea ai ma se tagata sa ola i mataupu faavae maualuluga ae o lenei—i le mavae ai o se tele o aafiaga o le olaga—ua foliga mai ua fai si maaa ma lelavā.

Ou te le talitonu sa uunaia e Pilato se talanoaga ina ua ia tali atu i ni upu faigofie se ono: “O le a le Upu Moni?”⁴

Ina ia faalauteleina, pe le o le mea moni ea sa fesili ai o ia o le “E mafai faapefea ona iloa e se tagata le upu moni?”

Ma o le fesili lena mo le olaga atoa lenei ma mo tagata uma.

E Mafai e Se Tagata Ona Iloa le Upu Moni?

Ia, ua mafai la e se tasi ona iloa le upumoni? Sa taumafai nisi o tagata sili ona atamamai na soifua i lenei lalolagi e tali lena fesili. O le natura lemafaamatalaina o le mea moni sa avea ma se autu taatele i le au fatusolo ma le au tusitala maoae i le talafaasolopito. O Siekisipia e foliga mai sa faapitoa ona fafauina. O le isi taimi e te faitau ai i se tasi o tulaga matautia a Siekisipia, ia matau pe faafia ona faaali mai i le lagisolo se le malamalama i se upu moni taua.

Ia, e le’i i ai lava i le talafaasolopito o le lalolagi se taimi na faigofie ai ona tatou maua le tele o faamatalaga—o nisi o ia faamatalaga e sa’o, o nisi e sese, ae o le tele lava o ia faamatalaga e na o se vaega e sa’o.

O lea la, e le’i i ai foi i le talafaasolopito o le lalolagi se taimi ua sili atu ona taua e iloa ai le auala sa’o e iloatino ai le va o le sa’o ma le sese.

O se vaega o le faafitauli i la tatou sailiga mo le upu moni e faapea, o le poto o le tagata ua faafia ona tatou le fiafia ai. E tele ni faataitaiga ua tatou iloa o mea sa “iloa” e tagata e moni ae mulimuli ane ua faamaonia e sese.

Mo se faataitaiga, e ui lava i le autasi tele sa i ai muamua, ae e le mafolafola le lalolagi. O fetu e le faataamilomilo i le lalolagi. O le ‘aina o se tamato o le a le maliu faafuasei ai se tagata. Ma, ioe, e mafai moni lava e le tagata ona lele—e faapena foi ona talepeina le papupuni o le leo.

Ua tumu tusitusiga paia i tala i alii ma tamaitai o e sa faauigaseseina le “upu moni.”

I le Feagaiga Tuai, sa le mafai e Palaamo ona teenaina le “totogi o le amioletonu”⁵ sa ofoina atu e sa Moapi. O lea sa ia faatalitonuina ai o ia lava e talitonu i se upumoni fou ma fesoasoani ia sa Moapi ia fetuu e Isaraelu i latou lava e ala i le ola le mama ma le le usiusitai.⁶

O Korioa na liliuese, ina ua uma ona ia taitaieseina le toatele mai le upu moni, sa tautino atu o le tiapolo sa faaseseina o ia seia oo lava ina ia talitonu moni o ana faamatalaga sa fai o le upu moni lea.⁷

I le Tusi a Mamona, sa fatu ai uma e sa Nifae faapea ma sa Lamana a latou lava “upu moni” e uiga i le tasi ma le isi. O le “upu moni” a sa Nifae e uiga ia sa Lamana o le, o i latou “o ni tagata aivao ma feai, ma le fia faamasaatoto,”⁸ sa le mafai ona taliaina le talalelei. O “upu moni” a sa Lamana e uiga ia sa Nifae e faapea, sa faoa e Nifae le tofi o le ulumatua a lona uso ma o e tupuga mai ia Nifae o ni tagata pepelo o e sa faaauau pea ona faoa mai ia sa Lamana a latou meatotino.⁹ O nei “upu moni” sa fafagaina ai lo latou ita i le tasi ma le isi seia iu lava ina faatamaiaina ai i latou uma.

