“Kalamposan sa Pagpaambit sa Ebanghelyo,” Liahona, Okt. 2022.
Kalamposan sa Pagpaambit sa Ebanghelyo
Ang misyonaryo nga buhat mahimong sama ka yano sa “paghigugma, pagpaambit, pagdapit.”
Si Eddie ug Christina (wala) nahimong mga higala ni Brent ug Jessica (tunga) ug sa ilang pamilya sa dihang mibalhin sila sa ward. Wala madugay si Brent gibunyagan ni Eddie.
Sa dihang mibalhin ang usa ka bag-o nga pamilya ngadto sa ilang ward, si Eddie ug Christina Brouse midesisyon sa pag-ila-ila kanila. Human sa simba, si Christina miduol ni Brent Vickers ug misugod og panag-istoryahanay. Wala madugay, ang uyab ni Brent, si Jessica Espinoza, miapil kanila. Tungod kay pareho silang adunay bag-ong natawo nga mga anak nga lalaki, si Christina ug Jessica nagkasuod dihadiha dayon.
Miingon si Eddie, “Si Brent mao kining taas nga lalaki nga tingali katahaan sa ubang tawo, apan nabati lang gayod nako nga buotan gayod siya nga lalaki. Nakahinumdom ko nga naghunahuna nga kini usa ka tawo nga gusto gayod nako nga mas makaila.”
Samtang ang Brouse ug ang Espinoza/Vickers nga mga pamilya nahimong mga higala, makanunayon nilang gidapit ang usag usa sa panihapon. Usa ka gabii, si Brent ug Jessica mipasabot sa kasaysayan ni Brent sa ebanghelyo. Nakadawat na si Brent og mga leksiyon sa misyonaryo pipila ka tuig na ang milabay tungod miyembro na sa Simbahan si Jessica, ug bisan og ganahan siya sa pagpakigtagbo sa mga elder, mihukom siya nga dili magpabunyag niadtong panahona.
Uban sa pagdasig ni Jessica ug sa pamilya Brouse, mihukom si Brent sa pagpakigtagbo pag-usab sa mga misyonaryo. Nasabtan niya og maayo ang mga leksiyon sa misyonaryo nga siya ug si Jessica mihukom nga gikinahanglan nilang maminyo. Misuporta gayod ang pamilya Brouse niini nga desisyon ug mipadayon sa pagsuporta ni Brent samtang nakigtagbo siya sa mga misyonaryo. Si Brent ug Jessica gikasal niadtong Hulyo 2019 pinaagi sa ilang bishop, si Eddie Brouse.
Mihimo og mga panagana sa kasegurohan atol sa COVID-19 nga pandemya, ang mga pamilya nagkatagbo pag-usab. Gisulti ni Jessica ngadto sa mga Brouse nga gihunahuna ni Brent nga andam na siya nga magpabunyag. Ang pahiyom ni Brent mikompirmar niini nga pamahayag.
Miingon si Christina, “Gitawagan namo dayon ang sister nga mga misyonaryo ug gisultihan sila nga si Brent gusto nga magpabunyag. Miyerkules kadto, ug pagka Sabado, nabunyagan siya.”
Mipadayon siya, “Sa adlaw sa iyang bunyag, gigakos kami og maayo ni Brent. Nakahinumdom ko nga nahimong mapasalamaton kaayo nga gitugotan nila kami nga mahimong kabahin niining panaw uban sa ilang pamilya.”
Wala madugay human nga nabunyagan si Brent, si Jessica mipahayag og interes nga moadto sa templo. Human sa pagpakig-istorya sa mga lider sa ward ug sa pag-apil sa klase sa pagpangandam alang sa templo diha sa ilang ward, nadawat ni Jessica ang iyang pagtuga diha sa Orlando Florida Temple human gilibkas ang mga restriksiyon sa COVID-19.
Nabag-o [renew] usab sa mga ginikanan ni Jessica ang ilang mga rekomend sa templo ug nakakuyog ni Jessica diha sa templo. Ang magulang nga anak nga lalaki ni Jessica ug Brent nga si Eli nakadawat usab sa Aaronic nga Pagkapari.
Samtang nagsugod si Brent sa pagkuha og mga leksiyon alang sa bag-ong miyembro ug miapil sa buhat sa family history, nakaplagan niya ang mga ngalan sa mga sakop sa iyang pamilya nga pagadad-on ngadto sa templo. Bag-ohay lang mitaliwan ang amahan ni Brent, mao nga nangandam si Brent sa paghimo sa buhat sa templo alang sa iyang amahan.
Giandam ni Jessica ang buhat sa family history alang sa iyang tinuod [biological] nga amahan ug sa ubang mga sakop sa pamilya aron maseguro nga madawat nila ang ilang mga ordinansa sa templo. Ang anak nga lalaki ni Jessica nga si Eli nahimong puli [proxy] alang sa bunyag sa iyang lolo.
Ang pamilya Brouse nagpakita og ehemplo kon unsa ka natural ang pagpaambit sa ebanghelyo. Ang anak nga babaye sa mga Brouse nga si Abbie miingon, “Ang pagpakighigala una kanila mao ang nakatabang kanamo sa pagpaambit sa ebanghelyo ngadto kanila.” Miuyon si Christina, “Ang pagpakig-istorya kanila mahitungod sa ebanghelyo sayon kaayo tungod kay gihigugma gayod namo sila, ug kami walay laing butang nga gusto alang kanila kay sa makita sila nga magkaduol ngadto sa Ginoo.”