Ua Faasoa atu e Aposetolo Savali o le Faamoemoe
Ua ofoina mai e taitai o le Ekalesia ni malamalamaaga e uiga i le faalatalata atu i le Atua, auauna atu i le alofa, ma agai atu i luma ma le onosai i le taimi o le faama’i pipisi i le lalolagi.
Atapue mai le Getty Images
I le tali atu i le pipisi ai o le vairasi i le salafa o le lalolagi, ua faasaina ai e taitai ia faalapotopotoga i nofoaga faitele ma faatautaia le faanofo esea. Ua tapunia aoga, taofia e taitai o ekalesia le faatautaia o sauniga lotu, ma o i latou o loo galulue i fafo e manaomia ona faia talifofoga mo le puipuiga.
O le tausaga e 1919, ma o le fulū matautia na pipisi i le lalolagi lea na amata i le tausaga na muamua atu o le a ma’umau ai le fia sefulu miliona o soifua.1 O le perofeta fou o le Ekalesia, o Peresitene Heber J. Grant (1856–1945), sa vaetofia ia Novema 1918 ae sa lei lagolagoina seia oo ia Iuni 1919 ona ua tolopoina le konafesi aoao ia Aperila.
I le taimi o lana auaunaga i le mavae ai o na ma isi aso faigata, na tuuina mai ai e Peresitene Grant se fautuaga talafeagai mo o tatou aso ina ua ia faapea mai, “Ua tatou o mai ai i lenei lalolagi ina ia maua le malamalama, atamai, ma le poto, ina ia aoao i lesona, ia mafatia i tiga, ia onosaia ia faaosoosoga, ma maua ia manumalo o le olaga faaletino.” Mai le malamalama na ia maua mai i le fitā o aafiaga patino, sa ia faaopoopo mai, “Ou … te iloa o taimi o faigata e faamafanafanaina ai ma faamanuia ma faamalosiauina ia le Au Paia o Aso e Gata Ai e le pei o isi tagata!”2
I o tatou “taimi o faigata” i le taimi o le vairasi fou o le korona, tatou te maua ai le mafanafana ma le faamafanafanaga mai le talalelei toefuataiina a Iesu Keriso. O lo tatou iloa e alofa le Tama Faalelagi i Ana fanau ma ua Ia valaauina perofeta ma aposetolo i o tatou aso e taialaina i tatou i afā o le olaga faaletino o se faamanuiaga sili lea.
Mai le fautuaga na faasoa i le taimi o faatalanoaga talu ai nei, e faamanatu mai ai e nisi o sui o le Korama a Aposetolo e Toasefululua e mafai ona tatou lagonaina le olioli ma vaavaai atu i le lumanai ma le faamoemoe e tusa lava po o le a le mea o loo siomia ai i tatou.3
Ata na pueina e Welden C. Andersen
E Agai i Luma le Galuega
Na faatusaina e Elder Bruce R. McConkie (1915–85) i se tasi taimi le Ekalesia i “se caravan tele” lea e agai lava i luma e ui lava i le tetee.4 O Elder David A. Bednar na ia faauigaina mai le agai i luma ma le mausali o le Caravan i tapenapenaga musuia a le Ekalesia ma lona talafaasolopito i le feagai ai ma faigata.
“E leai se lima eleelea na te taofia lenei galuega mai le alualu i luma,5 ma e leai se faama’i pipisi i le lalolagi o le a taofia lenei galuega mai le alualu i luma,” na ia saunoa ai. “I le lotolotoi o luitau uma lava ua feagai ma i tatou i le taimi nei ma lenei vairasi, e agai pea i luma le galuega. … Tatou te le iloa po o le a le umi o le a i ai, ae o le a tatou manumalo. Ma atonu o le a tatou le toe faaauau tonu la tatou mamanu muamua o le olaga ua tatou maitauina, ae o le tele o na fetuunaiga ma suiga o le a matua lelei lava.”