E tau le fai atu lava, e tele faataitaiga o loo i le Tusi a Mamona lea e feteenai i nei manatu soonafai. Ae ui i lea, sa talitonu lava sa Nifae ma sa Lamana i nei “upu moni” sa mamanuina ai le faasinomaga o lenei nuu sa i ai se taimi na avea ai ma ni tagata malolosi ma lelei.

Natura o le Tagata ma le Upu Moni

I se tasi itu, o loo tatou lilifa atu uma i mafaufauga ese faapena.

O “upu moni” tatou te taliaina e aafia ai tulaga o a tatou faalapotopotoga faapea foi ma o tatou lava uiga faaletagata lava ia. E masani lava o nei “upu moni” e faavae i faamaoniga e le atoatoa ma le le sa’o ma, e i ai taimi e faia ai i luga o lagona e tumu i le manatu faapito.

O se vaega o le pogai o faamasinoga le lelei e oo mai mai le matele o tagata e faanenefu le laina i le va o le talitonuga ma le upu moni. E masani ona tatou faafenumia’ia le talitonuga ma le upu moni, o le mafaufau e faapea ona o le fetaui o se mea pe ona o le talafeagai, o lea e tatau ai ona sa’o. I le isi itu, o nisi taimi tatou te le talitonu ai i le upu moni pe teena ai ona o le a manaomia ai ona tatou sui pe ioeina tatou te sese. E masani lava, e teena le upu moni ona e le foliga mai e ogatasi ma aafiaga sa [tatou] oo i ai muamua.

A feteenai finagalo po o “upu moni” a isi ma o tatou lava manatu, nai lo le mafaufau i le tulaga e faapea atonu e i ai se faamatalaga e ono aoga ma faalautele pe ogatasi ma mea ua tatou iloa, ae e masani lava ona tatou tulioso i faaiuga pe talitonu e aunoa ma se faamaoniga e faapea o le isi tagata ua taitaiseseina, faaletonu le mafaufau, pe iu foi ina taumafai ma le manatu i ai e faasese.

O le mea e faanoanoa ai, o lenei faiga e mafai ona salalau atu i itu uma o o tatou olaga—mai taaloga i fegalegaleaiga faaleaiga ma mai tapuaiga e oo atu i upufai.

Ignaz Semmelweis

O se faataitaiga leaga o lenei faiga o le tala ia Ignaz Semmelweis, o se fomai Hanikeri sa galue faafomai i le vaitau o le ogatotonu o le seneturi lona 19. I le popofou o lana matata, sa iloa ai e Dr. Semmelweis o le 10 pasene o tina sa o atu i lona falema’i sa maliliu ona o se siama e aafia ai i le taimi e fananau ai, ae o le tele o maliu i se falema’i lata ane sa itiiti ifo i le 4 pasene. Sa naunau o ia e suesue e fia iloa le mafuaaga.

Ina ua uma ona suesueina ia falemai e lua, o le faaiuga a Dr. Semmelweis e faapea, na pau lava le eseesega tele, o lona falemai o se falemai faaleaoaoga, lea e suesue ai tino maliliu. Sa ia matauina fomai sa o atu sa’o mai le faatinoina o taotoga o tagata maliliu i le faafanauina o pepe. Sa fai lana faaiuga e faapea, atonu na siamā o latou lima i tino maliliu ma faapea ona mafua ai ia fiva matautia.

Ina ua amata ona ia fautuaina atu ia fufulu e fomai o latou lima i le vailaau pisia, sa faafetoai o ia i le le manatu popole faapea foi ma le tetee. O ana faaiuga sa feteenai ma “upu moni” a isi fomai. Sa talitonu foi isi o ana uo o se mea faavalevalea tele le mafaufau e faapea e mafai ona le mama lima o se fomai pe mafua ai ni faama’i.

Ae sa finau atu pea Semmelweis, ma sa ia faia ai o se aiaiga faavae mo fomai i lana falemai le fufulu o o latou lima a o le’i faafananauina ia pepe. O se taunuuga, sa vave lava ona palasi i lalo i le 90 pasene le aofai o tagata maliliu. Sa lagona e Semmelweis le tauamiotonuina ma sa mautinoa o lenei faiga o le a faaaogaina nei e faalapotopotoga faafomai. Ae sa sese o ia. E oo lava i ana taunuuga maoae sa le’i lava lea e suia ai mafaufau o le toatele o fomai o na vaitau.

