Maotatapuai—O Nofoaga o le Migao ma Tapuaiga
Saunia e Bishop Dean M. Davies
Fesoasoani Muamua i le Au Epikopo Pulefaamalumalu
O loo i ai le Agaga o le Alii i o tatou maotatapuai ma o le a musuia i tatou pe a tatou faafoeina i tatou lava i le migao i Ona luma.
Sa faasoa mai e se paaga tuuto faigaluega ia te au sona aafiaga a o ia faataunuuina se tofiga e teu ese nofoa ma faamamā le nofoaga autu o le siteki ina ua mae’a se konafesi a le siteki. Ina ua maea le 30 minute o le faatinoina o nei tiute, sa ia iloaina o ia le tagata mulimuli o loo totoe i le fale. Ae, nai lo le lagonaina o le tuuatoatasi ma se faanatinati e alu, sa ia matauina le lagona matagofie lava e tasi sa ia lagonaina i le taimi o le konafesi, o loo tumau pea ia te ia ma sa faateleina.
Ina ua mae’a lana galuega ma ulufafo atu mai le maotatapuai, sa la fetaui ma se tasi tagata o le au paia sa foliga mai sa ia mataituina lelei o ia. O le mataulia o le mea sa faia e la’u uo, sa tago atu le tagata lea i lona lima ma faapea atu, “Uso, o loo silafia e le Alii nei mea iti ua e faia mo Ia, ma o loo silasila mai i lalo ma soisoi mai i ai.”
Na mavae tausaga e tele ao avea o se epikopo, sa toe i ai foi lea lava uo na o ia i le maotatapuai o lana uarota. Ina ua mae’a ona tape ia moli i le falesa, sa ia faatuatuai mo sina minute a o susulu atu le masina i faamalama agai atu i le pulelaa.
Sa toe faatumulia foi o ia i lea lava lagona filemu ua masani ai, ma sa ia nofo ifo i lalo i luma o le falesa ma manatunatu i le mau taimi paia sa ia oo i ai i lena faatulagaga—o taimi e tele sa ia matauina ai ositaulaga o lufilufia le areto i le laulau faamanatuga, o taimi na ia lagonaina ai le Agaga Paia o mafuta atu ia te ia a o ia tuuina atu se lauga i se konafesi a le uarota, o sauniga o papatisoga sa ia taitaia, o pese matagofie a aufaipese sa ia faalogo ai, ma le mau molimau mai tagata o le uarota sa matua tuia loloto ai o ia. A o nofonofo ai na o ia i le falesa ua pogisa, sa ia lagonaina le faatumuina i taunuuga tuufaatasi o nei aafiaga i lona olaga ma olaga o tagata o lana uarota, ma sa punou ifo lona ulu i se lotofaafetai maoae.
Sa aoaoina ma le poto ma le tonu la’u uo e faapea o nofoaga e sili ona paia i le lalolagi o le malumalu ma le fale, ae e ala i aafiaga e lua na faamatala atu i luga, sa ia malamalama ai foi i le natura paia o o tatou maotatapuai. Ona sa faapaiaina e le pule o le perisitua, ua avea ai nei faatulagaga e liligi mai i ai e le Alii ia faaaliga i luga o lona nuu ma “faaalia ai le mana faaleatua” e ala i sauniga e faatinoina ai iina (tagai i le Mataupu Faavae ma Feagaiga 84:20).
O le maotatapuai e tuufaatasi ma le fale e aumaia ai le olioli folafolaina lea e mafai ona maua e le Au Paia faamaoni i le Aso Sapati. E avea o se nofoaga e tapuai faatasi ai tagata o le au paia, ma matua’ia ai ona “fili faatasi o latou loto i le lotogatasi ma le alofa o le tasi i le isi” (Mosaea 18:21) ma agai atu i le Faaola. Mo i tatou e tuuina atu le lotofaafetai e tatau ai ma le faaaloalo mo le sasaa mai o faamanuiaga faaleagaga lea e oo mai ia i tatou e ala mai i o tatou maotatapuai, e ao ona tatou ulufale atu i nei nofoaga o tapuaiga ma se uiga faaalia o le migao loloto ma le faamaoni.
