“Pagkat-on gikan sa Sundanan sa Dios kalabot sa mga Konseho,” Liahona, Hunyo 2022.
Pagkat-on gikan sa Sundanan sa Dios kalabot sa mga Konseho
Pito ka pamaagi sa paghimo sa inyong personal, pamilya, ug Simbahan nga mga konseho nga mas makahuloganon.
Si Elder Dieter F. Uchtdorf (sa ulohan sa lamesa) nagpahigayon og usa ka miting uban sa mga lider ug mga empleyado sa Simbahan kabahin sa Missionary Executive Council.
Gilitratohan ni Jeffrey D. Allred, Deseret News
Sukad pa sa sinugdanan, ang Dios naghimo sa Iyang buhat pinaagi sa mga konseho. Adunay daghan nga atong makat-onan mahitungod sa kaimportante sa mga konseho ug sa pagtinambagay gikan sa atong kasinatian sa wala pa moanhi sa Yuta.
“Atong mabasa kanang unang tinuod nga istorya sa konseho diha sa Perlas nga Labing Bililhon,” miingon si Presidente M. Russell Ballard, Akting nga Presidente sa Korum sa Napulog Duha ka Apostoles, naghisgot sa Dakong Konseho sa Langit. Niini nga konseho sa pamilya, ang Langitnong Amahan mipresentar og usa ka plano alang sa pag-uswag sa Iyang mga anak—usa ka plano nga gihimong posible pinaagi sa andam nga sakripisyo ni Jesukristo, kinsa gitawag nga Jehova. Ang Langitnong Amahan nangulo uban sa gugma, miawhag sa gawasnon nga pagpadayag, ug mitahod sa gasa sa kabubut-on.1
Atol sa misunod nga Paglalang sa langit ug yuta, ang Langitnong Amahan mipakita og usa ka balaanon nga sundanan alang sa pagtinambagay diha sa konseho. Mga instruksiyon gihatag, ug mga tahas gihimo ug gi-report. Ang Langitnong Amahan ug si Jesukristo padayon nga nagdumala sa pamilya sa Dios ug sa Simbahan pinaagi sa mga konseho.
Kining balaan nga sundanan sa pagpakigtambag “mahinungdanon kaayo” sa matag lebel, miingon si Presidente Ballard. Diha sa Simbahan kini naglakip sa mga konseho sa kinatibuk-an, sa stake, ug sa ward nga mga lebel.
Usa ka Sundanan alang sa mga Indibidwal ug mga Pamilya
Kini nga sundanan mogiya usab sa mga indibidwal ug mga pamilya. Si Presidente Dallin H. Oaks, Unang Magtatambag sa Unang Kapangulohan, miingon, “Ang baroganan sa pagtinambagay walay dapit diin kini mas importante kay sa diha sa relasyon tali sa usa ka bana ug asawa ug sa ilang relasyon isip mga ginikanan ngadto sa ilang mga anak—o ni bisan kinsa nga lugway sa pamilya nga nagpuyo uban kanila .”
Si Presidente Ballard mihulagway sa mga family council [konseho sa pamilya] isip ang “pinakauna ug mahinungdanon—ug tingali ang labing importante—sa tanang council.”2 Kon ang usa ka amahan motapad og lingkod sa iyang tin-edyer nga anak nga lalaki, si Presidente Ballard miingon, dili lang kini usa ka miting sa amahan ug anak. “Anaa siya sa usa ka miting sa konseho sa pinakabililhon nga miyembro nga posible niyang makauban sa pagpakigtambag.”
Kitang tanan makagamit sa mga baroganan sa maayo nga mga konseho sa atong kinabuhi pinaagi sa pagpangutana sa mga ginikanan, mga lider sa Simbahan, mga mentor, ug uban pa sa pagpakigtambag kanato bisan kanus-a, lakip na kon nag-atubang og importante nga mga desisyon o nanginahanglan nga sulbaron ang mga hagit.
“Ang mga single ug gani ang mga estudyante nga nagpuyo layo sa balay makasunod sa balaang sundanan sa council [konseho] pinaagi sa pagpundok sa mga higala ug mga kaubanan sa kwarto aron sa pagtinambagay sa usag usa,” si Presidente Ballard miingon.3
Bisan ang tawo nga nagpuyo nga nag-inusara mahimong makigtambag diha sa usa ka miting sa konseho uban sa Ginoo pinaagi sa pag-ampo. Makapadayag sila sa ilang gugma ug pasalamat ug mangayo og inspirasyon ug giya samtang sila maminaw sa pag-aghat sa Espiritu, siya miingon.4
Bisan unsa pa nga matang sa konseho, miingon si Presidente Henry B. Eyring, Ikaduhang Magtatambag sa Unang Kapangulohan, “ang kalig-on sa mga konseho sa kinadak-an nagagikan sa hugot nga pagtuo sa mga tawo nga anaa niini.”