Mata E Mafai ona Iloa le Mea Moni?

O le mea e uiga i le upu moni o le, e i ai lava i tua atu o le talitonuga. E moni e tusa lava pe leai se isi e talitonu i ai.

E mafai ona tatou faapea i le aso atoa o sisifo ia matu ae o matu ia sisifo, ma iu ai ina talitonu i ai ma o tatou loto atoa, ae afai, mo se faataitaiga, tatou te fia felelei mai Quito, Ekuatoa, i le Aai o Niu Ioka i le Iunaite Setete, e na o le tasi lava le auala o le a taitai atu ai i tatou iina, ma o lena auala o matu—ae le o sisifo.

Ioe, o lenei mea ua na o se faatusa faigofie i femalaaiga i vaalele. Ae peitai, o loo i ai moni se mea e pei o le mea moni a’ia’i—le upu moni e le mafaatoilaloina, ma e le masuia.

O lenei upu moni e ese mai le talitonuga. E ese mai le faamoemoe. O le upu moni a’ia’i e le faalagolago i manatu faalauaitele po o le lauiloa. E le mafai e finagalo faaalia ona fefulisa’ia. E le mafai lava foi e le pule e le iu o le faamaoniga a tagata lauiloa ona sui ai.

E mafai la faapefea ona tatou maua le upu moni?

Ou te talitonu ua fiafia lo tatou Tama Faalelagi i Ana fanau pe a latou faaaogaina a latou taleni ma atamai faalemafaufau e iloa ai ma le naunautai upu moni. I le aluga o seneturi, e toatele alii ma tamaitai atamamai—e ala i faaiuga lelei, naunautaiga, fesili faasaienisi, ma ioe, e ala i musumusuga—ua iloa ai upu moni. O nei silafia ua faatamaoaigaina ai le tagata, faaleleia atili ai o tatou olaga, ma musuia ai le olioli, fiailoa, ma le maofa.

Ae, o mea sa tatou faapea ua tatou iloaina, o loo faaauau pea ona faaleleia, suia, pe teena foi e le au atamamai fatufatuai o e saili ia malamalama i le upu moni.

E pei ona tatou iloa uma, e faigata foi ona tau faavasega upu moni mai o tatou lava aafiaga. Ma ina ia atili ai le leaga, o loo i ai so tatou fili, “o le tiapolo lea, o loo fealualuai o ia e pei o se leona tagi, ua saili se tasi e ‘aina e ia.”¹⁰

O Satani o le taufaasese sili lea, o “le na molia [le] usoga,”¹¹ o le tamā o pepelo uma,¹² o lē o loo saili pea e faasese ina ia mafai ona ia faatoilalo i tatou.¹³

E tele fuafuaga alualu mamao faafiapoto a le fili e taofia ai tagata mai le upu moni. Na te ofoina atu le talitonuga e faapea o le upu moni e faatusalia; e faatosinaina o tatou lagona o le mafaufau fetala’i ma talafeagai, na te natia ai le upu moni sa’o e ala i le faapea mai o le “upu moni” a se isi tagata e tutusa lava le aoga ma soo se isi lava upu moni.

O nisi na te faatosinaina ia talitonu o loo i ai se upu moni a’ia’i i fafo atu i se mea, ae e le mafai e se tagata ona iloaina.

Mo i latou o e ua uma ona taliaina le upu moni, o lana fuafuaga autu lava o le faasalalau o fua o le le talitonu. Mo se faataitaiga, ua ia faaosoina le toatele o tagata o le Ekalesia e tautevateva pe a latou iloa ni faamatalaga e uiga i le Ekalesia lea e foliga mai e feteenai ma mea na latou iloaina muamua.

Afai e te oo i se taimi faapena, ia manatua i lenei vaitau o faamatalaga, e toatele ua latou fatuina le le talitonu i soo se mea ma i mea uma, i soo se taimi ma nofoaga uma.

