Digital Lamang: Mga Amahan sa Ulahing mga Adlaw
Pagbuntog sa Kahadlok nga Mahimong usa ka Ginikanan
Ang talagsaong mga panalangin miabot sa dihang ako mipili sa pagtutok sa mga kalipay sa pagka-amahan.
Ang tagsulat nagpuyo sa Idaho, USA.
Wala ko kahibalo unsa ang lauman sa dihang si Susie, ang akong asawa, gikulbaan nga mitawag nako ngadto sa banyo usa ka gabii. Bag-o pa lang kaming naminyo, nagpuyo mi sa balay sa akong ugangan nga walay abang, ug kaming duha nagtrabaho aron makatigom og kwarta alang sa kolehiyo.
Mao nga sa dihang ang akong asawa misulti nako nga mabdos siya, ako nakuratan. Kini ingon og sayo pa kaayo alang kanamo nga makabaton og usa ka batang masuso. Mibati kami nga dili gayod andam. Nianang higayona, nasayod ko nga ako nagkinahanglan nga motubag sa responsibilidad alang sa usa ka batang masuso. Busa akong gitutokan ang usa ka pagbati nga maoy labing positibo: ang akong paghinamhinam sa ideya nga mahimong usa ka amahan.
Usa ka Pag-usab sa Panglantaw
Ako kanunayng nahasol sa paagi nga ang pagka-amahan—ug pagkaginikanan sa kinatibuk-an—nga kanunayng gipakita diha sa media. Ang mga amahan ingon og wala makahibalo sa mga panginahanglan ug mga pagbati sa ilang asawa ug mga anak. Sila gipakita isip dili sarang sa pag-amuma alang sa uban ug gani sa ilang kaugalingon. Dugang pa, ang pagkahimong usa ka ginikanan gihulagway diha sa media ug sa tinuod nga kinabuhi isip ang kataposan sa “kalingawan” nga hugna sa kaminyoon. Ako sa kasagaran makadungog nga ang kinabuhi mag-anam og kalisod, dili ka makatulog, wala na kay panahon sa imong kaugalingon, ug uban pa.
Ako karon nakaila na nga kining mga gipakita mao ang gamhanang mga himan ni Satanas sa pagwagtang sa atong kadasig sa pagtukod og mga pamilya. Samtang adunay mga hagit human nga makabaton og usa ka anak, aduna usab kalipay ug katumanan nga walay sama sa bisan unsa pa.
Mihukom ko sa pagsalikway sa tanang dili maayong butang nga gisulti kanako kalabot sa pagka-amahan. Hinoon, akong gihangop ang tanang positibo kabahin niini ug mapasaligon sa pagpaningkamot latas sa malisod nga mga bahin. Ang pagkaginikanan dili sayon alang sa daghang mga tao, ug ako dili mosulti ninyo nga sayon ra para nako. Ang ubang mga kinaiya sa amahan dili natural lang nga miabot. Apan sa wala pa ang matawo ang among masuso, akong gibuhat kutob sa akong mahimo aron maandam ang akong kaugalingon ug gitabangan ang akong asawa nga maandam samtang kami misugod na sa among katungdanan isip mga ginikanan.
Akong gisiksik ang mga kasulatan aron masayod kon unsaon aron maandam. Nagbasa usab ko og ubang mga libro kabahin sa pagka-amahan. Gitun-an nako kon unsaon sa pag-ilis og mga diaper. Gihimo nako ang tanang paningkamot aron makasabot ug makasimpatiya sa mga kasakit nga maagian sa akong asawa. Ug akong gihimo ang akong labing maayo aron magpabilin nga malaumon. Ang pagdangop ngadto sa Langitnong Amahan diha sa pag-ampo nakatabang nako nga mobati og kalinaw nga akong gikinahanglan aron makalatas sa kahadlok sa pagkahimong usa ka ginikanan.
Ang Gugma nga Dala sa mga Pamilya
Wala nako giisip ang akong kaugalingon nga usa ka emosyonal nga tawo, apan samtang nagtan-aw ko sa akong asawa nga naggunit sa akong masuso nga batang babaye sa adlaw nga siya natawo, nakahilak ko sa kalipay. Nianang higayona, akong naamgohan nga kining masuso nga batang babaye makauban namo hangtod sa kahangtoran, ug ako nagpasalamat sa Langitnong Amahan nga siya luwas nga ania uban kanamo.
Ang paghandom niana nga kasinatian, akong nahinumdoman ang usa ka video kabahin sa mga pamilya nga kanunay nakong gipaambit atol sa akong misyon. Ang video nga, “Earthly Father, Heavenly Father,” mipakita og usa ka amahan nga nagbuhat sa iyang inadlaw-adlaw nga buluhaton. Ang nakapahimo sa video nga hilabihan ka espirituhanon alang kanako mao kon sa unsang paagi kini may kalabotan sa inadlaw adlaw nga buluhaton sa pamilya ngadto sa among relasyon uban sa among Langitnong Amahan. Kini gitapos uban niining pamahayag: “Sa tanan nga mga titulo sa pagtahod ug pasidungog ug pagdayeg nga gihatag sa Makagagahom, Siya naghangyo kanato sa pagtawag Kaniya isip Amahan.”1
Kana nga kinutlo mas makahuluganon pa ngari nako nianang ako usa na gayod ka amahan. Sa una, yano lang ni nakong gihunahuna isip usa ka relasyon tali sa Dios ug nako; Siya nagpakabana kanako ug naggiya nako sa matag adlaw isip akong Amahan sa Langit. Apan isip usa ka amahan mismo ug mibati ang dili mahulagway nga gugma nga anaa kanako alang sa akong anak nga babaye nakapahimo nako nga nakaamgo og dugang pa kon unsa ka dako nga gugma ang anaa sa akong Langitnong Amahan alang kanako. Ang ebanghelyo mao ang modelo alang sa mga pamilya, ug sa higayon nga kita makabaton og usa ka pamilya nga atong kaugalingon, kita mas makasabot pa sa gugma nga ang Langitnong Amahan aduna alang kanato diha sa atong kaugalingong mga kinabuhi.
Magpadayon sa Unahan
Karon ang akong anak nga babaye nag-edad na og kapin sa tuig ug paspas nga mitubo. Isip usa ka amahan nakapalambo usab nako, sa mga paagi nga wala gani ko makahibalo nga posible. Ang pagka-amahan nakahatag kanako og dugang kalipay kay sa bisan unsang gidaghanon sa libreng panahon ug katulog nga akong maangkon sa laing paagi. Bisan pa man sa pagbati nga dili andam sa pagka-amahan, ang gugma sa Langitnong Amahan nagdasig kanako sa pagpangandam kutob sa akong mahimo. Kana nga gugma nakapahimo nako nga magpadayon. Sama sa gisulti diha sa Lucas 12:31, “Unaha hinuon pagpahari ang Dios diha sa inyong kinabuhi ug magsangkap siya kaninyo niining mga butanga.” Akong gitinguha nga unahon sa pagbuhat ang tanang butang nga makaandam nako sa pagkahimong usa ka ginikanan, ug dayon miabot ang kalinaw ug kalipay nga dala sa pagka-amahan. Ang negatibo dili gayod molabaw sa mga positibo sa maong balaan nga katungdanan. Ang pagka-amahan angayng hangopon ug tagamtamon, ug kana ang labing talagsaon nga leksiyon nga akong nakat-onan ug padayon nga makat-onan niining katungdanan isip usa ka amahan.