Tumau i luga o le Papa o Faaaliga
Saunia e Elder Lawrence E. Corbridge
Fitugafulu ua Faamalolo ma le Mamalu
Mai se lauga sa faia i se faigalotu, “Tumau e Faavavau,” sa fofogaina atu i le Iunivesite o Polika Iaga i le aso 22 Ianuari, 2019.
O le faalagolago i le papa o faaaliga, e mafai ai ona tatou maua ia tali i fesili e aupito taua.
Ata na tusia e Michal Dziekan
E avea o se vaega o se tofiga na tuu mai ia te au o se Pulega Aoao i ni nai tausaga talu ai, sa ou faitau ai i le tele naua o anomea e faasagatau i Le Ekalesia a Iesu Keriso o le Au Paia o Aso e Gata Ai, o le Perofeta o Iosefa Samita, o le Tusi a Mamona, ma mea na tutupu i le Toefuataiga. Talu ona suia lena tofiga, ou te lei toe foi e tautevateva ai i lena faataufusi.
O le faitauina o na anomea e tuua ai lava au e le aunoa ma se lagona o le faasiasia, ma i se tasi aso na musuia ai au e lena sane o le pogisa e tusia se vaega o se tali i na tuuaiga faatautee uma. Ou te fia faasoa atu ni nai mafaufauga sa ou tusifaamaumauina i lena aso, ma e ui o le mea sa ou tusia sa mo a’u lava ia, ae ou te faamoemoe o le a fesoasoani foi ia te outou.
Pe o le a Tatou Tutumau ea e Faavavau?
Na fai mai le perofeta o Tanielu e faapea, o aso amuli “e faatuina ai e le Atua o le lagi o le malo e le faaumatia e faavavau: o lea malo foi, e le tuuina atu ia i se tasi nuu, na te tu’imomomoina ma faaumatia ia malo uma lava, a o ia e tumau lava e faavavau” (Tanielu 2:44).
O le malo o le Atua o Le Ekalesia a Iesu Keriso o le Au Paia o Aso e Gata Ai. O le a “tumau e faavavau.” O le fesili o le, Pe o le a e ma ou tutumau ea pe “o le a [tatou] o ese foi?” (Ioane 6:67). Ma afai foi tatou te o ese, o fea o le a tatou o i ai?
O Le Taufaasese o se Faailoga o O Tatou Taimi
Ina ua faamatala e le Alii ia faailoga o Lona afio mai ma le iuga o le lalolagi, sa Ia ta’ua le tele o mea, e aofia ai taua ma tala o taua, o le tulai mai o malo e faasagatau i isi malo, o oge, faama’i, mafuie, ma le tele o isi faailoga, e aofia ai ma lenei: “Aua i aso na o le a tutu mai ai foi Keriso pepelo, ma perofeta pepelo, ma o le a latou faaali mai faailoga tetele ma mea e ofo ai, e oo ina a mafai, o le a latou faaseseina ai lava e ua filifilia, o e ua filifilia e tusa ma le feagaiga” (Iosefa Samita—Mataio 1:22; tagai foi i le Mataio 24:24).
Ou te le o mautinoa pe o a uma mea e faatatau i ai le “pe a mafai, o le a latou faaseseina ai lava le au filifilia,” ae ou te manatu o lona uiga, o le a luitauina tagata uma i o tatou taimi.
E toatele i latou o e taufasese, ma e tele ituaiga o taufaasese. I le tasi itu tatou te fetaiai ai ma i latou o e osofa’ia le Toefuataiga, o le Perofeta o Iosefa Samita, ma le Tusi a Mamona. O le isi tatou te vaaia ai i latou o e talitonu i le Toefuataiga ae fai mai e le o atoa le Ekalesia ma ua se ese mai le ala. Ae fai mai nisi e talitonu i le Toefuataiga ae e le fiafia i le aoaoga faavae o loo feteenai ma uiga siita’i o o tatou taimi. O nisi e aunoa ma le pule ua latou fai mai ua latou maua faaaliga, o miti, ma asiasiga e faasagatonu le vaa, e taiala i tatou i se ala e maualuga atu, pe saunia le Ekalesia mo le iuga o le lalolagi. O isi ua faaseseina e agaga pepelo.