O le a e iloa ai foi e oo lava ia i latou o e o loo fai mai pea ua ia i latou ni faamaoniga e mafolafola le lalolagi, o le masina o se ata itu-tolu, ma o ni tagata lauiloa i ata tifaga o ni mea ese mai se isi paneta. Ma e lelei i taimi uma le manatua, e le faapea o le tusia o se mea i luga o le pepa, faaali mai i luga o le Initoneti, masani ona ta’ua soo, pe i ai se vaega malosi o tagata e mulimulitai i ai, ona faapea ai lea ua sa’o.

O nisi taimi o tautinoga po o faamatalaga e le moni e tuuina mai i se auala e foliga mai ai e faatuatuaina. Ae peitai, a outou fetaiai ma ni faamatalaga e feteenai ma le afioga faaalia mai a le Atua, ia manatua o alii tauaso i le faataoto i le elefane, o le a le mafai lava ona sa’o atoatoa lo latou faamatalaina o le upu moni atoa.

Tatou te le iloaina mea uma—e le mafai ona tatou vaaia mea uma. O le mea e foliga mai e ese i le taimi nei atonu o le a malamalama lelei i ai a o tatou suesue i ai ma maua mai nisi faamatalaga faatuatuaina. Ona tatou te vaai atu e ala i se faata nenefu, o lea e tatau ai ona tatou faalagolago i le Alii, o lē e manino Lana silasila i mea uma.

Ioe, ua tumu lo tatou lalolagi i le le mautonu. Ae mulimuli ane, o le a taliina ai a tatou fesili uma. O o tatou masalosaloga uma o le a suia i le mautinoa. Ma o le mafuaaga ona ua i ai le punavai e tasi o le upu moni ua faapea ona atoatoa, sa’o, ma e le mafaapi’opi’oina. O lena punavai o lo tatou Tama Faalelagi e le gata Lona atamai ma Na te silafia mea uma. Na te silafia le mea moni e pei ona sa i ai, e pei ona i ai, ma e pei ona o le a oo mai.¹⁴ “Ua malamalama o Ia i mea uma, … ma ua i ai o ia i luga o mea uma, … ma o mea uma ua ala mai ia te ia, ma e a ia.”¹⁵

Ua ofo mai e lo tatou Tama Faalelagi agalelei Lana upu moni ia i tatou, o Lana fanau faaletino.

Ia, o le a lenei upu moni?

O Lana talalelei. O le talalelei a Iesu Keriso. O Iesu Keriso o Ia “o le ala, le upu moni, ma le ola.”¹⁶

Afai o le a i ai tau lava ia lava lo tatou lototele ma le faatuatua e savavali ai i Lona ala, o le a taitai atu i tatou i le filemu o le loto ma le mafaufau, i le aano tumau o le olaga, i le fiafia i lenei lalolagi, ma i le olioli i le lalolagi a sau. O le Faaola e “le mamao o ia ma i tatou taitoatasi.”¹⁷ Ua ia i tatou Lana folafolaga, afai tatou te sailia ma le filiga o Ia, o le a tatou maua o Ia.¹⁸

O Lo Tatou Tiute e Saili mo le Upu Moni

Ae e faapefea ona tatou iloa o lenei “upu moni” ua ese ai lava? E mafai faapefea ona tatou talitonuina lenei “upu moni”?

O le valaaulia e faalagolago i le Alii e le faapea e faamalolo mai ai i tatou mai le tiutetauave ia tatou iloa mo i tatou lava. O lenei mea e sili atu nai lo o se avanoa; o se tiute, au uo talavou. O se, ma o se tasi lea o pogai na auina mai ai i tatou i lenei lalolagi.

E le o talosagaina le Au Paia o Aso e Gata Ai ia talia tauaso mea uma latou te faalogo i ai. Ua uunaia i tatou e mafaufau ma ia maua le upu moni mo i tatou lava. Ua faamoemoe ia tatou mafaufau loloto, e suesue, e iloilo, ma tatou oo ai i se malamalamaaga patino e uiga i le upu moni.

