Digital Lamang
Pagkaplag og Kadangpan atol sa Natural nga mga Katalagman
Agig tubag sa grabe nga natural nga mga katalagman sa ilang natawhang mga nasod, ang mga Santos sa Ulahing mga Adlaw mipakita kon sa unsang paagi ang pagbarog dayon pinaagi ni Jesukristo makahatag og kalinaw sa mga panahon sa kalisdanan.
Ang Manluluwas nanagna nga sa ulahing mga adlaw “may mga kagutom, ug mga linog sa tanang dapit” (Mateo 24:7). Kita nakakita niining mga panagna nga nahitabo sa atong palibot nga nagkadaghan sa matag tuig inubanan sa natural nga mga katalagman nga nahitabo sa tibuok kalibotan.
Daghang matinud-anong mga miyembro sa Simbahan ang nakatagamtam sa mga epekto sa makaguba nga puwersa sa kinaiyahan. Apan ang ilang pagbarog ug hugot nga pagtuo makapaubsanon ug makapadasig samtang sila “naghulat sa Ginoo” (Isaias 40:31) ug nagsalig sa Iyang gisaad nga mga panalangin.
Agig tubag sa grabe nga natural nga mga katalagman sa ilang natawhang mga nasod, ang mga Santos sa Ulahing mga Adlaw mipakita kon sa unsang paagi ang pagbarog dayon pinaagi ni Jesukristo makahatag og kalinaw sa mga panahon sa kalisdanan.
Naghuwat uban sa Hugot nga Pagtuo
Niadtong Nobyembre 2020, ang Bagyong Eta ug Iota mihasi sa pipila ka nasod sa Central Amerika. Ang pagkagun-ob hinungdan sa mga unos makapaluya. Isip Presidente sa Area sa Central America Area, si Elder Brian K. Taylor sa Seventy nakadawat og dili makalimtan nga mensahe sa text gikan sa usa ka presidente sa stake didto sa Honduras. Ang pamilya sa presidente sa stake nagpuyo sa temporaryo nga kapuy-an human ang unos mipwersa kanila sa pagbiya sa ilang panimalay; sa iyang mensahe sa text mabasa: “Kami mopadayon uban sa samang hugot nga pagtuo ug manghinaot nga kami makabangon nga mas lig-on pa gikan niini nga kasinatian: mas mapainubsanon, mas matinabangon — ug andam nga motugyan ngadto sa bisan unsang pagbuot sa Ginoo nga angay.”1
Sayon ra ang mawad-an og kadasig ug mobati nga wala nay paglaom niining bag-ong “panahon sa kalisdanan” (Nahum 1:7). Apan kami wala mag-inusara sa among mga panglimbasog ug mga pag-antos. Ang tubag sa Langitnong Amahan ngadto sa desperado nga pangamuyo ni Joseph Smith gikan sa pag-antos sa Bilanggoan sa Liberty ingon ra ka mapuslanon ngari kanato: “Kalinaw nganha sa imong kalag; ang imong kalisdanan ug ang imong mga kasakitan sulod lamang sa mubo nga higayon; Ug unya, kon ikaw molahutay pag-ayo, ang Dios mobayaw kanimo sa kahitas-an” (Doktrina ug mga Pakigsaad 121:7–8).