I le isi itu o le fua ua tatou oo mai ai i se atulaulau atoa o mea faalavefau. E lei i ai se taimi na tele atu ai faamatalaga, o faamatalaga sese, ma faamatalaga taufaasese; lelei ua tele atu, o meafaigaluega, ma taaloga; ma isi mea e filifili mai ai, o nofoaga e o i ai, ma mea e vaai i ai ma faia e faapasi ai le taimi ma tata’i ese mai ai mai le mea e sili ona taua. O na mea uma ma isi mau mea ua salalau i le taimi nei lava i le lalolagi atoa e ala i faasalalauga faaeletonika. O se taimi lenei o le taufaasese.
E Taua Tele le Atamai
O le upumoni e mafai ai e i tatou ona vaai manino aua o le “iloa lea o mea e pei ona i ai, ma e pei ona sa i ai, ma e pei ona o le a oo mai” (Mataupu Faavae ma Feagaiga 93:24). O le silafia e taua tele e aloese ai mai le taufaasese, e iloatino ai le upumoni ma le mea e sese, ma ia iloa manino ai ma faatautaia se ala e aloese ai mai faafitauli ma mea matautia i o tatou taimi.
Na saunoa le Perofeta o Iosefa Samita: “O le atamai e manaomia mo le olaga ma le faaleatua. … O le atamai o le faaaliga. Faalogo … o lenei le ki atoatoa; o le atamai o le mana o le Atua i le faaolataga.”1
Fai mai tagata, “E tatau ona e faamaoni i ou talitonuga.” E ui ina moni lena mea, ae e le mafai ona e sili atu nai lo le mea e te iloa. O le tele o i tatou e gaoioi e faavae i o tatou talitonuga, aemaise o mea tatou te talitonu tatou te fiafia i ai. O le faafitauli o le, o nisi taimi o tatou e sese.
O nisi tagata atonu e talitonu i le Atua ma e sese ia ponokalafi ae o la lava e kiliki i le uepisaite o ponokalafi, ma le talitonuga sese faapea o le a sili atu lo latou fiafia pe afai latou te faia po o le faapea e le mafai ona tatalia ae kiliki ai po o le faapea, latou te le o faatiga ai i se isi. Ua sese lava i latou.
O isi atonu e talitonu e sese le pepelo ae pepelo lava i taimi, e talitonu sese o le a sili atu ona fiafia pe afai e le iloa le mea moni. Ua sese lava i latou.
Atonu e talitonu se tasi ma ua iloa lava foi o Iesu o le Keriso ae faafitia pea lava o Ia e le na o le faatasi ae faatolu, ona o le talitonuga sese faapea o le a sili atu ona ia fiafia e faamalie le aofia. Sa le’i leaga ia Peteru. Ou te le o mautinoa foi pe sa vaivai o ia. Sa na ona sese lava o ia. (Tagai Mataio 26:34, 69–75.)
Pe a leaga ona tatou faatino se mea, atonu tatou te mafaufau o tatou ua leaga, ae o le mea moni ua na ona tatou sese. O le lu’itau e le faapea o le punia o le ava i le va o a tatou faatinoga ma o tatou talitonuga; ae, o le lu’i o le punia o le ava i le va o o tatou talitonuga ma le upumoni.
E faapefea ona tatou punia lena ava? E faapefea ona tatou aloese mai le taufaasese?
O Uluai Fesili ma Fesili Lona Lua
E i ai uluai fesili ma e i ai foi fesili lona lua. Amata i le taliina muamua o uluai fesili. O uluai fesili e aupito sili ona taua. E itiiti lava ni nai uluai fesili. Ou te ta’ua le fa:
-
“Pe o i ai se Atua o lo tatou Tama?
-
Pe o Iesu Keriso o le Alo o le Atua, le Faaola o le lalolagi?
-
Pe o Iosefa Samita o se perofeta?
