Digital Lamang

15 ka Saad sa Kalinaw gikan sa Karaan ug Buhi nga mga Propeta

Ni Victoria Passey

Mga Magasin sa Simbahan

Ang Ginoo misaad og kalinaw ngadto niadtong kinsa mosunod Kaniya. Tan-awa ang pipila ka pagdapit nga gihatag aron sa pagtabang kanato nga makasinati og dako nga kalinaw sa atong mga kinabuhi pinaagi ni Jesukristo.

Niining gubot nga ulahing mga adlaw, ang mga pulong sa himno “Ang Kalinaw Asa Ko Pangitaa?” mahimong motandog sa atong mga kasingkasing. Kita usab lagmit maghunahuna asa kita mangita og kalinaw, makakita og konsuwelo, ug mobati nga mamaayo ang atong samaran nga mga kasingkasing. Ang himno naghatag og tubag sa pangutana, “Kinsay makasabot? Siya lamang.”¹ Ang kalinaw makaplagan diha kang Jesukristo.

Ang mga propeta ug mga apostoles sa karaan ug sa ulahing mga adlaw namulong bahin sa kalinaw nga atong makaplagan diha kang Kristo, dili igsapayan sa atong yutan-on nga mga kahimtang. Daghan niini nga mga pamahayag nagpakita sa aksiyon nga gikinahanglan sa atong bahin (tan-awa ang mga pulongan nga gi-bold) aron makadawat og kalinaw, ug kini nagpahinumdom kanato nga ang tinuod nga kalinaw moabot lamang gikan sa atong Langitnong Amahan ug sa Iyang Anak, si Jesukristo. Samtang rebyohon ninyo kini, hinaot giyahan kamo sa Espiritu aron makahibalo kon unsaon ninyo nga makaplagan ang kalinaw nga inyong gitinguha.

1. Presidente John Taylor (1808–1887): “Ang kalinaw mao ang gasa sa Dios. Kamo ba gusto og kalinaw? Dangop sa Dios. Kamo ba gusto og kalinaw sa inyong mga pamilya? Dangop sa Dios. Kamo ba gusto nga ang kalinaw manalipod sa inyong mga pamilya? Kon kamo gusto, pagpuyo sumala sa inyong relihiyon, ug ang mismong kalinaw sa Dios mopuyo ug mouban kaninyo, tungod kay diha naggikan ang kalinaw ug kini [dili] mopuyo bisan asa. … Ang tanan natong buhaton mao ang pagpuyo sa atong relihiyon, pagsunod sa tambag sa atong Presidente, magmapainubsanon ug magmatinud-anon ug dili mobayaw sa atong kaugalingong kusog, apan mangayo og kaalam sa Dios ug tan-aw[on] nga kita adunay pakigdait uban sa Dios, uban sa atong mga banay, sa usag usa, aron ang kalinaw mahimong mohari diha sa atong mga dughan ug diha sa katilingban. … Ang kalinaw usa ka tilinguhaon nga butang, kini mao ang gasa sa Dios, ug ang labing mahinundanong [gasa nga] ikahatag sa Dios diha sa mga mortal. Unsa ang labaw nga tilinguhaon kaysa kalinaw? … Ang iyang makahupay nga impluwensiya mopahupay sa kabalaka, mopauga sa mata nga magul-anon, ug mohingilin sa kasamok gikan sa dughan; ug himoa nga kini masinati sa tibuok kalibotan, ug kini mohingilin sa kagul-anan gikan sa kalibotan, ug mohimo niining yuta nga usa ka paraiso. Apan ang kalinaw mao ang gasa sa Dios.”²

2. Presidente Joseph F. Smith (1838–1918): “May usa lamang ka butang ang makadala og kalinaw sa kalibotan. Kini mao ang pagsagop sa ebanghelyo ni Jesukristo, husto nga gisabot, gisunod ug managsama nga gibuhat sa mga tigmando ug sa mga tawo. … Sulod sa daghang mga tuig gituohan kini nga ang kalinaw moabot lamang pinaagi sa pagpangandam sa gubat. … Ang kalinaw moabot lamang pinaagi sa pagpangandam alang sa kalinaw, pinaagi sa pagbansay sa mga tawo sa pagkamatarong ug kaangayan, ug sa pagpili ug mga tigmando kinsa nagrespeto sa matarong nga kabubut-on sa mga tawo. … Dili gayod modangat sa kalibotan kana nga espiritu sa kalinaw ug gugma nga kinahanglan nga maanaa, hangtod nga ang katawhan modawat sa kamatuoran sa Dios ug sa mensahe sa Dios ngadto kanila, ug moila sa iyang gahom ug awtoridad diin balaanon, ug dili gayod lamang makaplagan diha sa kaalam sa mga tawo.”³