Ang Ginoo nagsaad kanato nga Siya mohimo sa tanang mga butang nga matarong kon kita molahutay diha sa atong mga kalisdanan uban sa hugot nga pagtuo. Si Elder Jeffrey R. Holland sa Korum sa Napulog Duha ka Apostoles nagtudlo:
“Busa samtang magtrabaho kita ug magpaabot sa mga tubag sa pipila sa atong mga pag-ampo, akong ihalad kaninyo ang akong apostolikanhong saad nga kini gidungog ug gitubag, apan tingali dili sa panahon o sa paagi nga atong gusto. Apan kanunay kini nga gitubag sa panahon ug sa paagi nga kini tubagon sa usa nga nasayod sa tanan ug walay paglurang nga maloloy-ong ginikanan.”2
Salamat sa plano sa kalipay sa Langitnong Amahan, kita makahinumdom nga “may kalinaw kang Kristo Jesus.”3
Pagserbisyo sa Uban
Isip usa ka presidente sa Relief Society sa stake sa Japan, si Sister Junko Yoshida nakigtambayayong sa mga miyembro sa iyang Relief Society sa stake aron pagkolekta og 1,000 ka tualya alang sa mga residente nga naapektohan sa grabing pagbaha sa sayong bahin sa Hulyo 2020. Si Sister Yoshida miingon: “Gusto kong makatabang sa mga tawo. … Diha-diha dayon ako [nagtrabaho]. … [Kami adunay] mga 1,000 ka tualya ug mga nuog nga napundok sa mubong panahon sa mga upat ka adlaw.”4
Susamang Kristohanong serbisyo ang gipakita niadtong Disyembre 2021, sa dihang ang grabeng buhawi miguba latas sa tunga-tungang bahin sa kasadpan sa Estados Unidos, nagbilin og daghan nga walay kapoy-an ug napulo ka liboan ka mga tawo nga walay kuryente. Imbis motugot sa pagkagumon sa ilang panimalay nga mopaluya kanila, ang mga miyembro sa tanang estado nga naapektohan mitrabaho sa pagserbisyo ug pagtabang sa ilang mga komunidad. Si Kevin D. Releford, usa ka presidente sa stake sa Hendersonville, Tennessee, miingon nga siya “hingpit nga nahingangha sa maloloy-on, Kristohanong serbisyo nga gipakita sa atong mga miyembro alang sa usag usa, alang sa ilang mga silingan. … Ang mga miyembro migakos sa ilang mga [silingan] ug misiguro nga sila adunay dapit nga kapuy-an ug gisuportahan ang ilang gikinahanglan.”5
Si Elder Moises Villanueva sa Seventy nagtudlo: “Gipakita ni Jesukristo kanato nga sa panahon sa pagsulay ug kalisdanan, kita makahibalo sa mga kalisod sa uban. Tungod sa kaluoy, kita makatabang ug makabayaw kanila. Ug kon atong buhaton, kita usab mabayaw tungod sa atong Kristohanon nga pagserbisyo. Si Presidente Gordon B. Hinckley mipahayag: ‘Ang labing maayo nga tambal nga akong nasayran alang sa kabalaka mao ang pagtrabaho. Ang labing maayo nga medisina sa pagkawala sa paglaom mao ang pagserbisyo. Ang labing maayo nga tambal alang sa kakapoy mao ang hagit sa pagtabang sa usa ka tawo kinsa mas gikapoy.’”6
Pagkaplag og Kalinaw
Kini nga mga istorya mao ang dagkong mga ehemplo kabahin kon sa unsang paagi ang pagsentro sa atong mga kinabuhi diha sa Manluluwas makatabang kanato dili lang sa pagkaplag og kalinaw sa mga panahon sa kalisdanan apan makatugot usab kanato nga mahimong tinubdan sa kalinaw ngadto sa uban.
Ang Manluluwas miingon, “Ang kalinaw ibilin ko kaninyo. Ang akong kalinaw nga dili sama sa ikahatag sa kalibotan ihatag ko kaninyo. Ayaw kamog kabalaka ug ayaw kahadlok” (Juan 14:27).
Si Jesukristo, ang Prinsipe sa Kalinaw, nakaila kanato. Kita makasalig Kaniya sa paghimo sa atong mga palas-anon nga mogaan (tan-awa sa Mateo 11:28–30). Ang mga unos nga atong giatubang niini nga kinabuhi maliteral man o simbolikanhon, “ang Manluluwas makahatag og panalipod ug kalinaw sa paggiya kaninyo sa kataposan ngadto sa luwas ug kapasilongan sa mga unos sa kinabuhi.”7