-
Pe o Le Ekalesia a Iesu Keriso o le Au Paia o Aso e Gata Ai o le malo lea o le Atua i le lalolagi?
O le eseesega, o fesili lona lua e le muta. E aofia ai fesili e uiga i le talafaasolopito o le Ekalesia, o faaipoipoga faaautaunonofo, o le tupuga mai o tagata Aferika ma le perisitua, o tamaitai ma le perisitua, o le faaliliuga o le Tusi a Mamona, o le Penina Tau Tele, DNA ma le Tusi a Mamona, o faaipoipoga a itupa tutusa, o tala eseese o le Uluai Faaaliga, ma isi mau mea.
Afai e te taliina ia uluai fesili, e taliina ai foi ma fesili lona lua, pe leai ai foi se taua tele. Tali ia uluai fesili, ona mafai lea ona e taulimaina isi mea e te malamalama i ai ma mea e te le malamalama i ai ma mea e te ioeina ma mea e te le ioeina e aunoa ma le tuua o le Ekalesia.
O Le Metotia Paia o le Aoaoina
E i ai auala eseese o le aoaoina, e aofia ai metotia faasaienitisi, faafuainumera, akatemia, ma faalelagi. O metotia uma e fa e alagatatau ia iloa ai le upumoni. E tutusa lava le auala e amata ai: i se fesili. E taua ia fesili, aemaise o uluai fesili.
O le auala faalelagi o le aoaoina e aofia ai elemene o isi metotia ae o le taunuuga e fuaao ai isi mea uma lava e ala i le valaau atu i mana o le lagi. O le taunuuga o mea a le Atua e faaalia mai e le Agaga o le Atua, lea e masani lava o se leo filemu, ma le itiiti. Na fetalai mai le Alii, “O le a tuu atu e le Atua ia te outou le poto e ala i lona Agaga Paia, ioe, e ala i le meaalofa lē mafaamatalaina a le Agaga Paia” (Mataupu Faavae ma Feagaiga 121:26).
Na aoao mai e le Aposetolo o Paulo e faapea, e le mafai ona tatou iloaina mea a le Atua sei vagana ai e ala i le Agaga o le Atua (tagai 1 Korinito 2:9–11; tagai foi Faaliliuga Iosefa Samita, 1 Korinito 2:11). Na Ia saunoa, “E le talia e le tagata faaletino o mea a le Agaga o le Atua: aua o mea valea ia ia te ia.” Tatou te vaaia lena mea i aso uma. Sa faaauau le tala a Paulo, “Na te le mafai foi ona iloa, aua e faamasinoina faaleagaga” (1 Korinito 2:14).
Mai faafitauli uma tou te fetaiai i le olaga, o le tasi e tatau ona muai tali o na mea uma o le mea e tupito le malamalama i ai. O le tulaga aupito leaga o tulaga uma o tagata soifua e le o le mativa, ma”i, tuuatoatasi, sauaina, po o taua---pe o le a lava le matuia o i ai na tulaga. O le tulaga aupito leaga o tulaga uma o tagata soifua e sili ona taatele: o le oti lea faaleagaga. O le tuueseeseina lea mai le afioaga o le Atua, ma i lenei olaga, o Lona afioaga o Lona Agaga po o le mana lea.
I se isi itu, o tulaga aupito sili o tulaga uma o le tagata soifua e le o le tamaoaiga, lauiloa, tulaga aloaia, soifua manuia, o mamalu o tamaalii, po o le malupuipuia. O le tulaga aupito sili o tulaga uma o tagata soifua, o le faaeeina lea i le mana faalelagi. O le toefanauina lea, o le maua o le meaalofa ma le mafutaga a le Agaga Paia, o le punavai o le atamai, faaaliga, malosiaga, manino, alofa, olioli, filemu, faamoemoe, mautinoa, faatuatua, ma toetoe o isi mea lelei uma.
