Digital Lamang: Mga Young Adult
Adunay mga Pangutana? Ania ang 5 ka Kamatuoran nga Ipabilin sa Hunahuna
Ako adunay daghang pangutana sa dihang ako mipasakop sa Simbahan, apan akong nakat-onan kon unsa ang buhaton aron makaplagan ang mga tubag.
Didto sa Japan, nagdako ko nga nagkat-on kabahin sa mga butang nga dili nako masabtan. Busa, sa wala pa ko miapil sa Simbahan, Ako adunay mga pangutana kabahin sa uniberso ug sa katuyoan sa kinabuhi.
Sa dihang misugod ko sa pagdawat og mga leksiyon gikan sa mga misyonaryo, mibati ko nga nabug-atan tungod sa mga pangutana. Akong gipasabot nga ako nangita sa mga tubag gikan sa daghang nagkalain-laing tinubdan apan wala gayod mibati nga nahimutang sa unsay akong nakaplagan. Gitudloan ako nila nga ako sa kanunay makasalig sa Ginoo sa paggiya nako ngadto sa kamatuoran.
Sukad niadto, kanunay na kong makapangita og mga tubag gikan Kaniya ug mosunod sa Espiritu aron sa pagpadayon nga mapalawman ang akong pagpamatuod.
Ania ang lima ka kamatuoran nga akong nakat-onan kabahin sa pagbaton og mga pangutana:
1. Ok ra nga Adunay mga Pangutana
Ang mga pangutana daw makahahadlok, apan ang Langitnong Amahan gusto nga kita mangutana nga may hugot nga pagtuo aron kita makadugang sa atong hugot nga pagtuo diha ni Jesukristo. Kita makatan-aw sa mga ehemplo sa mga propeta nga nangutana og matarong nga mga pangutana sama ni Nephi (tan-awa sa 1 Nephi 17–18), ang igsoong lalaki ni Jared (tan-awa sa Ether 2–3), ug ilabi na ni Joseph Smith, kansang yano nga pangutana migiya kaniya ngadto sa Pagpahiuli sa ebanghelyo (tan-awa sa Joseph Smith—Kasaysayan 1:5–13).
2. Ang Dios Nasayod sa Tanan
Sa dihang ako nagbasa sa 2 Nephi sa unang higayon, nakaamgo ko nga bisan si Nephi adunay mga pangutana. Apan siya mibutang sa iyang pagsalig diha sa Ginoo kay sa “gahom sa tawo” (2 Nephi 4:34). Busa, sa dihang ako adunay mga pangutana, ako misalig usab sa Ginoo. Sinsero ko nga nag-ampo, nagsiksik sa mga kasulatan, ug nagtuon sa mga pulong sa mga propeta aron mapaduol ngadto Kaniya ug mosalig sa Iyang tukmang panahon sa dili pa ang bisan unsang butang.
Ang mga tubag sa kalibotan tingali ingon kasayon pangitaon, apan ang Dios mao ang tinuod nga tinubdan sa kamatuoran ug kahibalo. Ug kita adunay makanunayon nga agianan ngadto Kaniya aron mogiya kanato ngadto sa kamatuoran—pagkanindot nga panalangin niana!
Sama sa gitudlo ni Presidente Russell M. Nelson, “Maka-ampo kita sa atong Langitnong Amahan ug makadawat og giya ug direksyon, mapahimangnoan mahitungod sa mga kakuyaw ug sa mga makabalda, ug makabuhat og mga butang nga dili gayod nato mahimo kon kita lang.”1
3. Kita Nagkinahanglan og Inadlaw-adlaw nga mga Kasinatian uban sa Ginoo
Adunay mga higayon nga natintal ko sa pagpahilayo gikan sa Langitnong Amahan sa dihang ako naminaw ngadto sa mga opinyon sa kalibotan, ilabi na niadtong anaa sa social media. Ang kaaway nagbuhat sa tanan niyang mahimo sa pagpahilayo kanato gikan sa kamatuoran. Ug kasagaran siya mopresentar kanato sa katunga nga mga kamatuoran ug mga ideya nga ingon og dili makadaot ug makapadani.
Apan si Presidente Nelson nagtudlo usab nga “ang pangontra sa plano ni Satanas klaro: nga kita nagkinahanglan og inadlaw nga mga kasinatian sa pagsimba sa Ginoo ug pagtuon sa Iyang ebanghelyo. … Hatagi Siya og patas nga bahin sa inyong panahon. Kon inyo kining buhaton, panid-i kon unsay mahitabo sa inyong positibo nga esprituhanong paglambo.”2
Ang paggahin og panahon alang Kaniya sa matag adlaw makatabang kanato nga makaila tali sa tingog sa kaaway ug sa tingog sa Ginoo.
4. Ang Pagtuman sa mga Pakigsaad Nagdapit sa Gahom sa Dios
Makatintal gayod kini nga tugotan ang atong mga pangutana nga mopatigbabaw sa atong hugot nga pagtuo ug paglaom diha ni Jesukristo. Ang kalibotan gani mohimo og ideya sa paglapas sa atong mga pakigsaad nga makapaagni. Apan ako mopamatuod nga pinaagi sa pagsunod sa mga pulong sa mga propeta ug sa pagtuman sa akong mga pakigsaad, ako nakahimo sa pagbaton og mahangturon nga panglantaw nga nakatabang nako sa pagbati og dugang nga kalinaw ug hingpit nga kalipay sukad masukad, bisan kon wala ang tanang mga tubag. Nasayod ko nga, sama sa gitudlo ni Presidente Nelson, “ang mga ordinansa ug mga pagkigsaad maghatag kanato og akses sa diosnon nga gahom,”3 ug akong nabati kana nga gahom sa pagkaplag ug pagtuo sa kamatuoran pinaagi sa pagtuman sa akong mga pakigsaad.
5. Kita Makapili nga Motuo
Kon kamo nag-atubang og mga pangutana nga walay mga tubag, hunahunaa kon unsay inyong nahibaloan. Hinumdomi nga ang Langitnong Amahan nagauban kaninyo bisan kon kamo dili makapangita dayon og mga tubag.
Ako nasayod kon unsa ang bation nianang adunay pangutana nga wala matubag ug mag-atubang og mga tintasyon gikan sa kalibotan. Apan kita adunay mahinungdanon ug makapaawhag nga gasa sa Espiritu Santo. Ang pagsunod sa Espiritu dili kanunayng nagpasabot nga kita makakaplag dayon sa mga tubag, apan kini nagpasabot nga kita kanunayng magiyahan sa kamatuoran. Samtang ako magtinguha sa Langitnong Amahan ug ni Jesukristo, ako mobati og kalipay ug kalig-on gikan sa Espiritu sa matag adlaw aron sa pagpadayon sa unahan uban sa hugot nga pagtuo. Nakahinumdom ko nga bisan pa man sa atong mga panglimbasog, kita kanunayng makabaton og gahom nga “makapili nga motuo.”4
Mapasalamaton kaayo ko sa akong kahibalo sa ebanghelyo ug alang sa mga pangutana nga nakatugot nako sa pag-amuma ug pagpalambo sa akong pagpamatuod ni Jesukristo.