Fai atu Leai, Faalogo i le Leai

E alofa le Tama Faalelagi ia i tatou ma e finagalo ia tatou saogalemu! O le fai atu leai pe a tatau ai, ma le faaaloalo i isi pe a latou fai mai leai ia i tatou o ni auala ia e mafai ona tausisia ai lo tatou saogalemu faapea foi le saogalemu o isi.

O nisi taimi e manaomia ona e fai atu leai i se ala manaia.

“Leai, faafetai. E mafai la ona amai se ta vai faamolemole?”

O lou taimi lenei! Manatunatu e manaomia lou fai atu leai i se ala manaia. O le a se mea e mafai ona e fai atu ai?

O nisi taimi e manaomia ona e fai atu leai i se ala e malosi atu.

“Ou te le fia vaai i le mea lena! E le tatau ona tatou vaai i ai.”

O lou taimi lenei! Manatunatu e manaomia lou fai atu leai i se ala e malosi atu. O le a se mea e mafai ona e fai atu ai?

O nisi taimi e ta’u mai e tagata ia i tatou e leai ina ia fesoasoani ia tatou saogalemu ma ola maloloina.

“E faamalie atu, e le mafai ona e alu. E le saogalemu.”

O lou taimi lenei! Manatunatu ua ta’u atu e se tagata matua ia te oe e leai ae e te le fiafia ai. O le a se mea e tatau ona e faia?

O nisi taimi e ta’u mai e tagata ia i tatou e leai pe a le lelei o latou lagona.

“Tuu! Ou te le fiafia i le taaloga lea.”

O lou taimi lenei! Manatunatu ua talosaga atu se tasi ia te oe e tuu le faia o se mea. O le a se mea e tatau ona e faia?

Ae faapefea pe afai e le faalogo tagata pe a e fai atu leai? E faapefea pe a latou faatiga ia te oe pe faia se mea e le lelei?

• Savali ese pe a e mafaia.

• Ta’u i se tagata matua e te talitonuina e uiga i le mea ua tupu.

• Manatua e le o oe na mafua ai.

• Po o le a lava le mea e tupu, ia e iloa e alolofa pea lava lou Tama Faalelagi ma Iesu Keriso ia te oe!