Na saunoa Elder Quentin L. Cook o sauniuniga musuia a le Ekalesia e aofia ai ni faataitaiga talafeagai e avea ma faamamafa i le tausia o le aso Sapati, faamalolosia o korama a le Perisitua Mekisateko ma le Aualofa, le suiga i le auaunaga, ma le faailoaina o le Sau, Mulimuli Mai ia te A’u, vitio o le Tusi a Mamona, ma le polokalama a Tamaiti ma le Autalavou.
“O le a tatou toe tepa i tua i lenei mea o se taimi autu o sauniuniga ae le na o se mea e tatau ona tatou tumau ai,” na ia saunoa ai.
Na lagolagoina e Peresitene M. Russell Ballard o le Korama a Aposetolo e Toasefululua. E ui i le tapunia le tumau o malumalu ma falelotu, ua i ai i tagata o le Ekalesia ia meafaigaluega faaleagaga latou te manaomia e faaauau ai pea ona agai i luma.
E manatuaina e Peresitene Ballard lona lagona i le toe foi mai ai i le fale mai i le lotu i le aso 7 o Tesema, 1941, i le iloa ai sa osofaia Pearl Harbor ma ua latalata ona tosina atu le Iunaite Setete i le Taua Lona II a le Lalolagi. E pei o le toatele o tagata i aso nei, sa popole o ia i le lumanai ma mafaufau ai pe o le a leai sona lumanai.
“Ae e le o le mea lena na tupu,” na ia fai mai ai. E pei lava ona manumalo tagata saoloto o le lalolagi i lena taua, o le a faapena foi ona manumalo le lalolagi i le taua e faasaga i le vairasi o le korona. “O le a lelei lava mea uma ao liliu atu o tatou loto i lo tatou Tama i le Lagi ma vaavaai atu ia te Ia ma le Faaola o le Togiola o tagata ola uma,” na ia saunoa ai.
O le isi auala e agai ai i luma le Ekalesia e ala mai lea i ana taumafaiga faafaifeautalai, lea e tali atu i suiga o tulaga o le lalolagi. Na saunoa Elder Dieter F. Uchtdorf sa suesueina e taitai o le Ekalesia ni auala fou e faasoa atu ai le talalelei e oo lava i le taimi ao lei amata ona faalavelaveina e le KOVITI-19 galuega faafaifeautalai. O lena faauilavea na aofia ai le felaua’iina o le faitau afe o faifeautalai i o latou atunuu, vave faamaloloina o isi, ma toe fetuunai isi.
“O le KOVITI-19 na faatelevaveina ai o tatou mafaufau e uiga i lenei mea maoae ma pupula ai o tatou mata,” o lana tala lea. O se taunuuga, o ala o faasalalauga o tekinolosi ma agafesootai ua tatalaina nei faitotoa ia sa tapunia e nuu na tapu ai talaiga ma aiga sa le mafai ona oo i ai ma fale mautotogi.
“O le a faaauau pea ona agai i luma le galuega faafaifeautalai e ui lava i le pipisi o le faamai i le lalolagi,” na faaopoopo mai ai Elder Uchtdorf. “Ua faaauau pea ona tatou aoao i auala e faaleleia ai le galuega faafaifeautalai i le taimi nei ma le lumanai. Ua folafola mai e le Alii o le a faanatinatiina Lana galuega mo le faamanuiaina o fanau uma a le Atua (tagai Mataupu Faavae ma Feagaiga 88:73). Ou te lagona ua tatou i ai i le ogatotonu tonu o lenei faagasologa a o tatou ola ai i nei taimi faigata. O a tatou faifeautalai faapelepele o paionia ia o o tatou aso, o loo asaina se ala o le faasoaina atu o le savali o le talalelei i ni auala fou e talafeagai ma o tatou tulaga ina ia mafai ai ona faaauau pea ona taavale atu i luma le Ekalesia a Iesu Keriso, seia tumu ai le lalolagi atoa’” (Mataupu Faavae ma Feagaiga 65:2).
O avanoa fou mo le faasoaina atu o le talalelei e le na o le pau na o mea o loo tatalaina. O loto foi ua tatalaina ona o taimi faigata e masani lava ona faamaualalo ai tagata ma liliu atu ai i latou i le Atua, na saunoa ai Elder D. Todd Christofferson.
