E Sili Atu ma le Tasi se Auala e Suesue ai Tusitusiga Paia

Saunia e Marissa Widdison

Mekasini a le Ekalesia

E tusa lava pe e te le fiafia e faitau, e tele auala e suesue ai tusitusiga paia.

Ou te fiafia i lo’u valaauga i le taimi nei o le ta piano a le Peraimeri. I ni nai vaiaso talu ai sa fai ai se a’oga pese a tamaiti. Na ou lagonaina le Agaga a o latou pepese:

Saili, mafaufau Loloto, ma tatalo
O mea ia e ao ina ou faia. 
O le a taitaiina e le Agaga, ma, loloto i totonu,
O le a ou iloa ai foi e moni tusitusiga paia.1

Ae o se fesili foi na oso ifo i lou mafaufau. Ae faapefea pe afai e te le—e pei ona fautuaina mai e le fuaiupu muamua o le pese—“o tusitusiga paia ou te fiafia i ai?” Ou te matea o le autu o le faitau na i ai i lou mafaufau talu ai nei ona e sili atu nai lo le toatasi se uo na faasoa mai latou te tauivi ma se manaoga faapitoa i le faitau. Ma e toatele tagata ou te iloa e le fiafia lava e faitau! E i ai se auala e mafai lava ona latou maua ai se aafiaga anoa i tusitusiga paia ma atiina ae ai “se molimau e moni ia”?

E foliga mai e sili atu ona lelei le aoao mai a tagata pe afai e tuuina mai faamatalaga i le tele o auala eseese, e pei o mea e vaaia ma faamatala, ma o lesona e fai fai pea i le aluga o taimi. I le mafaufau ai i lena mea, sa ou taumafai ai e mafaufau i le tele o auala eseese e uiga i le suesueina o tusitusiga paia e pei ona ou mafaia. I le taimi nei, e le o mea uma o loo i luga o lenei lisi e faitauina faapea o suesuega manatunatuga loloto ma lotolotoi o tusitusiga paia e pei ona aoaoina e perofeta e taua i a tatou molimau—ae o nisi o nei mea e na o ni manatu vave, ma agamalie—ae sa ou manatu atonu latou te ono uunaia ai ni ou lava manatu fou. Tatou tuu atu se taumafaiga silisili i le suesuega o le talalelei ina ia mafai, e pei ona fai mai le pese, “ia tatou malamalama” faatasi!

Manatu mo le Suesueina o Tusitusiga Paia

Faailoa mai upu o loo taua soo i lou faamanuiaga faapeteriaka ma saili mo na lava upu i tusitusiga paia.
A o e suesue, tusi ni ata e uiga i ou mafaufauga i se api talaaga mo suesuega po o autafa o lau tusi lesona Sau, Mulimuli Mai ia te Au .
Ia fausia se faatusa laitiiti o se tala mai tusituiga paia.
Valaau se tagata o le aiga e aumau i atunuu mamao ma faitau faatasi i luga o le telefoni.
Tusi se lisi o ni au fesili mo le Atua ona vaavaai lea mo tali ao e faitau.
Matamata i se vitio mai BookofMormonVideos.org po o BibleVideos.org.
Susue tusitusiga paia i soo se mataupu ma amata ona faitau.
Usu se viiga ona sue lea o mau o loo lisi atu i le faaiuga o le pese.
Asiasi i autu.ChurchofJesusChrist.org ma suesue se mea e te fiafia i ai.
Tagai i ata o loo i luga o le Initoneti o loo faaalia ai le tala faatusi paia o loo e suesueina.
Faitau na o mataupu ma vaega o autu o se tusi.
Tai ni musika malu o mea faifaaili a o faitau leotele.
Vaavaai mo ni auala e fesootai ai mataupu taitasi o tusitusiga paia i le malumalu.
Afai e masani ona e suesue i tusitusiga paia faatekinolosi, taumafai e faitau ia kopi ua lolomiina, po o le feliua’i.
Vali pe tusi se vaaiga o tusitusiga paia po o se tala.
Faafoliga e pei na tofia oe e te saunoa e uiga i se autu i le lotu, ma suesue i ai.
A uma ona faitau se mataupu e sili ona e fiafia i ai, toetusi i a oe lava upu.
Mulimuli i vaefaamatalaga i se fuaiupu e sili ona fiafia i ai, ona mulimuli ai lea i vaefaamatalaga o i fuaiupu o loo taitaiina atu ai oe, ona mulimuli ai lea i na vaefaamatalaga, ma isi.
Ia auauai e faitau leotele ia fuaiupu ma ni uo ma talanoa e uiga i mea e te faitauina.
Faaaoga le Topical Guide e suesue ai i se upu po o se autu e tasi.
Sue uma mau i faamatalaga o i le faaiuga o se lauga o le konafesi aoao.
Tuu se mau i soo se mea e te vaai i ai i aso uma ma taumafai e tauloto i le vaiaso lenei.
Tusi ni faamatalaga laiti i tagata o loo i ai mau faamafanafana o loo tusia i totonu.
Faaaoga le Potutusi o le Talalelei e faalogo ai i tusitusiga paia a o faitau leotele mai.
Fai se ata o le faasologa o mea na tutupu a o e faitauina le Tusi a Mamona.
Saili se “paga i tusitusiga paia” ma tusi e le tasi i le isi se fuaiupu i taeao taitasi.
Amata mai le mataupu mulimuli o le Tusi a Mamona ma faitau e oo i le amataga.
Faitau mau o loo aofia ai se molimau, ona tusi lea i lalo o lau molimau.
Afai e te taina se mea faifaaili, taumafai e tusi se pese e pueina ai le lagona o se fuaiupu.
Fesili atu i tagata o le aiga po o ni uo e uiga i fuaiupu o mau latou te fiafia i ai.
A o e faitau, tusi ni mea faitino o loo faamatalaina, e pei o le aufana gau a Nifae.
Faitau ma tauloto ia fuaiupu o loo faaaogaina e aoao atu ai lesona a faifeautalai, o loo maua i le mataupu e tolu o le Talai Lau Talalelei.
Faitau se tusi mai le Tusi Paia e te lei faitau muamua lava i ai.
Suesue i le olaga o se tagata toa o tusitusiga paia ma tusi ai se lipoti o lona talaaga.
Faatino se tala faatusipaia o se vaega o afiafi faaleaiga po o se isi gaoioiga a le Ekalesia.
Sue se upusii mai se taitai o le Ekalesia e ogatasi ma mataupu taitasi e te faamaeaina.
Faitau i le fesoasoani mo le suesueina o tusitusiga paia, e pei o le folasaga i le Tusi a Mamona po o le Lolomi Fefiloi o le Tusi Paia.
Faaalu se taimi i le natura ma mafaufau pe faapefea ona fesootai mea e te vaai i ai i le talalelei, ona sue lea o se fuaiupu e uiga i mea ua e aoaoina.

E i ai ni ou lava manatu? Faasoa atu i au uo!