Na saunoa Polika Iaga: “Ua ou … fefe ona ua tele naua le talitonuina e nei tagata o o latou taitai o le a latou le fesili ai mo i latou lava i le Atua pe o Ia taitaia i latou. Ua ou popole ua latou masani i se tulaga o le saogalemu tauaso. … Ia iloa e alii ma tamaitai uma, e ala i musumusuga a le Agaga o le Atua ia i latou lava, pe o savavali o latou taitai i le auala ua faatonu mai e le Alii.”¹⁹

Tatou te saili mo le upu moni i soo se mea lava tatou te ono maua ai. Na aoao mai le Perofeta o Iosefa Samita e faapea, “O le tulaga Faamamona o le upu moni. … O le mataupu faavae muamua ma le taua o la tatou tapuaiga paia o le, matou te talitonu ua ia i tatou se aia tatau e taofi mau uma ai, ma soo se aitema o le upu moni, e aunoa ma le faatapulaaina pe … o le … faasāina e ala i talitonuga po o manatu faavalea o tagata.”²⁰

Ioe, ua tatou maua le atoatoaga o le talalelei e faavavau, ae e le faapea ai la ua tatou iloa ai mea uma. O le mea moni, o se tasi o mataupu faavae o le talalelei toefuataiina o lo tatou talitonuga “o le a faaali mai e le Atua le tele o mea silisili ma le taua.”²¹

O le Toefuataiga o le talalelei a Iesu Keriso na oo mai ona o se alii talavou sa i ai se loto faamaualalo ma se mafaufau naunautai sa sailia le upu moni. Sa suesue ma galue loa Iosefa, ma sa ia iloa ai afai e leai se poto i se tagata, e mafai ona ia ole atu i le Atua ma o le a tuuina moni mai ai ia te ia le upu moni.²²

O le vavega sili o le Toefuataiga sa le gata ina faasa’oina ai manatu sese ma aoaoga faavae pi’opi’o—e ui o le mea tonu lava lena sa faia ai—ae na tatalaina ai foi pupuni o le lagi ma amatalia ai ona liligi mai pea lava pea le malamalama ma le poto fou lea o loo faaauau mai pea seia oo mai i lenei vaitaimi.

O lea e faaauau ona tatou sailia le upu moni mai tusi lelei uma ma isi punavai atoatoa lelei. “Afai e i ai nisi mea e mama, matagofie, pe logoleleia, pe tauleleia, matou te saili atu i nei mea uma.”²³ O lenei faiga e mafai ai ona tatou tetee atu i le taufaasese a le tiapolo. O lenei faiga tatou te iloa ai le upu moni i “lea fuaitau i luga o lea fuaitau; ma lea mataupu i luga o lea mataupu.”²⁴ Ma o le a tatou iloa ai o le atamai e pipii i le atamai, o le poto e talia le poto, ma o le upu moni e fusia le upu moni.²⁵

A’u uo talavou e, a o outou taliaina le tiutetauave e saili atu le upu moni ma se mafaufau fetala’i ma se loto faamaualalo, o le a sili atu ona e malamalama i isi, sili atu ona avanoa e faalogo, sili atu ona saunia e malamalama, ma sili ona aga atu e atiae nai lo le toso mai i lalo, ma sili atu le naunau e alu i soo se mea e finagalo le Alii e te alu i ai.

O Le Agaga Paia—O Lo Tatou Taiala i Upu Moni Uma

Ia mafaufau i ai. Ua ia te oe moni lava se soa mamana ma le taiala faatuatuaina i lenei sailiga faifaipea mo le upu moni---O ai? O le Agaga Paia lea. Ua silafia e lo tatou Tama Faalelagi le faigata o le a i ai mo i tatou ona sao mai le faatautavā o le vavaō uma ma iloa ai le upu moni a o tatou i ai i le olaga nei. Sa Ia silafia o le a na o se vaega o le upu moni o le a tatou vaai i ai, ma na Ia silafia o le a taumafai Satani e faasese i tatou. O lea ua Ia aumai ai ia i tatou le meaalofa faalelagi o le Agaga Paia e faamalamalama ai o tatou mafaufau, aoao i tatou, ma molimau mai ia i tatou i le upu moni.

O le Agaga Paia o se talifaaaliga. O Ia o le Faamafanafana, e aoaoina i tatou “i le upu moni o mea uma; … [o lē] e silafia mea uma, ma ua i ai le mana uma tau i le atamai, alofa mutimutivale, upu moni, fai mea tonu, ma le faamasinotonu.”²⁶

O le Agaga Paia o se taiala mautinoa ma le saogalemu e fesoasoani i tagata uma o e sailia le Atua a o latou folau i vai e masani ona faigata o le le mautonu ma feteenaiga.

