“Te Tau Lava ʻo ʻIlo ha Ngaahi Founga Fakaʻaho ke tau ʻOfa, Vahevahe, mo Fakaafe Ai,” Liahona, Tīsema 2022.
Ngaahi Tefitoʻi Moʻoni ʻo e Ngāue Fakaetauhí
Te Tau Lava ʻo ʻIlo ha Ngaahi Founga Fakaʻaho ke tau ʻOfa, Vahevahe, mo Fakaafe Ai
ʻE lava ke hoko e ngāue fakaetauhí ko ha meʻa angamaheni kiate kitautolu, kae ʻikai ko ha ngāue pē ke fakahoko.
Naʻe toki vahe ʻa Kali (naʻe liliu e ngaahi hingoá) ke ngāue fakaetauhi kia Kasi. ʻI he feinga ʻa Kali ke maʻu ha meʻa ʻokú na tatau ai mo Kasí, naʻá ne ʻilo ʻokú na fakatou manako ʻi he faʻu tohí. Ko ia naʻe fakaafeʻi ia ʻe Kali ke na ʻalu ki he fakataha ʻa ha kulupu faʻu tohi fakalotofonua. ʻI he ikuʻangá, naʻe ʻikai ha taha ʻiate kinaua naʻá ne maʻu ha taimi ki he kulupú, ka naʻe iku ʻa e fakaafé ki ha fepōtalanoaʻaki lelei, ʻa ia naʻe iku ki haʻana maʻu meʻatokoni hoʻatā fakataha ʻi ha ngaahi uike ʻe niʻihi—ʻa ia naʻe tokoni ke faʻu ai ha vā fakakaumeʻa ʻe lava ke fakafalala ki ai ʻa Kasi ʻi heʻene fiemaʻu tokoni ʻamui angé.
ʻI he ngāue fakaetauhi ʻa Kali mo hono uaifi ko Sulí, ne na fekumi ki ha potupotutatau ʻi he ngāue fakaetauhi fakahangatonu mo ʻikai fakahangatonú. ʻOku ʻi ai ha ngaahi taimi ʻe niʻihi ʻokú na palaniʻi ai ʻi he faʻa lotu ha meʻa ʻe fakataumuʻa ke poupouʻi e fakalakalaka ʻa e niʻihi kehé ʻi he hala ʻo e fuakavá. Ka kuó na feinga foki ke hoko ʻa e ngāue fakaetauhí ko ha konga angamaheni mo fakanatula ʻo ʻena moʻui fakaʻahó.
ʻI he taimi naʻe tali ai ʻe Suli ha ngāue ke ʻalu ʻi ha pongipongi ʻe taha ki ha ngāue tokoni ʻi ha fale ngaohiʻanga meʻakai ʻa e Siasí, naʻá ne fakakaukau ke fakaafeʻi ʻa Sona ke na ō. Kuo tātātaha pē ha maʻulotu ʻa Sona lolotonga e ngaahi taʻu ʻo ʻene hiki mai ki honau feituʻú. Naʻe maʻu ʻe Suli mo Sona ha taimi fakafiefia ʻi heʻena ngāue fakataha ʻi he fale ngaohiʻanga meʻakaí. Ne ʻikai fuoloa mei ai, kuo palani ʻe Suli mo Kali ha pō vaʻinga ki he efiafi fakafāmilí. Ne na fakakaukau ke fakaafeʻi e fāmili ʻo Sōná ke nau kau fakataha. Koeʻuhí naʻe fakakaukau ʻa Suli ke fakakau ʻa Sona ʻi he ngaahi ʻekitivitī ko ʻeni naʻá ne ʻosi palaní, naʻe fakatupulaki ai ʻe he ongo meʻá ni ha vā fetuʻutaki naʻe loloto angé. Kimui ange ai, ʻi he fehangahangai ʻa Sona mo ha ngaahi faingataʻá, naʻá ne fetuʻutaki ki he husepāniti ʻo Suli ko Kalí, ke maʻu ha tāpuaki lakanga fakataulaʻeiki.