Mga Baroganan sa Epektibo nga mga Konseho
Sa ubos mao ang pipila ka mga baroganan gikan sa mga lider sa Simbahan nga makapanalangin sa atong mga konseho sa stake, ward, ug pamilya.
Hibaloi ang inyong katuyoan
Ang miting sa konseho dili mao ang pagsulti sa matag usa kon unsay buhaton, si Presidente Ballard miingon. Ang miting sa konseho dili mao ang paghangyo sa matag usa sa paghatag og report. Ang usa ka miting sa konseho mao kanang higayona nga ang usa ka bishop moingon, sama pananglit, “Duna kitay problema sa balaang pagtahod dinhi sa ward. Hisgotan nato kini. Unsa ang atong mahimo?” Ang miting sa konseho maoy usa ka oportunidad sa pagpundok aron makasabot ug mahiusa diha sa komon nga katuyoan.
Didto sa Dakong Konseho sa Langit, ang Langitnong Amahan mipresentar sa Iyang plano sa pagtabang sa Iyang mga anak nga mahimong sama Kaniya ug mitugot kanato nga sa kadugayan makasabot sa plano (tan-awa sa Abraham 3:22–28). Sama sa Dakong Konseho sa Langit, usa sa pinakauna nga katuyoan sa bisan unsa nga konseho sa pamilya o sa Simbahan mao ang “pagdala og mga kalag ngadto kang Kristo,” si Presidente Ballard miingon. “Aron kini makatabang sa pag-andam kanila sa pagdawat sa mga ordinansa ug mga pakigsaad nga gikinahanglang kaayo alang sa mahangturon nga kaluwasan.”
Ipabilin ang Manluluwas diha sa sentro
Sama nga ang Manluluwas mao ang sento sa Dakong Konseho sa Langit, si Jesukristo kinahanglan nga maoy sentro sa matag usa sa atong mga konseho, “dili ang atong kaugalingong garbo o hunahuna,” miingon si Elder Dieter F. Uchtdorf sa Korum sa Napulog Duha ka Apostoles.
Aron padayon nga makapukos sa Manluluwas, ang usa ka konseho tingali mangutana: “Unsa man ang gusto Niya nga atong buhaton? Unsaon nato pagtuman sa Iyang katuyoan?”
Si Presidente Camille N. Johnson, Kinatibuk-ang Presidente sa Primary, miingon nga ang mga konseho dili ipahigayon alang lamang sa katuyoang pang-administratiba og pagplano. “Kini mao ang pagpangalagad ngadto sa usa, ug ang paagi nga kita masayod kon unsaon sa pagbuhat niana sa tibuok kalibotan nga pamaagi mao ang pagdapit sa atong Manluluwas ngadto sa proseso ug ang pag-ila sa Espiritu.”
Dapiton ang Espiritu pinaagi sa pagpangandam
Sa dili pa maghisgot og usa ka hilisgotan, ang mga sakop sa konseho mahimong morebyo sa background nga impormasyon, mitambag si Elder Quentin L Cook sa Korum sa Napulog Duha ka Apostoles. “Ibutang kini sa konteksto,” miingon siya. Kini mahimong konteksto sa kasaysayan o doktrinal nga konteksto o mga obserbasyon gikan sa personal nga kasinatian. Ang pagtinambagay sa pamilya mahitungod sa mga paagi sa pagpalambo sa ilang pagtuman sa Igpapahulay nga adlaw, pananglitan, mahimong magbasa og may kalabotan nga mga kasulatan o mga pakigpulong sa kinatibuk-ang komperensiya.
Ang maayong impormasyon makadala og inspirasyon, si Elder Uchtdorf miingon. “Kinahanglan kamong mokolekta og impormasyon, ug dayon maanaa kamo sa posisyon sa pagdawat og pagpadayag kon kamo mokonekta ngadto sa Espiritu.”
Siguroa nga ang matag tingog madunggan
Si Elder David A. Bednar sa Korum sa Napulog Duha ka mga Apostoles mitudlo: “Ang pagpadayag gikatag taliwala sa nagkalain-laing mga sakop sa konseho. Kon ang usa ka isyu ipasupot aron mahatagan og konsiderasyon, kinahanglan kita nga modapit, ug maminaw og tambag gikan sa matag usa.”
Bisan kon anaa diha sa konseho sa kinatibuk-an, sa stake, sa ward, o sa pamilya, ang tingog sa matag sakop sa konseho gikinahanglan ug angay nga hatagan og bili.
