Fakakomipiuta Pē
Ngāue Tokoni ʻi he Huafa ʻo Sīsū Kalaisí
ʻOku nofo ʻa e tokotaha naʻá ne faʻú ʻi ʻAitahō, USA.
ʻOku ou loto ke fakafōtunga ʻe heʻeku tokoní mo e ʻofá ʻa e ʻofa mo e tokoni ʻa e Fakamoʻuí.
Ko ʻeku kui fefiné ʻa e tokotaha foaki lelei tahá. Naʻe fakakaukauʻi fakalelei ʻene ngaahi meʻaʻofá, pea ko e meʻaʻofa kotoa pē naʻá ne kofu ia ʻaki ha pepa fakaʻofoʻofa pea nonoʻo ʻaki ha līpine. Naʻe hangē ʻa e ʻalu ki hono ʻapí ʻi he pongipongi Kilisimasí ko e ʻalu ki he fale ngāue ʻa Sanitaá. Ko ʻene meʻaʻofá ʻa e meʻaʻofa naʻe ʻikai ke ke faʻa tatali ke maʻu ʻi he Kilisimasí mo e ʻaho fāʻeleʻi kotoa pē. Ka neongo ia, ʻoku ʻikai ke u manatuʻi kotoa e ngaahi meʻaʻofa naʻá ne foaki maí. Ko e meʻa naʻe makehé ko e founga naʻá ne foaki ʻakí.
ʻI he konga kimui ʻo e 2016, naʻe puke ʻa Kulenimā ʻi he kanisaá. Ko e fefine ko ʻeni naʻá ne foaki lahi ʻi he Kilisimasí, ʻe ʻi falemahaki ia ʻi he ʻaho mālōlō ʻokú ne saiʻia taha ai he taʻú. Naʻe kamata ke u hohaʻa ki ai, ko ia ne u ongoʻi ʻoku totonu ke u telefoni ki heʻeku faʻeé ʻo ʻeke ange pe te u tokoniʻi fēfē nai ʻa Kulenimā ʻi heʻene ngaahi meʻaʻofá. ʻI heʻeku ʻiloʻi ʻa Kulenimaá, te ne fakahoko fuoloa ʻene ngaahi palani ki he Kilisimasí pea te ne lotomamahi ʻaupito ka ʻikai fakahoko ia. Pea ko e moʻoní, naʻe talamai ʻe he Fineʻeikí kuo ʻosi fakatau mai ʻe Kulenimā ia ʻa e ngaahi meʻaʻofá.
Naʻe vahe mai ʻe heʻeku kuitangatá ke ma kofu mo teuteuʻi e ngaahi meʻaʻofa maʻá e makapuna ʻe toko hongofulu mā tolu mo e ngaahi mali takitaha, fakataha mo e ngaahi meʻaʻofa ki ha makapuna ua ne laka he toko uofulu mā fitú. Naʻá ku fili fakalelei ʻa e ngaahi kato meʻaʻofá, pepa moluú, mo e ngaahi silá.
Naʻá ku kumi ha kaati mei ha taʻu kimuʻa ke manatuʻi ʻena pōpoaki fakataʻú: “ʻOfa Taʻengata Atu, Kulenimā mo Kulenipā.” Naʻá ku fai hoku lelei tahá ke toe faʻu ʻena pōpoakí, ʻi hono fakangofua au ʻe Kulenimā mo Kulenipaá. Naʻá ku feinga ke kofu e meʻaʻofá hangē ko Kulenimaá. Naʻá ku fiemaʻu ke haohaoa e meʻa kotoa pē—ʻo hangē ko ia naʻá ne mei fakahokó.
ʻI he mei ʻosi hono faʻo e ngaahi meʻaʻofá, meʻa ngingilá mo e ʻū kātí, naʻe fanafana mai ʻa e Laumālié, “Ko e konga ʻeni ʻo e ʻuhinga ke toʻo kiate koe ha hingoa ʻo ha taha. Ko e konga ʻeni ʻo e ʻuhinga hono fakahoko ha meʻa ʻi ha hingoa ʻo ha taha.” ʻI heʻeku feinga ke foaki ʻo hangē ko Kulenimaá, naʻá ku toe ofi ange ai kiate ia. Naʻe kamata ke u fakakaukau lahi ange ki he ʻuhinga ʻo hono toʻo kiate kitautolu e huafa ʻo Sīsū Kalaisí.
Naʻá ku fuakava ʻi he papitaisó, ke toʻo kiate au ʻa e huafa ʻo Sīsuú pea ke “manatu maʻu ai pē kiate [Ia]” (Molonai 4:3). ʻI he uike takitaha lolotonga e sākalamēnití, ʻoku ou fakafoʻou e fuakava ko iá pea toe kamata foʻou. ʻOku ou toʻo fakataautaha ange ʻa e fakaafe ko iá he taimí ni. ʻOku mahino lelei ange kiate au ʻa e founga ʻoku kau ʻi hono toʻo kiate kitautolu e huafa ʻo Kalaisí ʻa e moʻui hangē ko Iá.
Naʻá ku ʻiloʻi ʻa e founga ʻo e foaki ʻa Kulenimaá koeʻuhí he kuo tā tuʻo lahi ʻeku maʻu ʻene ʻofá mo e faʻa fakaʻatuʻí. ʻOku ou ʻiloʻi e ʻofa mo e foaki ʻa e Tamai Hēvaní mo Sīsuú koeʻuhí ʻoku ou sio tonu maʻu pē ki Heʻena ngaahi tāpuakí ʻi heʻeku moʻuí.
ʻOku ou maʻu ʻa e ʻaloʻofa ʻa Kalaisí. ʻOku ou fie fakahoko e meʻa te Ne fakahokó. ʻOku ou fiemaʻu ke fakafōtunga Ia ʻi heʻeku moʻuí, ngāue tokoní, mo e ʻofa ʻoku ou fakahokó—ke hangē naʻe haʻu ia meiate Iá. ʻOku ou houngaʻia ne u maʻu e faingamālie ke tokoni kia Kulenimā, pea ʻi heʻeku fai iá, ne u maʻu ai ha mahino lahi ange ki he ngaahi meʻaʻofa kuo foaki mai ʻe he Fakamoʻuí kiate aú.