“E I Ai Se Lua Tusi Lanumoana e I Ai Mataitusi Auro?”
O sei taimi ina ua uma ona tia’i le tusi, sa ou fiailoa pe o a mea sa i ai.
Ata na tusia e Greg Newbold
I tausaga ua mavae, sa ou mauaina ai se tusi lanumoana e i ai mataitusi auro i le faavaa mai faifeautalai sa talai i le nofoaga autu o le militeli lea sa aoaoina ai au mo la’u galuega i le Neivi a le Iunaite Setete.
Ina ua amata ona ou faitauina le tusi, sa fai mai se tasi ia te au e sese ona sa kopiina mai le Tusi Paia. O le mea lea na afua ai ona ou masalomia le moni o le tusi, ae sa ou teuina pea. Sa ou faitauina sina mea itiiti, ma toe tuu i le ta’ele o la’u ato, ona galo ai foi a lea.
I le mavae ai o se tausaga mulimuli ane, sa tonu ia te au e teu faamama la’u ato. Sa ou mauaina le tusi ae ua le o toe i ai so’u manatu i ai, o lea na ou tia’ia ai. Ae i se taimi mulimuli ane, sa oo ina ou fiailoa le mea sa i ai i lena tusi lanumoana e i ai mataitusi auro. Ua ou talitonu nei o le lagona lea na aumai mai le Agaga, “lea na te taitai ia fai mea lelei” (Mataupu Faavae ma Feagaiga 11:12).
I le 2005, sa valaaulia ai au e se uo fou na ou maua, e faalogologo i faifeautalai. Muamua, sa i ai a’u fesili ma ni faaletonu i mea sa la aoao mai, ae sa to’a faifeautalai ma tuuina mai tali e talafeauga ia te au.
Ina ua ou iloaina o nei faifeautalai e pei o ia na ou feiloai i ai i tausaga ua mavae, sa ou fesili ma le naunautai ia i la’ua, “E i ai se lua tusi lanumoana e i ai mataitusi auro?”
“Ioe, e i ai!” sa tali mai ai se tasi o i la’ua. “E ta’ua o le Tusi a Mamona!”
Sa o se mea fiafia le toe maua o le Tusi a Mamona. O le mea moni, sa ou matua fiafia lava ma o lea na ou faituaina e sili atu i le faatasi a o lei atoa ni vaiaso se lua! A o ou faitauina ma tatalo, sa oo ina ou iloaina o le afioga a le Atua.
Na saunoa Elder Rubén V. Alliaud o le Fitugafulu i se mea i le konafesi aoao e fesootai i lo’u aafiaga ma le Tusi a Mamona. “Soo se tagata faitau lava e tautino atu i se suesuega faamaoni [o le Tusi a Mamona], faatasi ma se agaga o le tatalo, e le gata o le a aoao e uiga ia Keriso ae o le a aoao mai ia Keriso—aemaise lava pe a latou faia le faaiuga e “faataitaia o le mana o le afioga” [Alema 32:5] ma aua le vave teena ona o manatu faailogalanu o le le talitonu ona o mea ua ta’u mai e isi e uiga i mea latou te lei faitau lava i ai.”1
O le faitauina o le Tusi a Mamona, tatalo, ma le faalagolago i le Agaga, ua ou vaai ai i mea maoae ua taunuu i lo’u olaga.