“Social Media: Unsa Ang Inyong Gipaambit?,” Liahona, Abr. 2023.
Mga Young Adult
Social Media: Unsa Ang Inyong Gipaambit?
Magamit nato ang social media isip usa ka pamaagi alang sa uban nga makasaksi sa hingpit nga kalipay nga moabot gikan sa ebanghelyo.
Mga paghulagway pinaagi ni David Green
Unsa ang inyong gipaambit diha sa social media? Gipaambit ba ninyo kon unsa ang naghatag kaninyo og hingpit nga kalipay? Gi-post ba ninyo ang mahitungod sa inyong mga kasinatian sa kinabuhi? Gitinguha ba ninyo ang mga like ug pagdayeg? Labing importante, gi-post ba ninyo ang mahitungod sa ebanghelyo ni Jesukristo?
Ang pagpaambit sa ebanghelyo sa akong misyon usa gayod ka magantihon nga kasinatian alang kanako nga gusto nako nga mopadayon sa paghimo niini human nga nauli ko sa Peru. Apan sa wala madugay akong naamgohan nga wala koy panahon nga akong gikinahanglan aron maabot ang tanang tawo nga akong gusto, sama sa akong gibuhat sa akong misyon.
Mao nga midangop ko sa social media.
Naghimo ko og blog aron sa pagpaambit ngadto sa uban sa akong mga kasinatian sa misyon, sa akong mga hunahuna gikan sa akong sinemana nga pagtuon sa Dali, Sunod Kanako, ug sa ubang may kalabotan sa ebanghelyo nga mga panabot. Ug samtang akong gipaambit ang akong blog, nagsugod ko nga makadawat og malumo nga mga mensahe gikan sa mga higala nga nagpasalamat kanako alang sa pagpaambit. Wala ko magdahom niana! Mao nga nakahunahuna dayon ko: “Unsa kaha kon mobuhat ko og dugang pa diha sa social media?” Ug mao kana kon sa unsang paagi nagsugod ang akong dalan sa pagmugma og plataporma sa pagpaambit sa ebanghelyo diha sa Instagram ug YouTube.
Ang Sekreto sa Misyonaryo nga Buhat sa Social Media
Ang pagpaambit sa inyong hugot nga pagtuo diha sa social media dili kinahanglang komplikado, apan usahay mahimong mahadlok kita nga mopaambit tungod kay ang social media mahimong mapuno sa panghusga, kalibotanon nga mga ideya, ug taphaw nga mga post. Usahay ingon og mabati kini nga mao ang labing menos nga dapit nga paambitan nato sa atong hugot nga pagtuo. Apan ang kamatuoran mao, tungod kay ang social media napuno sa daghan kaayong tumotumo ug mga bakak nga gikinahanglan natong ipaambit ang hingpit nga kalipay ug kalinaw ug kamatuoran nga atong madawat isip mga disipulo ni Jesukristo.
Kanunay kong mapangutana: “Ale, unsay nakapadasig nimo sa pagpaambit sa ebanghelyo pinaagi sa social media? Unsa ang sekreto sa pagpaambit niini sa natural kaayo nga paagi ug sa paglambigit niini sa inadlaw-adlaw nga kinabuhi?” Ug ang akong tubag kanunayng pareho ra: “Walay sekreto! Ang importante nga butang mao ang pagsunod sa ebanghelyo ug paghimo niini nga kabahin sa akong inadlaw-adlaw nga kinabuhi.”
Kon mas maningkamot akong mosunod sa ebanghelyo ug palawoman ang akong hugot nga pagtuo, mas modako ang akong tinguha sa pagpaambit niini sa uban. Ang nakapadasig nako sa pagpahinungod og dakong oras sa pagpaambit sa akong pagpamatuod ngadto sa uban naggikan sa espirituhanon nga mga kasinatian nga aduna ako uban sa akong Langitnong Amahan.
Pinaagi sa akong mga kasinatian, akong nakat-onan nga ang pagpaambit sa ebanghelyo mahimong ingon ka sayon sama sa pagpaambit sa atong inadlaw-adlaw nga mga kasinatian sa pagkahisakop sa panon sa Manluluwas. Wala ako kanunayng nakahibalo kon nakaapekto ba ako ni bisan kinsa sa unsay akong gipaambit, apan nasayod gayod ako nga “pinaagi sa gagmay ug yano nga mga butang ang mga dagko nga butang ipahinabo” (Alma 37:6).
Ang Pagdapit sa Manluluwas sa Pagpaambit sa Atong Hugot nga Pagtuo
Adunay mga tawo sa kalibotan nga nangita og mga pahinumdom mahitungod kon kinsa sila ug kon nganong kinahanglan silang magsige og padayon sa unahan uban sa paglaom. Ug kinsa man ang mas maayong makapaambit niini nga mga kamatuoran kay sa kanato? Isip mga sumusunod ni Kristo, nahibalo kita mahitungod sa mga saad sa Dios ug sa maanindot nga plano nga Iyang giandam alang sa Iyang mga anak. Hinumdomi, ang ubang tawo “natago gikan sa kamatuoran tungod kay sila wala masayod asa kini pangitaa” (Doktrina ug mga Pakigsaad 123:12)—ug kita makatabang kanila sa pagpangita niini.
Sama sa gisulti ni Elder Dieter F. Uchtdorf sa Korum sa Napulog Duha ka Apostoles:
“Ipaambit ang inyong mga kasinatian sa personal, diha sa social media, sa mga grupo, bisan asa.
“Usa sa kataposang mga butang nga gisulti ni Jesus sa Iyang mga disipulo mao nga kinahanglan silang moadto sa tibuok kalibotan ug ipaambit ang istorya sa nabanhaw nga Kristo. Karon malipayon usab kitang modawat nianang mahinungdanong mando.”1
Ang pagkahimong mga disipulo ni Jesukristo kinahanglang dili lang molangkob sa atong kinaiya sa tinuod nga kinabuhi apan usab diha sa social media. Kon atong ipalanog ang atong tingog sa pagpahayag sa mga kamatuoran sa ebanghelyo, atong matuman ang dako nga responsibilidad nga gisalig ni Jesukristo kanato.
Ipakita nato sa kalibotan kon giunsa nato paggahin og panahon alang sa Ginoo sa matag adlaw, giunsa nato pag-atubang ang atong mga kalisod ug mga kasub-anan, ug giunsa nato pagkaplag og kalinaw. Nasayod ko nga pinaagi sa pagpaambit sa mahinungdanon nga mga butang, mahimo kitang maayo kaayo nga mga instrumento sa mga kamot sa Dios sa pagpundok sa Israel.
Ang Langitnong Amahan nagkinahanglan kanato. Hunongon nato ang sobra nga paggamit sa atong elektronik nga mga himan nga nagpugong kanato sa pakig-istorya sa uban ug hinuon gamiton kini sa pakigkonektar sa uban. Magmahimo kitang kabahin sa Iyang buhat ug mo-post dili mahitungod sa unsa apan Kinsa ang naghatag kanato og hingpit nga kalipay—ang atong Manluluwas, si Jesukristo.