“Ua sili teisi atu le naunau o i latou e mafaufau, ‘Masalo ou te manaomia se mea e sili atu nai lo lau teugatupe. Atonu e tele atu nisi mea i le olaga nai lo o le mea sa ou ola ai,” o lana tala lea.
Ua uunaia e Elder Christofferson tagata o le Ekalesia e vaavaai mo avanoa faafaifeautalai, e pei o le faasoaina o savali e faatatau i le talalelei ma ata e ala i faasalalauga faaagafesootai, fesootai atu i faifeautalai faamisiona e uiga i le fesoasoani atu i le faaaumeaina o tagata o loo latou aoaoina i le initoneti, ma le fesootai atu i tagata latou te le o masani ona vaai soo i ai.
Faataumamaoina Faaleagafesootai ma le Faataumamaoina Faaleagaga
O le isi auala e agai ai i luma le Ekalesia o le tali faaleagaga lea e tuuina atu e le Au Paia o Aso e Gata Ai i luitau faaletino e pei o le KOVITI-19. Mo lo tatou puipuiga faaletino, tatou te faateleina lo tatou mamao faaletino mai isi, ae mo lo tatou puipuiga faaleagaga, tatou te faalatalata atili atu ai i lo tatou Tama i le Lagi ma Lona Alo. O le pipisi ai o le faamai o le KOVITI-19 i le lalolagi ua tuuina ai i le toatele o tagata o le Ekalesia le tele o avanoa e faateleina ai lo latou puipuiga faaleagaga e ala i le mulimuli i le fautuaga a Peresitene Russell M. Nelson e faalogo i le Alii.
Ua silafia e lo tatou Tama pe a siomiaina i tatou e le lē mautonu ma le fefe, o le mea o le a sili ona fesoasoani tele ia i tatou, o le faalogo lea i Lona Alo,” na saunoa ai Peresitene Nelson i le konafesi aoao o Aperila 2020. Sa ia faaopopo mai, “A o tatou saili e avea ma soo o Iesu Keriso, o a tatou taumafaiga ia faalogo ia te Ia e manaomia ona matua faia ma le faamoemoe sili i ai. E manaomia ai le lotofuatiaifo ma taumafaiga tumau e faatumu o tatou olaga i aso taitasi i Ana afioga, Ana aoaoga, Ana upumoni.”6
E ui tatou te le taliaina le taofia o sauniga a le Ekalesia, o le tapunia o malumalu, po o le leai o ni galuega, o le faaaluina o le tele o le taimi i le fale e aumaia ai ia i tatou “se avanoa e mafaufau ai e uiga i le ala mai i le Atua” (tagai Alema 5:7), na saunoa ai Elder Cook. “Atonu o mea na tutupu talu ai nei e mafai ona avea ma se uati e mataituina faaleagaga e taulai atu ai i tatou i mea e sili ona taua. Afai o lea, o le a avea ma se faamanuiaga maoae i lenei vaitaimi le taulai atu i mea e mafai ona tatou faaatoatoaina i o tatou olaga ma le auala e mafai ai ona tatou faamanuiaina olaga o isi a o tatou ala mai i le Atua ma agai atu i luga o le ala o feagaiga.”
Na faaopoopo mai Elder Jeffrey R. Holland, “O taimi faapena e valaaulia ai i tatou e vaai i totonu o o tatou agaga pe tatou te mananao i mea o loo tatou vaaia iina. O le taimi lena [tatou te] mafaufau po o ai moni lava [i tatou] ma mea e taua moni lava.”
O taimi faapena e valaaulia ai foi i tatou e faateleina lo tatou faatuatua, auauna atu, ma le agaga faafetai, e uunaia ai i tatou e “mafaufau i lo tatou faalagolago i le Atua ma faamanuiaga mai ia te Ia lea e masani ona tatou le amanaiaina,” o le saunoaga lea a Elder Holland. “Tatou te tuuina atu i lo tatou Tama i le Lagi se faateleina o le loto faafetai, se loto faafetai sili atu, ma se ua’i sili teisi atu e manatua ai le tele o faafitauli ua foiaina ona o le Atua, o agelu, folafolaga faalefeagaiga, ma le tatalo.”