Na fetalai mai Iesu: “O le Fesoasoani o le Agaga Paia lea, … na te aoao ia te outou i mea uma lava” (Ioane 14:26). O le mana lea “tatou te iloa ai le tonu i mea uma lava” (Moronae 10:5). “O le a faaali mai … ia i [tatou] mea uma … e tatau ona [tatou] faia” (2 Nifae 32:5). O le punavai o le “vai ola” e puna a’e i luga i le ola e faavavau (Ioane 7:38; tagai foi i le fuaiupu e 37).
Totogi po o le a lava le tau e tatau ona e totogiina, ia talia po o le a lava le avega e tatau ona e tauaveina, ma faia po o le a lava le osigataulaga e tatau ona e faia ia maua ai ma tamau i lou olaga le agaga ma le mana o le Agaga Paia. O mea lelei uma e faalagolago i le mauaina ma le tausisia o le mana o le Agaga Paia i lou olaga.
“O Le Mea Ua Le Faagaeetia”
O lea la o le a le faasiasia sa ou lagonaina i le tele o tausaga talu ai a o ou faitauina anomea faatautee? O le a faapea mai nisi o le faasiasia o le fua o le talitonu faaitu’au, o le lilifa atu lea e piki ma filfili na o mea e ogatusa ma o tatou manatu ma talitonuga faivavale. O le mafaufau faapea o mea uma ua talitonu i ai se tasi ma sa aoaoina ai atonu e sese, aemaise i le leai o se mea sili atu e suia ai, o se mafaufauga faasiasia ma le faalavelave moni lava.
Ae o le faasiasia sa ou oo i ai a o ou faalogologo i tagata sa faitioina le Perofeta o Iosefa Samita ma le Toefuataiga o le Ekalesia a Iesu Keriso e ese lava. O lena faasiasia e le o se talitonuga faaitu’au, ma e le o le fefe ina nei ou sese. O le leai o le Agaga o le Atua. O le tulaga o le tagata pe a “tuua na o ia lava” (Mataupu Faavae ma Feagaiga 121:38). O le faasiasia o le pogisa ma le “mafaufauga papa” (Mataupu Faavae ma Feagaiga 9:9; tagai foi i le fuaiupu e 8).
Na fetalai le Alii:
“Ma o le mea ua le faagaeetia e le mai le Atua, ma o le pouliuli lea.
“O le mea e mai i le Atua o le malamalama lea; ma o ia o lē e mauaina le malamalama, ma tumau pea i le Atua, e mauaina le malamalama atili; ma o lena malamalama o le a tupu susulu malamalama tele pea lava pea seia oo i le aso e atoatoa ai” (Mataupu Faavae ma Feagaiga 50:23–24).
O faaaliga mai le Agaga o le Atua e fuaaoina talitonuga faaitu’au aua e le o faavaeina na o ni faamaoniga. Ua ou faaaluina lo’u olaga atoa i le sailiga ia ou faalogo i le afioga a le Alii ma aoao ia iloa ma mulimuli i le Agaga o le Atua. O le agaga na fesootai ma leo leaga na osofaia le Perofeta o Iosefa Samita, le Tusi a Mamona, ma le Toefuataiga e le o le agaga o le malamalama, atamai, ma le upumoni. E le tele se mea ou te iloa, ae ou te iloaina le siufofoga o le Alii, ma o Lona siufofoga e le o i ai i leo o e amioleaga.
I se faatusatusaga tuga i le faasiasia ma mafaufauga papa mataga lea na lilofia ai le faataufusi o le masalosalo o le agaga o le malamalama, atamai, filemu, ma le upumoni lea e o mai faatasi ma mea na tutupu ma le aoaoga faavae mamalu o le Toefuataiga, aemaise ai o tusitusiga paia na faaalia mai i le lalolagi e ala mai i le Perofeta o Iosefa Samita. Tau lava ina faitau i ai ma fesili ifo ia te oe lava ma le Atua pe o ni upu o le pepelo, taufaasese, ma se faafoliga pe o ni upumoni.