3. Presidente Howard W. Hunter (1907–1995): “Ang kalinaw nga dugay nang gipangandoy sa kalibotan mao ang usa ka panahon sa napugngan nga mga kagubot; apan ang mga tawo wala makaamgo nga ang kalinaw usa ka kahimtang sa pagpakabuhi nga moabot sa tawo pinaagi lamang sa mga lagda ug mga kondisyon nga gitakda sa Dios, ug dili sa laing paagi. … Kon mosulay kita sa pagtabang niadtong nakapasilo kanato, kon mag-ampo kita alang niadtong mipahimulos kanato, ang atong kinabuhi maanindot. Makabaton kita og kalinaw kon makighiusa kita sa Espiritu ug sa usag usa samtang nagserbisyo kita sa Ginoo ug nagtuman sa iyang mga sugo.”⁴

4. Presidente Thomas S. Monson (1927–2018): “Kon motambong kita sa templo, dunay moabot nato nga matang sa pagkaespirituhanon ug pagbati sa kalinaw nga molabaw pa sa bisan unsang pagbati nga moabot sa kasingkasing sa tawo. … Sa atong mga kinabuhi makabaton kita og mga tintasyon; mga pagsulay ug mga hagit. Sa atong pag-adto sa templo, sa atong paghinumdom sa mga pakigsaad nga atong gihimo didto, mas makabuntog kita niadto nga mga tintasyon ug makalahutay sa atong mga pagsulay. Sa templo makakaplag kita og kalinaw.”⁵

5. Presidente Russell M. Nelson: “Ako mopanalangin kaninyo nga kamo mapuno sa kalinaw ni Ginoong Jesukristo. Ang Iyang kalinaw dili matugkad sa tawo. Ako mopanalangin kaninyo og dugang nga tinguha ug abilidad sa pagsunod sa mga balaod sa Dios. Ako mosaad nga kon buhaton ninyo, kamo mabubu-an og mga panalangin, lakip ang dugang kaisog, dugang nga personal nga pagpadayag, mas nindot nga panag-uyon sa inyong mga panimalay, ug hingpit nga kalipay bisan taliwala sa walay kasiguroan.”⁶

6. Presidente M. Russell Ballard, Akting nga Presidente sa Korum sa Napulog Duha ka Apostoles: “Ang walay kataposan nga kalinaw nga gisaad ni Jesus mao ang kalinaw sa kahiladman, namugna tungod sa hugot nga pagtuo, nakabase sa pagpamatuod, giamumahan sa gugma, ug gipahayag pinaagi sa padayon nga pagkamasulundon ug paghinulsol. Usa kini ka kalinaw sa espiritu nga nakaimpluwensya sa kasingkasing ug kalag. … Ang kalinaw—ang tinuod nga kalinaw— nga mabati ninyo sa tinuod nga matang sa tibuok ninyong kalag—moabot lamang diha ug pinaagi sa hugot nga pagtuo kang Ginoong Jesukristo.”⁷

7. Elder Quentin L. Cook sa Korum sa Napulog Duha ka Apostoles: “Naglaom ug nag-ampo gayod kita alang sa kinatibuk-ang kalinaw, apan anaa sa mga indibidwal ug [mga] pamilya nga atong makab-ot ang matang sa kalinaw nga mao ang gisaad nga ganti sa pagkamatarong. Kini nga kalinaw mao ang gisaad nga gasa sa misyon ug maulaong sakripisyo sa Manluluwas. … Ang pagpaubos sa atong kaugalingon sa atubangan sa Dios, pag-ampo kanunay, paghinulsol sa mga sala, pagpabunyag uban sa masulub-on nga kasingkasing ug mahinulsolon nga espiritu, ug pagkahimong tinuod nga [mga] disipulo ni Jesukristo mao ang [nindot kaayo nga] mga ehemplo sa pagkamatarong nga gantihan og [malungtaron nga] kalinaw.”⁸

8. Salmo 29:1–2, 11: “Ihatag ninyo sa Ginoo ang himaya ug ang kusog. Ihatag ninyo sa Ginoo ang himaya sa iyang ngalan; simbaha ninyo ang Ginoo sa katahom sa pagkabalaan. … Ang Ginoo maghatag unta ug kusog sa iyang katawhan! Ang Ginoo magpanalangin unta ug kalinaw ngadto sa iyang katawhan!”

9. Salmo 119:165: “Ang mga nahigugma sa imong Balaod adunay dakong kalinaw; walay makapapandol kanila.”

10. Mga Panultihon 16:3, 7: “Itugyan ang imong mga buhat ngadto sa Ginoo, ug ang imong mga laraw malig-on. … Kon ang mga pamaagi sa usa ka tawo makapahimuot sa Ginoo, iyang himoon bisan ang iyang mga kaaway nga makigdait kaniya.”

11. Isaias 32:17: “Ug ang sangpotanan sa pagkamatarong mao ang pakigdait, ug ang sangpotanan sa pagkamatarong kalinaw ug pagsalig hangtod sa kahangtoran.”

12. 1 Corinto 14:33: “Kay ang Dios dili Dios sa kasamok, kondili sa kalinaw.”