I le totonugalemū o lo tatou agaga faafetai o le faamanuiaga lea o le manatuaina o “le alofa mutimutivale tele o le Alii i le fanauga a tagata, mai i le foafoaga o Atamu e oo mai i lalo seia oo mai i le taimi [nei]” (Moronae 10:3). Na saunoa sui o le Korama a le Toasefululua o soo se taimi lava tatou te manaomia ai ona “malu i fale,” e mafai ona tatou mulimuli i le faataitaiga a Nifae ma Alema, le manatuaina o Ia “o le ua [tatou] faalagolago i ai,” le Faaola o Iesu Keriso, “o le a ia laveai mai pea ia te [i tatou]” (2 Nifae 4:19; Alema 36:27). Ma e mafai ona tatou manatua, e pei ona aoao mai le Aposetolo o Paulo, e leai se mea e mafai ona “faateaeseina mai i tatou i le alofa o Keriso” (tagai i le Roma 8:35).
O le Alii o Iesu Keriso “o lo tatou malutaga sili” (tagai i le Salamo 61:1–4), na saunoa ai Elder Holland. “Po o le a lava le mea e tupu, o le a le faateaeseina lava i tatou mai le alofa o le Faaola ma Lona mafuta mai, e tusa lava pe tatou te le iloaina i lena taimi. E le o taofia le Agaga e se vairasi po o ni tapu faalemalo po o ni vaaiga mamao faafomai.”
Atapue mai le Getty Images
“Fai Mea Lelei”
Talu ai nei, a o faitauina se lipoti na faia e se komiti a le Ekalesia, sa oo ina popole Elder Christofferson e uiga i aafiaga o le “faamalosia le nofo toatasi” e mafai ona oo mai i luga o tagata nofofua o le Ekalesia—matutua ma e laiti.
“O le faamalosia o le nofo toatasi e mafai ona oo atu ai i le tuuatoatasi, ma o le tuuatoatasi e mafai ona maua ai ni taunuuga le lelei faaletino ma faalemafaufau,” o lana tala lea. “Ina ia faafetaia’ia, o nisi o faufautua o le soifua maloloina lautele na fautuaina mai o i latou e aafia i le tuuatoatasi e vaavaai mo auala e ‘fai ai mea lelei’ mo se tasi.”
O le Au Paia o Aso e Gata Ai e mafai ona sailia ni auala e auauna atu ai, fesoasoani, ma saofagā atu i isi, ae maise lava ia i latou ua tuuatoatasi, na saunoa ai Elder Christofferson, ma o tagata e tuuatoatasi o e tuuina atu ni auaunaga i isi e mafai ona faaitiitia ai o latou lagona o le faaesea.
“Taulai atu i auaunaga,” o lana tala lea. “E tele mea e mafai ona tatou faia mo le tasi ma le isi ina ia maua ai se lagona o le auai ma le usoga a alii ma tamaitai. O se taimi lea e mafai ai e le korama a toeaina ma le Aualofa ona o mai o i latou lava ma tuuina atu mea e na o i latou lava ua tulagaese lo latou faatulagaina e faia.”
Ma nai lo le auina atu o feau tusitusia i se tasi i taimi uma, na ia fautua mai, “Ou te manatu e matuai lelei tele lava le valaau atu i se tagata e faaaoga ai lena tekinolosi tuai sa ta’ua o le telefoni. Tau lava o le valaau i ai e talanoa ma fegalegaleai. Tuu atu ia i latou e faalogo i se leo.”
O taumafaiga laiti e aapa atu ai i isi e mafai ona faia ai se eseesega tele, e faamalamalamaina ai se aso o se tasi i auala tatou te le iloa. Na saunoa Elder Cook, “O a tatou auaunaga e matua manaomia lava i tagata e matuai taumamao lava.