O Le Uiga o le Migao
I la tatou aganuu faaonaponei i le Ekalesia, o le upu migao ua suia ia uiga tutusa ai ma le upu fifilemu. E ui o leo lemu e matuai talafeagai mo o tatou falesa, ae o lea malamalama utiuti i le migao e le o maua tonu ai le uiga atoa o le upu. Reverence e maua mai i le veape Latina o le revereri, o lona uiga o le “tu atu ma le ofo i le.”1 Pe mafai ona tatou maua se faaupuga e sili atu ona faamatalaina ai ma le mana ia lagona o o tatou agaga pe a tatou manatunatu loloto faamaoni i mea sa faia e le Faaola mo i tatou taitoatasi?
Ua ou manatua ai upu o se viiga matagofie tatou te lagiina i o tatou falesa, “Ou te tu ma ofo i le alofa o Iesu.”2 O lena lagona maoae o le lotofaafetai, faaneetaga ma le maofa o le fatu lea o le migao, ma e uunaia ai i tatou e aloese mai soo se ituaiga o gagana po o amioga e ono faavaivaia ai na lagona i totonu o i tatou lava po o isi.
Atapue o le fafine i le pulelaa na pueina e Tiffany Myloan Tong
O Maotatapuai ma le Aso Sapati
Mai faaaliga i ona po nei, ua tatou iloa ai o se vaega tutotonu o la tatou tapuaiga i le Aso Sapati o le ”o atu i le fale tatalo ma ofo atu a [tatou] faamanatuga i le aso paia [o le Alii]” (Mataupu Faavae ma Feagaiga 59:9). O “fale o le tatalo” lea tatou te faapotopoto ai i le Sapati o o tatou maotatapuai paia na.
Ua fesoasoani mai Peresitene Russell M. Nelson ia tatou malamalama atili i le sootaga vavalalata i le va o lo tatou migao mo le Faaola ma o tatou lagona e uiga i le aso Sapati. I le faasoa mai o lona lava aafiaga i le faamamaluina o le Sapati, sa faamatala mai ai e Peresitene Nelson, “Sa ou iloa mai tusitusiga paia o la’u amio ma o’u uiga i le Sapati o le a avea ma se faailoga i le va o a’u ma lo’u Tama.”3
E pei lava o le avea o a tatou amioga ma uiga faaalia i le Sapati o se faailoga o lo tatou tuuto atu i le Alii, o a tatou amioga, o o tatou uiga faaalia, e oo lava i le faiga o o tatou lavalava ao i ai i Lona fale o le tatalo e mafai ona ta’u atu ai le maualuga o le migao tatou te lagonaina agai i le Faaola.
O Maotatapuai ma Sauniga
Na faateleina e Elder Jeffrey R. Holland o le Korama a Aposetolo e Toasefululua lo tatou malamalama e uiga i lenei manatu faavae, ma tautino mai ai:
“E faaopoopo atu i le faaavanoaina o taimi mo aoaoga o le talalelei e faatotonugalemu-i-le-aiga, o a tatou sauniga o le Aso Sa ua fetuunaia … ua faamamafa ai le faamanatuga o le Tausamaaga a le Alii e fai ma taulaiga autu paia, ma faamamaluina o o tatou aafiaga i tapuaiga i vaiaso taitasi. E ao ona tatou manatuaina i se ala sili ona patino tatou te mafai ai, na maliu Keriso mai se loto nutimomoia i Lona tauaveina atoa na o Ia o agasala ma faanoanoaga o le aiga atoa o le tagata.
“Talu ai na tatou saofagā i lena avega matautia, o se taimi faapena e matua manaomia ai lo tatou faaaloalo”4
E taua le manatua o le nofoaga atofa mo lea taimi sili ona maualuga o le faaaloalo agai i le Faaola o le falesa o le maotatapuai. E faaopoopo atu i le migao tatou te lagonaina i le saungia faalevaiaso o le faamanatuga, o o tatou lagona o le migao ma le faaaloalo e faateleina pe a tatou mafaufau i isi sauniga ma faamanuiaga o le perisitua e faatinoina i totonu o maotatapuai, e aofia ai le faaigoaina ma le faamanuiaina o fanau, papatisoga ma faamauga, faauuga i le perisitua, ma le vaetofiaina mo valaauga. O nei sauniga taitasi ma faamanuiaga e mafai ona aumaia ai se liligi tele mai o le Agaga Paia pe afai e o mai i latou o e auai i le faatinoina ma i latou o e lolotu mai i se uiga faaalia o le migao.
