Na Ia Toe Tuufaatasia A’u
Na faalogo la’u uo o la sa ou ma’i ma sa ia auina mai se paso na ia faia faapitoa mo a’u.
Ata na tusia e Joshua Dennis
Sa ou mafaufau lava a’u ia o a’u o se tagata e ola maloloina. O lea sa faateia ai au ina ua ou ala ae i se tasi taeao ua lagona e pei o oomiina malosi lo’u fatafata ma pei o le a pa. Sa faatelevave atu au i le falemai, ae ina ua mavae ni nai itula o suesuega, sa le mafai e fomai ona maua le faafitauli. Sa latou auina au i le fale, e ui o la lava sa ou mafatia i se tiga matautia. O lea na amata ai ni vaaiga o le fomai mo le fitu-masina-le umi, nofo i le falemai, ma le tiga sili ona matautia ua ou oo i ai i lo’u olaga.
Sa amata ona ou faatu. Sa tatau ona toe aveese mai a’u vasega i le kolisi ma ou toe foi e nofo ma o’u matua. Sa le mafai ona matou o e tafafao ma a’u uo. Sa ou matua tigaina tele ma sa le mafai ai ona ou faia lava se mea sa ou fiafia i ai. Sa ou lagonaina o mea uma ou te manatu alofa i ai—o o’u faanaunauga, o a’u fegalegaleaiga, o a’u taleni—ua nutipalaina, ma o le taimi nei ua foliga mai ua le mafai ona toe tuufaatasia vaegamea o lo’u lava tagata. Ma sa amata ona ou taumanatunatu: Ua mafai faapefea e le Tama Faaelagi ona faatagaina lenei mea e tupu ia te au? Pe ua le alofa o Ia ia te au?
Ina ua mavae se isi vaaiga tiga ma le le manuia a le fomai, na pau lava le mea sa ou manao ai o le faapupuu ma tagi. Ae ina ua ou taunuu i le fale, sa ou vaaia se mea uigaese i luma o le faapaologa: o se pusa tuai masaesae o seevae ua tumu i mea faapipii ma o loo faatuatusi mai ia te au.
O se tusi i luga o le pusa sa faaalia ai o le afifi na aumai i se tasi o a’u uo. Na faalogo o ia o la sa ou ma’i ma sa manao o ia e faafiafia a’u. Ina ua ou tatalaina le pusa o seevae, sa ou maua ai le tele o nutiga momi ninii. O se paso na ia faia faapitoa mo au.
A o ou tuufaatasia le paso, sa amata ona ou tagi. O le paso na mamanu ai lo’u igoa, ae siomia i savali matagofie o le alofa ma le faamalosiauga. Sa ou lagonaina o vaega na faataapeapeina o a’u lava ia, ua toe tuufaatasia nei a o ou tuufaatasia le meaalofa a la’u uo.
I sina taimi puupuu mulimuli ane, sa amata ona ou inuivai lea sa faaitiitia ai auga ma sa fesoasoani i fomai e faia ai se faaiuga. Sa uiga ese le tulaga sa ou i ai ae sa mafai ona togafitia, ma faatasi ai ma vailaau talafeagai, sa mafai ai ona ou toe foi i le olaga masani.
E oo lava ina ua faamaloloina lo’u tino, sa ou iloaina o le a le galo lava ia te au mea sa ou aoaoina. Ona o le meaalofa matagofie a la’u uo, sa ou iloa ai sa alofagia au ma sa lei faagaloina lava au e lo’u Tama Faalelagi. Ina ua mavae ni masina o lagona nutipalaina, faafetai i le agalelei o se uo ma le alofa o lo’u Tama o i le Lagi, ua ou toe atoatoa ai.