Na fautua mai Elder Holland, “E tatau ona tuuto atu se vaega faapitoa o o tatou aso e fesootai atu ai i tagata o e manaomia se faamalosiauga. Ioe, tatou te maua se faamalosiauga mai le faia o lena mea, o lea ua “sii ae” ai i luga tagata uma (3 Nifae 27:14, 15), e pei ona fetalai le Faaola na auina mai o Ia i le lalolagi e fai.”
O le isi auala e mafai ona tatou sii ae ai i tatou lava ma isi, o le saunia lea mo le aso o le a toe tatala ai malumalu. Tapunia o malumalu—pe mo faama’i pipisi i le lalolagi, toe fausia, po o le faamamaina—“ua maua ai se avanoa ofoofogia e aoao atili ai e uiga i sailiiliga o talafaasolopito o aiga, faasinoupuina o igoa, ma le auala e saunia ai le tele o igoa mo le aso o le a toe tatala ai faitotoa o malumalu,” o le saunoaga lea a Elder Bednar.
E tusa lava pe tatala pe tapunia malumalu, sa faaopoopo mai Elder Bednar, e mafai lava e tagata o le Ekalesia ona taumafai malosi ia agavaa ma maua se pepa faataga aoga o le malumalu.
Lesona e Finagalo le Alii Tatou te Aoaoina
E pei ona faailoa mai e Elder Bednar, e ui o le a leai se tasi e filifili e tofo i aafiaga o le faama’i pipisi o le KOVITI-19, ae ua i o tatou luga foi se mala o aso e gata ai.
“Faatasi ai ma le vaaiga e faavavau e faapea o le talalelei toefuataiina e maua ai ma le alofa tunoa lea e sau mai le Togiola a le Faaola, e mafai ai ona tatou aoaoina lesona mai faigata o le olaga faaletino lea e saunia ai i tatou mo faamanuiaga o le faavavau,” na ia saunoa ai. E tatau ona tatou tatalo. E tatau ona tatou sailia. E tatau ona tatou fesili atu. E tatau ona i ai ni o tatou mata e vaai ma taliga e faalogo ai. Ae e mafai ona faamanuiaina i tatou i ni auala ofoofogia e aoao ai lesona ia o le a faamanuiaina ai i tatou i le taimi nei ma le faavavau.”
Faatasi ai ma lona aafiaga matautia i aiga i le lalolagi atoa, na aoaoina ai e le KOVITI-19 tagata e faateleina le faaali atu o le popole tele mo isi, na saunoa ai Peresitene Ballard.
“Ua tatou iloa le taua tele o o tatou aiga, le taua o o tatou tuaoi, ma le taua o o tatou uso a tagata o le Ekalesia,” na ia saunoa ai. “Ua i ai lesona ua tatou aoaoina nei ia o le a avea ai i tatou ma ni tagata sili atu.”
Ma pe a mavae atu faigata o i ai nei, o le a se mea e mafai ona tatou faamoemoeina? O le mea lava e tasi, na saunoa ai Elder Uchtdorf. O le a faaauau pea ona feagai le fanau a le Atua i totonu ma fafo atu o le Ekalesia ma luitau.
“Ua tatou ola i se taimi e manaomia ai ona tatou aoao,” na ia saunoa ai. Ma o le lesona sili ona taua e mafai ona tatou aoaoina o le tali i luitau o le a oo mai o le tali foi lea i luitau o i ai nei: o le talalelei a Iesu Keriso.
Ona o le Au Paia o Aso e Gata Ai ua mauaina le talalelei toefuataiina a Iesu Keriso, na saunoa ai Elder Holland, e mafai ona latou aoao ia lelei ma faamoemoeina, le faia o mea sili latou te mafaia ma talitonu i le Alii ma Lana afioga ina ua ia fetalai, “Ia tatou faia ai ma le fiafia mea uma ua i ai i lo tatou mana; ona mafai lea ona tatou tutu, ma le mautinoa atoatoa, e vaai i le faaolataga a le Atua, ma mo lona aao e faaali mai” (Mataupu Faavae ma Feagaiga 123:17).
“E tele naua mea e olioli ai ao faaleleia lo tatou faatuatua, faalagolago atili i le Alii, ma vaai i le vavega o Lana laveaiga,” o le saunoaga lea a Elder Holland.