13. Mga Taga-Filipos 4:1, 2, 4, 6–7: “Barog kamo nga lig-on diha sa Ginoo. … Magkauyon diha sa Ginoo. … Paglipay kamo kanunay diha sa Ginoo: usbon nako pag-ingon, paglipay kamo. … Sa tanang butang ipahibalo ninyo sa Dios ang inyong mga hangyo pinaagi sa pag-ampo ug sa pagpangamuyo uban ang pagpasalamat. Ug ang kalinaw sa Dios nga milapaw sa tanang pagpanabot, magbantay sa inyong mga kasingkasing ug sa inyong mga hunahuna diha kang Kristo Jesus.”

14. 1 Nephi 20:18: “O nga kamo nga nagpatalinghog ngadto sa akong mga sugo—niana ang inyong kalinaw maingon sa usa ka suba.”

15. Doktrina ug mga Pakigsaad 59:23: “Hibaloi nga siya kinsa nagbuhat og mga buluhaton sa pagkamatarong makadawat sa iyang ganti, gani ang kalinaw niini nga kalibotan, ug kinabuhi nga dayon diha sa kalibotan nga umaabot.” (Tan-awa ang nahibilin sa Seksiyon 59 alang sa daghang paagi nga kita makahimo sa “mga buluhaton sa pagkamatarong.”)

“Kalinaw Kang Kristo”⁹

Sulod sa liboan ka tuig, gikan sa wala pa matawo si Kristo hangtod karon samtang nagpaabot kita sa Iyang ikaduhang pag-anhi, ang matag saad sa kalinaw nga gihatag sa pinili nga mga propeta ug apostoles sa Manluluwas naghisgot bahin Kaniya. Samtang ang kinabuhi kanunayng adunay mga pagsulay ug mga hagit, kita mapanalanginan og walay kataposan nga kalinaw sulod sa atong mga kasingkasing taliwala sa atong mga pagsulay kon atong ipunting ang atong mga kasingkasing ug mga hunahuna ngadto kang Kristo ug mosunod sa Iyang mga sugo diha sa pagkamatarong. Kining mahinungdanon nga saad sa kalinaw misustener sa mga sumusunod ni Kristo sa tibuok kasaysayan, ug kini makasustener usab nato, kon ato kining tugotan. “Si Jesukristo mao sa gihapon kagahapon ug karon ug hangtod sa kahangtoran” (Mga Hebreohanon 13:8), ug ang matag saad sa kalinaw nga Iyang gihatag kanato, bisan kon sa milabay kini nga tuig o usa ka libo ka tuig kaniadto, nagpabilin gihapon nga tinuod karon.

Unsa Kaha Kon Naningkamot Ko og Maayo ug Wala Gihapon Mobati og Kalinaw?

Si Elder Jeffrey R. Holland sa Korum sa Napulog Duha ka Apostoles mitudlo kausa: “Sa bisan unsang rason … ang kinabuhi adunay mga higayon niini sa dihang ang kanunay nga kalinaw ingon og molikay kanato sulod sa usa ka panahon. Tingali maghunahuna kita kon nganong adunay ingon niana nga mga panahon sa kinabuhi, ilabi na sa dihang tingali mas naningkamot gayod kita kay sa atong nasulayan nga magpakabuhi nga takos sa mga panalangin sa Dios ug makakuha sa Iyang tabang. Kon moabot ang mga problema o mga kasubo o mga kaguol ug kini ingon og dili nato sala, unsa man ang atong buhaton sa wala gihangop nga pagpakita niini?” Basaha ang unsay iyang gitudlo mahitungod kon unsaon sa pagpadayon niini nga sitwasyon diha sa iyang pakigpulong nga “‘The Peaceable Things of the Kingdom,’” (Ensign, Nob. 1996, 82).

Mubo nga mga Sulat

1. “Ang Kalinaw Asa Ko Pangitaa,” Mga Himno, nu. 75.

2. Mga Pagtulon-an sa mga Presidente sa Simbahan: John Taylor (2001), 183–85.

3. Mga Pagtulon-an sa mga Presidente sa Simbahan: Joseph F. Smith (1998), 484–85.

4. Mga Pagtulon-an sa mga Presidente sa Simbahan: Howard W. Hunter (2015), 60–61.

5. Thomas S. Monson, “Ang mga Panalangin sa Templo,” Liahona, Mayo 2015, 92–93.

6. Russell M. Nelson, “Ipatigbabaw ang Dios Labaw sa Tanan,” Liahona, Nob. 2020, 119.

7. M. Russell Ballard, “The Peaceable Things of the Kingdom,” Ensign, Mayo 2002, 87, 88.

8. Quentin L. Cook, “Personal nga Kalinaw: Ang Ganti sa Pagkamatarong,” Liahona, Mayo 2013, 33, 34.

9. Nik Day, “Kalinaw kang Kristo,” 2018 Tema nga Kanta sa Mutual, Liahona, Ene. 2018, 54–55.