Ata na pueina e James Iliff Jeffery
O Maotatapuai ma Tapuaiga
O le aso Sapati tatou te maua ai le avanoa e tapuai ai i le Alii i le taimi o a tatou suesuega i le fale, ma se potopotoga i le taimi o la tatou faamanatuga ma isi sauniga. Talu mai aso o le popofou o le Ekalesia, sa fiafia le Au Paia e o mai faatasi e mafuta ma amatalia noataga faaleusoga a alii ma le usoga faatamaitai. Sa mamanuina foi o tatou maotatapuai ma ni avanoa e faatino ai na ituaiga o gaoioiga i le gasologa o le vaiaso. Peitai, e le tatau ona galo ia i tatou le uluai faamoemoega o nei fale, o le saunia ai lea o se nofoaga mo tapuaiga.
O tapuaiga ma le migao e fesootai vavalalata. “A tatou tapuai atu i le Atua, tatou te faalatalata atu ia te Ia ma le alofa migao, lotomaualalo, ma le faamemelo. Tatou te mataulia ma talia o Ia o lo tatou Tupu paia, le Foafoa o le atulaulau, o lo tatou Tama pele alofa ma faavavau.”5
O lea faamoemoega autu o le tapuaiga e tatau ona tosina ai la tatou amio i maotatapuai tusa lava pe o tatou faia ni gaoioiga faaagafesootai po o faafiafiaga. E ao ona tausisia se vaavaaiga tele e faaitiitia ai le gaogaosa, o otaota, po o le faaleagaina o soo se vaega o le fale mai gaoioiga faale-Lotu, ma e tatau ona vave faia se faatatau e faamama ai pe faaleleia ai pe a tulai mai se mea faapena.
E mafai ona aoaoina tamaiti ma le autalavou o le migao ma le tausiga o le maotatapuai e le na o sauniga ma fonotaga i Aso Sa. O le auai o le au paia i le faamamaina o maotatapuaia—aemaise le auai tuufaatasi o matua ma fanau—o se auala matagofie lea o le atiina ae o se lagona o le migao mo o tatou maota paia. E pei ona molimauina i le aafiaga o la’u uo i le faasa’osa’oina o le nofoaga autu o le siteki ina ua uma le konafesi a le siteki, o lena lava gaoioiga o le teuina o le maotatapuai o se auala o le tapuai ma valaaulia ai le Agaga o le Alii.
Ata pue o tagata o le au paia o loo tutū i fafo na pueina e Massimo Criscione.
O Maotatapuai ma le Faaola
I lalo o le taitaiga faaperofeta a Peresitene Nelson, ua faia ai taumafaiga maoae ia mautinoa ai e le taofia le suafa o Iesu Keriso pe a faasino i Lana Ekalesia. I se auala foi faapena, e le tatau ona tatou faatagaina le aveesea o le Faaola mai le totonugalemu o a tatou tapuaiga—e aofia ai o tatou nofoaga mo tapuaiga.
Ua tatou masani i le faasino atu i le malumalu o le maota o le Alii, o se faatatauga sa’o ma le taua. Peitai, tatou te ono magaga ina galo, o o tatou maotatapuai taitasi ua faapaiaina i le pule o le perisitua e avea o se nofoaga e mafai ona afio ai le Agaga o le Alii ma se nofoaga mo fanau a le Atua—i latou i totonu ma fafo o le Ekalesia—e mafai ona latou maua ai “le malamalama i lo latou Togiola” (Mosaea 18:30).
O le faamoemoega na faasilasila mai talu ai nei e faamatagofie ai o tatou maotatapuai i galuega o faatufugaga ia e faaalia ai ma le faaaloalo le Faaola ma mea paia na tutupu i Lona soifuaga i la le tino ma ina ua mavae i la le tino, ua mamanuina ina ia ta’a’ina atu ai o tatou mata, mafaufau, ma loto ia latalata atili atu ia te Ia. A o e ulufale atu i nei fale o le tatalo mo sauniga ma gaoioiga, matou te valaaulia ma le alofa oe e te tu, matau, ma manatunatu loloto i nei atavali paia, e maimoa i ai ma lau fanau, ma faatagaina i latou ia faateleina ou lagoona o le tapuai ma le migao i le Atua.
Na tautino mai e le perofeta o le Feagaiga Tuai o Sapakuka, “O Ieova ua i lona malumalu paia o ia: ina faalologo ia le lalolagi uma i ona luma” (Sapakuka 2:20). Ia faapena foi ona tatou manatua o loo i ai le Agaga o le Alii i o tatou maotatapuai ma o le a musuia i tatou pe a tatou faatautaia i tatou lava ma le migao i Ona luma.