O le Molimau o le upu moni mai le Agaga Paia e masani ona avanoa mo tagata uma i soo se mea i le lalolagi atoa. O i latou uma o e saili ia iloa le upu moni, o e e suesue i ai i o latou mafaufau,²⁷ ma o e “ole atu ma le loto faamaoni, ma le manatu moni i ai, ma le faatuatua ia Keriso, [o le a iloa ai] le moni … i le mana o le Agaga Paia.”²⁸

Ma o le Meaalofa faaopoopo lena ma le meaalofa lemagagana o le Agaga Paia ua avanoa mo tagata uma o e faaagavaaina i latou lava e ala i le papatisoga ma e ala i le ola agavaa mo Lana mafutaga faifaipea.

Ioe, o le a le tuua lava na o oe e lou Tama oi le Lagi alofa i lenei olaga e feofeoai i le pogisa. E le tatau ona taitaiseseina oe. E mafai ona e faatoilaloina le pogisa o lenei lalolagi ma maua le upu moni e faavavau.

Ae peitai, o nisi, e le saili tele mo le upu moni e pei ona latou tauivi ai mo finauga. Latou te le saili ma le faamaoni ia aoao ai; ae, latou te mananao e faavevesi, e faalialia vale lo latou poto taumatemate ma faapea ona aliae ai fefinauaiga. Latou te le amanaia pe teena le fautuaga a le Aposetolo o Paulo ia Timoteo: “A o sailiga valea ua le aoaoina mai, ia e aloese ai, aua ua iloa o mea ia e [mafua ai fefinauaiga].”²⁹

I le avea ai ma soo o Iesu Keriso, ua tatou iloa o finauga faapena ua matuai le tusa ai lea ma le Agaga lea tatou te faalagolago i ai i la tatou sailiga mo le upu moni. E pei ona lapataia ai e le Faaola ia sa Nifae, “Aua e moni, … ou te fai atu ia te outou, o lē e i ai le agaga o le finauga ua le mai ia te a’u o ia, ae ua mai le tiapolo ia, o lē o le tamā o le finauga.”³⁰

Afai e te mulimuli i le Agaga, o lau sailiga patino mo le upu moni o le a mautinoa lava le taitaiina atu ai o oe i le Alii ma le Faaola, o Iesu Keriso, aua o Ia “o le ala, ma le upu moni, ma le ola.”³¹ Atonu e le o le auala aupito faigofie lea; atonu foi o le ala e seasea ona uia, o le a avea ma ala e i ai mauga e a’ea, vaitafe aave e asaina, ae o Lana ala—lea ala o le togiola a le Faaola.

E faaopoopo atu i ai ma la’u molimau o se Aposetolo a le Alii, o Iesu o le Keriso, le Alo o le Atua soifua. Ua ou iloa lenei mea ma lo’u loto ma lo’u mafaufau atoa. Ua ou iloa lenei mea e ala i le molimau ma le mana o le Agaga Paia.

Ou te fai atu ia te outou ia outou galulue malosi i a outou sailiga ia iloa lenei upu moni mo outou lava—aua o le a tuu saoloto outou e lenei upu moni.³²

Au uo talavou pele e, o outou o le faamoemoe o Isaraelu. Matou te alolofa ia te outou. E alofa o Ia ia te outou. Ua i ai le talitonuga tele o le Alii ia te outou. Na te silafia o outou manuia, ma Na te silafia foi o outou luitau ma fesili o le olaga.

O la’u tatalo ia outou saili ma le faamaoni e le aunoa i le upu moni, ina ia outou naunau e feinu mai le vaipuna o upu moni uma, o ona vai e mamā ma suamalie, “o le vaipuna e puna i luga i le ola e faavavau.”³³

Ou te faamanuia atu ia te outou ia talitonu ma le mautinoa i le Alii ma se manao mauaa loloto ia iloatino moni le upu moni mai mea sese—i le taimi nei ma i lou olaga atoa. O la’u tatalo lea ma a’u faamanuiaga, i le suafa o Iesu Keriso, amene.