ʻE lava ke hoko e ngāue fakaetauhi ʻoku ʻuhingamālié ʻi he taimi ʻoku tau maʻu ai ha ngaahi founga faingofua ke fakahaaʻi ai ʻetau ʻofá, vahevahe ʻetau tui kia Sīsū Kalaisí mo fakaafeʻi e niʻihi kehé ke haʻu kiate Ia pea kau fakataha mo kitautolu—ʻo aʻu ki he ngaahi meʻa ne tau mei fakahoko pē ʻe kitautolú.
Faitaaʻi ʻe Monica Georgina Alvarado Zarate
Konga ʻo ʻEtau Moʻui Fakaʻahó
Naʻe tokoniʻi ʻe he palōfita ko Sakalaiá hono kakaí ke nau ʻilo ha ngaahi founga fakaʻaho ke fakakau ʻi heʻenau moʻuí ʻa e fakakaukau ki he ʻEikí. Lolotonga ʻene hoko ko ha takí, naʻe tohi ʻe he kakaí e ngaahi lea “Māʻoniʻoni ki he ʻEikí” ʻi he ʻū meʻa ne nau angamaheni ke mamata ki ai he lolotonga e ʻahó, ʻo hangē ko e ʻū poulú mo e fafangu ʻo e hōsí, ke fakamanatu kiate kinautolu ke nau fakakaukau kiate Ia (vakai, Sakalaia 14:20–21).
Kuo poupouʻi foki kitautolu ʻe he kau palōfita ʻo e kuonga ní ke tau kumi ha ngaahi founga fakanatula ke fakamuʻomuʻa ai e ʻOtuá ʻi heʻetau moʻuí pea ke tau ʻofa, vahevahe, mo fakaafe ʻi he sīpinga fakanatula tatau pē. Ko e fakafiemālie ange mo e fakanatula ange ʻetau fakaafe ʻofá, ko e lahi ange ia ʻetau fiemālie ʻi hono fakaaʻu ʻetau ʻofá mo e fakaafé, pea ko e lahi ange ia e fiemālie ʻa e niʻihi kehé ke maʻu kinautolú.
Ngaahi Tefitoʻi Moʻoni ke Fakakaukau Ki Aí
Ko e ngāue fakaetauhí ko ha meʻa ia ʻe lelei ki ai ʻa e palani ʻi he faʻa lotú. ʻI heʻene hoko ko ha konga ʻo ʻetau moʻuí, ʻe lava foki ke faingofua ʻa e ngāue fakaetauhí ʻo hangē ko ha fakakaukau ke fakakau mai e niʻihi kehé ʻi ha ngaahi meʻa kuo tau ʻosi fakahoko pē ʻe kitautolu. Hangē ko ʻení:
-
Kuó ke ʻosi toʻo hake hoʻo telefoní ke ke pōpoaki ki haʻo kaungāmeʻa. Fakaʻaongaʻi ha sēkoni ʻe 10 ke vakaiʻi ai ha taha ʻokú ke ngāue fakaetauhi ki ai.
-
ʻOkú ke feimeʻatokoni ʻo lahi ange ia ʻi he meʻa naʻá ke palani ke ngaohí. ʻAve ha konga ai maʻa ha taha te ne ala fiemaʻu.
-
Naʻá ke saiʻia ha meʻa ʻi hoʻo ako folofola he pongipongi ní. Vahevahe ia mo haʻo kaungāmeʻa.
-
ʻOku ʻalu ho fāmilí ki he paʻaké ʻi ha pō fakafāmilí. Fakaafeʻi ho kaungāʻapí ke mou ō.
-
Naʻe fakaafeʻi koe ke ke lea ʻi he houalotu sākalamēnití. Fakaafeʻi ha kaungā-ngāue ke haʻu ʻo fanongo ʻi hoʻo leá.
Ko e Hā Te Tau Lava ʻo Fakahokó?
Te ke fakaʻaongaʻi fēfē ha meʻa kuó ke ʻosi fai he uiké ni ke ke fakakau mai ai e niʻihi kehé?