Mga Young Adult
Lahi sa Maayong Paagi: Pagsabot sa Kaligdong isip usa ka Kinabig
Nagtuo ko nga ang baroganan sa kaligdong makapalayo nako gikan sa uban. Apan karon nakaamgo ko nga kini nakapahimo nako nga lahi—sa labing maayong paagi.
Litrato gikan sa Getty Images, giposingan sa modelo
Isip usa ka 16 anyos nga kinabig sa Simbahan nga nagpuyo sa New York City, nasayod ko nga ang pagkahimong Santos sa Ulahing mga adlaw nagpasabot nga mohimo og daghang mga kausaban sa estilo sa kinabuhi.
Apan ang paghimo niini nga mga kausaban mas lisod kaayo kay sa akong gidahoman.
Usa niana, ang New York City hilabihan ka madasigon nga dapit nga puno sa nagkalainlaing mga kultura, mga pinulongan, ug mga tinuhoan, ug lahi ra kaayo sa gagmay nga mga siyudad diin ako nagdako didto sa Colombia. Gipalibotan ko sa sobra kadaghan nga pagpang-agni sa paglihok ug pagpakabuhi sa usa ka piho nga paagi, bisan kon ako naghunahuna pa kon si kinsa ang akong gusto nga mahimong ako ug kon unsa ang akong gusto nga kinabuhi. Nag-atubang ko og daghang kapilian kon asa mopadulong ang akong kinabuhi, apan sa tinuod gusto lang nako nga mobagay ug maapil sa grupo. Mas nakatutok ko sa akong gusto nga maparehas og pamay-hon, sinultihan, ug linihokan sama sa uban.
Sa kalit lang ako usab nga gisulayan ang mga kausaban sama sa pagsimba kada Dominggo, pagbasa sa mga kasulatan, pag-ampo, ug pag-undang sa pag-inom og kape. Ug samtang ang uban niini nga mga kausaban sayon ra, ang uban mas komplikado—ilabi na ang baroganan sa kaligdong. Lisod para nako ang pagbalanse sa akong tinguha sa pagsunod ni Jesukristo ug sa akong tinguha sa pagpadayag sa akong kaugalingon sa akong naandan nga pamaagi sa akong pagpanamit.
Pagsabot sa Kaligdong
Medyo nabug-atan ko samtang naninguha ko nga mahimong ligdong. Nabalaka ko nga mawad-an ko og mga higala ug nga dili na ko mobagay sa grupo. Apan misalig ko ni Kristo nga mohatag nako og kaisog ug pagtuo aron magpadayon sa unahan.
Mas gipaladman nako ang pagtuon sa mga baroganan sa ebanghelyo, nag-ampo alang sa tabang, ug nagtinguha og mas dako nga pagsabot sa mga balaod sa Langitnong Amahan, nga nakatabang nako nga mas makasabot sa ngano nga gikinahanglan ang kaligdong. Ug samtang andam ko nga motugot sa akong kasingkasing nga makabig, nausab ko dili lamang sa kahiladman apan sa akong kinaiya ug sa akong panggawas nga panagway. Samtang gidugangan nako ang paghangop sa ebanghelyo ni Jesukristo, ang akong gugma alang Kaniya ug sa akong Amahan sa Langit mitubo, ug ang paghimo og mga kausaban nahimong mas sayon kaayo.
Nakaamgo ko nga ang Langitnong Amahan ganahan nga kita magpakaligdong dili lamang sa atong sininaan apan usab sa atong mga hunahuna, sinultihan, ug sa personal nga kinaiya. Ug karon lahi na ang akong pagtan-aw, pagsulti, ug panglihok—akong gipahisama ang akong kaugalingon sa usa ka disipulo ni Jesukristo, sama sa gipahinumdom ni Presidente Russell M. Nelson nga atong buhaton.1 Ug ang akong mga higala ug bisan ang mga dili kaila nakamatikod og butang nga lahi bahin kanako. Nakadawat ko og mga pangutana kon ngano nga ingon ako niini. Ang mga tawo nakamatikod sa akong kalipay ug sa Kahayag ni Kristo nga anaa kanako.
Matag higayon nga mobalik ko sa Colombia (o bisan asa, sa tinuod lang) morag dili na ko “mobagay,” ug labing maayo kini! Makapahingangha kaayo ang pagkakita kon sa unsang paagi ang yano nga pagkaligdong nakahatag kanako og oportunidad sa pagsulti sa uban mahitungod sa ebanghelyo ug kon ngano nga nagpakabuhi ko sa ingon niini nga paagi—ngano nga nagsunod ko ni Jesukristo.
Pagkahimong “Talagsaon nga Katawhan”
Ang ebanghelyo mao ang labing bililhon nga gasa nga ako gihatagan og kahigayonan sa pagdawat. Dihang mas nakaila nako sa akong Manluluwas, ang akong tinguha nga mahimong tinuoray nga mahisama Kaniya nagkadugang. Ug Siya padayon nga naghatag kanako og kaisog diha sa akong panaw sa pagkaplag og kaanindot diha sa pagkahimong lahi gikan sa kalibotan.
Milungtad na og 10 ka tuig sukad ko mipasakop sa Simbahan, ug akong nakita karon nga dili ko kinahanglan nga “mobagay” sa kalibotan, tungod kay ako anak sa Dios. Akong nasinati ang kaanindot sa pagkahimong kabahin sa “usa ka talagsaon nga katawhan” (1 Pedro 2:9) ug ang mga panalangin nga nagauban sa pagkahimong disipulo ni Jesukristo. Ako nahigugma Kaniya, ug ang paningkamot sa pagsunod Kaniya, ilabina pinaagi sa kaligdong, nakalig-on sa akong relasyon ngadto Kaniya.
Tungod kay ang panagway ug pamatasan nagpakita sa akong pangsulod nga pasalig ngadto Kaniya, ang ebanghelyo ug ang mga pagtulon-an niini nahimong sentro sa tanan nga akong gibuhat, nga maoy nagdala kanako og hilabihan nga kalipay. Ganahan kaayo ko sa akong pagkalahi, nga nakahimo sa pagpakigbahin sa Kahayag ni Kristo ngadto sa uban, ug nakatutok sa unsa ang labing mahinungdanon: ang akong pagtuo diha ni Kristo ug pagpaduol ngadto Kaniya diha sa dalan sa pakigsaad.