Atatosi o le Faatuatua
Sakiusa ma Salote Maiwiriwiri
Suva, Fiti
E faigata lava ona ou talitonu i le filemu ma le fiafia sa ou maua i le fale o le au Maiwiriwiri. E ui ina e toalua le la fanau ua maliliu, ae o loo soifua ma le fiafia ma le faamoemoe i aso uma.
Leslie Nilsson, tagata pueata
Salote:
E lua tausaga na mavae talu ona maliu lo ma atalii o Esa i le kanesa o le mamā, ae maliu le ma tama teine o Esalynn i le fula o le ’afu’afu o le faiai. I totonu o le malumalu, sa ou lagonaina se uunaiga malosi e talanoa i se faifeautalai tamaitai matua iina, o lē foi sa maliliu lana fanau e toalua i ni tausaga ua mavae. Sa ia fai mai, “Afai e te faia lou fale o se nofoaga paia, e mafai ona e lagonaina le i ai o lau fanau iina.”
Na avea lena mea ma a ma’ua sini. O mea uma ma te faia e fai ina ia avea lo matou fale o se nofoaga paia. Ma te mananao ia lagonaina lo la latalata mai.
Tatou te le mailoa pe faapefea ona tausia fanau i talaatu o le veli. Ae afai tatou te faia le mea sili e ola ai amiotonu, ma te talitonu o le a la lagonaina a ma taumafaiga. I a matou faigalotu faaleaiga, ma te faafeiloaia lava Esa ma Esalynn i o la’ua igoa.
I totonu o lo ma fale, tusa lava pe e i ai ni o ma feeseeseaiga, ma te taumafai lava ina ia vave ona foia. Ma te mananao i lo ma fale ia tumau o se nofoaga paia i le tele e mafai ai. A o ma faia lena mea, ma te lagonaina lava le faamoemoe ma le faamalologa ma le alofa.
Sakiusa:
O le aafiaga i le maliliu o Esa ma Esalynn, ua matuai vavalalata ai lava lo matou aiga. Matou te fefautuaai faatasi ma isi o le ma fanau. Matou te o i le malumalu o se aiga. Ua matou ola i o matou olaga i se ala e sili ona faigofie ma filifili le lotofaafetai i aso uma. A matou talanoa e uiga i le faamauina o se aiga i le malumalu, e olaola lena faamauga i totonu o i matou. Ma e ala i nei mea uma, ua matou lagonaina ai le faatasi mai o le ma fanau.
O se tasi o mea sa matou faia e avea ai lo matou fale o se fale ua atili paia, o le amata lea ona faitauina i aso taitasi le Tusi a Mamona. I le taimi muamua, sa matou fetufaai i tala ma ata o le Tusi a Mamona mo le ma fanau laiti. Ona matou faaopoopo lea i ai o vitio. O le taimi nei o loo matou faitau atili mai le Tusi a Mamona. E mafai ona ou molimau atu i le mana o le Tusi a Mamona.
E mafai foi ona ou molimau atu i le mana o i le ata o le faaolataga. Ina ua matou fuafuaina sauniga maliu mo Esa ma Esalynn, sa tonu ia i ma’ua e le faatelēina e pei o agaifanua masani a Fiti. Nai lo lena, sa na o a’u ma lo’u toalua na lauga, ma sa ma lauga i le ata o le faaolataga. E toatele tagata o o ma aiga lautele ua auai i le Ekalesia talu mai lena mea, ina ua uma ona latou faalogo i upumoni mai sauniga maliu.
Ua aoao atu e Sakiusa i lona aiga e leai se foi i tua i le olaga, ua na o le agai i luma. “O aso uma lava e faaopoopo ai le faaleleia atili,” o lana tala lea. O loo soifua i o latou olaga i se tulaga aupito faigofie e mafai ai, ma taulai atu i le lotofaafetai.
Ua maua e Salote le olioli tele i le faaaluina o lona taimi i lana fanau ma i le aoaoina o i latou i le talalelei.
Ua i ai i le aiga o le au Maiwiriwiri se molimau malosi o le faamauina i totonu o le malumalu. Latou opomauina na upumoni i o latou loto a o latou manatuaina ia Esa ma Esalynn.
A o latou taulai atu i le ola i se tulaga faigofie ma le agaigai i luma, e maua e le aiga o le au Maiwiriwiri le lotofaafetai mo o latou faamanuiaga i aso uma. “Matou te matua faafetai mo mea ua matou maua,” o le tala lea a Sakiusa.