Fakaʻilekitulōnika Pē
Ko e Ngaahi Tāpuaki Pau ʻo e Vahehongofulú
‘Oku ʻikai hangē ko e mana ‘oku tō mei he langí ʻa e ngaahi tāpuaki ʻoku ou ma‘u mei he totongi vahehongofulú, ka ʻoku ou ʻilo fakapapau ‘oku moʻoni ʻene haʻu ‘a e ngaahi tāpuakí.
‘Oku ou ongoʻi hangē ko e taimi kotoa pē ‘oku ou fanongo ai ki he ngaahi fakamoʻoni fekau‘aki mo e totongi vahehongofulú, ʻoku kau maʻu pē ai ha ngaahi aʻusia fakaofo mo mahuʻinga lahi fau.
‘Oku ou houngaʻia ‘i he ngaahi fakamoʻoni ko ‘ení, ka kuo teʻeki ke u a‘usia ha meʻa peheni kimuʻa.
Ka ʻi he taimi tatau pē, kuo teʻeki ai foki ke ofongi mālohi pehē au ʻe he Laumālie— kuo hoko maʻu pē ia kae ʻikai ke u faʻa fakatokangaʻi.
Kuó u totongi vahehongofulu ma‘u pē. Kuo te‘eki ke u fakakaukau ke taʻe totongi ia, koeʻuhí ʻi he kamatá naʻe ʻamanaki maʻu pē ki ai ʻeku ongomātu‘á, pea ʻi he‘eku ʻalu ki he kolisí koeʻuhí ne u ongo‘i ʻa e ueʻi fakalaumālie ke fakahoko iá. Pea ‘i heʻeku mali mo kamata ma‘u ha fānaú, naʻá ku hokohoko atu koe‘uhi he naʻá ku ma‘u ʻa e tui kia Sīsū Kalaisi mo ha fakamo‘oni mālohi ki he ngaahi tāpuaki ʻoku ma‘u ʻi he totongi vahehongofulu kakató.
‘I he taimi ʻoku ou totongi ai ‘eku vahehongofulú, ʻoku ola lelei e ngaahi meʻa kotoa pē. ʻOku mau maʻu maʻu pē ha me‘akai feʻunga. ‘Oku iku kiʻi maʻamaʻa ange ʻa e ngaahi koloa ʻe niʻihi ‘i he meʻa na‘á ku fakakaukau ki aí, pe ‘oku ou lava ʻo ma‘u ha ngaahi fakatau fakamaʻamaʻa pe kūponi. Ke ʻomai iá, kuo pau ke u ngāue ki ai—‘oku fie maʻu e ngāué mo e tuí. ʻOku mau tātānaki pea ʻoku mau fakapotopoto pea mau patiseti. Ka ‘i he taimi kuo lea ʻaki mo fakahoko ai ʻa e meʻa kotoa pē, ʻi he faka‘osinga ʻo e ‘ahó, ʻoku ou ‘ilo maʻu pē ʻe sai pē ʻa e ngaahi me‘a kotoa koe‘uhi he kuó u totongi ʻeku vahehongofulú mo fai ‘a e lelei taha naʻá ku lavá pea tuku hono toengá ‘i he toʻukupu ‘o e ʻOtuá.
‘I heʻeku fakakaukau atu ki he‘eku ngaahi aʻusiá mo e ʻuhinga ʻoku ou maʻu ai ha fakamo‘oni mālohi ki he vahehongofulú, ne u fakakaukau ai ki ha meʻa mahu‘inga. Kiate au, ko e ngaahi tāpuaki ‘o e vahehongofulú ʻoku ‘ikai hangē ko e mana mei he langí. ‘Oku ʻikai ke u maʻu noa pē ha ngaahi sieke pa‘anga ʻi he meilí pe meʻakai mei ha taha kuo ue‘i fakalaumālie ke ʻomi kiate au ha me‘a. ʻOku hangē ia ko e taimi na‘e fafanga ai ʻe Sīsū ‘a e toko 5,000 (vakai, Mātiu 14:14 – 21). Na‘e foaki ʻe ha tangata kei talavou e me‘akai kotoa pē naʻá ne ma‘ú. Ne tuku ʻe he Fakamoʻuí ha fakamālō ki he ‘Otuá pea hili iá ne fafanga leva ʻa e tokotaha kotoa pē, ʻaki ha foʻi mā pē ‘e nima mo ha mataʻi ika ‘e ua. Pea naʻe fakaofo ʻa e mākona ʻa e tokotaha kotoa pē, pea naʻe kei toe pē ʻa e meʻakaí.
Kuo ‘i ai ha ngaahi uike na‘á ku taʻepauʻia pe ko e hā ha meʻa te u kai koeʻuhí na‘á ku fie maʻu ke fafanga hoku fāmilí. Ka ʻi ha faʻahinga founga, ne feʻunga maʻu pē . ‘Oku ʻikai ke hā fakafokifā mai pē ‘a e meʻakaí. Ka ne u ongo‘i fiemālie pē ʻi he konga meʻakai iiki angé pea pehē ki hoku husepānití. ‘Oku ʻikai ke u ma‘u ha paʻanga lahi ange, ka ‘oku ou lava ke fakapotopotoʻi ke fuoloa ange ʻa e meʻa ʻoku mau maʻú .
‘Oku fakaofo ʻa e founga ʻoku ngāue fakataha ai ‘a e Tamai Hēvaní mo kitautolú pea mo e me‘a ʻoku tau fie ma‘ú. ʻOku kehekehe e tokotaha kotoa pē. ‘Oku kehekehe ʻa e ngaahi fiemaʻu ʻa e tokotaha kotoa pē. Pea ko ia ai ‘oku kehekehe hotau ngaahi tāpuakí. ‘Oku fakaofo ʻEne ʻafio‘i ʻetau ngaahi fiema‘ú, ʻi he fakatu‘asino mo e fakalaumālie fakatouʻosi. Kuo faitāpuekina au ʻi hono totongi ‘eku vahehongofulú. ʻOku ou fie maʻu ke ke ʻilo ia.