O Le Faamoemoega o Lo’u Papatisoga
A o lei oo i lou papatisoga, sa ou nofo na o au ma sa ou tatalo ia faavavega ona o mai a’u uo.
Ata na tusia e Julia Yellow
I le avea ai o se tamaitiiti e nofo i nuu maotua o Taipei, i Taiuani, sa leai so’u iloa e uiga i faifeautalai. O le taimi muamua lava na ou fesootai ai ma i la’ua, sa ou fiailoa e uiga i la la’ua savali. E lei umi ae ou naunau e mulimuli ia la’ua aoaoga ma faataitaia le talalelei i lo’u olaga. Sa ou lagonaina o se auala lea mo au e iloa ai pe i ai moni lava se Atua.
I totonu o se masina, sa aoaoina au i le talalelei ma poloaiga ia e aoao a o lei oo i le papatisoga. Na oo mai le filemu ia te au e ala i le tatalo, ma sa ou mauaina se faaaliga patino mai le suesueina o tusitusiga paia, ma ou te lei misia lava se sauniga Lotu. Sa tonu ia te au e tatau ona ou papatiso.
O le luitau aupito telē sa ma feagai i le taimi lea o faafitauli na alia’e mai i a’u sootaga ma nisi o a’u uo ona sa latou tetee i lou auai ai i le Ekalesia. Sa ou tatalo malosi e uiga i nei faafitauli, ae sa foliga mai sa atili ai ona leaga a matou sootaga.
Sa ou valaauliaina a’u uo i lo’u papatisoga, ae sa latou matuai le amanaiaina la’u valaaulia. Sa ou matua le iloaina lava le mea a fai. A o lei faia lo’u papatisga, sa ou nofo na o au i luga o le sofa i le faapaologa o le falelotu, ma tatalo ai ia faavavega lava ona tutū mai a’u uo ina ia mafai ai ona ou ta’u atu ia te i latou e uiga i suiga lelei ua ou faia i lo’u olaga, ma faamaonia atu ai ia i latou sa ou faia le faaiuga sa’o e ala i le papatisoina.
E lei o mai lava a’u uo, ae a o sasaa atu lo’u loto i le Atua, sa ou lagonaina se uunaiga. O le taimi lea, sa ou lagonaina ai se alofa tele mai lo’u Tama Faalelagi. Sa ou iloaina sa i ai o Ia iina ma sa faafofoga moni mai i la’u tatalo.
Sa ou uluai manao ia papatiso ona o mea matagofie uma ua tutupu i lo’u olaga, ae i le taimi lea, sa oo ina ou malamalama i le faamoemoega o lo’u papatisoga.
O le uunaiga na ou maua sa pei o le siufofoga o le Alii o tulei sa’o mai ma le alofa ia te au ma faapea mai, “E te le tau faamaonia se mea i se tasi. Na pau lava le mea e te manaomia o le faamaonia mai ia te a’u ua e naunau e sau ia te au ma tumau faamaoni i la’u talalelei mo aso uma o totoe o lou ola.”