Samtang ang usa ka bana ug asawa magtinabangay sa pagtugot sa ilang mga anak nga makapadayag sa ilang opinyon diha sa ilang pamilya, sama pananglit, mahimong makat-on sila nga “usahay ang pagpadayag moabot pinaagi sa tingog sa usa ka otso anyos,” miingon si Presidente Bonnie H. Cordon, Kinatibuk-ang Presidente sa Young Women.
Magtinguha sa mga panglantaw sa kababayen-an
“Ang tingog sa kababayen-an sa matag lebel, lakip sa panimalay, mahinungdanon kaayo,” si Presidente Ballard miingon.
Ang kauswagan mahitabo kon ang mga babaye ug mga lalaki magkahiusa ug magtinabangay, miingon si Presidente Jean B. Bingham, Kinatibuk-ang Presidente sa Relief Society. Ngadto sa mga babaye nga nagduhaduha sa ilang bili diha sa usa ka konseho, siya miingon, “Ang inyong tingog isip usa ka babaye mahinungdanon.”
Si Elder Cook misubli sa mga hunahuna ni Presidente Bingham: “Kinahanglan nga timbang ang atong pagpas-an sa yugo.” Iyang gipahinumdom ang ehemplo sa mga kapangulohan sa korum sa mga elder ug sa Relief society nga “timbang nga nagpas-an sa yugo” sa ilang mga katungdanan sa buhat sa kaluwasan diha sa ward. Ang pagtinguha sa mga panglantaw sa kababayen-an diha sa mga konseho padayon nga “makapanalangin pag-ayo sa buhat sa kaluwasan,” siya miingon.
Maminaw aron makat-on
Samtang nagdapit sa matag tingog nga makatampo, ang mga sakop sa konseho kinahanglang “maminaw aron makat-on” kay sa maghulat lamang sa turno nga makasulti, miingon si Presidente Bingham. Ang gahom sa pagtinambagay mahitabo diha sa pagkat-on nga “kamo makapaminaw ngadto ni bisan kinsa diha niana nga konseho ug makakuha og kaayohan.”
Si Presidente Cordon miingon nga pinaagi sa paggahin sa kaugalingong mga ideya ug aktibong pagpaminaw aron makat-on—gikan sa uban ug gikan sa Ginoo—“ang Espiritu modugang sa atong mga panabot ug pagkasabot.”
Diha sa konseho sa Unang Kapangulohan ug sa Korum sa Napulog Duha ka Apostoles, pananglitan, walay usa nga mopugos sa usa ka piho nga panglantaw, si Elder Bednar miingon. Ang mga desisyon makab-ot pinaagi sa “pagkaligdong ug pagkamapaubsanon ug pinaagi sa gahom sa Espiritu Santo.”
Magtinguha sa kinatibuk-ang panag-uyon, dili pagkompromiso
Si Presidente Bingham nakaobserbar nga sa sekular nga mga kahimtang, ang diskusyon sa grupo sa kasagaran mosangpot ngadto sa pagkompromiso—makab-ot ang panag-uyon samtang ang matag habig mohatag og pabor.
“Dili ingon niana ang pamaagi sa konseho sa Simbahan. Padayon kitang maghisgot hangtod ang tanan magkauyon” siya miingon. Matinud-anon ug bukas nga mopakigbahin og mga ideya, “padayon kitang magtinabangay, nga mangita sa labing maayo nga solusyon nga mailhan pinaagi sa pagpadayag sa Espiritu.” Kon ang mga sakop sa usa ka konseho magtinguha nga magkahiusa sa usa ka desisyon, kini modapit sa gahom sa Ginoo aron parehong mokompirmar sa desisyon ug motabang sa pagpahinabo niini (tan-awa sa Mateo 18:19; Doktrina ug mga Pakigsaad 42:3; 107:27). Kon mahimo na ang usa ka desisyon, ang tanan adunay responsibilidad sa pagpadayon ug sa aktibo nga pagsuporta sa desisyon sa gawas sa konseho.
Usahay ang kinatibuk-ang panag-uyon makab-ot dayon, ug sa ubang higayon mahimong mogahin kini og mas taas nga panahon, si Presidente Johnson mipahimatngon. “Pagmapailubon sa proseso sa pagpadayag.”
Mas Maayo nga Resulta
Si Presidente Ballard miingon nga kadtong nagkat-on sa epektibo nga pagtinambagay diha sa ilang mga stake, mga ward, ug mga pamilya—nga nagsunod sa balaanong sundanan nga gipakita sa Langitnong Amahan ug ni Jesukristo kanato—sa “kanunay mosangpot sa mas maayo nga resulta, sa kanunay mosangpot sa mas maayo nga tubag, sa kanunay mosangpot sa mas maayo nga espiritu.”