E Le Mafai Ona E Aoaoina le Upumoni e ala i le Aveesea
O nisi o e fefefe faapea atonu e le moni le Ekalesia, ua faaaluina lo latou taimi ma le gauai e tau la’ala’a ai i le faataufusi o fesili lona lua. Ua faaseseina i latou i le taumafai e aoao le upumoni e ala i le faagasologa o le aveesea, e ala i le taumafai e aveesea masalosaloga uma. O se manatu e le lelei i taimi uma. E le mafai lava ona aoga.
O loo i ai ni tautinoga ma ni manatu e feteenai lava ma le upumoni. O taimi taitasi uma e te tulituliloa ai se tali i se tasi o tautinoga feteenai ma tepa ae i luga, e i ai foi se tasi e faataupupula atu ia te oe. Ou te le o faapea atu e tatau ona e le amanaiaina, ae o loo ou fai atu e mafai ona e faaaluina lou soifua ma le naunautai e tulituliloa ia tali i tautinoga uma e faasagatau i le Ekalesia ae le maua lava se malamalamaaga i upumoni aupito taua.
O tali i uluai fesili e le oo mai e ala i le taliina o fesili lona lua. O loo i ai tali i fesili lona lua, ae e le mafai ona e faamaonia se tonu e ala i le faaleaogaina o mea faafeagai uma. E le mafai ona e faamaoniaina le Ekalesia e moni e ala i le faaleaogaina o tautinoga uma e faia faasaga i ai. O se faiga faavae e ponatia. O le taunuuga lava e tatau ona faamaonia le moni, ma faatasi ai ma mea a le Atua, o le faamaoniga moni e iu ina oo mai moni e ala i faaaliga e ala mai i le agaga ma le mana o le Agaga Paia.
I Ona Soo, na fesili i ai Iesu:
“A o outou pe se a la outou upu ia te au po o ai?
“Ona tali mai ai lea o Simona Peteru, ma faapea mai, O oe o le Keriso, o le Alo o le Atua soifua.
“Ona tali atu ai lea o Iesu, ua faapea atu ia te ia, Amuia oe Simona Paiona; aua e le se tagata na ia faaali atu ia te oe, a o lo’u Tama o i le lagi.
“… O Peteru oe, ou te ati ae foi la’u ekalesia i luga o lenei papa; e le mafaia foi e faitotoa o seoli ona manumalo i ai” (Mataio 16:15–18; tagai foi i fuaiupu 13–14).
O le Ekalesia a Iesu Keriso ua faavae i luga o le papa o faaaliga, e le mafaia foi e faitotoa o seoli ona manumalo i ai. O oe ma A’u o le Ekalesia lea. E tatau ona ta faavae i luga o le papa o faaaliga, ma e ui ina atonu tatou te le iloaina le tali i fesili uma, ae e tatau ona tatou iloa ia tali i uluai fesili. Afai tatou te iloa, o le a le manumalo lava faitotoa o seoli ia i tatou ma o le a tatou tumau e faavavau.
Tumau i luga o le Papa o Faaaliga
O loo i ai se Atua i le lagi o lē o lo tatou Tama e Faavavau. O Iesu Keriso o le Alo o le Atua, o le Togiola o le lalolagi. O Iosefa Samita o se perofeta a le Atua o lē na faataatiaina le faavae mo le Toefuataiga o le malo o le Atua. O Le Ekalesia a Iesu Keriso o le Au Paia o Aso e Gata Ai o le malo lea o le Atua i le lalolagi. Ua ou iloa lenei mea e ala i o’u aafiaga---mea uma lava. Ua ou iloa lenei mea e ala i faamaoniga, ma o le faamaoniga e lofituina. Ua ou iloa lenei mea e ala i le suesue. Ma, e sili ona moni, ua ou iloa lenei mea e ala i le agaga ma le mana o le Agaga Paia.
Ma faatasi ai ma lena mea, ua ou iloa o mea uma e manaomia ona ou iloa ia ou tumau ai e faavavau. Ina tatou tumau ai i luga o le papa o faaaliga, aemaise ai i uluai fesili. Afai tatou te faia, o le a tatou tumau e faavavau ma e le se ese ai lava.