O Lo Tatou Faamoemoe, o lo Tatou Malamalama, o lo Tatou Malosiaga

Saunia e Elder Ronald A. Rasband

O Le Korama a Aposetolo e Toasefululua

Mai se Faasauga ma se Pulega Aoao i se faasalalauga mo faiaoga o aoaoga faalelotu na faia i le aso 8 Fep. 2019.

Ina ua faauuina a’u o se Aposetolo, sa saunoa mai le Peresitene pele o Thomas S. Monson (1927–2018) o le a avea a’u ma se molimau faapitoa o le suafa o Iesu Keriso i le lalolagi atoa. Sa le’i māmā ia te a’u lena poloaiga. Sa ou matua suesueina tusitusiga paia ia iloa le Alii i Ona suafa ma faalagiga. O nei suafa uma o le a ou faasoa atu ia te outou e mai fuaiupu o tusitusiga paia ua faamanatu mai ai ia i tatou lo tatou faamoemoe o loo ia te Ia.

O Ia o le Faamoemoe o Isaraelu (Ieremia 17:13), Fetu Ao Pupula (Faaaliga 22:16), Leoleo Mamoe Lelei (Mataupu Faavae ma Feagaiga 50:44), Faipule (Isaia 9:6; 2 Nifae 19:6), Alii o le Filemu( Isaia 9:6; 2 Nifae 19:6), Faaola (Roma 11:26), Malamalama o le Lalolagi (Ioane 8:12), ma le Faitaulaga Sili i mea lelei uma e oo mai (Eperu 9:11). E Malosi o Ia e faaola (Alema 34:18; Mataupu Faavae ma Feagaiga 133:47) ma o Le o i ai le mana uma (Mataupu Faavae ma Feagaiga 61:1).

O le faatosinaga ma le aafiaga o Keriso e maoae. E i ai o Ia iina pe a tatou vaivai ma tauivi e agai i luma. Ma afai tatou te pauu, o Lona “malamalama ua susulu i le pouliuli” (Mataupu Faavae ma Feagaiga 6:21) e pupula atu nai lo se isi lava taimi muamua. E alofa o Ia ia i tatou i o tatou taimi e sili ona lelei ma taimi e sili ona faigata.

O le avea ma se soo o Iesu Keriso, e le o se mea e taumatemate. O Lona ala ua faailoga lelei i Ona tulagaaao. Pe a tatou mulimuli ia te Ia, o le a tatou fiafia i mea e fiafia i ai o Ia. A o tatou faafouina a tatou feagaiga ma Ia i vaiaso taitasi i le aai i le faamanatuga paia, tatou te tuputupu ae i le malamalama ia te Ia o le Togiola o le lalolagi (Mataupu Faavae ma Feagaiga 93:9), o le Agaga o le Upumoni (Mataupu Faavae ma Feagaiga 93:9), ma o le Lokou (Mataupu Faavae ma Feagaiga 93:8).

Uo pele, o le Faaola lena ou te iloaina, lea ou te alofa ma faaaloalo i ai ma lo’u loto atoa. Mai le taele o lo’u agaga ou te molimau atu ia te Ia ma Lona agalelei ma le alofa mutimutivale. Na Ia folafola mai, “O outou o aʼu uo, ma o le a outou maua se tofi faatasi ma aʼu” (Mataupu Faavae ma Feagaiga 93:45) .

O Iesu Keriso o le tali lava lea i taimi uma i faafitauli ma luitau ia o loo avea o se vaega o lenei aafiaga i la le tino. O le malamalama ai i Lana misiona ma Lana talalelei, o lo tatou alofa mo Ia, ma lo tatou talitonuga ma le faalagolago ia te Ia, tatou te maua ai le malosiaga.